12/06/2025
أحياناً مشاكل الصمامات ممكن تعمل أعراض ألم بالصدر أو صعوبة فالتنفس .. وأهم صمام هو الصمام الميترالي ،،
الصمام الميترالي هو صمام بيربط بين الأذين الأيسر والبطين الأيسر، وبيسمح بمرور الدم من الأذين للبطين فقط.
كتير من الناس بتخلط بين ؛
إرتخاء الصمام الميترالي
وإرتجاع الصمام الميترالي
لكن فيه فرق كبير بينهم، وكل حالة ليها أسبابها ومضاعفاتها وطريقة علاجها!
🔹 ارتخاء الصمام الميترالي:
هو لما بيحصل لجزء من شرفات الصمام "ينفش" لجوه الأذين ودا يخليه مايقفلش كويس، وبالتالي يعمل خفقان (سرعة في ضربات القلب) ، نغزات في القلب، أو شعور بعدم انتظام ضربات القلب.
مضاعفات ارتخاء الصمام الميترالي:
- خفقان في القلب.
- نغزات أو وجع بسيط في الصدر.
- شعور بالدوخة أو التوتر أحيانًا.
- ممكن يتطور لارتجاع مع الوقت في بعض الحالات.
⬅️ غالبًا بيكون بسيط ومش بيحتاج علاج غير المتابعة بالأشعة.
🔸 ارتجاع الصمام الميترالي:
المشكلة هنا أكبر، وهي إن الصمام بطوله مش مجرد جزء بسيط ما بيقفلش بإحكام، وده بيخلي الدم يرجع في الاتجاه العكسي، وده بيخلي الدم فالقلب ومابيطلعش منه كله، وبالتالي بيجهد القلب مع الوقت.
مضاعفات ارتجاع الصمام الميترالي:
- ضعف عضلة القلب مع الوقت.
-زيادة الضغط الرئوي.
-جلطات القلب.
⬅️الحالات المتوسطة والشديدة بتحتاج تدخل، سواء علاج دوائي أو جراحة (إصلاح أو تغيير الصمام)، خصوصاً مع وجود أعراض وهي نفس أعراض الإرتخاء بس زيادة حبتين، وممكن توصل في بعض الحالات للإغماء أو الوفاة المفاجئة.
