06/09/2024
الخوف والقلق
الفرق بين الخوف والقلق هو إن الخوف بيكون من حاجة ملموسة فى الحاضر زى الخوف من التعابين أو الحشرات أو الضلمة، ولما الخوف بيزيد اوى بيتحول لقلق بس هنا بقى بيكون خوف من حاجة مجهولة فى المستقبل ..عشان يكون القلق ده بناء محتاج إنه يكون على شىء محدد والحاجة دى أنا أقدر أستعد ليها زى مثلا إنى هقدم محاضرة أو كلمة قدام مجموعة من الناس فأقلق إنى أتلخبط فى الكلام أو أنسى أو كده فأستعد ليه بإنى اقعد اتمرن على كل إلى هعمله فى المحاضرة دى قبلها بفترة وساعتها القلق يهدى.. إنما المشكلة بقى إن يكون عندى قلق من حاجات أنا مش عارف هى إيه، قلق من اى حاجة ممكن تحصل فى المستقبل القريب أو البعيد فبالتالي مش هقدر إنى استعد لكل حاجة ممكن تحصل فالقلق يفضل موجود ويزيد.. طيب نعمل إيه؟
القلق والخوف هم الاتنين مشاعر وزى ما قلنا قبل كده إن المشاعر دايما مقبولة واتضح فعلا إن كل ما قبلت إن عندى قلق وبطلت أتخانق معاه أو أمشى وراه كل ما القلق ده مستواه بيقل..القلق والخوف مهمين فى حياتنا طول ما هم فى مستوياتهم الطبيعية المشاكل بتحصل لما يقلوا أوى عن مستواهم أو يزيدوا أوى..قولنا كده عن فايدة الخوف والقلق فى حياتك ممكن تكون ايه؟
#الخوف #القلق
