د. دنيا عامر

13/10/2022

توعية الناس بطرق الوقاية أهم ألف مرة من الجري ورا الأدوية بعد المرض

30/04/2022

مع تغيير الجو دا ، بعض الأطفال بييجي لهم دور برد

🌡🌡 الولد سخن وبقيس له الحرارة الترمومتر اتكسر فى بؤه 🤒🤒

شكوى سمعناها كتير ..انا خايفة يكون بلع الزئبق يحصل مشكلة ..
البنت بتلعب بالترمومتر اتكسر فى الاوضة ومش لاقياه او جهاز الضغط اتكسر والزئبق وقع..

طيب الاول كدة نهدى و نطمنها زئبق الترمومتر دة اسمه elemental mercury ودة مش سام الحمد لله لانه مبيتهضمش ، نسبه امتصاصه اقل من ٠.٠١% والكمية اللى موجودة فى الترمومتر بسيطه خالص ومش بتعمل اى حاجة

نعمل ايه ؟
المهم نتطمن على فم الولد من جوة عشان الازاز ومايبقاش فيه حتت ازاز صغيرة تعوره او تعمل مشكلة

نشيل الزئبق بورقة او بقطارة و نلمه بالراحة مش بالمكنسة و نهوى المكان كويس ونسيبه متهوى فترة

لازم نفتح الشبابيك كويس ونهوى المكان كويس و ممنوع نشيله بالمكنسة لييه بقى لانه بيتبخر ..

مشكلة الزئبق كلها فى ابخرته.. ٨٠%نسبه امتصاصه بيأثر على كل حاجة

ربنا يحفظ اولادنا كلهم 🌸❤️


قولوا لنا عاوزين نتكلم عن ايه البوست الجاي 😉

27/04/2022

واحد اغم عليه قدامي ، الصح اني اعمل ايه ؟ 😳

الاغماء نتيجة عدم وصول غذاء كافي للمخ ( نقص اكسجين - نقص دم - نقص سكر ) و دا بسبب :

١. نقص كمية السوائل في الجسم

٢. التعرض لألم شديد ، المخ استجاب أنه طفى الفيشة

٣. حساسية شديدة من حاجة معينة زي بعض الأدوية

٤. مشكلة في عضلة القلب ، مش قادر يوصل دم كافي للجسم

٥. وجود عدوى شديدة منتشرة في الدم

من هنا نلاحظ أن الاغماء ممكن يكون حاجة بسيطة و ممكن يكون بسبب حاجة خطيرة
عشان كدا اول ما تلاقي حد اغم عليه ، اعمله الإسعافات الأولية اللي هنقول عليها ، لو فاق يبقى كان حاجة بسيطة و تمام ، مفقش تتصل بالاسعاف و تنقله اقرب مستشفى

١. لو في مكان خطر زي حريق أو انهيار مبنى او اي حاجة لازم تنقله مكان آمن

٢. توفر له اكسجين كويس ، تهوية كويسة ، ميبقاش تجمع بشري حواليه سادين عنه الهواء ، و لا مكان مغلق

٣. نيمه على ظهره و ارفع رجله لفوق ٤٥ درجة زي الصورة عشان تساعد وصول الدم للمخ

٤. اديله حاجة مسكرة سهلة الامتصاص تحت لسانه ( حتى لو نص معلقة سكر ، أو عصير بالنقطة )
بلاش حاجة كبيرة أو يشرب عشان ميحصلش شرقة و الموضوع يكون أسوأ

٥. لو في البيت اديله بردو شوية ملح تحت لسانه يرفعوا له الضغط شوية

هتلاقي وشه بدأ يرجع للون الطبيعي بدل البهتان اللي حصل ، عينه بدأت تفتح بسيط ، نفسه بدأ ينتظم
الحمد لله هو كدا بيفوق ، محتاج تتابع معاه الضغط و السكر و يأكل كويس
لو اتكرر اكتر من مرة ، لازم تروح لدكتور يشوفه و يعمل فحوصات اكتر عشان نعرف السبب

لو مبيتحسنش ، تنقله على اقرب مستشفى بسرعة

ملحوظة
١. لو كان في تشنجات نيمه على جنبه و حط له أي حاجة بين اسنانه و اتصل بالاسعاف فوراً
٢. الكلام دا عن الاغماء ، مش الغيبوبة



قولوا لنا عاوزين نتكلم عن ايه البوست الجاي 😉

21/04/2022

إجابة السؤال اللي فات : نقص السكر اخطر طبعا من زيادة السكر 😳

لأن نقص السكر ممكن يدخل في غيبوبة ، يسبب الوفاة حالاً ، مفيش وقت

لو شكيت لاي حد ان سكره قليل لازم ياخد سكريات بسرعة ، عشان كدا في حالات الاغماء ، من ضمن الاسعافات الاولية :
اديله اي حاجة مسكرة تحت لسانه
(لو سكره كان واقع انت انقذته ، و لو كان عالي مش هتفرق اما يعلى شوية كمان لحظيا )

دا مش معناه ان زيادة السكر عادي ، لا خطر بردو للاسف خصوصا على المدى الطويل ممكن تبوظ الكلى و تدخل المريض في فشل كلوي ممكن تبوظ العين (الشبكية و العدسة) و توصل لحد العمى ممكن تعمل التهابات للأوعية الدموية في الجسم كله

و ممكن تدخل في غيبوبة سكرية بردو : 🤷
السكر يزيد لأن الأنسولين قليل الأنسولين القليل يساعد في تكوين اجسام كيتونية الاجسام الكيتونية تمشي في الدم و تعمل حموضة و تنزل في البول

و (سكر عالي + اجسام كيتونية + حموضة دم ) دي حالة خطر محتاجة تدخل سريع في رعاية مركزة ، و إن شاء الله بتتلحق

عشان كدا مهم جدا لمرضى السكر اخد جرعات الدواء أو الأنسولين بانتظام و المحافظة على نسبة السكر في الدم مظبوطة

17/04/2022

زيادة أم نقص السكر في الدم
تفتكروا أيهما أخطر ...

16/04/2022

الجلطات زادت جدا الفترة دي ، حافظوا على نفسكم و شوفوا تتجنبوه ازاي 👇

بيحصل ايه اخر فترة :
شرب مياه قليل جداً←زيادة لزوجة و كثافة الدم نوم طول النهار فمفيش حركة ←بطء حركة الدم في الجسم تتقل في الاكل جامد في الفطار ←يقلل الدم في الجسم و يسحبه كله للجهاز الهضمي اكل صحي قليل و نقص فيتامينات ←شعيرات دموية ضعيفة غير صحية التدخين بأنواعه ، الوزن الزيادة و الدهون←تصلب شرايين

كل دا زاد اخر فترة خصوصا مع الصيام و الحر ،،

نقدر نتجنبه بسهولة باذن الله عن طريق :
على الاقل شرب ٢ - ٣ لتر مياه متقسمين في الفترة بين الفطار و السحور ، كل ساعة شوية 💧💧💧

لو شربت كمية كبيرة قبل السحور على الطول الجسم هيفقدها و بزيادة كمان
دخل وزنك هنا ، هيطلع لك كمية المياه اللي جسمك محتاجها

https://altibbi.com/calculator/water
نتحرك و نمشي على الأقل ، الصيام مش للنوم و لا للكسل ، بالعكس نشتغل عادي و نتحرك عشان ننشط الدورة الدموية و نمنع التجلطات
الاكل على الفطار مش سباق 😂💔 كفاية انك تشرب كوباية بلح و كوباية ميه و تقوم تصلي المغرب و ترجع تأكل حاجة بسيطة ، التخمة بتعمل مشاكل كتير هنتكلم عنها بعدين
انك تخس و تنزل الدهون الزيادة دي حاجة صعبة و انا مقدرة دا ، لكنها مفيدة جدا و بتحميل من أمراض كتير و رمضان فرصة عشان تقلل الاكل ، مش العكس 😂
التغذية الكويسة مش كمية اكل كبيرة ابدا ، لكن اكل صحي و خضار و فواكه ( فيتامينات ) و تنوع في الاكل
مش هقولك قلل التدخين ، لا امنعه خالص و رمضان فرصة ليك ، كل يوم بنشوف حالات سرطان رئوي و سدة رئوية و تصلب شرايين و جلطات في القلب و مشاكل كتير سببها بس التدخين
ظبط جرعاتك لو مريض ضغط أو سكر او قلب أو بتتعالج من اي مرض مزمن عشان تقلل المخاطر

كم يحتاج الجسم من الماء؟ احسب كمية المياه المناسبة التي يحتاجها جسمك حسب وزنك لتجنب الجفاف والأمراض بخطوات سهلة على الطبي.

15/04/2022

_انت دكتور والمفروض عارف ان مهما شربت مايه الكليتين هيتخلصوا منها بعد الفجر ع طول!
=شايف الدكتور الى مخلص ازازتين وداخل ف التالته ده.
_اهاا ماله!
=ده دكتور كلى.

14/04/2022

لو شكيت في جلطة اوعى تاخد اسبوسيد اول حاجة ابدا
ليه ؟
لأن أعراض جلطة المخ شبه اعراض نزيف المخ ، لكن علاجهم عكس بعض تماماً

خلي بالك و احمي نفسك و أهلك لحد ما توصل لأقرب مكان أشعة مقطعية

الجلطة أو النزيف الاتنين بيمنعوا وصول دم كافي لجزء في المخ على حسب مكانهم و بالتالي هييجوا بنفس اعراض نقص الدم عن الأعصاب :

تقل في اللسان - صعوبة في الكلام
تنميل أو تقل أو شلل في الايد أو الرجل أو نص الجسم
النظر يقل مرة واحدة (من ساعة كنت شايف كويس)
تنميل في الوش كله أو نص الوش

الأهل اول ما يحسوا بالاعراض دي يعملوا ايه :
١. على أقرب صيدلية أو دكتور يقيس علامات حيوية بسرعة الضغط و السكر و النبض و التنفس
٢. لو اي حاجة مش مظبوطة يظبطها بعلاج مبدأي
يعني لو مريض سكر ياخد الأنسولين بتاعه ، لو مريض ضغط ياخد حباية الضغط أو حاجة تنزل له الضغط و هكذا

٣ ***و يطلعوا جري على اقرب مكان فيه أشعة مقطعية***

الأشعة المقطعية هي الحاجة الوحيدة اللي تقدر تقولك:
دا نزيف ياخد أدوية توقف النزيف و تعمل تجلط الدم
و لا دي جلطة ياخد أدوية تدوب الجلطة و تعمل سيولة في الدم

متجريش تدي اسبوسيد الا في حالات معينة لو عنده تاريخ مرضي بالجلطات و جاله جلطات قبل كدا لو قاعد بقاله فترة طويلة مبيتحركش من سريره لو عامل عمليات اخر فترة

خلي بالك خصوصا في مرضى الضغط بالذات غالبا بيكون نزيف
اوعى تلاقي ضغط العيان عالي و تدي له اسبوسيد
انت كدا بتموته ، لأن ضغطه عالى و عنده سيولة في الدم و انت بتزود السيولة بالاسبوسيد و بتزود النزيف و بتموت اعز الناس عليك منغير ما تعرف

09/04/2022

كل سنة و أنتم طيبين ♥️
رمضان كريم 🥳😍

إن شاء الله اي سؤال طبي انا تحت أمركم ، اللي اعرفه هاجاوبه ، و اللي مش عارفاه هاسأل و ابحث و ارد عليكم ♥️