03/02/2025
الأخصائيين والمُعالجين النفسيين دول أبطال بصراحة ، وكتير منهم مش بياخدوا التقدير الكافي على اللي بيعملوه ♥️
شغلهم مش مجرد مهنة ، دي رسالة وإنقاذ أرواح حرفيًا ، تخيل حد يكون تايه في ظلام الاكتئاب أو مخنوق من القلق ، أو مش قادر يتعامل مع صدمات حياته....
وييجي المعالج النفسي يمدله إيده ويقوله :
" أنا هنا ، و أنت هتقدر تعدي دا متقلقش "
الشغلانة دي مش سهلة خالص ، بالعكس دي مرهقة نفسيًا وعاطفيًا جدًا ، الأخصائي بيسمع قصص تقطع القلب وبيحاول يساعد بأفضل ما عنده ومع ذلك فيه ناس لسه مش مقدرة قيمتهم ، أو ممكن تشوف إن العلاج النفسي رفاهية أو ضعف
وده أبعد ما يكون عن الحقيقة !!!
عشان كدا كل حد بيشتغل في المجال ده لازم يعرف إنه بيعمل فرق حقيقي في حياة الناس ، حتى لو مفيش حد قاله شكراً بشكل مباشر كفاية إنه يقدر يشوف التغيير اللي بيحصل في عيون اللي بيساعدهم ، أو يشوف حد كان محطم وبقى قادر يعيش حياته بشكل طبيعي .
دي حاجات مفيش فلوس تعوضها ، وده اللي بيخلي المهنة دي عظيمة بجد ♥️
فكل الاحترام والتقدير لكل أخصائي ومعالج نفسي بيشتغل بضمير ، لكل حد بيحاول يخفف عن الناس ، ولكل حد فاهم إن الصحة النفسية مش رفاهية دي أساس الحياة...♥️
#منقول
مقالة_نفسية_علي_الماشي
