04/02/2025
في فتره من الفترات كنت شغال في مكان وكانت مديرتي ست استراليه … عملت اجتماع او يوم شغل لينا وقالت جمله مهمه ، قبل ما تكلمني تقولي " عندي مشكله " .. قولي قبلها " عشر حلول " انت حاولت تحلهم للمشكله وفشلت و وقتها هاسمعك
ورقم عشره ده مش مجاز يعني هي فعلا عايزه عشر حلول
طبعا انا اعتبرت ان ده كلام مش بجد ، مجرد كلام اجتماعات
،بعد يومين حصلي مشكله ، العربيه غرزت في وسط الصحراء ومش عارف اتصرف .. كلمتها فورا .. ولسه باقولها عندي مشكل… قفلت السكه في وشي
بيني وبين نفسي قولت ايه العبط ده ، بس بعدها بصيت حواليا انا واللي معايا وبدأنا نشوف هنعمل ايه ، وهنطلع من الصحراء دي ازاي .. فضلنا نلوش ، ناس تشيل بايديها الرمل وناس تحاول تطلع بالعربيه وناس بتشوف حد معدي يشدنا … بعدها خرجنا من الموقف وكملنا شغل عادي
لما رجعت ، لقيتها قدامي ، وانا قالب وشي ومش فاهم تصرفها ، لقيتها بتقولي انا عرفت انك حليت المشكله في ٢٠ دقيقه والشغل ما اتعطلش ، قولتلها اه بس انا مش جزء من شغلي اني
اطلع عربيه غرزت في الرمل ، دي مشكله بره الشغل
ردها كان ، ان مشاكل الشغل هي اي مشكله تعطل الشغل سواء مسئوليتي او مش مسئوليتي ، دا غير انها كررت جملة اني اصلا ماحاولتش اعمل الحلول قبل ما اقول اني " عندي مشكلة "
والغريب انها جابتلي شخص يشرحلي ميكانيكا العربيه وازاي لما العربيه تغرز في الرمل احل المشكله علشان لو اتكررت
انا فعليا دلوقتي مابسمعش حد يقولي " عندي مشكلة " … باسمع اللي يقولي انا حاولت ، مره واتنين ، باسمع اللي عايز يحل ، اللي عايز يطلع لقدام … مش في الشغل بس ، في الحياه عموما .. وقوفك قدام المشكله مش هيحلها ، انك تزعق وتقول عندي مشكله من هنا لبكره مش هيحلها .. انك تقول انها مش مشكلتي دا برضو مش هيحلها ..
مخك عامل زي العضله ، هتمرنه انه يحل هيحل معاك
هتمرنه على الشكوى هتفضل شكاي طول عمرك ،
دور على حلول .. دور على عشر حلول لاى مشكلة وجربهم ، صدقني نص مشاكلك هتتحل او على الاقل هتتعلم ازاي لما المشكله تكرر تلاقي حلول
By: Ahmed Assaf
