د أميره صديق لطب الاطفال وحديثي الولاده Dr.Amira Seddik kids clinic

23/04/2021

الايام دي النزلات المعويه كتيره جدا ربنا يحفظ اولادنا جميعا
الشكوي الشائعة سخونه ترجيع وإسهال
تلات حاجات كافيه جدا تدخل طفلك في جفاف بسرعه جدا ومن غير ماتاخدي بالك
المفروض تعملي ايه
اول حاجه لازم تدي الطفل مياه بكميه كبيره وسوائل خفيفه ومتسيبيهوش عطشان
وبلاش فكرة أن المياه هتعمله جفاف الكلام ده خطأ طبعا وبنسمعه من بعض الأمهات
كمان ادي طفلك خافض حراره مناسب لسنه ووزنه تحت إشراف طبيبك .
دش بماء فاتر هيساعدك جدا ان الحراره تنزل وتقلل فقد السوائل من الجسم .

استشيري الطبيب لفحص الطفل وتقييم حالته

24/02/2021

سؤال متكرر اليومين دول
هل اطعم ابني في حملت التطعيم ضد شلل الاطفال القادمه ولا لا ؟
مبدايا التطعيم في شكل نفط بالفم وضروري نطعم اطفالنا في الحمله ك جرعه تنشيطيه حتي لو واخد كل تطعيماتهالاساسيه.
**في وقت الحمله بيكون التطعيمات الاساسيه موقوفه وبعد انتهاء الحمله تقدري تطعمي طفلك تبعا لجدول التطعيمات مفيش اي تعارض .
**لو طفلك اخد تطعيم الروتا فيروس يراعي ان يكون في فتره اسبوعين فرق بينه وبين تطعيم شلل الاطفال.

**لو طفلك تعبان أو بياخد اي علاج استشيري طبيبه قبل اخد التطعيم.
**يراعي الالتزام بالاجراءات الوقائيه و عدم التزاحم وده اهم حاجه .

21/02/2021

من اكتر الشكاوي الشائعه في أول كم شهر من عمر الطفل هو الارتجاع.
ارتجاع المريء يحدث في نسبه كبيره في حديثي الولاده وممكن يستمر حتي عمر ست شهور ل سنه والي بتقلق الام جدا جدا.
ضروري نتابع وزن الطفل وحالته العامه ولو بيزيد الزياده الطبيعيه المتوقعه فلا داعي للقلق .
مهم جدا أن الطفل يرضع في وضع صحيح وتتجنبي الرضاعه وهو نائم .
كمان بعد الرضاعه يفضل تحملي طفلك حوالي تلت ساعه في وضع مائل وتتجنبي أنه ينام بعد الرضاعه مباشرة لان ده بيزود الارتجاع.
ارتجاع المريء بيتحسن عند عمر ست شهور ل سنه في معظم الحالات .
وممكن نحتاج ندي بعض الادويه في بعض حالات الارتجاع علي حسب حالة الطفل .

25/01/2021

معلومات خاطئه شائعه جدا ومش عارفه مصدرها ايه وبعض الأمهات بتكون مقتنعه بيها جدا هقول منها بعض الحاجات
*جلسات البخار بتعمل تعود وده مش صح لان جلسات البخار من أكثر العلاجات أمانا وأقلها آثار جانبيه علي الطفل .
*البخاخات متنفعش ومضره علي الأطفال وده مش صح ، البخاخات ممكن تستخدم ف الأطفال وبرضو آمنه جدا عن ادويه تانيه كتير لكن بوصف الطبيب وتحت إشرافه ومش لكل الأطفال
* انا بدي لبوسة دولفين كل مايسخن طب لو سخن طول اليوم ؟ الاجابه للاسف انا بدي كل ماالسخونه ترجع ،،الدولفين واي مسكن اخر لهم جرعه بتتحدد حسب الوزن و تحت إشراف الطبيب مش كل مايسخن نديله من فضلكم.
* عندها 3شهور وبدي بسكوت بشاي والنتيجه جايين بنزله معاويه وسخونه ،، الطفل غذائه الصحي لبن الأم فقط حتي عمر ست شهور .
* لبن الأم خفيف وعطيناه لبن صناعي ،،،مفيش حاجه اسمها لبن خفيف واكتفاء الطفل من الرضاعه أو حاجته الي لبن صناعي مش بتتحدد علي حسب اللبن خفيف ولا لا .
ايه تاني من الأخطاء الشائعه عند بعض الأمهات ؟

18/01/2021

نكمل كلامنا عن انسداد الأنف عند حديثي الولاده
ازاي تساعدي طفلك يرضع كويس وينام براحه ؟
بخاخ ماء البحر منظف طبيعي وآمن جدا ممكن نستخدمه قبل الرضاعه وقبل النوم وعند الحاجه ف أي وقت .
شفاط الأنف بعد البخاخ كويس جدا وييحسن كتير انسداد الأنف .
لو طفلك عنده ارتجاع نديله علاج لأن الارتجاع من أسباب التهاب الانف عند الرضع .
لازم طفلك يرضع ف وضع صحيح وتتجنبي أنه يشرق منك وتحملي الطفل في وضع رأسي من وقت لآخر
نقلل اختلاط الطفل مع اخواته ومع الأطفال الأكبر عشان يكون اقل عرضه لعدوي الجهاز التنفسي ونزلات البرد واحتقان الأنف.
د.أميرة صديق
أخصائي طب الأطفال وحديثي الولادة

17/01/2021

إنسداد الأنف عند حديثي الولادة من الحاجات الشائعة جدا واللي بتقلق الام جدا
الطفل حديث الولاده بيتنفس من خلال الأنف فقط وميعرفش يتنفس من خلال الفم و معندوش القدره علي تنظيف الانف وإخراج الافرازات ،
كل ده بيخلي الطفل عرضه لانسداد الأنف أو الخنفره
وده ميقلقش طالما الطفل بيرضع كويس وبينام كويس وغير مصحوب بأي أعراض تانيه .
امتي نتجه للطبيب ؟
لو لقينا الطفل عنده اي صعوبه في الرضاعه أو مش عارف يرضع متواصل
لو مصحوب بكحه أو رشح أو صعوبه في التنفس
في الحاله دي بيكون محتاج تقييم الطبيب
وممنوع ندي أدوية البرد والكحه في السن ده غير مناسبة .
د أميرة صديق
أخصائي طب الأطفال وحديثي الولاده

27/11/2020

د أميرة صديق
أخصائي طب الأطفال وحديثي الولاده
ماجستير طب الأطفال م أبو الريش
الدور الارضي ٤٧ ش حموده امام ايمدج ماركت
مواعيد العمل يوميا من ٥ ل ٨ مساءا

04/10/2020