23/05/2025
(كلمات حالة موجوعة من جلسات الإرشاد الزواجي)
كنت شايفاه أماني في الدنيا..ووقت خوفي كنت بدور عليه مش من بين الناس من بين الحياة كلها…
بس لما احتاجته يسندني.. اختار يسند غيري.
بتفكري ترجعي؟
- اللي يهون عليه ضعفي ويقف ضهر لناس تانية وأنا بتهد مايبقاش ليه مكان تاني في قلبي.
انا ماخسرتوش هو اللي خسر قلب حبه واختاره بصدق.
حتي لو رجع؟
حتى لو رجع لو هموت عمري ما هرجع للي خان اللحظة اللي كنت محتاجة فيها ذرة تمسك بيا تحمي قلبي من الوجع ومشاعري من القهر والحسرة مش هقدر انسي اني كنت بتوسل إليه يرحم قلبي اللي تعبان بكلمه تمسك قالي مش هكرمشها وارميها هي موجودة وهتفضل موجودة عمري ما هنسي أنه قالي مش هقدر امنعها تعمل اللي عايزاه بس الحقيقه مش هقدر انسي أنه قالي مش هقدر تبقي محتاجه مني حاجه ومعملهاش ونسي اني حياتي كلها كانت محتجاله واللي قدر عليه أنه يكرمشني انا ويرميني ويضحي بوجودي انا وكان عارف اني مليش غيره واتمسك بوجودها..
عمري ما هنسي ايام كنت بسهر فيها افكر ممكن اريحه ازاي وممكن افرحه ازاي بكل ما املك عشان بس اشوف ضحكه معينه في وشه وهو كان منتظر مني اني افرحه واريحه اني اقبل بوجود حبيبته اللي هو في الاخر اختارها واتمسك بوجودها واجبرني امشي
انا كنت شايفاه اب وقت خوفي وحبيب وقت وحدتي.. وسند وقت ضعفي .. كنت عايشه ليه بس هو اختار يموتني ويعيش لناس تانيه
عمري ما هرجع لشخص اختار يفرح غيري وانا ببكي .. مشاعري دي مش ضعف دي منتهي القوة هو اللي معرفش يحافظ علي قلب حبه بصدق ومعرفش قيمة أن حد يعيشله ويشوف فيه حياته.. سيبته وعمري ما هرجع سيبته لإنه أجبرني أمشي وانا مش ندمانه علي اي حاجه غير اني خليته في يوم أماني ومحور حياتي وبنيت عليه عمري ومستقبلي لانه اتخلي عني واختار يكون سند لغيري في عز إحتياجي ليه.
