فيتامينات نفسية د. منة بدوىDr.menna Badawy

28/02/2026

اللي بيحصل حوالينا يخوف اوى
والقرف بقى سهل يوصل لبناتنا وسط البيت ومن الموبايل و بطرق لا تتخيلها.
حقيقى مشاعر الأبوة دي مش حاجة عادية
دي نعمة كبيرة ربنا حطها في قلب الراجل علشان يحمي ويطبطب ويحتوي فطرة جميلة فى راجل عرف يقوى حته منه ويحميها .
بنتك مش بس بنتك بس دي حتة منك، قلبك اللي بيمشي على الأرض.

عارف أكتر حاجة بتحمي بنتك مش العصبية ولا المراقبة، ولا الخوف الزايد…
أكتر حاجة بتحميها هي علاقتك بيها.

البنت في المراهقة بتبقى محتاجة:

حد يسمعها

حد يحسسها إنها مهمة

حد يقولها إنها غالية ومش أي حد يستاهلها

لو الإحساس ده ملقتهوش منك… هتدور عليه بره.

وأي حد يدخل لها من باب "أنا فاهمك"
ممكن يدخل من لحظة ضعف…
لحظة خوف…
لحظة احتياج لكلمة حلوة.

المتسلل لقلب بنتك خبيث بس ذكى اوى
بييجي يقولها :
"أنا جنبك"
"أنا الوحيد اللي حاسس بيكي"
"محدش هيفهمك غيري"

لو بنتك متعودة تحكيلك كل حاجة،
لو عارفة إنك هتسمع قبل ما تحكم،
لو حاسة إن حضنك أمان مش محكمة…
صدقني، مفيش حد هيعرف يدخل لها.

قولها إنك فخور بيها.
قولها إن جسمها له حرمة وغالي اوى
قولها إن اللي يحبها بجد ميضغطش عليها ولا يخوفها ولا يخليها تخبي
قولها انا فى ظهرك وسندك طول منا عايش

اقعد معاها.
هزر معاها.
اسألها عن يومها.
اعرف أصحابها.
خلي بينكم لغة خاصة بيكم.

أوعى تفتكر إن القسوة بتربي القسوة بتخليها تسكت وتخبى
بس مش بتحميها.

البنت اللي بتحس إنها محبوبه ومحترمة ومسموعة ومتشافة ومقدرة صعب جدًا حد يستغلها.

خليك أنت أول راجل تحسسها بقيمتها،
علشان لما تكبر…
متقبلش غير راجل يحترمها زي ما شافت منك.

احموا بناتكم بالحب ارجوكم أظهروا فى حياتهم
بالقرب…
بالاحتواء…
مش بالخوف.
عارفة الدنيا صعبة وضاغطة علي الكل بس مفيش طريقة تانية غير كده أظهر وأحضر وتواجد فى حياتها ارجوك

24/02/2026

ناس كتير بتقعد قدام برامج المقالب وتضحك، بس هل فكرنا اللقطات دي بتعمل إيه في عقول اطفالنا. الموضوع مش مجرد "هزار"، وتأثيره بجد بيخوّف:
​التقليد الأعمى: الطفل بيشوف "المشهور" بيفرح لما بيخوف حد، فبيفتكر إن ده ذكاء وشطارة، ويروح يطبقه على صحابه أو إخواته وممكن تحصل كارثة. 🏃‍♂️
​موت "التعاطف": لما الطفل يتعود يضحك على حد بيصرخ أو بيستنجد، قلبه بيموت بالتدريج وبتقل عنده قيمة الرحمة بالغير. 💔
​الغدر بقى "فهلوة": البرنامج بيعلمهم إن عادي تخدع صاحبك وتوقعه في فخ عشان الناس تضحك، وده بيهز مفهوم "الثقة" والأمان عندهم. 🤝❌
​رعب وكوابيس: الأطفال الصغيرين مبيعرفوش يفرقوا بين التمثيل والحقيقة، والمشاهد دي ممكن تتحول لخوف وقلق بيطارد فكرهم بالليل. 😰 بلاش نربي جيل بيشوف الوجع "كوميديا"! 📺✋

23/02/2026

✍🏻كيف يضعف النرجسى ضحيته
👈🏻النرجسى استاذ ورئيس قسم
فى ممارسة حيل التلاعب النفسى

وهدفه الأساسى فى بدايه العلاقه أنه يضعف الضحية تماماً
يخليها شخصية هشه جدا
ولا تقوى على الاعتراض أو حتى
✳️1- يعزلها عن اقرب الناس ليها وخاصة الناس اللى ممكن تدعمها أو تقويها
✳️2- يحاول أن يقلل منها ويشعرها أنها غير كافيه له يسخر من شكلها ومظهرها باستمرار
يقلل من قيمتها من كلامها من نجاحها

✳️3- يشكك فى قدراتها النفسية والعقلية

✳️4- يقلب عليها الترابيزه وقت اى مناقشه ويخليها دائما موقف الدفاع عن نفسها
دائما وابدا تبرر اى تصرف لها

✳️5- القرب والبعد
يخليها يوم فى السما وعشره تحت الارض
شويه اهتمام وحب وغزل ثم عقاب قاسى وعنف واهانه وإهمال وتجاهل

✳️6- السيطره المطلقه والتحكم
يتحكم فى كل تفاصيل حياتها حتى طريقه ملابسها شكلها ومظهرها

✳️7- المقارنه السلبيه
دائما وابدا يقارنها بالاخريات

✳️8- يقلل من اى انجاز تعمله من اى مجهود حتى من تربيه الاولاد
يشعرها أنها فاشله جدا فى كل أمور حياتها

✳️9- الابتزاز العاطفى
ويمارس الابتزاز العاطفى عليها علشان يشعرها بالذنب باستمرار

✳️10- التحكم المادى
بيخليها دايما محتاجه إليه مادياً
والمفروض أن تقدم مزيد من التنازلات علشان يعطيها بعض الاحتياجات الخاصة بها

✳️11- الصمت العقابى
وسيله لمزيد من العقاب والضغط النفسي عليها

✳️12- تشويه السمعه
يمارس تشويه السمعه بذكاء شديد

✳️13- يخلى أهله يتحكموا فيها
ويمارسوا عليها الايذاء النفسى

✳️14- الخيانه
يمارس العلاقات الخارجية وده يخلى ثقتها بنفسها تضعف

✳️15- التهديد بالهجر والبعد
مع كل خناقه يهددها بالطلاق والهجر
لا تشعر بالأمان والاستقرار معه واحيانا كتير لا ينفذ كلامه لأنها فريسته المفضلة

✳️16- يقلب اولادها عليها
بحيث تجد نفسها متراقبه من اقرب الناس ليها من الاولاد

👈🏻وهناك أساليب أخرى للتلاعب بها
👈🏻كل دى أساليب يضعف بيها ضحيته
✳️ والضحيه للاسف تكون مشوشه جدا لدرجه انها اصبحت تصدق كلامه وأنها فعلا غير متزنه نفسياً ومحتاجة تتعالج
✳️وهنا يكون النرجسى دمر زوجته نفسياً ومعنوياً وعاطفياً ومادياً

👈🏻ياترى حصل ولا محصلش
✳️ولو حصل موقفك ايه هل بتتعافى ولا لسه ساكته وبتكملى ظلمه ليك
✳️منتظره مشاركتكم واستفساراتكم وتعليقاتكم

23/02/2026

مش لازم تكون اتربيت صح 100٪ علشان تبقى إنسان سوي
لأن الحقيقة البسيطة: مفيش حد اتربى صح 100٪

كل أهل بيحاولوا يعملوا اللي شايفينه صح،
لكن أحيانًا اللي كانوا فاكرينه حماية يطلع خوف،
واللي كانوا فاكرينه تربية يطلع قسوة،
واللي كانوا فاكرينه مصلحة يطلع جرح

ومع ذلك…
في ناس طلعت أسوياء جدًا رغم إنها اتربت في بيئات غير سوية

ليه؟
لأن الفكرة مش في اللي حصل لك،
لكن في اللي قررت تعمله بعد كده
في مقولة بتقول:
“Hurt people hurt people, but healed people heal people.”
يعني المجروحين بيأذوا لكن المتعافين بيشفوا

لما تكسر دائرة القسوة،
وتختار الرحمة بدلها،
والتفهم بدل الحكم،
والاحتواء بدل الإهانة…
ساعتها أنت مش بتعالج نفسك بس، انت بتحمي اللي حواليك من الألم.

التسامح مش معناه ان اللي حصل معاك كان صح بس معناه انك اخترت ان لا تورث الألم ده لحد.

أهلك بشر… يخطئون ويصيبون.
وأنت أيضًا بشر… لكن لديك وعي واختيار.

الإنسان السوي مش اللي عاش طفولة مثالية،
لكن اللي فهم ألمه، واتعلم منه، وقرر ميكررهوش

21/02/2026

الشخصية الحديّة اللي بتسيب قبل ما تتساب، وتخاف من المسؤولية، مش شخصية بتلعب ولا بتستهين، دي شخصية عايشة طول عمرها على حافة الخوف، خوف من الهجر، خوف من الوجع، خوف من إن القرب يخلص بكسر.
هي مش بتمشي لأنها زهقت، ولا لأنها مش مقدّرة اللي قدامها، هي بتمشي لأنها أول ما تحس إنها قرّبت زيادة، قلبها يدق بسرعة، دماغها يبتدي يشتغل، ويطلع صوت جواها يقولها: أكيد هيمشي، أكيد هيمل، أكيد أنا مش كفاية، فأسبق وأمشي أنا، أوجع نفسي بإيدي، أرحم من إني أستنى حد يوجعني.
الشخصية الحديّة اتعلمت بدري إن القرب خطر، وإن الأمان مش مضمون، وإن أي حد ممكن يختفي فجأة، عشان كده لما تحب، بتحب بخوف، ولما تتعلّق، تتعلّق وهي جاهزة تهرب في أي لحظة.
أما بقى حكاية الخوف من المسؤولية، فدي مش كسل ولا استهتار، دي رهبة، المسؤولية بالنسبة لها معناها التزام، معناها ثبات، معناها توقعات ناس تانية، وهي جواها إحساس عميق إنها ممكن تخيّب، ممكن تفشل، ممكن تتساب بسبب إنها قصّرت، فتهرب من البداية، تقول لأ من الأول، وتنسحب قبل ما تتحط في موقف تحس فيه إنها أقل.
الغريب إن الشخصية الحديّة ممكن تبان قوية، جامدة، قاسية، كأنها بلا قلب، بس الحقيقة إنها حساسة زيادة عن اللزوم، بتحس بكل حاجة مضروبة في عشرة، بس اتعلمت تداري، اتعلمت تلبس قناع البرود عشان تحمي نفسها.
هي دايمًا عايشة صراع، عايزة حد يقرب منها، وفي نفس الوقت مرعوبة حد يقرب منها، عايزة أمان، بس مش واثقة فيه، عايزة تستقر، بس خايفة الاستقرار يتكسر.
وأكتر حاجة بتوجعها إنها بعد ما تمشي، تقعد تلوم نفسها، تراجع كل اللي حصل، وتقول ليه خوفي هو اللي سِق، ليه معرفتش أكمّل، ليه دايمًا بهرب، وتفضل دايرة في نفس الدوامة، قرب، خوف، هروب، ندم.
الشخصية الحديّة مش محتاجة لوم، ولا ضغط، ولا حد يقولها ما تخافيش، هي محتاجة أمان حقيقي، حد ثابت، علاج يفهم صدماتها القديمة، حد يستحمل خوفها من غير ما يستغلّه، ويعلّمها واحدة واحدة إن القرب مش دايمًا نهايته وجع.
الشخصية الحديّة اللي بتسيب قبل ما تتساب، مش أنانية، ولا مؤذية، دي شخصية اتوجعت بدري، فبقت بتجري من الوجع قبل ما يجري عليها.

20/02/2026

شاركونا 😍
فطرتوا فين اول يوم رمضان
أول يوم كلنا عند ماما👌 😅

19/02/2026

18/02/2026

‏ 💖🌙🕌 🌙💖
الْلَّھُم أَهِلَهُ عَليْنَا بِالْأمْنِ وَالإِيْمَانِ وَالْسَّلامَةِ وَالْإِسْلَامِ وَالْعَوْنٓ عَلَى الْصَّلاةِ وَالصِّيَامِ وَتِلَاوَةِ الْقُرْآَنِ الْلَّھُمّ سَلِّمْنَا لِرَمَضَانَ وَسَلِّمْهُ لنا وَتَسَلَّمْهُ مِنّا مُتَقَبَّلاً يٓارٓبٓ العٓالِٓمينْ .
🌺🌺🌺🌺🌺🌺
*مبارك عليكم شهر رمضان*
🌙 _كل عام وأنتم بخيـــــر_🌙

17/02/2026

تمرين سدّ احتياج التعلق القلق بشكل جذرى

الجزء الأول

لو انتي من النوع اللي:
• بتخافي يتغيروا عليك فجأة
• بتراقبي التفاصيل الصغيرة
• بتفسري السكوت رفض
• بتهدي بس لما يطمنوكى … وتنهاري أول ما يبعدوا

يبقى إحنا مش بنتعامل مع تعلق امن ولا عمرك هتستمتعى بعلاقه صحيه
إحنا كدا بنتعامل مع جهاز إنذار شغال طول الوقت.

تعالي نطفيه بوعي.

المرحلة الأولى: كشف الفكرة الجوهرية

جاوبي بسرعة ومن غير تجميل:

أنا بخاف أسيب ليه؟
1. عشان بحبهم؟
2. ولا عشان بخاف أبقى لوحدي؟
3. ولا عشان حاسة إن محدش هيختارني بعدهم؟
4. ولا عشان بحس بقيمتي لما بيكون الآخر موجود؟

اكتبي الحقيقة.
حتى لو هتضايقك

المرحلة التانية: اسمعي الجزء المعطوب

اقفلي عينك دقيقة…
واسألي الجزء اللي بيتشبث:

“إنت خايف من إيه بالظبط؟”

غالبًا هتسمعي جملة شبه:
• “محدش بيكمل معايا.”
• “أنا بتساب.”
• “أنا مش كفاية.”
• “لو مشيت مش هلاقي حد تاني.”

دي مش أفكارك الواعية.
دي ذاكرة ألم قديمة.

المرحلة الثالثة: فصل الزمن

اسألي نفسك:

الإحساس ده يخص الموقف الحالي؟
ولا هو نفس الإحساس اللي حسيت بيه زمان مع:
• أب مش متاح؟
• أم مشغولة؟
• علاقة سابت فجأة؟
• موقف رفض؟

التعلق القلق بيخلط الماضي بالحاضر.
وانتي غالبا بتعاقبي الشخص الحالي على جروح قديمة.

المرحلة الرابعة: اختبار الاستحقاق

سؤال قاسي شوية:

لو الآخر سابني…
هل ده معناه إني مش كفاية؟
ولا معناه إنه مش مناسب؟

العقل القلق دايمًا يختار التفسير الأول.
لكن الحقيقة غالبًا التاني.

المرحلة الخامسة: إعادة توجيه الاحتياج

بدل ما تقولي:
“أنا محتاجة يطمني.”

قولي:
“أنا محتاجة أتعلم أطمن نفسي.”

بدل:
“أنا عايزة أحس إني مهمة عند الآخر .”

قولي:
“أنا عايزة أبني إحساس داخلي بقيمتي.”

التعلق القلق مش بيحتاج حب أكتر.
هو بيحتاج أمان داخلي.

تمرين عملي يومي (لمدة 14 يوم)

كل مرة تحسي برغبة ملحة إنك:
• تكلمي
• تراجعي كلامهم
• تطلبي تأكيد
• تراقبى تصرفاتهم وكلامهم حتى من بعيد

اعملي الآتي:
1. اكتبي الشعور.
2. اكتبي الفكرة اللي وراه.
3. اسألي: دي حقيقة؟ ولا خوف؟
4. خدي نفس 10 مرات.
5. اعملي حاجة لنفسك (عنايه او اى تعبير عن اهتمام او رعايه او حب)بدل ما تروحي لهم.

انتي كدا بتعيدي تدريب جهازك العصبي.

الجملة اللي هتوجع شوية:

أنتِ مش محتاجة تتمسكي بحد علشان يفضل.
اللي عايز يفضل… بيفضل.

واللي مشي…
كان ماسك في احتياجه هو مش فيك

📌متنسيش تكتبى الجزء ((الثانى ))هشاركك افكار وتمارين اول مره اشارك بيها هنا باذن الله هتحل مشكلتك من جذورها

15/02/2026

كل فتره لازم تقف تتفرج على حياتك وعلى ناسك وصحابك ونفسك🫂 🍀
وتتخيل حياتك ك لوحه شطرنج♟️ 🎭
وشوف مين لسه معاك وجنبك وفي صفك ومين اللي ضدك
ومين اللي وقع من اللوحه ومن نظرك
ومين اللي مكمل معاك وبيحميك
ومين اللي بيحاول يتسرسرب لحياتك لأهداف شخصيه ومين اللي بيتمني حياتك
ومين اللي مركز معاك اكتر ما هو مركز في حياته وفي نفسه👁️ 👁️
أقف اتفرج على اللوحه. وتقبل. وأبتسم.😊 وحاول تحاوط نفسك دايما بحدود نفسيه قويه اللي يقع من اللوحه انت متقعش معاه ولا تبص وراك

#الشطرنج #الثقةـبالنفس

15/02/2026

متى يرحل النرجسي إلى الأبد؟ 🤔
(دراسة ميدانية من معهد “كفى تبريرًا” 🎓)

سؤال يتكرر أكثر من مرة:
متى يملّ؟
متى يختفي؟
متى يتركني وشأني؟
هل إذا تجاهلته أسبوعًا يرحل؟ ⏳
هل إذا حظرته عشر مرات يفهم الرسالة؟ 🚫📱

دعني أختصر عليك الطريق…

❌ النرجسي لا يرحل لأنك تعبت.
❌ لا يرحل لأنك بكيت.
❌ لا يرحل لأنك اكتشفت حقيقته.
❌ ولا يرحل لأنه وجد ضحية جديدة… فهو يؤمن بمبدأ “الاحتياط العاطفي” 🗂️

النرجسي يرحل في حالة واحدة فقط:
عندما تتحول من مصدر تفاعل… إلى جدار. 🧱
نعم، جدار.
لا يصفق 👏
لا يصرخ 😡
لا يتوسل 🙏
لا يشرح 📢

لأن النرجسي لا يبحث عنك أنت،
بل يبحث عن انعكاسه في عينيك 👁️

هو لا يريد قلبك… ❤️
هو يريد استجابتك.
حتى لو كانت غضبًا 🔥
حتى لو كانت دموعًا 😢
حتى لو كانت نقاشًا طويلًا بعنوان: “أين أخطأت؟”

إنه يعيش على الاهتمام
وأنت – دون أن تدري – كنت محطة شحن لغروره 🔌

متى يختفي إذًا؟ 🕳️
يختفي عندما:
📩 يرسل رسالة… ولا يجد ردًا.
🎭 يستفزك… فلا تتحرك فيك ذرة انفعال.
🩹 يعود بدور الضحية… فتجيبه بهدوء: “أتمنى لك السلام.”
👀 يلوّح بالغيرة… فتقول: “وفقك الله.”

يختفي عندما تصبح مملًا بالنسبة له 😴
عندما لا تمنحه مسرحًا 🎬
عندما لا تعود جمهورًا يصفق لدراماه اليومية 🎤

النرجسي لا يخاف من شخص قوي 💪
بل يخاف من شخص لم يعد يحتاجه.

الخلاصة 🧠
النرجسي لا يرحل عندما تفهم لعبته،
بل يرحل عندما تتوقف عن اللعب. 🎮❌
لا يرحل لأنك أقنعته،
بل لأنك لم تعد تمنحه ما يقتات عليه.
يرحل عندما تدرك أن التحرر لا يعني أن تنتصر عليه،
بل أن تسترد نفسك. 🌿

والسؤال الحقيقي ليس:
متى يرحل النرجسي؟ 🤷‍♀️🤷‍♂️
بل:
متى تتوقف أنت عن العودة؟ 🔁
تحرر بلا خوف ✨

#النرجسية