31/03/2026
يا ترى في حد من دايرتك القريبة مصاب باضطراب فرط الحركة وتشتت الانتباه (ADHD) وعندك مشكلة في التعامل مع ردود أفعاله العصبية الغير مبررة؟
أو أنت شخصياً اللي مصاب بيه وبتعاني من حكم الناس عليك الدائم بإنك شخص عصبي؟
مصابين الـ ADHD (فرط الحركة وتشتت الانتباه) مش دايماً بيبقوا "عصبيين" بمعنى إنهم بيختاروا يزعقوا أو ينفعلوا، لكن لأن مخهم بيتعامل مع المشاعر بطريقة مختلفة.
الشخص العادي لما بيتعصب بيحصل توازن طبيعي بين هرمونات زي الدوبامين والنورأدرينالين، فالجسم يعرف يهدى بعد شوية.
إنما عند المصاب بالـ ADHD الهرمونات دي بتتفرز بشكل عشوائي، ومفيش نظام ثابت ينظمها وقت الغضب. فبدل ما الجسم يعرف يفرمل المشاعر، بيدخل بسرعة في حالة (fight mode) اللي بتظهر في شكل اندفاع أو عصبية.
وده مش سلوك متعمد ولا اختيار واعي، ده رد فعل عصبي بيحصل من غير تفكير.
كمان في حاجات ممكن تزود الحالة دي زي الصوت العالي، الإضاءة الشديدة، قلة النوم، اللخبطة في الأكل، أو حتى زيادة الكافيين. علشان كده الشخص المصاب بالـ ADHD محتاج يتعلم يلاحظ المحفزات دي، ويحاول يخرج من الموقف قبل ما الانفعال يزيد.
أما الناس اللي حواليهم، فمهم يفهموا إن العصبية دي مش موجهة ليهم، ومش معناها إن الشخص بيكرههم أو بيقصد يضايقهم، لكنها طريقة جسمه ومخه في التعامل مع الضغط. الفهم ده لوحده بيقلل سوء التفاهم وبيخلي التواصل أهدى وأنضج.
فهمك لطبيعة مرضك هيسهل عليك تتعايش معاه وتركز في إيجابياته وتتعلم تكون آليات تأقلم للحد من آثاره السلبية.
في النهاية بأكد اضطراب فرط الحركة وتشتت الانتباه (ADHD) مش مرض بنشفى منه تماماً ولكنه اضطراب بنتعلم نتعايش معاه.
وفي أنظمة علاجية كتير مش بس دوائية ولكن بتشمل تعديلات سلوكية وتطبيقات للعلاج المعرفي السلوكي بتساعد الشخص على تحسين جودة حياته وتنظيمها.
دكتورة ماجي الشافعي أخصائي الطب النفسي وعلاج الإدمان والعلاج المعرفي السلوكي.
للحجز والاستفسار عن الجلسات ابعتولنا في رسايل انستجرام.
