د/شريف رؤوف Dr.Sherif Raouf

16/05/2025

#صباح #الخير #التصالح #مع #النفس كلنا بنسمع أو بنقول عن البعض جملة أن " فلان متصالح مع نفسه " والحقيقة أن التصالح مع النفس من أهم الصفات اللي بتخلي الإنسان #في حالة #من الهدوء والسكينة والطمأنينة لأن التصالح مع النفس معناه أن الإنسان يقبل ذاته كما هي، بعيوبها ومميزاتها، وأنه يتعامل مع أخطائه وتجاربه الماضية بتسامح وفهم، لا بنقد قاسٍ أو جلد للذات. والتصالح مع النفس بيدى حالة من السلام الداخلي بتخلي الشخص يشعر بالراحة تجاه قراراته، وماضيه، ومشاعره، من غير ما يحمل نفسه فوق طاقتها.

10/05/2025

#صباح #الخير علشان تقدر تساند وتدعم اي شخص مهم انك :- 1. حاول تختار كلماتك بعناية وأستخدم كلمات مشجعة، ومحترمة، وطيبة، وحاول انك تبعد عن النقد الجارح أو التهكم. وخلي بالك كلامك ممكن يدخر شخص وأنت مش واخد بالك.
2. اظهر التعاطف وخصوصاً لما تتكلم مع أي شخص ، حسّسه إنك فاهم مشاعره ومهتم بيه، حتى لو مش متفق معاه. بلاش الجفا وعدم الإحساس بالناس ، الناس كلها تعبانة وبتتألم.
3. خليك صادق وبسيط لأن الناس بيوصلها الكلام اللي طالع من القلب، مش اللي فيه تصنع أو مبالغة. لأن اللي بيخرج من القلب بيوصل للقلب.
4. اسمع أكتر ما تتكلم لأن استماعك للناس معناه انك بتقدرهم ، وبيديك فرصة أن تفهم الأمور صح ، وبيخلي كلامك بعد كده له وزن وتأثير.
5. اختار الوقت والمكان المناسب:، لأن لكل مقام مقال ، حتى الكلام الإيجابي ممكن ما يكونش له تأثير لو اتقال في وقت مش مناسب. فلكل شيء تحت السماء وقت.
6. خلي ملاحظاتك تكون بناءة ، مش مجرد تقد وخلاص، وخلي هدفك التحسين مش التقليل.
7. شارك تجاربك الشخصية ببساطة وبدون تكبر لأن الناس بيفرق معاها جدًا لما تشاركهم حاجة حقيقية من حياتك، خصوصًا لو فيها دروس أو مشاعر. وخليك فاكر أن العلاقات بتتدمر بسهولة جداً ، والحفاظ عليها مش سهل .

10/05/2025

#صباح #الخير هل فكرت قبل كدا ازاي كلام الناس معانا ممكن يكون له تأثير قوي جدًا علينا، سواء بشكل إيجابي أو سلبي، الحقيقة أن ده بيحصل من خلال كذا طريقة:
1. التشجيع أو الإحباط: فكلمة تشجيع ممكن ترفع معنوياتك وتدفعك وتخليك تحقق إنجازات، وكلمة إحباط ممكن تكسرك وتخليك تفقد الثقة في نفسك.
2. نقل المشاعر: كلام الناس معانا بينقلنا مشاعر ممكن تكون إيجابية وممكن تكون سلبية، فالكلام اللي فيه طاقة إيجابية زي التفاؤل أو الامتنان ممكن يعدي للي بيسمعه وينقلها طاقة ايجابية، والعكس صحيح، لو فيه شكوى أو سلبية بتنتقل كأنها عدوى، فبلاش تخلي الناس اللي دايما بتشتكي قريبة منك .
3. التأثير في القرارات: رأي الناس أو نصايحهم ساعات بتخلي الشخص يغير قراراته أو طريق تفكيره، خصوصًا لو الكلام جاي من حد قريب أو محل ثقة.
4. بناء أو هدم العلاقات: الكلام الطيب يقرب الناس من بعض، والكلام الجارح أو النميمة ممكن تبوّظ علاقات وتخلي الناس تبعد عن بعض. ولو اي واحد فينا فكر بهدوء هيلاقي أن علاقات كتيرة اتهدمت واتدمرت بسبب الكلام.
5. تكوين الانطباع: كلام الشخص عن نفسه أو غيره بيأثر في الطريقة اللي الناس بتشوفه بيها، وبيساعد في تكوين صورة ذهنية عنه. واللي أقصده هنا أننا عن طريق سماع الكلام واراء الناس في موضوعات متعددة ممكن نكون انطباعات عن أشخاص وأمور أخرى ، أحياناً بتكون الانطباعات دى غلط.

09/05/2025

#مساء #الخير #الوفاء #هو صفة تدل #على الالتزام بالعهد والثبات على العشرة والصدق في القول والعمل. يُقال "وفى بوعده" أي صدق فيه وأتمّه، و"الوفاء بالعهد" يعني الالتزام بما تم الاتفاق عليه دون خيانة أو تراجع.

09/05/2025

#صباح #الخير #الصدق أساس الثقة، وميزان الأخلاق، ودليل على صفاء القلب ونقاء السريرة. الصادق يُؤتمن، ويُحترم، وتُفتح له القلوب والأبواب. والصدق لا يُراد به فقط القول، بل يشمل الأفعال والنيات والمواقف. #و #الإنسان الصادق يعيش #في راحة ضمير، لأنه لا يحتاج لتزييف الحقيقة أو تذكر الأكاذيب التي قالها، بل يكون واضحًا في حياته، ثابتًا في مواقفه، ومحبوبًا في محيطه.

01/05/2025

#مساء #الخير بغض النظر عن الدين ، لأن في ناس بتدافع عن المتهم لانتمائه للدين المسيحي وناس تانية بتولعها لأن المعتدى عليه طفل مسلم ، والحقيقة أن الاتنين بيعملوا فتنة وليهم مصالح معينة ، واللي لازم نتفق عليه اي حد بيخطيء لازم يتعاقب وهنا الجرم مش عادى دا أقذر جرم ممكن يرتكبه اي انسان ، وانا هنا عايز أوضح صعوبة كذب الطفل ياسين في اتهامه للمسن ، لأننا في حالات الأطفال اللي بيتعرضوا لاعتداء جنسي أو هتك عرض – زي الطفل ياسين – ففكرة إن الطفل "يكدب" في الموضوع ده نادرة جدًا، وتكاد تكون مستحيلة ، وبتكون آخر احتمال ممكن يتاخد في الاعتبار، لأن:

١/الأطفال نادرًا ما يختلقوا قصص عنف جنسي، خصوصًا بالتفاصيل اللي غالبًا بيحكوها في التحقيقات ( زى معمل ياسين).
٢/الإفصاح عن الاعتداء بيكون صعب جدًا ومؤلم للطفل، وغالبًا بيخاف أو بيتردد أو حتى بيتراجع عن الحكي، مش العكس.
٣/كتير من الأطفال اللي بيتعرضوا للاعتداء بيتهموا بالكذب و تشكيك من الكبار، أو دفاع من المتهمين، أو صدمة نفسية لدى الأهل كمحاولة للإنكار وعدم قبول الواقع المرير الذى تعرض له الطفل، لكنه في الغالب مش مبني على تحليل أو أدلة منطقية.
٤/ الطفل ياسين حكي أدق التفاصيل وتعرف علي الجناة ( اقصد الراجل والناني والمدرسة ..الخ) والكشف الطبي والطب الشرعي أثبتوا أنه بنسبة كبيرة تعرض للاعتداء ، يعني في تطابق مع كلامه. واكيد في كاميرات في المدرسة وفي حاجات كتير ممكن يتم مراجعتها والتأكد من صحة كلام الطفل......أخيراً بلاش نخلي القضية مسيحي ومسلم ، القضية ملهاش علاقه بالدين ، في أشخاص زى الراجل دا في كل دين وهما ملهومش علاقة بالدين اصلا ولازم ياخدوا جزاؤهم وأشد العقاب، واتمني من المجتمع مساعدة الطفل ياسين علي وجه الخصوص ومساعدة كل الأطفال المساء إليهم علي وجه العموم بتوجيه الدعم والمساندة علي كافة المستويات ، ويارب يقدر ياسين وأسرته يتخطوا كل الالم دا.

22/04/2025

17/04/2025

#صباح #مساء #الخير #أجمل ما #في #الإنسان هو #جمال #الروح لانه الجمال الحقيقي والدائم الذى ينبع من داخل الإنسان، ويعكس صفاته الجميلة من طيبة وصدق وتواضع وإحساس بالآخرين وتسامح. وجمال الروح يترك أثرًا طيبًا في قلوب الناس. فالناس قد تُعجب بالمظهر، لكنهم لا ينسون من عاملهم بلطف، وساندهم وقت الحاجة، وابتسم في وجوههم بصدق. والحقيقة أن الأشخاص دى بتبقي عبارة عن مصابيح تنير ظلمات الحياة وكالملح الذى يجعل للحياة طعم ، مثل هؤلاء الأشخاص مهما ارتفعت مكانتهم يظل جمالهم طاغيا وتأثيرهم لا يزول ، فلمثل هؤلاء كامل التحية والتقدير والاحترام.

05/04/2025

كل شيء يحدث لسبب، وقد يكون هذا السبب لخير تكتشفه لاحقاً.

05/04/2025

الشعور بالرضا يفتح أبواب الراحة.

05/04/2025

كل تجربة صعبة نمر بها تصقل شخصيتنا وتزيدنا حكمة.

05/04/2025

كل صباح هو بداية جديدة، مهما كان ما حدث بالأمس.