دكتور محمد احمد الشيخ اخصائي طب وجراحه العيون

25/03/2023

كل عام وأنتم بخير

22/03/2022

تحت رعايه شركه جمجوم للأدوية

انعقاد الاجتماع السنوى الأول لعلاج أمراض المياه الزرقاء

20/01/2020

04/08/2018

لا يعاني الأطفال غالباً من أبصارهم، لكن قد تظهر عليهم أعراض عدم الرؤية بشكل صحيح.

تشمل الأشياء التي يجب أن ألاحظها الجلوس بشكل قريب من التلفاز أو حمل الأشياء بشكل قريب جدا لوجوههم، أو طرف العين كثيراً أو فرك العين أو تحريك عين واحدة للداخل أو الخارج.

إن كان لدى طفلك أي نوع من مشاكل البصر هذه، قم بأخذه لطبيب العيون من أجل المزيد من الفحوصات.

لا يحتاج الأطفال لأن يكونوا قادرين على قراءة الأحرف لاختبار أعينهم. يجب على الأطفال أن بقوموا بالاختبار المنتظم كل ستة اشهر اذا كانوا اقل من 10 سنوات او سنويا اذا كانوا اكبر من 10 سنين.

30/07/2018

من السهل إهمال العين لأنها نادراً ما تؤلم عندما يكون هناك مشكلة ما.

لا يخبرك اختبار العين فيما إذا كنت بحاجة لنظارات جديدة أو تغيير في الوصفة الطبية فقط، ولكنه فحص مهم لصحة العين أيضاً.

يمكن أن يكشف العديد من المشاكل الصحية العامة والأعراض المبكرة للحالات العينية قبل أن تعاني من أي أعراض - يمكن معالجة الكثير إذا ما اكتشف مبكراً كفاية.

على كل شخص اختبار النظر كل ستة اشهر اذا كان العمر اقل من 10 سنوات ثم سنوياً بعد ذلك العمر عن طريق زيارة طبيب العيون.

09/07/2018

جميل اننا ننقذ حياه بيبي ونرجعه حضن بابا وماما اللي مستنينه شهور ويمكن سنين بس العلاج بالاكسجين اللي بيحصل في الحضانات مش فرح و مش عشان الساتيورشن يعلى و ينور اغامر بعيون البيبي و ماقللش الاكسجين اللي زيه زي اي علاج ليه اضرار (زيادته و نقصانه )..
اي طفل اتولد في الاسبوع ٣٢ او اقل او وزنه اقل من كيلو و نص معرض يحصله ضمور في الشبكية حتى لو ماتحجزش ساعة واحدة في الحضانة لازم فحص قاع عين عند عمر شهر...
اي بيبي اتولد قبل ميعاده و اتحط على اكسجين حتى لو كام دقيقة لازم يكشف فحص قاع عين عند عمر شهر
اي بيبي كان ليه unstable course في الحضانة يعني من تنفس صناعي لطبيعي لتنفس صناعي تاني و هكذا بردو معاهم...
و عشان الكلمة الاخيرة دي خليها اي بيبي دخل حضانة يعمل فحص قاع عين و رسم سمع عند عمر شهر ...
و لازم و هو خارج تأكد ع الاهل و يستحسن تمضيهم على انهم ملزمين يعملوا فحص سمع و بصر ...
روح اقرب فرع حضانات جمعية شرعية ليك و احجز .. روح عيادة اقرب دكتور شبكية و اكشف على ابنك ماجاتش على ثمن الكشف ده..
ايه فايدة انك تنقذ حياة بيبي بس تعيشه طول عمره مايشوفش النور ؟!!!

24/02/2018

17/01/2018

القواعد الاربعون للكشف عند طبيب العيون

1. أول حاجة لازم تعرفها إن العين ما بتشوفش... العين هي اللي بتحول الضوء و درجات الألوان و الظلال إلى إشارات عصبية توصل للمخ علشان يشوف دي حاجة و علشان يتعرف على اللي شافه و دي حاجة تانية خالص. يعني العين ليس الا لتكوين صوره عى مركز الابصار بالشبكيه لتوصيلها في صوره اشارات عصبيه عن طريق العصب البصري للمخ.
2. خلي بالك دكتور العيون خلقه ضيق جداً بس ما بيبانش عليه من أدبه و كل ما يكون أكبر في السن كل ما بيتكون روحه على طرف مناخيره....جاوب على قد السؤال.
3. أول ما تخش عليه قوله بسرعه شكوتك ما تستناش لما يسألك علشان دي أول علامة بيقيم بيها الدكتور مريضه و ممكن تتعامل معاه إزاي...يعنى هتنجز هيعمل معاك الصح ...هتطول من أولها في معظم الحلات هتلبس قطرة توسيع تزغللك طول اليوم و اليوم اللي بعده...أخدتلي بالك.
4. كونك مزغلل او مش شايف ... في الحالة دي مش مطلوب من الدكتور إنه يستغرب أو يتفاجئ لما يسمع كده ...دي شكوى 99.9 % من حالات عيادة الرمد.
5. دي بقى حتة مهمة لو عندك عيل هتكشف عليه لازم تكون معاه علشان تساعده و تطمنه...لكن لما تكون أنت أو إنتي هتكشفوا بلاش تسيبوا عيالكوا يلفوا في العيادة كده يلعبوا في الأجهزة و يتنططوا على الكراسي و يسيبوا بصمات صوابعهم الملحوسة بالشيكولاتة و خلطة الشطة و الليمون اللي بتبقى على الشيتوس الحار...و مش لازم العيل يبقى داخل و علبة الزبادو بالموز اللي مشروب نصها و النص التاني نوى النية الصادقة إنه يتدلق فى العيادة...الزمن داخل عيادة الرمد كالزمن خارجها ليس أطول لدرجة إحتمال الإصابة بالجوع و العطش.
6. لما يطلب منك يكشف عليك على جهاز اسمع كويس بيقولك إيه علشان تخلص أجهزة الكشف بالضوء العادي مش بالليزر و لا الشعاع النووي.
7. أثناء الكشف افتح عينيك مش هيكشف على عينيك و هي مقفوله ولا إيه.
8. مش ضروري تكشف على كل الأجهزة اللي في العيادة ... الكشف مش All Inclusive...فبلاش الحتة بتاعت انا ما قعدتش على الجهاز ده هتسمع رد مش هيبسطك خالص خالص.
9. لو ربنا كرمك و حطيت قطرة توسيع ما تقعدش تقول عيني زغللت لأنك لو ما فقدتش الذاكرة هتفتكر إن الممرضة و الدكتور من قبلها قالولك المعلومة الخطيرة دي و ما تقعدش تقول أنا زغللت خلاص يبقى أخش أكشف لأن دا مش زي البنج عند دكتور الأسنان.. الممرضة هتخليك تكشف لما الحدقة توصل للوسع المطلوب.
10. أثناء ما الدكتور بيفحص قاع العين اسمع كويس بيقوللك تبص فين و ساعده علشان ربنا يساعدك.
11. أثناء كشف النظارة و خاصة أثناء تجربة العدسات بلاش صاحبك و لا خطيبتك ولا مامتك أو اللي معاك يطلع الموبايل و يصورك علشان الدكتور هيقول كلام مش حلو خالص عليكو أنتوا الاتنين في سره طبعا.
12. نخش على الجزء المهم...ما فيش حاجة اسمها نظارة حفظ نظر...يا إما محتاج نظارة و عندك عيب بصري يا إما لأ و نظرك سليم....اللهم بلغت اللهم فاشهد.
13. لو محتاج نظارة ... في معلومة مهمة خالص النظارة دي زي البطلون أو الشورت لو لبست شورت مش هتقصر و لو لبست بنطلون طويل مش هتتطول أنت بتلبس الحاجة اللي على مقاسك و لو ربنا أراد إن مقاسك اتغير بتغير البطلون و كذلك النظارة الدكتور بيعملها على مقاسك اللي ممكن يتغير بعد فترة و لازم تعمل نظارة جديدة للمقاس الجديد لكن النظارة مش هتحافظ على مقاسك ...يعني ما فيش حاجة اسمها نظارة حفظ نظر.
14. ما فيش حاجة اسمها قطرة معقِمة للعين...كل القطرات معقَمة يعني المصنع عملها عملية تعقيم علشان تحطها في عينك من غير ما تأذيك... مش علشان تعقم عينيك...زي الميه المعدنية معقَمة علشان تشربها و تكون مطمن من نضافتها مش علشان تعقم معدتك من الميكروبات.
15. البريزولين و التيراميسين مش هما دول أدوية العيون الوحيدة في غيرهم تاني و الله.
16. ما تطلبش من الدكتور علاج يغنيك عن النظارة...لأن لو في كان اختراع زي ده كانت النظارة انقرضت زي شريط الكاسيت...الاختراع ده لسه ما وصلش كوكب الأرض.
17. كونك ما بتحبش تلبس النظارة دي مشكلتك لوحدك...مش عاوز تلبس عدسات لاصقة حقك البشري المتجرد...رافض الليزك أو خايف منه أحب أقولك ما حدش بيجبرك...بعد كده ما تحاولش تتناقش مع الدكتور خد الكشف و اخلع من سكات.
18. لو قررت تلبس عدسات أو تعمل ليزك بلاش التعليق الظريف بتاع ما أنت لابس نظارة يا دكتور هتسمع بتاع 25 رد أظرف و 50 رد مش حلوين خليك في حالك أنت دافع كشف و داخل تطمن على الدكتور و لا على نفسك...خف تعوم.
19. لما تعمل النظارة و تيجي تراجع عليها...أبوس إيدك و بأحذرك و بأهددك إوعى إوعى إوعى تقول للدكتور أنا بأشوف بالنظارة كويس جداً بس ظهرت عندي مشكلة ..إيه؟ لما بأقلع النظارة مش بأشوف كويس ..هنا الرد الحاسم و الصارم و الصادم هيطلع زي عفريت العلبة ... خدلك ساتر...أو أقولك ...اهرب اهرب بسرعة.
20. بعد الأربعين نظارة القراءة ضروريه للناس اللي حتى ما بيلبسوش نظارة مشي...و ضرورية أكتر للناس اللي عندهم طول نظر...و بعض حالات قصر النظر...ودي حسب السن و مالهاش ليزك ناجح و مريح لغاية دلوقت...إلبس النظارة أريح و أوفر.
21. في معجم الترجمة لطب العيون: نظارة حفظ نظر = إذهب إلى الجحيم...ترجمة أنيس عبيد.
22. لما تكشف نظر على العلامات استخدم لغة الإشارة و حدد اتجاه العلامة بإيدك ممكن ما تتكلمش براحتك عادي...و بلاش تألف... دا اختبار نظر مش اختبار ذكاء...و مش كل الدكاترة خبراء في الاتجاهات الكونية زي مشرقة و مغربة و مبحرة و مقبلة...لغة الإشارة أسهل.
23. المستحيلات التلاتة في طب العيون : نظارة حفظ النظر، القطرة المعقِمة و العلامة اللي مش مفتوحة....كل العلاملت سبحان الله ليها فتحة و ساعات اتنين كمان...العلامة اللي مش مفتوحة دي عندها عيب خلقي و ما بندخلهاش العيادة لعدم التأهل.
24. في لونين للميه عندنا ميه بيضا و ممكن ساعات لما تقدم تبقى بني بس برضه اسمها ميه بيضا و ميه زرقا ما فيش ألوان تانية.
25. الميه البيضا علاجها عملية و ما فيش قطرة بتعالجها...خلونا ناكل عيش.
26. عمليات الميه البيضا الحديثة بالموجات الصوتية مش بالليزر لكن هناك ايضا الفيمتو ليزر .
27. الميه الزرقا ممكن تعتبرها برضه ارتفاع ضغط العين يعنى الاتنين حاجة واحده و ما بتشالش زي الميه البيضا ... ممكن تستجيب للعلاج و ممكن تحتاج ليزر و ممكن جراحة أنت و نصيبك و نصيبنا معاك.
28. شوية نكد: في حاجات مالهاش علاج لو سمعتها من طبيب العيون ...قول الحمد لله و ارضى بنصيبك زي: عمى الألوان، الالتهاب الشبكي التلوني، تليف أو ضمور العصب البصري و كسل وظيفي بالعين...بس الأمل فى ربنا إن في المستقبل ممكن يتم اكتشاف علاج للحالات دي لكن لغاية هذه اللحظة لأ على المستوى الفعلي ...لكن في بلاد بره مازالت التجارب مستمرة.
29. في حاجة كمان ما لهاش علاج و مش هيكتشفولها علاج و ما فيش منها أمل و لا عمر و هي الحالة اللي بتيجي لبعض المرضى و تخليهم يظنوا إن في حاجة اسمها نظارة حفظ النظر.
30. على فكرة قطرة الكورتيزون دي مش سم قاتل...ده علاج ليه نظام و جرعة بيحددها الطبيب المختص..عامة حتى لو بأقول لو فى ضرر أكيد هيكون أقل من الضرر اللي ممكن يحصل لو ما استخدمتوش...فبلاش لما تسمع كلمة كورتيزون تقول للدكتور بمنتهى (زيادة) الأدب معلش يا دكتور مش هأخد الكورتيزون علشان (قالولي) إنه مضر...هنا برضه لحظة من اللحظات التي قد يخرج فيها الوحش في عيادة العيون متضخما و فى الحالة دي مش هتلحق تهرب ...قبل ما تمشي من العيادة هتاخد نصيبك كامل بدون نقصان.
31. جفاف العين مش معناه إن العين ما فيهاش دموع زي حتة الطوبه...و إن الدموع بتنزل كتير في العياط فإزاي في جفاف؟ دا موضوع طويل لكن باختصار كون الدموع بتنزل كتير من العين دا ممكن يكون لأن الدموع مش بتثبت على العين و بتقع و بكدا يحصل جفاف العين...المهم خد قطرة ترطيب و هي تحلو معاك.
32. الرمد الربيعي ما بيجيش فى الربيع بس ... المريض بهذا المرض بيعاني منه طول السنة بس بيزيد في الربيع.
33. مريض السكر ...من فضلك لازم تروح لدكتور العيون يبصلك على قاع العين و لو مرة في السنة خصوصا لو السكر عدى عليه أكتر من عشر سنين حتى لو السكر مظبوط-و ده مستحيل-طول السنين اللي فاتت.
34. الرمد مش طب طوارئ...يعنى معظم الشكاوي ممكن تستنى للصبح مش لازم تصحي الدكتور في نص الليل علشان شكوى في العين إلا في أربع حلات و مش هأقول هم إيه...خليهم مفاجأة.
35. نظارة حفظ النظر دي مش من حالات الطوارئ طبعا بس لو المريض مصر عليها المريض هيتحول لزميل آخر في تخصص آخر ممكن يكون عظام أو جراحة و الدكتور هيتحول لمحكمة الجنايات.
36. الجزر بيقوي النظر...لأ...علشان الجزر فيه فيتامين أ و دا ضروري للنظر بس و خاصة بالليل و مش أكل الجزر الكتير هيقلل مقاسات النظارة لأ دا هيخليي لون جلدك يصفر ... الجزر هيخليك تشوف كويس بنظارتك لو بتلبس نظارة...و مش هتكلم في القاعدة دي تاني.
37. اتخبطت في عينك خبطة جامدة و بعديها مش شايف كويس، أو مش شايف خالص مع وجع مستمر و دم نزل من العين، عندك ميه زرقاء و فجأة ألم شديد و عيتك حمرا و مش شايف، عندك قرحة في القرنية و فجأة حسيت بألم زيادة و ميه بتنزل من العين...دي الأربع حالات اللي مش تروح فيها لدكتور عيون دي لازم تجري على أقرب مستشفى فيه تخصص عيون محترم...دي طوارئ الرمد غير كده نام و الصباح رباح.
38. الدوخة: لو دايخ الدنيا بتلف بيك و أنت قاعد مكانك يبقى تروح لدكتور أنف و أذن..أيوة تصور دى تخصصه، أما لو واقف و و أنت اللي مش قادر توزن نفسك و مش عارف تمشي فتروح لدكتور مخ و أعصاب...الرمد براءة يا معلم.
39. الشكاوي وال ردود اللي ممكن تسمعها: أنا ما بأعرفش أفتح عيني في الشمس...أرد عليك و أنا كمان...طب لما باستحمى بميه سخنة عيني بتحمر...الحمد لله ما بتخضرش...لما بأكون في البلكونة في الشمس و أدخل الأوضة و هيه ضلمة ما بأشوفش حاجة..أقولك الحل ولع النور...أول ما بأصحى من النوم ما بأشوفش كويس...مش لازم دا من رحمة ربنا بيك علشان ما نشوفش شكلك فى المراية و شكل اللي جنبك و إنتوا لسه صاحيين.
40. دكتور الرمد كيوت و شيك و ابن ناس و حبوب و مؤدب و ما تطلعش منه العيبة طول ما أنت ما طلعتش الوحش اللي جواه.....التزم القواعد اللي فوق يشهيصك و يظبطلك عينيك الاتنين .... سوقت الطناش و حبيت تجرب قابل بقى يا حلو...جبت سيرة اللي ما تتسماش اللي -أكيد حفظتوها خلاص- إعرف ساعتها إن الشيطان شاطر و اتمكن منك و منه.

وانا من عندي ، عايز أضيف دول

41. والله العظيم العدسا ت اللي بنزرعها داخل العين بتكون شفافه ومفيش عدسات بتغير لون العين علشان مش عايز واحدة تقوللي عايزه أغير لون عيني فوشيا بالمره مع عملية الميه البيضا
42. عمليات تغيير لون العين غير معتمدة دوليا و مشاكلها كتير وكل الجمعيات المعنية الدولية تحذر بشده منها، فأرجوك يا مدام وانت يا انسه لا تتهمني بعدم الاطلاع على الجديد ف العيون وتقولي أصل المغنية فلأنه عملتها في لبنان او كولومبيا ، اتفضلي حضرتك على المطار واعملي العملية في البلد اللي تعجبك و لما يجيلك ميه بيضا او زرقا بعد كام شهر ، ابقي تعالي

17/06/2017

د.محمد الشيخ يعرض الأضرارالناتجه من الاستعمال الخاطىء للعدسات اللاصقه

قال الدكتور محمد الشيخ أخصائى طب وجراحة العيون بطب عين شمس، إن العدسات اللاصقة لها بعض المميزات والعيوب..