Dr/ Asmaa Clinic

04/02/2020

عاوزين عروض عيد الحب تكون في ايه بالضبط
كل حد فيكو يكتب نفسه في عرض علي ايه🌺🌹🥰

21/01/2020

شوربة كريمة القرنبيط السريعة، صحيه شوفانيه 🍵
اه بجد قررررنبيط 😂
لو المرق جاهز والقرنبيط مسلوق ، تبقى فاست فوود 🤗
القرنبيط مسلوق ونشوحه في معلقتين زيت يكرمل
مرق فراخ بيتي متحبش لاورو ولومي وحبهان وبصل وفص توم. مع كوب صغير شوفان وحليب ، كله في الحله ونقلب كل شويه عشان الشوفان يدوب.
نتبلها ملح وفلفل وكمون. تغلي دقايق ، كله مستوي مش حتاخد وقت. نضربها بالهاند بلندر وتتقدم بالف هنا.
مشبعه جدا عشان فيها شوفان مع بروتين الحليب والقرنبيط، بيكتم 🤗
جربوها واحكوا لي.

11/01/2020

26/12/2019

كوباية حمص الشام افضل بديل لوجبة العشاء وتسد الجوووع 😍💪

و غير انه ليه فوائده للتخسيس وهي :

1• الحمص غني جدا بالألياف والبروتينات
اللي بتملي المعده وتحسسك بالشبع لفترات طويله
2• يرفع معدل حرق الدهون ويقلل من الكليسترول
3• بالنسبه للشطه والبهارات بتعلي من
معدل الحرق جدا في الجسم
4• الليمون له قدره عاليه في إذابة الدهون

طريقه عمل حمص الشام
• 2 كوب من الحمص المسلوق
• 3 معالق صلصه طماطم
• معلقه صغيره ثوم مفروم
• بهارات – كمون – شطه ⁦🌶️⁩🍾🏺
• عصير ليمون 🍋

الطريقه : ⁦
⁦ هنضيف الماء علي النار ومعاه كل المكونات
⁦ ما عدا عصير الليمون ونسيبهم يغلوا مع بعض ⁦
⁦وأخر حاجه نعصر عليه الليمون ونقدمه للأكل
وبالف هنا

25/12/2019

السحلب الدايت الطريقه
منقول من مجلة الجميله

المقادير
2 معلقة قرفة كبيرة
2 معلقة سحلب كبيرة
معلقة ماء زهر كبيرة
¼ معلقة فص مستكة صغيرة
2 كوب حليب خالي الدسم
طريقة التحضير
نسكب في قدر الحليب ونضيف إليه السحلب والمستكة ونقلب حتى تذوب المكونات .
نضع القدر على النار مع التقليب المستمر؛ حتى يثخن المزيج ثم نضيف ماء الزهر ونقلب ثانية.
نصب السحلب في الأكواب، ونرش القرفة على الوجه ثم تقدم بألف هنا وشفا.

كدا ممكن يبقى مكان وجبة الإفطار أو العشاء

23/12/2019

لا مش كيكة شوفان.. انا محدش يتوقعني 😁😁

عـــجـــة الــقــرنــبــيــط
او زي ما ضحكت على ولادي عشان ياكلوها Green Pizza 😂😂

قبل ما اكتب الطريقة خليني اقول لك ان كـــيـــلــــو القرنبيط فيه حوالي ٢٥٠ كالوري بس 😍😍

يعني قد سعرات رغيف عيش.. متخيل يعني ايه كيلو اصلا؟ 😂 😂

طب تخيل الصنية ديه لو فيها كيلو قرنبيط و ٦ بيضات.. و انتا طمعت و اكلت نص الصنية لوحدك مش هتكمل ٣٠٠ كالوري!! 😍😍

اتفضل الطريقة..
بس تدعي لوالدتي لانها صاحبة الوصفة ♥️

١- هنجيب القرنبيط و نقطع الزهور بتاعته و نسلقها في مياه و ملح و كمون (الكمون هيساعد للي خايف من موضوع الغازات 😁)

٢- بعد السلق هنضرب القرنبيط في الكبة نص ضربة و نشيه على جنب ومش لازم نضربه ممكن نهرسه بالشوكه كويس

٣- نضرب بصل ناعم في الكبة لوحده.. و بعدين نضرب شبت و بقدونس في الكبة لوحدهم الخضرة لو كتير بيكون تحفه

٤- معلقة زيت زيتون و نشوح فيها البصل لحد ما يصفر.. و بعدين ننزل بالخضرة لحد ما ريحتها تطلع.. و بعدين ننزل بالقرنبيط و ملح و بهارات و نعناع لو حابب.. و نقلب لحد ما يتجانس

٥- هنقلب الخليط ده مع البيض و فلفل اسود في طبق بارد (عشان البيض ما يستويش 😁).. و ننزل بيه بايركس او اي صنية و يدخل الفرن

و بالهنا و الشفا 😁

18/12/2019

فطار الشوفان مع الكيوي و الفراوله .. فطار لذيذ غني جدا بالاياف و الفيتامينات و النشويات الصحية بطيئه الامتصاص

كوب من الحليب + ثلث كوب نخالة الشوفان + ملعقة صغيرة قرفة + ملعقة طعام بذور الشيا .
نقلبه علي النار الخفيفة لحد ما نوصل للقوام المطلوب👌

* القرفه لزياده الحرق و طعمها الجميل
* بذور الشيا.. الياف عالية الجوده و دهون ال Omega و البروتين و مضادات الاكسده .. فعاله جدا لسد الشهية
* عين الجمل مصدر مثالي ل فيتامين ه Vit E المفيد للبشره و الشعر
* الكيوي و الفراوله فيتامينات و الياف طبيعية 😍

18/12/2019

الكيوي🥝 من الفاكهه المفيده جدااا للناس اللي بتعمل دايت👌 لان
👈سعراتها الحراريه للثمره الواحده حوالي 25 سعر حراري.
👈بتحتوي علي نسبه عاليه من فيتامين سي المهم لتقويه جهاز المناعه ومحاربه نزلات البرد والانفلونزا.
👈بتحتوي علي نسبه عاليه من الألياف الغذائية المشبعه والمهمه لعمليه الهضم.
👈كمان بتحتوي علي عناصر غذائية مهمه زي البوتاسيوم ،الكالسيوم والحديد.
ممكن تضيفيه علي زبادي وملعقه عسل نحل يكون وجبه فطار صحيه😉 ومتكامله او اعمليه عصير وضيفي عليه الجوافه والليمون🍹 كده تحصلي علي نسبه عاليه من فيتامين سي وكوجبه خفيفه بين وجبات يومك.

18/12/2019

البدنجان ياجماعه معظمنا ناسيه
مع انه خضار كويس جدا
سلطة بدنجان عبارة عن بدنجانايه مشوية
مهروسه ومعها بصلة صغيرة وفلفل الوان وطماطمايه وليمونه وبقدونس وملح وكمون وكزبرة خضراء وممكن نص رمانه
انا بحب اضيف زبادي عشان تكون وجبه متكامله سواء فطار او عشا
وبدون الزبادي بتكون سلطه مع الغدا
الاكل الهلثي مفيش اطعم منه

02/10/2019

بان كيك الكوسة شكلة زي مانتو شايفين كدا طعمة تحفة وينفع في الدايت وسعراتة الحرارية منخفضة جدا يفضل مانستخدمش كمية كبيرة من الزيوت يادوب علي قد طريقة التحضير

المكونات :-
- الكوسة: كوب (مبشورة) أو 200 جرام
- البصل : 1 حبة (مفروم ناعم) او 50 جرام
- بقدونس : ربع كوب (مفروم) او 20 جرام
- البيض : 1 حبة او 50 جرام
- شوفان مطحون : ربع كوب او 25 جرام
- ملح : نصف ملعقة صغيرة او 2 جرام
- فلفل أسود : ربع ملعقة صغيرة او 1 جرام
- زيت الزيتون : ربع كوب او معلقتين كبار

طبعاً الكميات دي تقدريبية وبتختلف ع حسب الرغبة

طريقة التحضير :-
- نسخن زيت الزيتون في مقلاية على نار متوسطة.

- نخلط الكوسة المبشورة والبصل والبقدونس والملح والفلفل جيداً.

- نضيف البيضة والشوفان واخلطي.

ونقسم الكمية علي حسب الرغبة وحجم الواحدة زي اللي في الصورة كدة

وبالهنا

لكن للشخص الواحد ممكن تاخدها كوجبة خلال اليوم مفيدة جداً وسعراتها منخفضة وهتشبع

30/09/2019

كيك الشوفان بالموز و التشوكليت شيبس

الكيك ده حيبقي جميل جدا كسناك او الفطار او للاطفال مع تعديل بسيط طعمها تحفه جدا و في نفس الوقت صحيه

لينك الفيديو في أول كومنت

السعرات الحراريه + الماكروز للقطعه في أخر البوست و في سكرين شوت في الصور

المكونات :
- موزه كبيره (100 جرام)
- كوب و ربع دقيق شوفان ( او شوفان مطحون كويس جداً ) 180 جرام
- 2 بيضه
- 4/3 كوب لبن ( 230 مللي )
- معلقه زيت جوز الهند 10 جرام
- نص معلقه قرفه و ملح
- معلقه كبيره فانيليا
- معلقه كبيره بيكينج باودر
- معلقتين سكر دايت ( او 3 معالق عسل أبيض لو للاطفال )
- 2 معلقه كبيره جنين القمح 20 جرام ( أختياري)
- دارك تشوكليت شيبس ( 30 جرام)

الطريقه :
تهرس الموزه جيداً ثم نضيف المكونات السائله ( البيض / الفانيليا / السكر او العسل / اللبن / الزيت ) و نخلط جيداً

نخلط المكونات الجافه معاً ( دقيق الشوفان / القرفه / الملح / البيكينج باودر / جنين القمح )
ثم ننخل المكونات علي الخليط السائل و نخلط جيداً حتي يكون قوام الخليط سميك
اذا كان قوام الكيك مازال سائل نضيف قليل من دقيق الشوفان

نخلط التشوكليت شيبس مع الخليط ثم في قالب الكيك يكون مبطن بورق الزبده و مدهون زيت لضمان خروج الكيك بسهوله بعد التسويه نصب الخليط و نزينه بقليل من التشوكليت شيبس ( اختياري )

يكون الفرن مسخن مسبقاً لمده 10 دقائق و يكون علي درجه حراره 170
يوضع الكيك لمده من 30 ل 35 دقيقه
مع عدم فتح الفرن عليه حتي لا يهبط الكيك
بعد مرور نص ساعه يمكن ان نفتح الفرن و نتأكد ان الكيك نضج بغرس عود خشبي من جانب الكيك الي المنتصف .. اذا خرج العود بعجين تترك 5 دقائق أخري

بعد خروج قالب الكيك يترك ليبرد تماماً قبل التقطيع

قالب الكيك قسمته الي 8 قطع
السعرات الحراريه في القطعه = 162 سعر حراري
الماكروز :
بروتين = 7.1 جرام
كارب = 22 جرام
دهون = 5.5 جرام