30/11/2025
اشمعني في اخر سنتين مشاكل المدارس زادت بالشكل ده وبالعكس بقيت بتوصل لجرائم
في اعتقادي أن ده سببه أن الوزير من ساعة ما دخل الوزارة وهو عنده ترجيت واحد عايز يحقق وهو أنه يرجع للمدارس كثافتها الكاملة بعض النظر عن استيعاب المدارس للترجيت ده بالعكس هو اتشقلب عشان يسد كل العقبات اللي تقابله في طريق تحقيقه للترجيت ده
1.الزم ولي الأمر اللي اصلا منفوخ من الدروس والمصاريف أنه ينزل ولاده يوميا المدرسة وده بقي يخلي ولي الأمر اللي كان عنده اولاد في مراحل أولي وتانية ب أو ثانوي مينزلوش ويرحموه من مصاريف مواصلات ومصاريف للعيل يوميا أنه بقي ملزم ينزلهم ويدفع التكلفة دي طول السنة
2.خلي المدرس اللي كان بيشم نفسه بغياب الولاد المشاغبين ومكنش يشوفهم غير في امتحانات الشهر بقي مبتلي بيهم يوميا والعيال اصلا لا جايه تسمع شرح ولا نيلة هو بس خايف علي التقييم والغياب
3.خلي الولاد اللي كانوا بيروحوا المدرسة يتعلموا بجد مش عارفين يحققوا ده بالعكس سلوكياتهم اتأثرت بالمشاغبين اللي كانوا مرتاحين منهم
4.حمل علي المدرسة من اول المديرين لحد العمال شغل فوق طاقتهم وبدون اي مقابل غير ابتلاءهم بمتابعات مستمرة تحط عليهم اكتر ماهو محطوط
5.افقدت الامتحانات هيبتها للطالب بعد ما كان بيذاكر طول الشهر عشان الامتحانات بقي بيمتحن كل يوم فمبقيتش فارقه معاه
برافو سيادة الوزير حضرتك حققت التارجت علي حساب الطالب وولي الأمر والمدرس
وفي النهاية...
زودت الضغط النفسي علي الطلاب وأهاليهم والمدرسين مبقاش حد طايق نفسه
لاغيت التربية ولاغيت التعليم وحولتها لمقاولين انفار
زودت معدل الجريمة للأحداث بشكل شبه يومي في الجمهورية كلها
لبست طاقية ده لده من تطميع المدرسين في حوافز مبتتصرفش وشباب عينته بالحصة ومبياخدش حاجة عشان الكل يشيل ونبقي نتقابل في الاجازة بقي بوجود جديده وخوازيق سنة جديدة
حضرتك المفروض كنت تمسك وزارة الاستثمار
شابوه سيادة الوزير 👏👏
