25/05/2026
فيه مغالطة منتشرة جدا في اي نقاش
ديني او صحي او اجتماعي
اول ما تقول الشيء ده له اضرار
تلاقي الرد فورا اه يعني انت بتحرمه
ياسيدي محدش حرم بنقول في ضرر
او الرد الاشهر
بس النبي ﷺ كان بيعمله أو بياكله
وده خلط خطير جدا بين التحذير من الضرر واصدار حكم شرعي بالتحريم
وبين فعل النبي ﷺ
والاستخدام الخاطئ لفعل النبي خارج سياقه
طيب خلونا نفهم بهدوء
وجود ضرر في شيء لا يعني انه حرام بالضرورة
لان لو طبقنا القاعدة دي حرفيا يبقى لازم نقول ان
كثير من الأدوية اللي لها تأثيرات ضارة حرام
السهر حرام
السكر حرام
الملح حرام
الموبايل حرام
الجلوس الطويل حرام
وقلة الحركة حرام
مع ان الواقع والشرع اوسع وادق من التفكير السطحي ده
الطب بيتكلم عن نسب ضرر واحتمالات وافراط وظروف صحية وفروق فردية
اما التحريم الشرعي فله ضوابط نص شرعي او ضرر محقق غالب شديد او افساد واضح معتبر
فمجيش اقولك الحاجة دي فيها ضرر تقولي انت بتحرم كذا😏
انت كدا اللي بتحرم مش أنا🤨
مش اي حاجة فيها نسبة ضرر تبقى محرمة
و الكارثة الاكبر ان بعض الناس اول ما طبيب يقول الشيء ده في ضرر لبعض الناس او الاكثار منه مضر
يرد فورا بس النبي ﷺ كان بياكله او يشربه او يستخدمه
النبي ﷺ عاش في بيئة مختلفة وطعام نضيف ومختلف وزراعة مختلفة ونمط حياة مختلف وحركة بدنية مختلفة وخلو من الهرمونات الصناعية والاضافات الحديثة والتصنيع الحالي
فانت مش بتقارن نفس الشيء اصلا.
وكمان فيه فرق بين ان الشيء كان مباحا وبين انه مناسب لكل شخص وكل زمان وكل كمية وكل حالة صحية
والنبي ﷺ كان يحب بعض الاطعمة فهل ده معناه ان اي شخص عنده حساسية او مرض او سمنة او مشاكل صحية يتجاهل الطب بحجة النبي كان بياكلها
ده مش فهم صحيح للدين
بل ان الشرع نفسه امرنا بالاخذ بالاسباب وعدم الاضرار بالنفس
قال تعالى ولا تلقوا بايديكم الى التهلكة
وقال النبي ﷺ لا ضرر ولا ضرار
وفيه قاعدة فقهية عظيمة الضرر يزال
لكن الناس احيانا تستخدم الدين في غير موضعه وتحول اي نقاش طبي لمعركة انت بتحرم الحلال
مع ان الشخص اصلا ماحرمش حاجة
هو فقط قال فيه ضرر او خفف او مش مناسب لبعض الحالات
وده طبيعي جدا
وفيه مغالطات بتحصل هنا لازم نفهمها
اول مغالطة مغالطة الرجل القش
انت تقول( س)مضر
هو يرد انت بتحرم الحلال
مع انك ماقلتش كده اصلا
ثاني مغالطة القفز للاستنتاج
يعني افترض ان كل ضرر يساوي حرام
ودي قاعدة غير صحيحة
ثالث مغالطة الاحتكام للدين بشكل خاطئ
ودي لما يستخدم شخص فعل النبي ﷺ خارج سياقه العلمي والفقهي والطبي
فعل النبي ﷺ دليل على الاباحة لكن مش معناه الغاء اختلاف الاجسام والامراض والزمان وطبيعة الطعام الحالية
رابع مغالطة التعميم
لان اللي يناسب شخص قد يضر شخصا اخر
وفيه فرق بين المباح والمفيد والمناسب صحيا والمحرم
مش كل مباح لازم يكون مناسب لكل الناس
ومش كل نصيحة صحية معناها تحريم.
