14/09/2025
❤️💙 يعني إيه الحزام الناري؟
الحزام الناري مرض منتشر جدًا، لكنه للأسف مظلوم في التوعية، وكتير من الناس بيجهلوه أو بيتشخص غلط، رغم إنه مؤلم جدًا وممكن يسبب مضاعفات خطيرة. والأهم من كده إنه ليه وقاية وعلاج.
✅ القصة من البداية:
معظمنا وإحنا صغيرين جالنا مرض "الجديري المائي – Chicken Pox"، واللي بيسببه فيروس اسمه Varicella-Zoster Virus.
الغريب إن الفيروس ده بعد ما الواحد يخف مش بيموت ولا بيخرج من الجسم، لكنه بيتخزن جوا الأعصاب ويفضل ساكت لسنين طويلة.
❤️💙 إزاي بيرجع الفيروس من تاني؟
لما مناعة الجسم بتضعف لأي سبب:
✅قلة نوم.
✅إرهاق وتوتر نفسي.
✅أمراض مزمنة.
✅أدوية مثبطة للمناعة.
✅أو حتى التقدم في العمر.
الفيروس بيصحى تاني، لكن مش في صورة "جديري"، المرة دي بيرجع باسم:
➡️ الحزام الناري – Shingles
❤️💙 الأعراض والعلامات:
✅بيظهر في نصف واحد من الجسم فقط (يمين أو شمال).
✅ألم شديد جدًا، وناس كتير وصفوه إنه أصعب من وجع الكلى أو الغضروف.
✅بعد أيام من الألم يبدأ طفح جلدي يمشي على مسار العصب: حبوب ملتهبة فيها سائل وبتتقشر.
✅ من الممكن ان يظهر بالوجه و لو أصاب عصب العين ممكن يعمل مضاعفات خطيرة على النظر.
✅في بدايته ممكن يتشخص غلط لأنه بيبدأ بألم فقط قبل ظهور الطفح.
❤️💙 الوقاية:
الوقاية أهم وأبسط من العلاج.
الأشخاص الأكثر عُرضة:
فوق سن الـ٥٠ .
أصحاب المناعة الضعيفة.
اللي بياخدوا أدوية مثبطة للمناعة.
الحل: تطعيم اسمه Shingrix، متوفر في مراكز التطعيمات زي "المصل واللقاح"، وده بيقلل جدًا فرص الإصابة أو يخفف حدة المرض لو حصل.
❤️💙 العلاج لو حصلت الإصابة:
✅أهم حاجة: زيارة طبيب جلدية فورًا أول ما يظهر ألم غير طبيعي في نصف واحد من الجسم.
✅التشخيص المبكر بيفرق جدًا، لأن الدوا لازم يتاخد في أول أسبوع.
✅الأدوية:
Acyclovir 800mg كل ٤ ساعات (٥ مرات يوميًا) لمدة أسبوع.
أو Valcyclovir 1000mg ثلاث مرات يوميًا لمدة أسبوع.
مسكن قوي زي Brufen.
غسول موضعي Potassium permanganate 1/8000 للطفح الجلدي.
❤️💙 الخلاصة:
أي وجع مفاجئ، شديد، ومتركز في جنب واحد من الجسم + ظهور طفح جلدي بعده = احتمال كبير يكون حزام ناري.
الوقاية بالتطعيم مهمة جدًا خاصة لكبار السن وأصحاب المناعة الضعيفة.
العلاج المبكر يقلل الألم ويمنع المضاعفات.
ربنا يحفظكم جميعًا، ويعافي كل مريض، ويديكم الصحة والعافية دايمًا
