CDF continuous development foundation مؤسسة التطوير المستمر للتنمية

20/12/2025

❤️👍

07/12/2025

ما فيش حاجه اسمها نسيان لاي خبره او عاطفه او تجربه بيمر بيها الانسان و لا بتروح ولا بتتنسي مهما حصل ..
و بتظهر في اي شكل من الاشكال زي اوقات الغضب او الاحلام او فلتات اللسان او في تصرفاتنا اليوميه ..
كل الحكايه اننا بنحط تراكمات على تراكمات مع مواقف الحياه اليوميه فالذكريات بتروح للمخزن البعيد و بنعتقد انها اتنست أو اختفت ..
لكن الاكيد انها بتفضل موجوده و مش بتتنسي ولا بجلسات ولا بأدويه ولا مع مرور الايام وبتفضل في المخزن العقلى .
تحياتنا للجميع 🌹
مؤسسة التطوير المستمر للتنميه 🌿

17/11/2025

بدأنا المحاضره التمهيديه للاباء والامهات فى كورس تعديل سلوك للطفل والمراهق ( المستوى الاول ) وهنبدأ اول محاضره فى الكورس يوم الخميس القادم ، والاشتراك الان متاح للجميع 🌹
هنبدأ من الخميس ٢٠ / ١١ من الساعه ٩:٣٠ ص الى ١٢:٣٠ ظ

❤️ الكورس قوى جدا و مخصص للاباء والامهات و طلبة الكليات والخريجين من جميع التخصصات ولكل المهتمين بالطفل والمجال النفسي و التربوى ..

✌️ هدف الكورس اننا نتعلم و نعرف اكتر عن اولادنا وصناعة مستقيل افضل ليهم وتعرف التكوين النفسي للطفل واحتياجاته واسباب كل سلوك بيصدر منه وطريقة تفكير المراهقين و تدريبك على تعديل السلوكيات الخطآ حسب علم النفس الحديث ..

معادنا هيكون كل يوم خميس فى نفس التوقيت لمدة ٨ محاضرات وتدريبات .

✍️ محتوى اليوم : محاضره + بريك + محاضره بإجمالى ٣ ساعات لليوم و التدريب يوم واحد فقط فى الاسبوع .. بالقاعه المكيفه .
و الحضور متاح للجميييع ولا يشترط مؤهل دراسى معين .

💚 محتويات الكورس لفائدتك وفائدة اولادك و شغلك👇

‏👈 التكوين و التطور النفسي و العقلى و الجنسي و اللغوى عند الاطفال
‏👈 لماذا يغض اطفالنا وبستخدموا العنف والشتائم ، وطرق علاجه
👈 اسباب ضعف الثقه بالنفس عند الطفل والمراهق وطرق العلاج وتقويه الثقه بالنفس
‏👈 لماذا تظهر الغيره عند الاطفال وطرق علاجها
‏👈 الطفل المنطوى والخجول بزياده هنعرف الاسباب والعلاج
‏👈 مشكله التبول اللا ارادى اللى بتواجه بيوت كتير ، ايه اسبابه وطرق علاجه
‏👈 ازاى بتظهر الاضطرابات الجنسيه عند الاطفال والمراهقين و ايه اشكالها وازاى نعلاجها
‏👈 مرض الكذب الموجود كثير عند الطفل والمراهق والكبار وانواعه و اسبابه و ازاى نعالجه .
‏👈 ايه معنى التخريب عند الاطفال ، و ليه بيخرب الطفل ، وطرق علاج المشكله .
‏👈 هتكلم كمان عن مرض السرقه عند الاطفال والمراهقين واسبابه وطرق العلاج
‏👈هتكلم عن مرض التهتهه ( التلعثم ) اللى محير المتخصصين والاباء والامهات ، هتكلم عن اسبابه و ازاى نعالجه بشكل علمى .
👈 الفزع الليلى وقلق النوم عند الطفل والمراهق والكبار واسبابه وعلاجه.
‏👈 هنتعرف على صفات المراهق فى المرحله دى و ازاى بيفكر والتغيرات النفسيه والسلوكيه و ازاى بيفكر .
👈 وهتكلم عن القلق و التوتر عند اولادنا فى المراهقه
‏👈 السيكوباتيه و العدوانيه فى مرحلة المراهقه و ازاى بتتكون و اشكالها وازاى نعالجها .
‏👈الشعور بالوحده النفسيه عند المراهق وتتصرف ازاى لو ابنك المراهق عنده شعور بالوحده النفسيه و ازاى تساعده يتخلص منها ويعالجها قبل ماتقضى عليه ..
👈 طرق التعامل السوي والسليم بشكل عام مع اولادنا فى مرحلة المراهقه

❤️ والمجموعه اللى هتبدأ هتكون متميزه ومختلفه ❤️

🎁 و هيحصلوا على امتيازات كتير 🥰👍 تعالوا اقولكم على الامتيازات :-

👈 اولا : كل متدرب هيحصل على شهاده مجانيه معتمده من المؤسسه تفيد اجتيارك الدبلومه 🎁
👈 ثانيا : كل متدرب هيحصل على كتاب ( محاضرات فى علم نفس النمو والتربيه 🥰
👈 ثالثا : كل متدرب هيحصل على #هديه فى اول محاضره 🥰🎁
👈 رابعا : هيكون فى #هديه وهتكون مفاجأه فى نهاية الكورس للجمييع 🎁❤️
👈 خامسا : فرصة تدريب و عمل بالمؤسسه للمتميزين بالكورس 🌹

🌿 الاستفسار واتس على الرقم ٠١٢٠٢٠٣٧٩٨٨ وهتجيلك تفاصيل اكتر .. او فون على ٠١٢٨٤٤٩٥٧١٠ ـ ٠١٠٩٠٨١١٠٩٣ .

الاشتراك متاح للجميع وبدون شروط : اباء ، امهات ، اخصائيين اجتماعيين ، اخصائيين نفسيين ، مدرسين ، مشرفين الحضانات ، وكل المهتمين بالمجال ..

العنوان : ٤ شارع ترعة التوفيقيه ، عزبة النخل
CDF continuous development foundation مؤسسة التطوير المستمر للتنمية
*** مواعيد العمل يوميآ من ١٠ ص الى ١٠ م ماعدا الجمعة

مع امنياتنا بالتوفيق للجميع 🌹
مؤسسة التطوير المستمر للتنميه CDF 🌿🌿🌿

30/10/2025

انتحار الشباب وإيذاء انفسهم بسبب لعبة روبلكس 👇

26/10/2025

اهم و اخطر ٣ اسباب بتهلك نفسية الطفل والمراهق وتزود معدل الجريمه والانتقام والعنف عنده :
اول سبب هو الجوازه الغلط من اتنين عتدهم مشاكل نفسيه وافكار غلط عن الجواز اصلا ولا واحد فيهم يعرف حاجه عن احتياجات الاخر ، وغير مؤهلين لتكوين اسره وبيت ولا معنى اطفال وتربيه ،

وهنا الطفل يعيش فى بيت عنيف وعصبى طول الوقت مع الخلافات المستمره قدام اولادهم واللى بتؤدى احيانآ للتطاول بالالفاظ والايد او الطلاق ، وطبعا كله بيتم قدام الطفل ..

و تانى سبب هو غياب الام عن البيت واولادها تماما أو لساعات طويله كل يوم ومافيش اهتمام ولا رعايه حقيقيه ،

و تالت سبب هو غياب دور الاب اللى بطبيعة الحال طول اليوم برا البيت وميعرفش حاجه عن عياله من بداية لنهاية اليوم بدون اهتمام ولا متابعه ..

وفى الحادثه دى التلات اسباب موجودين فى اسرة الولد الجانى .. والنهايه بقت الطلاق ز مافيش اب ولا ام
و فى رأيي اعتقد ان الجانى اختار ولد غالبا مش بيحبه وممكن تكون بتتوفر فيه مواصفات ( الاسره المستقره ) يعنى عايش مع ام و اب وبيت ومبسوط ،،
وده سبب كافى يخليه يقارن بين حياته وحياة طفل زيه ،
و يكرهه و ويغير منه و يفكر ينتقم ويخرج كل مشاعر الرفض للواقع ، والعدوانيه اللى جواه تجاه امه اللى سابته خالص هو واخته ،

و ابوه المشغول والغايب طول الوقت .. لحد ماوصل بيه الحال انه يقتله ويقطعه ويحطه فى اكياس ،، و يطبخ حته من جسمه و ياكلها ..
و كمان شال حته فى التلاجه علشان لما يفتكر مشاعر الانتقام دى تانى يسويها ويكمل اكل ..

ايه ده !!؟؟ ايه العنف والعدوان والكراهيه دى !؟؟
واتعملت واتكونت فى كام سنه ؟

الجريمه دى بتفكرنى بالجرايم اليوميه الصغيره اللى بيعملها الطفل واحنا مش بنهتم بيها ، احيانآ الحكايه بتبدأ كده ..
زي الفتنه على زمايله ، او انه يسرق من زميله او البيت ، او يضرب زمايله من غير سبب ، او قتل القطط والكلاب او ضربهم وتعذيبهم ، او الكذب اليومى الكتير اللى بيكذبه المراهق علي بابا وماما ، او ترك المنزل ، او التهديد بالانتحار ..
وغيرها من السلوكيات اللى وراها رسايل مخفيه محتاجه اهتمام وتركيز وتغيير وعلاج ..
الفرق فى الحادثه دى ان مستوى العنف والشراسه والعدوان زاد مع زيادة الاسباب و ادمان الالعاب العنيفه على الانترنت وعدم وجود متابعه ولا رقابه على التعامل مع الموبايل ، وعدم وجود الاب والام ولا الحب والدعم والاهتمام اليومى الطبيعى ..
🌿 وفى ختام كلامى ارجوكم التركيز والاهتمام مع ابنائكم و تقديم الحب باستمرار و الرفق بيهم ..
تحياتى د . عاطف خلف 🌿🌿🌿

30/09/2025

هو طفل صعوبات التعلم مش بيحب يذاكر ليه ؟
✍️ مش لانه كسلان ،، لأ
ولا علشان قاصد يضايقك .. برضو لأ
لكن زيه زى اى حد بيهرب من الحاجه الصعبه عليه ومش بيحب يعملها ..
و المعنى الوحيد لتصرفاته دى ان فدراته ضعيفه على الفهم
و محتاج طريقة مختلفة ومبسطه في التعلم والشرح ..
و محتاج حد يفهم حالته ..
و محتاج للتشجيع والدعم و ساعتها هيقدر ينجح ويكون افضل .
مؤسسة التطوير المستمر للتنميه CDF
معاكم لحد التفوق 🌿🌿🌿

24/09/2025

❤️👍

هو انتوا بتكونوا فين لما اولادكم ببقرروا الانتحار وكمان بيقدروا ينفذوا ده وينهوا حياتهم بالشكل البشع ده .. !!؟

كل كام يوم وجع و اكتر من حاله انتحار او اختفاء ووجع قلب ودمار اسره وعائله ومجتمع ودموع .. انتوا ليه كده لييييه ؟؟؟؟؟؟؟!
👈 شويه الاب مشغول و يقولى مش فاضي اقعد مع عيالى ..
ده هروب و مافيش حاجه اسمها كده انت مسئول عن اسرتك ( زوجتك وابنك وبنتك وبيتك ) وسلامهم النفسى وحياتهم وروحياتهم واشباعهم ..
والمفروض ان ده هدفكم من والزواج اصلا زوجه وبيت واولاد ولا ايه ؟ !!!
لكن مافيش حاجه اسمها انا مهمتى اجيب فلوس وبس !!!
👈 و انت عارف انك بتفضى نفسك لما بتحب تفضى نفسك وانا وانت عارفين كده كويييييس اوى ...

وشويه الام مشغوله ونزلت تشتغل وبترجع اخر اليوم علشان تحقق طموحها او تساعد فى الماديات .. ده مش دورك يامدام حضرتك ام ،،

وياترى اولادكم بيكونوا فين ؟؟ بنتك وابنك بيكونوا فين ؟
و لو مراهقين بالأخص بيكونوا متلغيطين و جعانين اهتمام واحتواء وفهم وحب ، ومحتاج اب يسمعه ويعرف تفاصيل يومه تفصيله تفصيله و الكبيره والصغيره ، ويجاوب اسئلته ويهتم بصداقته و تقضى وقت معاه وتشارك افكاره ومشاعره واهتماماته بكل انواعها المهمه والتافهه ..

😔 الموضوع خطير ياجماعه وصادم وبيتكرر كتير ،،
و الكلام و الرساله دى إنذار لكل اب و ام تراجعوا نفسكم وعلاقتكم باولادكم وبناتكم قبل فوات الاوان ،، 😔

لما ولد يسيب رساله مبحبش ابويا وميمشيش فى جنازتى !!
و ولد تانى يقول قسوة ابويا هى السبب !!
وبنت تكتب انا معرفش اهلى خلفونى ليه طالما مش فاضيين ليا ولا اكنى عايشه معاهم !!
واللى سابت رساله قبل موتها انا محدش بيحبنى ولا عايزنى !!!
واللى سابت لاهلها ورقه بتقول مش بحبكم لانكم بتكرهوا بعض وبتكرهونى وتعبت منكم !! واكتر واكتر .....

وكل اللى مات كان متألم اكتر منكم .. ياترى كل ده معناه ايه ؟ ها ؟ ومين المسئول ؟؟؟
كل ده معناه ايه ياماما و بابا ؟؟

👈 ياجماعه جوع البطن اهون من جوع الاهتمام و المشاعر والتركيز معاهم والحوار والمشاركه ،،
👈 جوع الاهتمام ..
وجوع الحب ..
وجوع المشاعر ..
والجوع من وجود الاب بعد مواعيد شغله ..
والجوع للدفئ الاسرى والمحبه والحوار مع اولادمم
وجوع لوجود للام المشغوله باولادها نفسهم مش اهتمام باحتياجاتهم اليوميه ومذاكرتهم وبس ..
والجوع لوجود ربنا فى البيت كل يوم والصلاه اليوميه مع بعض .

يشبعوا احسن بدل ما يصاحبوا المخدرات ، والسجاير ، و النت ، والعلاقات المشبوهه ، والالحاد ، والقمار ، والشارع ، وافكار الانتحار ، والاحباط ، واليأس ، والاحساس بالوحده ، وتناقض المشاعر ...

👈👈 كل يوم وكل جلسه نفسيه او اسريه بقول بحزم وبكرر اوعى تخلى ابنك يسقطلك من حساباته لانك هتندم واولادكم هيضيعوا بسببكم ..

وساعتها الندم ومش هيفيد و لا الشغل ولا الفلوس ولا اصحابك ولا كل مشغولياتكم ولا ولا اى حاجه ..

✍️ يا كل أب من فضلك :
ابنك محتاج اهتمامك ( حضورك وكلامك وحوارك وحزمك وحبك و خروجكم سوا ولعبكم سوا و استماعك واهتمامك ومشاركتك 🙏

✍️ يا كل ام من فضلك :
بنتك وبيتك هى مهمتك الاولى و مش دورك الاساسى تشتغلى وتكملى احتياجاتكم الماديه ،
ولو لزم الامر يكون لساعات محدوده مش طول اليوم برا البيت و سايبه اولادك ،، وجودك وتركيزك واهتمامك بيهم اهم من اشباع الاحتياجات الماديه.. 🙏

🌿🌿🌿🌿🌿🌿🌿

👈 انتم المسئولين و خليكم فاكرين ان على أد الحب والاهتمام اللى اولادكم منتظرينه منكم ومش بيلاقيه ،،،، على أد التحول السلبى اللى بيحصلهم و التعب والالم اللى بيمارسوها على نفسهم أو علي المحيطين ..

اتمنى الاستفاده للجميع ..
والمشاركه والاهتمام ..
و السلامه لكل اولادنا والحكمه للجميع ..
بقلمى ✍️ د . عاطف خلف 🌿
دكتوراه علم النفس السلوكى

22/09/2025

المقارنه تحبط و تقتل التفكير والاجتهاد والابداع ..
متقارنوش اولادكم بغيرهم لان كل طفل له قدرات دراسيه وعقليه مختلفه ومتنوعه عن غيره 🌿🌿🌿

19/09/2025

افعال الطفل الهستيرى 👇 🤍

👈 مش عارف سبب بكاء وصراخ ابنك لساعات طويله ؟؟!!
👈 و اوقات من غير دموع ؟؟!!
👈 مش عارف ليه وقت المذاكره او وقت نزول المدرسه اوالحضانه بيرفض و بيفضل يرجع او يمغص وساعات يسخن ؟؟؟!!!

👈 هكلمك انهارده عن ( الهستيريا عند الاطفال )
🌿 مين هو الطفل الهستيرى ؟؟!
🌿 و ايه اللى بيخليه يصاب بالهستيريا ؟؟!
🌿 و ليه اطفال بتظهر عليها الاعراض الهستيريه واطفال لأ ؟!
👈 الطفل الهستيري أو طفل العصاب الهستيري هو طفل مصاب بحالة مرضية بتؤدي بيه الى المبالغة فى التعبير عن مشاعره بكل أنواعها ..
و سواء مشاعر الخوف الشديده من ابسط الاشياء او مشاعر الرفض لمهمه معينه او الغضب الشديد لاسباب لاتستدعى ،
او مشاعر الفرح والسعاده فى مواقف بسيطه وعاديه فيضحك ويتحرك بشكل هستيرى مبالغ فيه ، او يبكى بكاء هستيرى .. ويستمر فى هذا الضغط لساعات ..

الطفل الهستيرى بيفهم كويس جدا ودارس الموقف ومفاتيح الكبار و بيعبر دايمآ بفيضان وبطريقه غير متوازنه ،
لكن مع الوقت غصب عنه بيكون صعب عليه او على اللى بيتعاملوا معاه السيطره على الاعراض الهستيريه دى فى وقتها ..

لانه عصاب بيظهر بشكل غير متوازن وبيتم تصنيفه انه أحد الأساليب العقلية الدفاعية اللى بيستخدمها عقل الطفل في مواجهة او حل بعض المواقف الحياتيه اللى بتقابله ..

🌿 طيب ليه الهستيريا بتظهر عند بعض الاطفال دون غيرهم ؟؟

فى اكتر من سبب بيخلقوا عصاب الهستيريا عند الطفل :

🌿 وهتكلم عن أهمهم :
وهو الاهتمام الهستيرى المبالغ فيه طول الوقت من الام او الاب او من الاتنين :
لو اتنفس نفس زياده ، لو كح ، لو هرش ، لو رمش بعينيه ، لو اتحرك ، لو عمل شقاوه ، لو بص يمين او شمال ، لو سهر ساعه زياده ، لو عيط ، لو نط ، لو لعب ، لو حط صوباعه فى ودنه ..
وهكذا ...
وهنا التركيز بشكل زايد و دقيق مع تصرفات كلها تلقائيه وعاديه لاتستدعى التركيز عليها ..

🌿 ف بيتخلق جوا الطفل الشعور بالمراقبه من الاخرين و يبدا هو كمان يركز على كل افعاله وبيشعر انها مهمه وخطيره ،، ويترجم كل ردود فعل الكبار انها طبيعيه ولازم يحصل منهم كده طول الوقت ،،

والكارثه المخفيه انه بيتوقع من كل الكبار ( المدرسين والاخصائيين و الاقارب ) انهم يعملوا نفس التصرفات ونفس الاهتمام الزايد وإذا محصلش بتحصل عنده مشكله كبيره و ازمه ..ازاى الشخص ده مش بيقدملى نفس الاعتمام المرضى اللى بتقدمه ماما ؟!

🌿 وهنا الاعراض بتبدأ تظهر على الطفل لو تم اهماله دقايق ..
و بتبدأ الثوره الهستيريه عند الطفل تحصل من اجل الحصول على نفس المكاسب ونفس مستوى الاهتمام و للفت النظر بكل الطرق ،،

🌿 فيعيط بصوت عالى ومزعج أو يضحك بشكل هستيرى ملفت للجميع او يدعى التعب او المرض احيانآ كحيله لرفض تحمل المسئوليه بطريقه مشروعه والكل يقبلها ..
زى ( المغص أو السخونه او الترجيع )

وطبعا الام او الاب للأسف بيصدقوا ان فى مشكله خطيره لانهم من البدايه مدققين ومهتمين بزياده جدا ، ولازم يتحركوا و يحلوها فورآ بخوف ورعب غير طبيعى ..

ويجبرهم انهم يقدموا اهتمام مضاعف اكتر من الاول كنوع من التأديب والرعب ، لانهم اهملوه دقايق او طلبوا منه التزام معين لايرغب فيه ..

🌿 طيب هل فى علاج للاعراض الهستيريه ؟
ايوه طبعا .. عن طريق جلسات الارشاد الاسرى للوالدين ( العلاج النفسى العائلى ) والجلسات النفسيه المتخصصه للطفل .

🌿 ايه هى خطورة عدم العلاج ؟
اذا لم يتم علاج الطفل مبكرآ بتزيد الاعراض الهستيريه وغالبآ بيحصلها تحويل جسمانى ،، يعنى تظهر اعراض نفس جسميه على الطفل زى : العمى الهستيرى ، الشلل الهستيرى ، البكم الهستيرى ، الترجيع الهستيرى .. و اعراض تانيه هستيريه تحوليه جسمانيه كتير ممكن تحدث فى حالة عدم التدخل العلاجى المتخصص ..

🌿 تحياتى ، واتمنى الاستفاده والسلام النفسى للجميع 🌹
بقلمى د . عاطف خلف 🌿
دكتوراة علم النفس السلوكى 🌿
للاستشارات : ٠١٢٨٤٤٩٥٧١٠ ـ ٠١٠٩٠٨١١٠٩٣ ـ ٠١٢٠٢٠٣٧٩٨٨

17/09/2025

و ايه المشكله لما نصور كل لحظات حياتنا واسرتنا وبيتنا ونشاركها مع كل الناس ونفرجهم علينا 😳😏 !!!

08/09/2025

فلوريان اسحق،أول مصرية تفوز بجائزة أفضل دكتوراه في الصيدلة في منطقة باريس

حصلت فلوريان اسحق على جائزة Prix Solennel de Thèse de la Chancellerie des Universités de Paris في ديسمبر 2024، لتصبح أول مصرية تفوز بهذه الجائزة الرفيعة لأفضل دكتوراه في الصيدلة في منطقة باريس.

فلوريان اسحق صيدلانية شابة، حصلت على درجة البكالوريوس في الصيدلة من الجامعة الألمانية بالقاهرة عام 2018، ثم واصلت دراستها العليا في فرنسا، حيث تخصصت في تصميم الأدوية باستخدام تكنولوجيا الكمبيوتر، وحصلت على درجة الماجستير بتفوق.

في عام 2023، حصلت على درجة الدكتوراه من Université Paris Cité برسالة رائدة بعنوان: “الأجسام النانوية المستهدفة لمستقبلات mGlu كعوامل مبتكرة لعلاج الفصام”. اعتمدت أبحاثها على طرق استخدام الكمبيوتر لتحليل ودراسة وتطوير الأجسام النانوية التي تستهدف مستقبلات mGlu لعلاج اضطرابات نفسية معقدة مثل الفصام.

خلال مسيرتها في الدكتوراه، حصلت د. فلوريان اسحق على عدة جوائز في مؤتمرات دولية.

في عام 2024، مُنحت جائزة Solemn Thesis Award المرموقة من Chancellerie des Universités de Paris، والتي تُعد تكريمًا بارزًا للتميز الأكاديمي والعلمي. تُمنح هذه الجائزة لأفضل رسالة دكتوراه في الصيدلة في منطقة باريس. وكانت هى الوحيدة من مصر التي تُكرّم في الحفل الذي أُقيم في 3 ديسمبر 2024 في جامعة السوربون في باريس.

بشغفها بتطوير البحث الطبي، د. فلوريان إسحق ملتزمة باستخدام أحدث التقنيات في اكتشاف الأدوية، وتسعى باستمرار لتطوير مجالات البحث العلمي.

31/08/2025

👍👍