22/11/2025
على الأصل دور 💜
في زمن كله سرعة ومجاملات، تلاقي ناس كتير لابسين أقنعة متفصلة بالمقاس… واحد قناع اللطافة، وواحد قناع الجدعنة، وواحد قناع إنه “اللي مفيش زيه”. ومع أول موقف حقيقي، القناع يقع… والوش الأصلي يطل، مهما حاول يستخبى.
وعلشان كده بيقولوا: على الأصل دور.
الأصل هو اللي بيبان من غير ما يقصد صاحبه.
هو رد فعله التلقائي، طريقته وهو زعلان، كلامه وهو غضبان … الأصل مابيكدبش، لأنه مش تمثيل ولا مجهود، ده الطبع اللي اتربى جواه.
تلاقي حد أول ما تعرفه تقول: “ده لطيف”، وبعد شوية مواقف، تكتشف إنه لطيف لمصلحته… فرق كبير بين حد بيعمل الحلو علشان طبيعته، وحد بيمثل الحلو علشان يكسب بيه.
على الأصل دور يعني تشوف الشخص بيتصرف إزاي لما ماحدش يكون شايفه.
شوفه بيعامل الضعيف إزاي.
شوفه بيكرم علاقاته ولا بيستسهل يبيع.
شوفه بيعتذر وقت الغلط ولا بيزوغ.
دي الحاجات اللي تكشف أصله أكتر من ألف كلمة.
وإنت كمان … خليك على أصلك.
لو طيب، ماتتغيرش علشان حد ماقدرش.
لو قلبك أبيض، ماتتكسفش من نقاءك.
اللي يستحقك هيلقيك و هيصون الأصل اللي لاقاه فيك.
في الآخر؟
العشرة بتعري، والمواقف بتفضح، والزمن بيغربل.
واللي له أصل… عمره ما يدوخك.
واللي ملوش؟
هيكشف نفسه بنفسه…
فما تتعبش نفسك كتير
المواقف كاشفة 💜
#ريكي #التشافي #التعافي
#التأمل
