17/10/2024
شويه فضفضه ورغي وكلام مش مترابط ببعضه
الوقت بيجري بسرعه الايام دي والايام بتجري ورا بعض واحنا أو للدقه انا بجري ورا الايام ... طيب
مشاعر عكس بعض ... وأوصاف متضاربه ... وافكار مش مترابطه ... طيب
خطوات مؤجله وخطوات لم تكن في الحسبان ... طيب
اليقين بأن الأمر جلل بيزيد
واليقين بأن الفتن الظاهره والباطنه هتظهر كل شويه بقوه اكتر بيزيد
والخوف من اللهيه بيزيد
احنا ملهيين قوووووي
احنا في الملاهي ... فيه اللي في المرجيحه و فيه اللي راكب الشلال وفيه اللي في بيت الرعب وفيه اللي في الصاروخ وفي اللي راكب الغساله
اهو احنا كده عاملين زي اللي دخل دريم لاند
ملاهي ارض الاحلام ... قوم يلا اركب لعبه واجري ورا حلمك
اللعب اللعبه وافتكر انك هتعيش في سعاده مدينه الاحلام
اول ما هتنزل من اللعبه هتلاقي نفسك عايز تركب كمان مره
وتفضل رايح من زحليقه لمرجيحه لشلال .... فرهددددددده
طيب اهلا وسهلا وبعدين ... مبسوط ياعم الحج ... لا مفرهد
وفي حته خوف جت جوايا وانا بلعب وبطني قلبت عليا طب كفايه اطلع من الملاهي ... لا انا حاسس ان عايز العب تاني
واللعب يا حبيبي ده حتي انت لسه مركبتش الدوده
اوعي متركبهاش يا حماده
اجري ورا الملاهي
اجري ورا المال
العيال
الشغل
الامتلاك
الرفاهيه
النجاح
التميز
الحب
العلاقات
الاعجاب
الفوز
التوسع
اجررررررررررررري
في لحظه هيتوقف فيها الجري ده ... كل حاجه هتقف
وكل حاجه هتخلص
وكل حاجه هتنتهي
طوعا ام كرها ... اللهم اجعلنا من الطائعين
اشهد ان لا اله إلا الله وحده لا شريك له واشهد أن محمد رسول الله
التوحيد ... ليس مجرد نطق شهاده ولكن هو مشاهده للوحدانيه الالهيه في ملكوته ... فانا لله وانا اليه راجعون
