MindUp

19/10/2025

I’m conducting a course in Psychometry in English.
The course starts on October 29th and will be held in Fifth Settlement.
It includes explanation and practical training on the following tests:
PDQ
MMPi
SCID 2
Beck Depression Inventory.
Obsessive-compulsive Inventory.
Taylor Manifest Anxiety scale.
TAT
CAT
ADHD

If you’d like to enroll, please contact me on WhatsApp
01026096914

04/10/2025

وكان فضل الله عليك عظيما .. كتاب كشف مستعجل) في معرض الرياض الدولي للكتاب
دار الكاف للنشر والترجمة - Alkaf publishing &translation
شكرا ا. محمد ابراهيم وعدت ووفيت
بالتوفيق لكل الكتّاب

24/09/2025

مؤشرات ماقبل الانتكاس



#علاجالادامان

19/09/2025

لما تجيلي فكرة ضرب اعمل اية ؟

18/09/2025

16/09/2025

سبتمبر عدي نصفه يعني فاضل ٣ شهور و٢٠٢٥ تخلص، لو حسيت إن السنة اتسرقت منك وانت سرحت شوية كده لاقتها خلصت ومانجزتش أي حاجة، تعالي نكتب شوية أفكار لأنشطة تتعمل في ال ٣ شهور اللي فاضلين فانحس إن السنة ماضاعتش مننا واننا بالفعل استغليناها بقدر لا بأس به

أول حاجة اكتب انت عملت ايه في ال٩ شهور اللي عدوا يعني اتفسحت سافرت قرأت أي كتاب زرت أقارب صاحبت حد جديد وهكذا، مهو أكيد المحصلة مش هتبقي صفر

اقرأ أهم كتاب نفسك تقرأه أو رواية

اتفرج علي بود كاست لأهم موضوعات بالنسبة لك

امشي ٣ مرات في الاسبوع كل مرة نص ساعة

اتعلم أي مهارة جديدة مش بتاخد وقت طويل عشان تكتسبها زي مثلا ركوب عجل، نوع معين من الطبخ، تصوير، نجارة، وطبعا مش لازم اوصل للاحتراف

اكتب خطط السنة الجديدة

غير عادة واحدة في اكلك

خد كورس واحد في اي مجال انت مهتم به

اتعلم حاجة جديدة في مجال شغلك فخد فيها كورس او اقرأ وذاكرها كويس من اليوتيوب أو من أي كتاب أو انزل تدريب في مكان عشان تتعلمها

صلح حاجة بايظة في بيتك أو عربيتك أو مكتبك وانت كنت مأجلها من فترة

كل أسبوع اشتري مع طلباتك عصير وكرواسون ودنش مثلا واديها لاي شخص بنية الاطعام

اختار سورة في القران واقرأ شرح معانيها وتأملها وتدبرها وتخلق بخلقها ونفذ احكامها وخليها سورة السنة

درب نفسك علي مهارة واحدة اجتماعية جديدة زي الاستماع أو الحوار أو التفاوض

اقبل دعوتك علي كام عزومة فهتحس انك اختلط بالناس فرح، عيد ميلاد، غدا

افطر بره قبل الشغل أو يوم جمعة

اتخلي عن سلوك واحد سلبي

اطرد فكرة واحدة سلبية من ذهنك وماتسمحش إنها ترجع تاني وافتكر زي ما قولنا كتييييير فكرة مشاعر سلوك

رتب دولابك أو مكتبك أو مكتبتك أو راجع لبسك وخرج اللي مش محتاجه لحد محتاجه

اهتم بحاجة واحدة خاصة بجسدك وصحتك مثلا اظبط ضغطك أو سكرك، انتظم علي دايت، واظب علي ماسك للشعر أو للبشرة، زور طبيب الاسنان لو محتاج وغيرهم

جدد حاجة في استايل لبسك

سامح نفسك علي خطأ قديم

اعمل كل شهر عمل واحد تطوعي فتبقي تطوعت ٣ مرات في انشطة مختلفة

اكتب قائمة بالامتنان للحاجات الموجودة بالفعل

نجاح حياة الانسان زي نجاح الشركات، فبص لحياتك وكأنها شركتك الخاصة، فلو استخدمت التخطيط ومراجعة الأهداف والتطوير وتقسم السنة لاربعة، ومراجعة كل ربع من السنة عملت فيه اية هتلاقي حياتك بتتقدم وانك بتنجز وهتحس إن الوقت مش بيتسرق منك ولا العمر عدي علي الفاضي

اكتبولي أفكار تانية جربتوها

ديما لسه في وقت

دمتم بصحة نفسية

الصورة من مبني التليفزيون ماسبيرو




fans

14/09/2025

عدم الأمانة وعدم الصدق

عدم التعامل مع مشاعر الغضب

كثرة الاستياء والنقد الهدام

التسرع والإندفاع

الثقة الزائفة بالنفس

عودة شعور السيطرة

عدم الذهاب للاجتماعات

عدم المشاركة في الاجتماعات

عدم اختيار مشرف

محاولة ايجاد طريق مختصر

عدم المشاركة بافكار التعاطي

جميعها عوامل تؤدي إلي الإنتكاس بعد
التعافي من تعاطي المواد المؤثرة نفسيًا (المخدرات).

دمتم بصحة نفسية

أخصائي نفسي إكلينيكي وعلاج الإدمان

13/09/2024

من ال Messages المبهجة الاسبوع ده 🙏🙏❤❤

03/09/2024

نموذج من اللي بسمعه في الجلسات الايام دي .. مواليد الافينات واخدينا ورايحين علي فين تاني 🤣🤣 انا خلصت مذاكرة علم النفس ومش ملاحقة اخلص المصطلحات اللي عمالة تجد 🤣🤣
بس بنفهم في الاخر ونرد 🤷‍♀️🤷‍♀️
الصورة دي مسروقة بس قولت افضفض معاكم لان دي بقت حياتي 😁😁 الكلمات الغريبة هي دكتور .. واحد .. بنت .. عشان 🤣🤣🤣🤣🤣

29/08/2024

لو عاوز شيء بشدة
اياك تطلق سراحه
فيه حاجات ياما بغبائنا
قولنا نسيبهم فـ راحوا
لو عاوز شيء بشدة
اعمل حواليه قوسين
خلي عيونك تحاوطه
لو حتى يروح لفين
الشاعر عمرو حسن 🖤

27/08/2024

لما اقول لل clients بتوعي كلام ويعملوه ويطلع صح ولما افسر سلوكهم وسلوك الناس اللي حواليهم فيتغيروا او يغيروا معاملتهم مع الناس ويطلع صح 🤣🤣🤣

16/08/2024

انا دخلت اداب قسم فلسفة بارادتي بمزاجي .. بحُب للفلسفة وبفَهم لها وادراكا لقيمتها وكنت عايزه اشتغل مدرسة فلسفة وعلم نفس (احنا كنا بندرس في الكلية مادة اسمها علم النفس العام ومادة علم اجتماع) فكان مدرس الفلسفةوالمنطق بيدَرس علم نفس واجتماع والعكس ولما دخلت اداب علم نفس درست بردو فلسفة ومنطق وعلم اجتماع .. المهم انا اتخرجت ٢٠٠٣ ورحت بقي اقدم في المدارس بكل شغف ورغبة وحب اني اعلم الطلاب فلسفة ومنطق واعلمهم معني كلمة فلسفة هي كلمة يونانية مكونة من مقطعين ( فيلو - صوفيا) يعني حب الحكمة ..
وقلت بس ده انا هفهم المراهقين طلاب ثانوي اللي اكبر ازماتهم النفسية علميا هي ازمة الهوية يعني اية حكمة.. يعني اية الفلسفة هي أم العلوم وانبثق عنها كل العلوم يعني ايه تعرف تفكر وترتب دماغك وتستقبل الاراء المختلفة وتختار منها اللي عقلك يوزنه وازاي يبقي ليك هوية فكرية فلا تنساق ورا اي ضلال فكري يتعرض عليك من الناس المضلة ..
وقلت وازود كمان عن المنهج علي هامش الحصص او بأي طريقة غير مرهقة لهم معلومات مفيدة واعمق باعتبار اني بحب المواد دي وربنا مديني ملكة فهما بعمق مش بسطحية وقلت هنتكلم عن محاورات افلاطون عن فلسفة هيجل وعن كنفوشيوس ونتكلم عن قوانين الفكر الارسطية .. وتعلالي بقي في الفلسفة اليونانية كانت بتدرسلنا دكتورة جاية رأسا من اليونان مصرية خوجاية قمر ثقافة وعلم وشياكة ورقي علمتنا ننطق اسماء الفلاسفة كنا بننطقها بالمصري مش باليوناني🤭... ا.د.هدي الخولي. وياسلاااااام علي علم الجمال ربنا يمسيه بخير ا.د.سعيد توفيق العلامة الكبير واوريهم لوحات فان جوخ واشرح مواطن جمالها زي ما اتعلمت بقي لوحة حذاء الفلاحة ودافينشي والموناليزا وغيرهم واقولهم يعني ايه الاستاطيقا في الفن ومواطن جماله... واعلمهم طريقة قراءة النصوص السياسية ( خدناها في مادة الفلسفة السياسية) وما هو المسكوت عنه في اي نص ( المستخبي ومش معلن عنه يعني عشان ما يتقفش😄) اه علمونا كده في القسم كمان والله ماقصروا.. 🤚

واكلمهم عن كتاب ل ا.د.مصطفي النشار اسمه فلاسفة ايقظوا العالم واقولهم ان لما العالم كان نايم الفلاسفة هم اللي ايقظوه علي فكرة .. وخش بقي علي المنطق الصوري والمنطق الرمزي ومعني الاغتراب وفلسفة الفراعنة والعصور الوسطي والفلسفة الحديثة لحد الفلسفة المعاصرة ..

وبالمناسبة كنا بندرس ٧ مواد في التيرم كل مادة كتابين كل كتاب ٥٠٠ صفحة او كتاب واحد الف صفحة علي بعضه نادرا ما درسنا كتاب ٣٠٠ صفحة وده علمني مهارة التلخيص ومهارة القراءة السريعة والقدرة علي الحفظ والتذكر وعلمني ازاي اقارن بين اي فكر واخر في مواطن المقارنة الاساسية. ومواد تانية كتير اخدناها غير دول كمان.

حلو كده ؟ لاء مش حلو 🙆‍♀️تعالي اقولك ليه🤷‍♀️.
علي ايامي وانا في ثانوي كنا بندرس فلسفة وعلم نفس ( ربنا يمسيكي بالخير ياميس ضحي ويا ميس هند) مادتين اساسيتين علي كل واحدة ٥٠ درجة داخلين في المجموع لكن بعد لما اتخرجت طلع قانون ان الطلاب هيختاروا بين الفلسفة والمنطق وعلم النفس والاجتماع فكان الطلاب بيختاروا علم النفس والاجتماع عشان بيجمع درجات اكتر وبالتالي مش عايزين مدرسين فلسفة بقوا كتير في وفرة القانون طلع وقتها للوفرة مش للقلة.

قلت طيب اشتغل مدرسة علم نفس قالوا طلع قانون كمان ان مدرس علم النفس يبقي خريج علم نفس مش فلسفة مش زي ايامي كان الفول من الطعمية والطعمية من الفول..
طيب اشتغل ايه قالوا لي هتشتغلي مساعدة مدرسة حضانة او مدرسة انجليزي لابتدائي ومع احترامي الشديد للتخصصات دي ومدي اهميتها بس انا معنديش اي ملكة فيها لا بحب الشغل مع الاطفال ولا بحب جو الحضانة ولا ابتدائي ولا اعرف اعمل اي حاجة لهم ولا اضيف للمجال حاجة ماكنت دخلت كلية رياض اطفال 🤷‍♀️ ولا عايزه اشتغل كده اصلا وكمان مش بحب اللغة الانجليزية اطلاقا تقيلة علي قلبي مش بحبها هو بالعافية.. انا عايزة ادرس لعقول كبيرة الحق والخير والجمال.
(كلنا بنتكامل مع بعض كل حد ربنا مدي له ملكة ومخلي له دور نافع للناس محدش احسن من حد كلنا محتاجين بعض)

المهم لفيت لفيت لفيت وكل المدارس بتقول نفس الكلام .
نسيت اقولكم بقي ان من حبي في الفلسفة انضميت للجمعية الفلسفية المصرية وبقيت احضر هناك مؤتمرات وكانوا بيستضيفوا فلاسفة معاصرين من دول اجنبية .. تخيل بقي لما تقابل فيلسوف اجنبي معاصر وتتناقش معاه وتخيل لما تحضر مناقشته مع فيلسوف مصري معاصر ويتدحضر بيك الزمن ويميل عشان تعيش وتشوف مهازل وتفاهة التيك توك والفيس بوك والناس اللي بتشخط في التلفزيون وبيطلوا علينا بجهلهم... يالا الحمدلله المهم اني عشت شوية قبل ما الرويبضة يطلعوا.

طيب وبعد كل الحب ده اشتغل ايه بالفلسفة مافييييش القانون قفل في وشي باب الشغل زي الموقف اللي المدرسين فيه دلوقتي بالظبط ..

زملائي اللي كانوا معايا في القسم اشتغلوا بالفعل مدرسين حضانة وابتدائي او في التسويق العقاري وغيرها (مهو محدش بيشتغل بشهادته حتي لو بيحبها) واللي عمل مشروع خاص وقليل مننا ٢ كده اللي اشتغلوا مدرسين فلسفة ..

طيب انتي بقي ياسوزان هتعملي اية ؟ فقررت ادرس دبلومات تربية لحد ما تيجي فرصة في مدرسة واشتغل مدرسة فلسفة فيبقي ليا الاولوية في التعيين عشان هبقي تربوية.
وكنا بندرس في الدبلومات دي نص المواد اعداد معلم ( وضع الامتحانات وضع المناهج وطرق تدريس واصول تربية وغيرها ونصها التاني علم نفس ( علم نفس تربوي وعلم نفس ارشادي ومقاييس نفسيه وغيرها من فروع علم النفس) وكنا بندرس ١٣ مادة ممتدة يعني نمتحنها اخر السنة علي بعضها + ٣ عملي ( ٢ معامل علم نفس و ١ تدريب عملي في مدرسة) وخلصت دبلومتين عامة وخاصة واتخصصت ارشاد نفسي وكنت من العشرة الاوائل في الدبلوم العام وممتاز في الدبلومة الخاصة في مواد التخصص وانتبهت لاني بحب علم النفس جدا وبحب العلاج النفسي وبحب احل مشاكل الناس واني كنت من وانا ٧ سنين بتفرج علي برنامج حياتي و وانا ١٠ سنين بقرأ لعبد الوهاب مطاوع الله يرحمه ...

فقدمت ماجستير في قسم علم نفس بكلية الدراسات العليا للتربية جامعة القاهرة ورحت كلية الاداب جامعة عين شمس ادرس في قسم علم النفس عشان ابقي اخصائي نفسي اكلينيكي لاني ادركت بالرغم من كم المعلومات اللي اخدتها من دراستي للدبلومات والماجستير الا ان ينقصني معلومات كتييييرة جدا فمقدرش اعرض حياة مريض لخطر بسبب جهلي ونقص معلوماتي ولازم ابقي اخصائي نفسي اكلينيكي مش مرشد نفسي وادرس امراض وادوية وتحليل نفسي.

واخدت الليسانس في خمس سنين مش اربعة عشان ولدت ياسو في الامتحانات وبعد ما خلصت الماجستير والليسانس وبعدهم تمهيدي الدكتوراه والدكتوراه والحمدلله انا دلوقتي مش بس اخصائي نفسي انا اترقيت وبقيت استشاري أول كمان 😍

فايدة الفلسفة وانا معالج نفسي كبيرة جدا بالنسبة لي بقي عندي مدرستي الخاصة لاني متخصصة في علم النفس ومتخصصة في الفلسفة ومتخصصة في التربية ( ٣ كليات والله 😃)
كل ده بقي خلي فكري وطريقتي العلاجية فيها شمولية اكتر عمق اكتر مساعدة اكتر وبقدر اتفتح ذهنيا لاي موضوع بيكلمني فيه المريض او العميل بقدر انقد واحلل واربط وافسر بيسر وسرعة وعلي قدر لا بأس به من الحكمة وبعرف اتعامل بحرفية مع اصحاب الفكر المتطرف ايا مكان نوع التطرف.. (ومش بشكر في نفسي واقلل من شأن الاخرين انا بحكي تجربة لولا ان المهزلة دي حصلت ولا كنت حكيت وزملائي اشطر مني ولهم كل التقدير والقصد هو توضيح كيف شكلت دراستي للفلسفة وجداني واثرت في عملي)

انا دلوقتي مبسوطة بكرم ربنا عليا بس تعبت اوي اوي اوي عشان اوصل هنا ..
انا بعد ما تخرجت من اداب فلسفة سنة ٢٠٠٣ دخلت الجامعة تاني ٢٠٠٥ وواصلت كل السنوات الدراسية بدون توقف لحد ما سحبت ملفي لما خلصت سنة ٢٠٢١..
عمر كامل قضيته جوه جامعة القاهرة وجامعة عين شمس انا وابني ( كان بيجي معايا 🙈) ...
شقيت اوي في الجامعات والاقسام والابحاث والمراجع والكتب والمكتبات والامتحانات ويقولك علوم مالهاش لازمة😡..
وده كان في عصر الكتب الورقية والمكتبات الورقية لاكان في نت ولا نتيت 🙃.

القوانين بتفرح ناس وبتحزن ناس بتشقلب حياة ناس وبتعدل حياة ناس انت ونصيبك وانا نصيبي كده الحمدلله اوي انه رسي علي كده لكن اللي مش مفهوم اني اقلل من قيمة العلم اقلل من قيمة شقا الناس في الدراسة اقلل من تخصصاتهم عشان انا جااااااااهل بها وافتي وانظّر واقول لازمتها ايه .. اهل التخصص هم اللي فاهمين تخصصهم لزمته اية قيمته اية.. واو اقلل من قيمته عشان انا باتبع الفلسفة المادية وهو طبعا مايعرفش ان كلامه تابع للفلسفة المادية هو كان حافظ وبيسمع.

الفلسفة وعلم النفس اسمهم مواد انسانية ازاي الانسان يبقي مش محتاجهم.. قسم الفلسفة متسجل فيه تاريخ الفكر الانساني هل في حيوان سجل فكره ؟ هل لاي حيوان فكر من الاساس؟ وهل الصحيح محو هذا التاريخ الفكري لنتساوي مع الحيوان !!!!!

وعندي سؤال: هو خريج الالسن يشتغل في الاعلام ليه هل اخد كورس شهرين للاعلام ؟ ده لو اخد كورس شهرين مكانش قال اللي قاله اصلا.

وعندي معلومة هامة:
ا.د. محمد الخشت رئيس جامعة القاهرة الاستاذ العظيم والانسان الخلوق المحترم رئيس الجامعة اللي فيها طب وهندسة واعلااااااام وسياسة وكل الكليات اللي بيتقال انهم كليات قمة هو بقي رئيسهم كلهم و Guess what بقي ؟؟؟؟
انه خريج كلية اداب قسم فلسفة 😍
وهو استاذي درسلي نصوص فلسفية باللغة الانجليزية ٣ سنوات متتالية والسنة الرابعة درسلي مادة اخري .. وهو من اعلام الفلسفة ومن اعلام قسم الفلسفة وقيمة وقامة من قبل ترئسة للجامعة وله فكره الخاص وفلسفته الخاصة .. حد ييبلغ الرويبضة عشان مايعرفوش طبعا لانهم جهله.
وفي المعجم وفي الاحدايث الشريفة معني كلمة رويبضة هو الرجل التافه الذي يتكلم في امور العامة.. وهو الرجل الذي لا قيمة له ولا يُنظر اليه ويتحدث في امور العامة ويرفع شأن من يشاء ويحط من شأن من يشاء.
وبالمناسبة كمان نجيب محفوظ اللي واخد جايزة نوبل في الادب خريج اداب فلسفة وهعمل بوست بالاعلام خريجي القسم.
ده اطول بوست كتابته في حياتي ولكنه بوست للتاريخ .
واخيرا اشكر كل اساتذتي اللي علموني🥰