13/05/2026
أصعب معركة ممكن الإنسان يعيشها…
مش مع الناس....
ولا مع الدنيا....
معركته مع نفسه
مع “القناع” اللي لبسه سنين طويلة
علشان يبقى مقبول.... محبوب....ويرضي الناس
فنظهر بهدوء وإحنا جوانا زحمة....
ونتصرف بقوة وإحنا مرهقين....
ونخبي أجزاء كاملة من شخصيتنا
بس لأننا اتعلمنا إنها مش صح ومش مناسبه
والمشكلة الحقيقية بتبدأ…
لما الإنسان ينسى إن القناع مجرد وسيلة نحمي بيها نفسنا....
مش حقيقتنا كلها.
وفي الناحية التانية بيعيش “الظل”…
كل المشاعر والصفات اللي حاولنا نهرب منها أو ندفنها جوانا....
الغضب، الضعف، الخوف، الاحتياج…
وحتى الأجزاء اللي خفنا الناس تشوفها فينا....
بس الظل عمره ما بيختفي لمجرد إننا أنكرناه…
مع الوقت بيبدأ يظهر في سلوكنا ومشاعرنا ..والاضطرابات النفسيه زي القلق والاكتئاب. ...وفي العلاقات المؤذية
في أحكامنا القاسية على غيرنا....
في ردود فعلنا المبالغ فيها...
وفي معارك فاكرين إنها مع الناس…
وهي أصلًا جوانا...
والاتزان الحقيقي…
مش إن الإنسان يعيش بالقناع طول الوقت....
ولا إنه يسيب ظله يسيطر عليه....
لكن إنه يتعرف على كل أجزائه...
الأجزاء القوية والضعيفة....
العاقلة والمندفعة.....
الهادئة والغاضبة....
ويتقبلها من غير إنكار أو خوف.
الناضج…مش اللي أخفى أجزاءه...لكن اللي قدر يبص لها بصدق من غير خوف...
وهنا تبدأ رحلة “التفرد”…
رحلة رجوع الإنسان لنفسه الحقيقية....
لما يجمع أجزاؤه المتفرقة.....ويبطل يهرب من نفسه.
#رحلةـوعي
