29/09/2025
5 كلمات لازم تقوليها لإبنك باستمرار.
5 كلمات إحذري تقوليها لإبنك نهائي.
خلوا بالكم كل كلمة بنقولها لأطفالنا وهم في مرحلة البناء وتكوين شخصيتهم بتأثر على الطفل بالايجاب أو السلب طول حياته.
5 كلمات لازم تقوليها لإبنك باستمرار:
1️⃣ أنا بحبك❤️
دي الكلمة اللي بتبني عند ابنك إحساس بالأمان والانتماء، بتخليه يحس إنه مهما عمل من أخطاء، هو محبوب ومقبول زي ما هو، الطفل اللي بيسمع الكلمة دي كتير بيكبر وهو عارف إنه يستحق الحب، مش بيشحته من أي حد.
2️⃣ أنا فخورة بيك🌟
بتزرع جوه ابنك ثقتة بنفسه وإنجازاته، حتى لو صغيرة جداً ،الطفل اللي بيسمعها كتير هيفضل يحاول ويجتهد لأنه عارف إن أي خطوة بيعملها بتفرق معاكي.
3️⃣ أنا جنبك🤝
دي اللي بتخلي الطفل يحس إنه مش لوحده في الدنيا، وإن في ضهر يسنده مهما وقع أو أخطأ، الكلمة دي بتعلمه معنى الدعم والرحمة في حياته.
4️⃣ إنت دايماً تقدر 💪
لما يسمعها باستمرار من الداعم الأول ليه (الأم، الأب)بتزرع جواه الإيمان بنفسه، وإنه يقدر يواجه الصعاب من غير خوف في حياته كلها ،الكلمة دي بتخلي الطفل عنده شجاعة يجرب ويحاول من غير إحساس بالفشل.
5️⃣ غلطك مش معناه إنت وحش:
بنعلمه يفرق بين الخطأ وبين شخصيته، وإنه ممكن يغلط ويتعلم من غير ما يحس إنه مرفوض أو مش محبوب لمجرد إنه اخطأ ،ودي مشكله بيقع فيها كتير من الأمهات لمجرد الطفل يغلط ،نهين ونوبخ الطفل نفسه مش سلوكه ،هنا هيفهم إن شخصيته هي اللي وحشه وكمان مينفعش يغلط خالص، وكل ما يغلط هيقتنع إن شخصيته فيها مشكله.
الحل إننا ننتقد ونوبخ السلوك نفسه مش الطفل.
5 كلمات إحذري تقوليها لإبنك نهائي:
1️⃣ إنت غبي💔
الكلمة دي زي السهم بيخترق الطفل، ودايماً كتير بحذر منها لأنها بتأثر على الإنسان من الطفوله لنهاية العمر.
بتزرع جواه عقدة إنه أقل من غيره، وبيكبر شايل جواه شعور بالنقص، ومع الوقت بيصدق إنه فعلًا غبي، حتى لو كان ذكي جداً ويعيش دايماً بالشعور ده.
2️⃣ إنت مش نافع
بتقتل جواه أي دافع للمحاولة أو التغيير، بتخليه يحس إن مفيش أمل فيه، فليه يتعب أو يجتهد؟ كلمة بتهدم المستقبل حرفياً.
ومع التكرار هيلجأ لطريقين، يا عناد وتمرد طول الوقت ،يا إنسحاب وتبلد وانطوائيه (وهنا الطفل فقد الثقة بالنفس للأسف)
3️⃣ بص على فلان أحسن منك أو شوف أخوك بيعمل ايه:
المقارنة نار بتد..مر الطفل، بدل ما يتعلم يحسن من نفسه، بيتعلم يكره غيره ويحقد ويحس إنه دايمًا أقل من كل إللي حواليه.
4️⃣ إنت وحش🚫
الكلمة دي بتبني عند الطفل شعور بالذنب والخزي، يخليه دايمًا عنده قلق ،ومش قادر يشوف الحلو اللي فيه وبتأثر جدًا على ثقته بنفسه.
5️⃣ إنت السبب:
لما نلقي اللوم على الطفل باستمرار في اي مشكلة بتحصل جوه البيت أو بره البيت، ده بيحمل الطفل فوق طاقته وسنه، وبيحسسه إنه مسئول عن مشاكل وأزمات كتير، وده مش مناسب لعمر وطبيعة الطفل، عشان كده بيزود عنده القلق والتوتر وبيأثر على نفسيته.
الكلام اللي بتقوله لطفلك النهاردة ،بيكون صدى بيسمعه طول حياته.
شوف عايز إبنك يعيش بـ إيه طول حياته وخليه يسمعه منك النهاردة❤️
مركز حريتك اختيارك للطب النفسي وعلاج الادمان
للتواصل: 01116202689
01117290444
