06/02/2026
بوست مهم جدا لمرضي قصور الشرايين التاجية و خصوصا اللي عندهم ضيق في جذع الشريان التاجى الايسر الرئيسى اللى هو اهم شريان تاجى علشان بيغذي ٨٠ % من الكتلة العضلية للقلب
اللي خلانى اعمل البوست ده تساؤل مريض عمره ٤٥ سنة كان زارنى في العيادة و كان عنده اعراض ذبحة صدرية و عمل فحوص اظهرت قصور في الدورة الدموية التاجية و عملت له قسطرة تشخيصية من كام يوم و لقيت انه عند ضيق في عدد من الشرايين منهم الجذع الشريانى الايسر اللي اسمه بالاتجليزى
Left main cororany artery
المشكلة التانية ان الشرايين كلها كالسيوم يعنى و ده بيقاوم تمدد البالونات و الدعامات و بيصعب المهمة علي دكتور القسطرة
قلت له انت محتاج جراحة قلب مفتوح و ده اول و افضل اختيار لان سنك صغير و عندك اكتر من شريان تاجى ضيق و الجراحة علميا افضل علي المدى البعيد و تاني اختيار لك هو اننا نركب دعامات دوائية بس هنستخدم اجهزة زى جهاز الموجات الصوتية داخل الشريان اللي اسمه
Intra Vascular Ultrasound (IVUS)
و جهاز الشينيور الطبي اللي بيكسر الكالسيوم داخل الشرايين و اللي اسمه
Rotablator
المريض فكر و قرر انه ياخد اول اختيار و فعلا قابل جراح القلب اللى رشحته يعمل له العملية لكن لقيته بعد ايام فقط باعت لي رسالة بيقول انه ارتاح علي العلاج و مش عايز يعمل العملية
لان الاعراض اختفت تقريبا علي حسب كلامه
قلت له الاعراض دى عبارة عن جرس انذار ان في مشكله و اختفاء الاعراض مش دليل علي ان المشكلة اتحلت احنا بنعالج الشرايين سواءا بالدعامات او الجراحة علشان حاجتين اهمهم الحفاظ علي حياة المريض و تجنب الوفاه المفاجئة باذن الله طبعا و تانى حاجة تقليل الاعراض لو كان الضيق في شريان فرعي او شريان صغير لكن في حالة الجذع الرئيسي ما فيش هزار
دمتم سالمين
#الشرايين
#التاجية
#القسطرة
#الشينيورالطبى
