09/10/2025
من كام شهر كنت بقرأ كتاب في علم النفس واتكلم عن البطاطس..
وشرح ازاي ممكن شوال بطاطس يتحط في بدروم تحت الأرض ويتخزن من غير تهوية فيفسد..
وازاي ممكن نوع تاني من الزرع يحتاج يتخزن تحت الأرض ومن غير تهوية علشان يستوي..
وكان بيستخدم المثال ده علشان يشرح ان طبيعة كل انسان فريدة ومختلفة عن غيرها..
فيه انسان اجتماعي وبيشحن لما يقعد مع غيره وفيه انسان انطوائي بطبيعته وبيحتاج يقعد مع نفسه كتير ولو قعد مع الناس طاقته بتستنفذ..
ومع الكتاب راجعت اخطاء تربوية وقعت فيها لما حاولت اربي بنتي زي ما ربيت ابني
لحد ما قرأت كتاب اسمه Nurture by Nature وصححت المسار التربوي وبقيت اربي بنتي بطريقة مناسبة لطبيعتها
من كام اسبوع اختي العزيزة شيري اللي اصغر مني بعشر سنين
دعتني اروح معاها تمرين Trampoline تمرين فيه نط كتير وفرهدة..
اول ما وقفت على النطيطة وبدأت اتنطط، حسيت بطاقة رهيبة..
ولاقتني بتنطط.. وكأن التمرين المرهق بالنسبة لي فسحة حلوة..
اتمرنت ساعة كاملة من النط والحركة والفرهدة..
وطلعت شكرت المدربة من كل قلبي..
ونزلت من على النطيطة وبضحك قلت لشيري أنا كنت محتاجة نطيطة وأنا صغيرة..
لو كانت مامي جابت نطيطة وأنا صغيرة كان مشاكلنا اتحلت..
وبعد كام يوم روحت نفس التمرين مرة تانية.. وبرضه حسيت بنفس الحماس..
المرة التالتة، وأنا على النطيطة لاقيت مشاعر بتقب على السطح..
لاقتني فجأة عايزة اعيط.. مسكت دموعي في التمرين خوفًا من الإحراج..
وبعده اخدتني وقعدت مع الجورنال بتاعي وسألتني بالورقة والقلم مالك؟
وكان الرد اني متألمة نفسيًا..
اني وأنا صغيرة كانت امي بتشتكي مني طول الوقت اني "طفلة متعبة"..
ولما سألتها لما كبرت، وأنا في رحلة العلاج النفسي وزي ما طلبت مني المعالجة النفسية، كنت متعبة ازاي؟ قالت "بتتحركي كتير ومش بتقعدي".
وطبعًا كانت المَدرسة الشهيرة اللي المجتمع عارفها للتربية هي مدرسة العقاب للتقويم..
وطبعًا كطفلة حركية كان العقاب هو الجزاء كل ما اتحرك او اقوم من على الكرسي..
ومع تكرار اني متعبة، صدقت اني متعبة..
بعد تمرين النطيطة ادركت اني مش انسانة متعبة.. اني انسانة بتحب الحركة والتنطيط..
وايه كمان؟
مع دموعي اللي نزلت على الجورنال افتكرت لما قررت اني ابدأ امارس رياضة بانتظام في سبتمبر ٢٠١٧، رياضة للصحة
وازاي لما روحت لمدربة عزيزة علشان ابدأ معاها من الصفر، قلت لها اني مش عايزة اعرق.. اتمرن بدون عرق..
في تمرين النطيطة كنت عرقانة جدًا..
ومع دموعي سألتني ايه اللي حاصل؟
لاقيت اني وانا طفلة كنت بتحرك كتير وبعرق وبالتالي بحتاج اخد شاور باستمرار
والنتيجة اني عشت طفولتي وشعري الناعم وقتها مقصوص قصير جدًا قريب من طول شعر الولاد..
لأني بتحرك فبعرق فباخد شاور كتير والشعر الطويل متعب في التنشيف وبياخد وقت فالحل كان اني اعيش بشعر قصير طالما انا حركية/متعبة
وبنات في مدرستي اطلقوا علي اسم ايمن بدل ايمان..
وبالتالي الحركة جابت عقاب وعرق والعرق جاب قص شعر وتنمر وعشت سنين طويلة بكره الرياضة لأن عقلي ربطها بالعقاب..
والعرق والتعرض للتنمر…
بعد القعدة مع الجورنال فكرت في لص من لصوص العلاقات..
ازاي يبقى عندك زرعة وتشربها لبن بدل مياه..
او يبقى عندك طائر وتأكله خروف بدل حَب..
كام حد فينا اتربي بطريقة ضد طبيعته واحتياجاته..؟
وعاش مصدق انه متعب او اناني او فاشل او مستهتر..؟
وكام حد فينا لص علاقات، بيتعامل مع الناس وهو مغمض عينيه عن طبيعتهم واحتياجاتهم والفروق النفسية بينهم..
كفاية سرقة لطبيعة غيرنا..
وكفاية تغريمهم ضرايب عشان ربنا خلقهم بطبيعة غير المتعارف عليها..
اول لص بيدمر العلاقة هو الري بماء لا يروي..
بل بيهلك..
لما انت نفسك ما تطوعكش او ابنك ما يتقومش راجع بترويهم ازاي،
ولو نفسك حركية هات لها نطيطة بدل ما تربطها في كرسي بحبل..
وتدمر نفسية الطفل، ويعيش بثقوب نفسية وفكرة ذاتية مشوهة واحساس عميق بالذنب وغضب مكبوت من تصرفات الأخرين..
راجع نفسك..
وكفاية سرقة..
ورد المظالم..
منقوووول
