What are the opening hours?

Tuesday 5pm - 10pm Wednesday 5pm - 10pm Saturday 5pm - 10pm Sunday 5pm - 10pm

د.غادة شوشة - استشاري أمراض الحساسية والمناعة والروماتيزم في الأطفال

Home
Egypt
Cairo
د.غادة شوشة - استشاري أمراض الحساسية والمناعة والروماتيزم في الأطفال

أ. د.غادة شوشة
أستاذ مساعد واستشارى (أ) أمراض الحساسية والمناعة والروماتيزم لدى الأطفال بكلية طب عين شمس ومستشفى التأمين الصحي (أطفال مصر)

30/07/2025

رغم انه مرض مناعي نادر، ولكن مهم نتكلم عنه، مرض الساركويد او التحوصلات المناعية لدى الأطفال.
وقبل ما نكمل كلام حابة أوضح ان فيه ٣ انواع حسب السن،:
١- الأطفال أقل من ٥ سنوات >> غالبا مرض وراثي على الجينات >> NOD2 mutation

٢- الأطفال والمراهقين

٣- البالغين

الأعراض متشابهة إلى حد كبير

من اسمه، هو خلل مناعي بينتج عنه تجمع للخلايا المناعية والأنسجة في أماكن متفرقة من الجسم، و عادة بتاخد شكل الحويصلات granulomas و دي من الحاجات المميزة في الاولاد دول.

حسب الأماكن اللي حصل فيها التهاب بنحدد طريقة العلاج والمتابعة. بمعنى، انه مش لازم المريض الواحد يكون عنده كل الأعراض او يوصل لأسوأ حاجة في كل عرض. كل مريض ليه بصمته الخاصة على المرض.

يللا نتكلم على الأعراض المختلفة:
🧠 المخ والأعصاب >> التهاب حويصلي في المخ، التهاب في الأوعية الدموية في المخ، التهاب في الأعصاب الطرفية

👀 العين >> التهاب قزحي حويصلي، التهاب في انسجة العين

🫁 الجهاز التنفسي >> التهاب مزمن في الجيوب الانفية، التهاب او تليفات في الرئة خاصة مع وجود تحوصلات ظاهرة في الأشعة المقطعية

🫀 القلب >> التهاب في عضلة القلب، ارتفاع في ضغط الشريان الرئوي

🦴🦵 المفاصل والعضلات والعظام >> التهاب في المفاصل، التهاب في العظام، تكون حويصلات في الجلد، التهاب في العضلات

⛹️‍♀️ الجهاز الهضمي >> تضخم في الكبد والطحال

☠️ التهابات نسيجية في الكلى

❤️‍🩹 أعراض عامة زي ارتفاع الحرارة، ظهور طفح جلدي، تضخم في الغدد الليمفاوية

✅️التشخيص: أساس التشخيص هو. أخذ عينة من النسيج المصاب خصوصا من الحويصلات الموجودة

طيب اذا مش متاح أخذ عينة؟ الأعراض وشكل تأثر الأنسجة المختلفة بالأشعات كافي للتشخيص

يعني مفيش تحاليل؟
مفيش تحليل مخصوص للساركويد، ممكن تحليل ACE يعلى في ٧٠% من الحالات، ولكن ممكن يعلى في حالات تانية غير الساركويد

يبقى التشخيص معتمد بنسبة كبيرة على الأعراض وفحوصات الأجزاء المختلفة من الجسم وشكل الالتهاب

العلاج >> زي اي مرض مناعي >> كورتيزون مع أدوية منظمة للمناعة ودي بتختلف حسب الأعراض، بالإضافة إلى علاج للأعراض المختلفة

هل فيه شفاء تام؟
للاسف هو مرض مناعي مزمن، فيه سيطرة على المرض وأعراضه، فيه اننا نكون كويسين بأقل أدوية، وده لوحده محتاج مننا مشوار نمشيه سوا لغاية ما نوصل لبر الأمان ونعمل بعد كده متابعات دورية

دكتورة
#أستاذ مساعد طب #الأطفال و استشاري أمراض #الحساسية و #المناعة و #الروماتيزم لدى الأطفال، كلية الطب جامعة عين شمس

29/07/2025

كتير من الضيوف بيشرفوني علشان مشاكل مناعية في الجلد، زي البهاق والثعلبة والصدفية

وحالات تانية، التهاب مناعي في الجهاز الهضمي

وحالات التهاب مناعي في الغدة الدرقية او البنكرياس

وحالات التهاب نفروزي في الكلى

انتو صح، هي فعلا أمراض مناعية، ولكن

علاجها لازم يكون مع استشاري متخصص في المكان المصاب من الجسم

يعني مرضى البهاق >> جلدية
مرضى الإسهال او الإمساك المزمن >> جهاز هضمي
مرضى السكر والتهاب الغدة الدرقية >> غدد وسكر
مرضى التهاب الأعصاب او التهاب المخ >> مخ واعصاب

ودور دكتور المناعة بيكون بالتنسيق مع استشاري الحالة اذا الاستشاري طلب رأي دكتور المناعة كرأي مساعد.

وزي ما باقول لضيوفي >> لف اللفة بتاعتك، بلاش تلف حواليها وترهق نفسك في تخصصات مش هتفيدك

دكتورة #أستاذ مساعد طب #الأطفال واستشاري أمراض #الحساسية و #المناعة و #الروماتيزم بكلية الطب جامعة عين شمس

28/07/2025

من الكواليس،
هنصور، كلاكيت و اكشن
ياترى كنا بنحضر لايه، وهنتكلم على ايه في الفيديو ده 🙈🥰🌺

انتظروني قريبا، وفيديو مهم جدا جدا

26/07/2025

عندي ضيوف كتير بيشتكوا من مرض شوجرن او اللي بأسميه مرض جفاف الجسم المناعي.

تعالوا احكي لكم عنه شوية حاجات:

🎀 مرض مناعي >> أجسام مناعية لسبب غير معروف قررت تبدأ تهاجم الجسم وتعمل مجموعة مميزة من الأعراض

🎀 أكتر أعراض مميزة لهذا المرض >> الجفاف
جفاف العين الشديد
جفاف الحلق نتيجة الالتهاب المتكرر في الغدد اللعابية
جفاف الجهاز الهضمي اللي بيظهر في صورة صعوبة في البلع، صعوبة في مرور الاكل من المريء بدون شرب مياه بكمية كبيرة، ارتجاع في المريء، التهاب في المعدة

جفاف في المنطقة التناسلية >> أوضح في البنات، ألم وهرش وممكن تقرحات

جفاف في الأنسجة الداخلية زي مثلا:
العين >> التهاب قزحي
المخ والأعصاب >> التهاب مناعي في المخ والأعصاب الطرفية
المفاصل >> ألم مع الحركة او التهاب مفاصل
العضلات >> ألم في العضلات
الرئتين >> كحة شبيهة بكحة الحساسية وممكن تليفات في الرئة
الكلى >> التهابات انبوبية ودي بيحصل فيها زيادة كبيرة في كمية البول وتغير في حمضية الدم وممكن يحصل نقص كبير في البوتاسيوم لدرجة حدوث شلل مؤقت في الأطراف
وممكن يحصل التهاب في نسيج الكلى

القلب >> عادة مش المريض نفسه ولكن الجنين للأم المصابة اللي عندها أعراض او غير منتظمة على العلاج >> heart block او توقف متكرر في ضربات القلب

الحمل >> إجهاض متكرر

أعراض عامة >> سخونة، اعياء، اجهاد، الام في الجسم، تورم في الغدد الليمفاوية او الكبد أو الطحال

أعراض نادرة >> كسل في النخاع الشوكي وانيميا ونقص صفائح دموية
الحالات المهملة >> قد يتطور الأمر إلى ورم خبيث في الغدد الليمفاوية

طبعا ضيوفي عارفين أن كل واحد ليه بصمته على المرض، والمرض ليه بصمته عليه، وكل واحد ليه الأعراض بتاعته، اللي ممكن تزيد او تتحسن مع الوقت

علشان كده المرض ده من الأمراض المناعية اللي محتاجة متابعة دقيقة والتزام على العلاج وعلى شرب المياه، وفحوصات دورية لمتابعة الأعراض الموجودة، والاطمئنان على باقي الجسم بشكل دوري

مفيش طريقة سهلة للتشخيص؟ تحليل مثلا؟
للاسف لا
الأجسام المناعية بتكون إيجابية في ٥٠% فقط من الحالات
Anti-SSA and Anti-SSB
ممكن نلاقي ANA and Rheumatoid factor أرقامهم عالية
وممكن نلاقي تغيرات في صورة الدم وسرعة الترسيب

ولكن يظل التشخيص بالأعراض الاكلينيكية

هل ده مرض وراثي او جيني ؟
إلى الآن مفيش كلام عن أي عوامل وراثية

العلاج بيعتمد على الكورتيزون في مرحلة من المراحل مع الأدوية المنظمة للمناعة حسب كل حالة واحتياجها وحسب الأعراض الموجودة

بشكل عام الأمراض المناعية هي أمراض مزمنة >> هدفنا نوصل لفترات خمول طويلة المدى في النشاط المناعي، فنعيش بدون أعراض وبأقل أدوية ممكن نحتاجها، والاستثناء هو اننا نقدر نعيش بأمان بدون أدوية تماما

دكتورة
#أستاذ مساعد طب #الأطفال و #استشاري أ أمراض #الحساسية و #المناعة و #الروماتيزم لدى الأطفال، كلية الطب جامعة عين شمس

24/07/2025

لما بيجي لي طفل محروم من اكلات كتير بحجة انه حساسية طعام بازعل جدا:
أولا: ما يقرب من ٨٠% من الحالات اللي اتقال لهم حساسية طعام >> تشخيصهم غلط. وده بالمناسبة مش كلامي، المشكلة دي موجودة في أوروبا وامريكا كمان

ثانيا: المنع ليه أصول في حساسية الطعام، ومفيش منع مطلق الا في حالات محدودة جدا

الأول نقول يعني حساسية طعام:
تعرض لأكل معين >> خلال دقائق إلى ٤ ساعات بحد أقصى حصلت أعراض حساسية شديدة >> تورم، احمرار مع حكة في الجسم، ضيق تنفس، قيء

منعت الاكل ده >> مفيش اعراض

اكلت نفس الاكل مرة تانية >> حصلت اعراض زي اول مرة

هو ده السيناريو الوحيد لحساسية الطعام، بإستثناء حساسية الألبان في الرضع، لأن دي أعراضها معظمها جهاز هضمي

ايه رأيكم ان حتى المعلومة اللي انا كتبتها دي مش دقيقة. ليه؟
لان ممكن تكون الحساسية من الاكل نفسه((بيض مثلا))، أو من طريقة طبخه، أو من الإضافات اللي عليه، أو بسبب الظروف اللي الطفل اكل فيها >> يعني البيض بطريقة الطهي دي بيعمل حساسية لو الطفل عمل مجهود بعده مباشرة

وبالتالي، قبل ما نقول ده فلان عنده حساسية كذا وكذا وكذا، انت اصلا كل كذا فيهم ممكن ما تكونش عاملة حساسية في العموم، وإنما شكل معين من اشكالها أو بس لما تضاف على توابل معينة أو طريقة طبخ معينة.

طيب واختبار الحساسية؟
الاختبار بينور لنا الطريق شوية، بيعرفنا الجسم عنده قابلية للتحسس من ايه، وبالتالي، قيمة الاختبار مش في نتيجته، ولكن في مناقشة النتيجة دي مع الدكتور المختص. لان الاختبار ممكن يطلع إيجابي والطفل بياكل عادي >> يبقى مش حساسية

طيب والطفل اللي عنده حساسية طعام فعلا وبيدخل في صدمات تحسسية؟
زمان كنا بنخاف منه ونمنع تماما الحاجة اللي سببت الحساسية
النهاردة أو للدقة من ٥ سنين، الكلام اتغير، وبقينا نحاول نعمل إدخال شديد البطء المعروف بالامصال سواء المصل الفموي أو تحت اللسان أو تحت الجلد في أقرب فرصة، يعني تمنع شهر واحد بس وتبدأ خطة الإدخال تحت إشراف طبي دقيق من استشاري حساسية

هل ممكن يكون عندي حساسية من اكل وما يظهرش في الاختبار؟
اه ممكن، وده بيحصل في ٤٠% من الحالات. بس مهم بردو انم لما تعمل اختبار حساسية تتأكد انك عملت الاختبار الأدق، يعني لو اختبار جلد لازم يكون في مكان موثوق فيه، ولو اختبار دم، يفضل تعمل ALEX2 لانه بيطلع التحسس لمكونات الاكل، بمعنى بيقيس التحسس لكل بروتين من بروتينات الألبان وهكذا مع كل نوع أكل، وده من أسباب ان الاختبار ممكن يطلع سلبي للقمح مثلا، ويطلع عالي جدا للجلوتين اللي هو أحد مكونات القمح.
وبردو التحليل قيمته مش في نتيجته، وإنما في مراجعة النتيجة مع الدكتور المتخصص.

بس انا منعت فعلا اكل على اعراض غير اللي بتقوليها واتحسنت، ده يبقى ايه؟
يبقى اي حاجة غير الحساسية
التهاب معدة مثلا
قولون عصبي
التهاب تقرحي في الجهاز الهضمي
أيا كانت المشكلة اللي خلت الطفل يرتاح مع المنع، طالما معندوش اعراض حساسية طعام اللي قولنا عليها في الأول >> هو مش مريض حساسية طعام

اخر حاجة، هل فعلا لبن الام ممكن يسبب حساسية؟
الإجابة لا
ممكن بنسبة صغيرة جدا البروتين اللي في أكل الام ونزل مع الرضاعة الطبيعية يسبب حساسية للطفل، ولكن اتفق جمهور العلماء ان ما ينفعش تحت أي ظرف نمنع الرضاعة الطبيعية أو نمنع الام عشوائيا من الاكل ونسبب لها هي والطفل سوء تغذية

منع الاكل ثم خطة إعادة الإدخال لازم يتموا تحت إشراف دقيق من استشاري حساسية

دكتورة
#أستاذ مساعد طب #الأطفال، #استشاري أمراض #الحساسية و #المناعة و #الروماتيزم لدى الأطفال، كلية الطب، جامعة عين شمس

22/07/2025

الشكل اللي حضراتكم شايفينه ده اسمه ((وذمة وعائية))
يعني تورم في أجزاء من الجسم >> جفن العين، الشفايف، اللسان، الحلق، الحنجرة، الأذن، الكفين، القدمين، المنطقة التناسلية، ويزيد في بعض الأمراض تورم جدار المعدة وتورم الساقين والذراعين والرقبة

النهاردة الوذمة الوعائية بتتقسم إلى ٥ مجموعات كبيرة:
✅️ حساسية:
بتحصل خلال دقايق إلى بالكتير ساعة من التعرض لأكل او دواء او حشرات >> بيزيد بسرعة >> ممكن يحصل معاه حساسية صدر وجلد وممكن يوصل لصدمة تحسسية anaphylaxis
استجابته سريعة على الكورتيزون وأدوية الحساسية، والادرينالين اذا تطلب الأمر >> غالبا بينتهي في أول ٢٤ ساعة >> مهم نعرف سببه

✅️أدوية:
ليها أكتر من طريقة تسبب بيها وذمة وعائية، يعني ممكن تكون بنفس طريقة الحساسية، معتمدة على تنشيط الخلايا البدينة وإخراج كمية كبيرة من الهيستامين والبراديكينين>> بتعالج زي النوع الأول،
او تكون شبه الوذمة الوعائية الوراثية، بطيئة، بتطول، مش بتستجيب لأدوية الحساسية

✅️الوذمة الوعائية الوراثية:
٧٠% من الحالات عندهم تاريخ مشابه في العيلة
النوبات مالهاش سبب (مش حساسية أصلا)
بالتالي مفيش حساسية جلد ولا صدر ولا صدمات تحسسية، ولكن
فيه ألم وتورم في البطن ممكن يحصل
علامات حمراء ممكن تظهر على الجسم قبل التورم
أوقات كتير بيكون التورم في أماكن وأماكن لا، يعني عين واحدة، كف ايد واحد، رجل واحدة وهكذا
المريض بيكون حاسس ان النوبة هتيجي
عادة الأعراض بتزيد بالتدريج على مدى ٦ إلى ١٢ ساعة، والنوبة بتطول من يوم إلى أسبوع في بعض الحالات
ولأنها مش حساسية، فالكورتيزون مش بيجيب نتيجة

الموضوع هنا جينات بتسبب نشاط في بروتينات مناعية اسمها complements وتنشط كمان التجلط في الجسم، فيزيد افراز بروتين اسمه براديكينين وبالتالي يحصل تورم بدون حساسية

✅️ التهاب أوعية دموية:
جزء من مرض مناعي أو أورام، سن المريض فوق الأربعين غالبا، مفيش تاريخ مرضي في العيلة، مفيش استجابة غير على الكورتيزون، وغالبا فيه اعراض وتحاليل تساعدنا نعرف ايه المرض المسبب

✅️ارتيكاريا مزمنة:
دي كمان مرض مناعي ولكن على مستوى الجلد،
بيحصل ارتيكاريا غير مفسرة، بتظهر وتختفي على مدار اليوم، بعض الاولاد بتهرش وبعضهم لا، وتستمر اكتر من ٦ اسابيع متواصلة،
ممكن يحصل وذمة مع الارتيكاريا، وممكن تكون الوذمة هي العرض الوحيد في ٢٠% من الحالات
والعلاج هنا أدوية حساسية بجرعات عالية ولمدة طويلة (اقل مدة ٣ شهور وممكن تستمر لسنوات) وممكن تحتاج أدوية مناعية أو بيولوجية، حسب كل حالة

✅️ يظل عندنا حالات غير معلومة السبب، لازال الطب عاجز عن ايجاد تفسير ليها

التشخيص والعلاج لازم يتم بواسطة دكتور حساسية ومناعة متخصص، ما تكتفيش برأي الدكتور المعالج الغير متخصص، لأن التفاصيل الصغيرة بتفرق.

واللي بينورني في العيادة عارفين اننا ممكن نقعد نص ساعة بتسأل في التفاصيل وندور على أصل الحكاية

دكتورة #أستاذ مساعد طب #الأطفال، #استشاري أمراض #الحساسية و #المناعة و #الروماتيزم لدى الاطفال، كلية الطب جامعة عين شمس

19/07/2025

عارفين يعني ايه مفصل (ملتهب) ؟
يعني وارم، مؤلم، أحمر، دافي، مع صعوبة في الحركة

فيه نوعين مهمين من التهاب المفاصل: حاد (حصل بسرعة ومؤلم جدا، ومدة الالتهاب اقل من أسبوع)، و مزمن (بطيء في أعراضه ووجعه أقل، بيزيد ويقل على مدار اليوم، وغالبا بيستمر لاكتر من ٦ أسابيع)

مهم نعرف عدد المفاصل الملتهبة، واحد واللا اكتر، ولو اكتر، حصلوا في نفس الوقت واللا ورا بعض، واللا واحد يخلص والتاني يبدأ

مهم جدا جدا الأعراض المصاحبة لالتهاب المفاصل >> مصاحب للعدوى (نفس وقت التهاب اللوز أو التهاب الأذن أو التهاب مجرى البول) واللا بعد العدوى، ولا مالوش علاقة باي ميكروبات

وقت التهاب المفصل خصوصا لو مفصل واحد، هل الطفل سخن وتعبان ومش قادر ياكل، واللا ألم المفصل وتورمه هم مشكلته الوحيدة

كل دي أسئلة مهم نجاوب عليها قبل ما نوصل لتشخيص (مبدئي) >> التحاليل ممكن تكون طبيعية أو ملخبطة فيهم كلهم >> السونار والرنين ممكن يتشابهوا في سيناريوهات كتير من اللي فاتت.

🎀 مفصل واحد ملتهب + ارتفاع حرارة + ألم شديد وعدم تحمل لأي حركة في المفصل مهما كانت بسيطة + ارتفاع في معاملات الالتهاب >> غالبا صديد في المفصل Septic arthritis

🎀 التهاب حالي (أيا كان مكانه أو سببه) + التهاب في مفصل أو أكتر >> غالبا التهاب مصاحب للعدوى toxic arthritis

🎀 ميكروب أو عدوى من اسبوع إلى اسبوعين (ثم) التهاب في مفصل أو أكتر +/- ارتفاع في معدلات الالتهاب >> التهاب مفاصل تفاعلي reactive arthritis

🎀 اسهال مزمن والم بطن متكرر وقرح متكررة في الفم أو حوالين فتحة ش*ج + التهاب مفاصل متعدد مزمن > حمى روماتيزمية ولازم نعمل ايكو على القلب

🎀 حرارة عالية متكررة على مدار اليوم+ احمرار في الجلد وقت الحرارة + التهاب مفاصل + ارتفاع شديد في سرعة الترسيب ومعاملات الالتهاب >> اطمن الأول ان مفيش أورام خبيثة لا قدر الله >> غالبا التهاب مفاصل مزمن جهازي

🎀 التهاب مفاصل مزمن بيزيد مع الراحة أو المجهود الشديد ويقل مع الحركة +/- التهاب قزحي في العين >> التهاب مفاصل مزمن (روماتويد أطفال قديما)

🎀 التهاب مفاصل + ضعف والتهاب في العضلات + تغير لون جفن العين وعقل الأصابع >> غالبا التهاب الجلد والعضلات المناعي

🎀 التهاب مفاصل تعددي مزمن خصوصا لما يكون الناحية اليمين زي الناحية الشمال + حساسية للضوء+ احمرار في الوجه والكفين + ارهاق عام وحرارة وألم عام في العظام >> لازم نفكر في الذئبة الحمراء

اللستة طويلة وكل مرض ليه مواصفات مختلفة، وتشخيص التهاب المفاصل بكل أسبابه يعتمد بنسبة ٩٠% على الدكتور المتخصص اللي بياخد تاريخ مرضي دقيق وبيفحص المريض فحص دقيق، ودور التحاليل محدود جدا، ومعظم الحالات بتكون الأجسام المناعية عندهم سلبية.
وطبعا كل تشخيص علاجه مختلف تماما عن التشخيص التاني.

علشان كده مهم جدا أن أي شكوى تخص المفاصل نتجه علطول لدكتور أطفال متخصص في الأمراض الروماتزمية

دكتورة
#أستاذ مساعد طب #الأطفال و #استشاري أمراض #الحساسية و #المناعة و #الروماتيزم لدى الأطفال، بكلية الطب جامعة عين شمس

18/07/2025

#حساسية #الجلد #التأتبية أو هنحكي شوية حاجات بتلخبط الناس:
أولا مش كل حساسية جلد = حساسية طعام >> ما تمنعيش الأكل ((احتياطي))

ثانيا مش كل اكزيما (التهاب جلد) = حساسية تأتبية >> الاكزيما أسبابها كتير، زي نقص المناعة وزي بعض الأمراض الجلدية، وزي
الاكزيما الفيزيائية وبعض أمراض التمثيل الغذائي.

تشخيص وعلاج الحساسية التأتبية في الأطفال مكانه عيادات حساسية الأطفال وليس عيادات الجلدية ولا الأطفال العام أو الغير متخصص >> ليه؟ علشان ببساطة هنقولك امتى تحتاجي تقللي أكل وامتى لأ، وإذا كانت حساسية جلد فقط ولا التهاب مناعي من النوع الثاني، اللي بيخلي الطفل عرضة لاشكال مختلفة من
الحساسية زي حساسية الأنف وحساسية الصدر والجهاز الهضمي.

مفيش حساسية تأتبية بدون هرش >> هرش شديد.
الحساسية التأتبية ليها أماكن معروفة في الجسم، وتختلف حسب سن الطفل >> مفيش حساسية تأتبية مثلا في منطقة الحفاضة أو تحت الابط.

اختبار الحساسية غير كافي وأحيانا كتير غير مطلوب في حالات الحساسية التأتبية >> ما تمنعيش الأكل، صدقيني مش هيتحسن لما تجيبي له سوء تغذية.
العلاج باستخدام الكورتيزون خاصة التركيز العالي من الكورتيزون الموضعي، او تكرار إعطاء كورتيزون بالفم >> مضاعفات وآثار جانبية كتير >> أبسطها فطريات في الجلد
وخراريج في أماكن الهرش.

النهاردة بقى فيه أدوية موضعية وأدوية عموما تشتغل على الخلايا المناعية المسؤولة عن حدوث الحساسية التأتبية وعن التهاب النوع التاني، واامن بكتير من الكورتيزون، وفاعليتها أكبر >> ولكن لازم متخصص، علشان يعرف امتى يبدأ وازاي يختار العلاج الأنسب.
حاجة أخيرة: لو بتأكل ولادك مواد حافظة وألوان صناعية واكل غير صحي، الأفضل ما تسألش عن علاج الحساسية التأتبية >> اضبط أكل وبعدين نتكلم.

اه صحيح >> العلاج بالأمصال في حساسية الجلد نتايجه ضعيفة جدا.

. دكتورة #أستاذ مساعد طب #الأطفال #استشاري أمراض #الحساسية و #المناعة و #الروماتيزم لدى الأطفال، بكلية الطب جامعة عين شمس

16/07/2025

شكرا لكل حبايبي اللي نوروني
وشكرا لشركة Parkville # اللي شرفوني وأسعدوا ضيوفي وحبايبي وفرحوهم بهداياهم 🙏❤️🌷🌺

16/07/2025

نتكلم تاني عن حمى البحر المتوسط علشان نصحح شوية مفاهيم:
أولا ((حمى)) البحر المتوسط مختلفة تماما عن ((انيميا)) البحر المتوسط

حمى البحر المتوسط مرض جيني، ممكن يحصل نتيجة خلل في اي ٢ من أصل ٣٥٥ جين حتى الآن، وهو مرض جيني متنحي، يعني ممكن أجيال ما يظهرش فيها أعراض، وممكن جدا تلاقي ناس كتير حاملين للجين بدون أعراض >> سيبهم في حالهم، مش هياخدوا علاج

استحالة نقول حمى بحر متوسط من أول مرة سخونية غير مفسرة، واستحالة نفكر فيها بردو لو السخونة زادت عن ٣ أيام >> اي حاجة من الاتنين دول، انت ١٠٠% مش مريض حمى بحر متوسط أيا كانت نتيجة تحاليلك

قبل ما اقول ايه هي أعراض حمى البحر المتوسط، خليني أراجع مع حضراتكم يعني ايه ((حمى غير معلومة السبب)) >> يعني اتعمل تحليل بول، واشعة صدر، وصورة دم بفيلم، ومزرعة دم وبول وبراز، واتعمل فحص كويس للحلق والأذن والصدر والبطن والجلد ومفيش سبب واضح للحرارة.
لو ما عملتش الحاجات دي، يبقى ما ينفعش نقول ((غير معلومة السبب)).. دور انت بس وهتلاقي سبب ان شاءالله.

طيب امتى نفكر بقى في أمراض المناعة الذاتية، اللي من ضمنها حمى البحر المتوسط؟ يعني نقول ان الحرارة دي سببها نشاط مناعي مش ميكروب؟

١- نوبات قصيرة من ١٢ إلى ٧٢ ساعة، متكررة، متشابهة
٢- النوبات بتبدأ فجأة ولما بتخلص الطفل بيرجع سليم تماما، مفيش ارهاق، مفيش وجع بطن، مفيش وجع عظام، مفيش فقدان شهية

٣- النوبة نفسها >> حرارة عالية، ألم شديييييييد في البطن، فقدان شهية، قيء، امساك يتبعه اسهال، التهاب في العضو الذكري، ألم في الحلق، ألم في الصدر، احمرار في الجلد، ألم أو تورم في المفاصل، تورم في الغدد الليمفاوية والكبد والطحال

لازم كلهم يحصلوا؟ لا طبعا، كل مريض ليه النوبات بتاعته، اللي ممكن تكون عبارة عن عرضين فقط من اللي ذكرناهم، المهم انه يكون شبه نفسه، نوبات قصيرة، متكررة، مالهاش تفسير

طيب والتحاليل؟ لان ده نشاط مناعي في الجسم، هنلاقي ان دلالات الالتهاب بتكون عالية >> سرعة الترسيب، كرات الدم البيضاء، صفائح الدم، CRP, واخيرا اميلويد أ اللي بيوصل لأرقام عالية فوق ال ١٠٠
ولما النوبة بتخلص، التحاليل بترجع طبيعية
لكن مفيش تحليل محدد بيشخص أو بينفي >>> الأعراض أهم حاجة

هل فيه مضاعفات للمرض؟
الحالات اللي مش بتتعالج، أو صعبة الاستجابة على العلاج، ممكن يحصل عندهم مشاكل في الكلى ويبدأ يظهر لهم زلال في البول، علشان كده المتابعة مهمة جدا

هل فيه أكلات معينة ممنوعة؟
في العموم لا. لكن طبعا مهم نمنع الاكل الغير صحي والمصنع،
وفي حالات استثنائية (تقليل) وليس (منع) الألبان والقمح بيساعد في الاستجابة السريعة للعلاج

على ذكر العلاج، هو مهم ناخد الكولشيسين؟ وايه أضراره؟
زي أي دواء لازم يكون فيه آثار جانبية، ودي بتحصل في أقل من ١% من الحالات، لكن الدواء بشكل عام آمن انه يتاخد من سن ٦ شهور وحتى ٩٠ سنة
ومن أهم مميزاته أنه بيحمي الكلى والقلب من مضاعفات الحمى اللي أهمها الداء النشواني أو ترسيب الاميلويد على أنسجة الجسم

هل فعلا فيه حالات مش بتستجيب على الكولشيسين؟
ايوة ودول نسبتهم اقل من ١٠% وبيحتاجوا نضيف لهم علاج بيولوجي

طيب سمعنا ان الأطفال ممكن توقف الكولشيسين بعد فترة؟
وفقا للتوصيات العالمية، اذا الطفل ما عندوش تاريخ عائلي في أقارب الدرجة الأولى أو الثانية، ومعندوش جين من الجينات المعروف عنها تأثيرها القوي على الكلى، وعدى عليه فترة خمول تام (مفيش نوبات تماما) لمدة ٢ إلى ٥ سنوات، ممكن نقلل الدواء تدريجيا ونوقفه بشرط المتابعة الدورية لوظائف الكلى والزلال البولي

دكتورة
#أستاذ مساعد طب #الأطفال، و #استشاري أمراض #الحساسية و #المناعة و #الروماتيزم لدى الأطفال، كلية الطب، جامعة عين شمس

15/07/2025

الصيف والآيس كريم
الصيف والاكلات اللي كلها ألبان وقشطة وسكريات
أنا مش هاتكلم عن التغذية وزيادة معدلات الإصابة بمرض السكر وكل المشاكل اللي ليها علاقة بالتغذية.

انا هاكلمكم عن ميكروب/بكتيريا معينة بتعيش وتنتعش وتكبر وتسبب عدوى أعراضها ممكن تستمر لأسابيع وشهور اذا ما اتعالجتش. البكتيريا دي بتنتقل من خلال الألبان، خاصة لما اللبن ما يكونش متبستر أو مغلي في درجات حرارة عالية لمدة ٥ دقائق على الاقل.

البكتيريا دي اسمها بروسيللا

ليه باتكلم عنها؟
علشان زادت جدا من بداية الصيف،
ولأن أعراضها بتستمر لفترات طويلة،
و ده للاسف بيعرض الأطفال لفحوصات وأدوية هم مش محتاجينها، وممكن الموضوع يوصل لدرجة ان الطفل يتعمل له منظار جهاز هضمي وهو مش محتاج

ايه الأعراض؟
طفل كان كويس، مش بيشتكي من حاجة >> سخونية عالية ممكن تستمر لغاية أسبوع وبعد كده تقل تدريجيا، وممكن تفضل حرارة الطفل عالية أو بتقل وتعلى لمدة ٣ او ٤ أسابيع،

معاها ألم شديد في البطن، بعض الحالات بيحصل لها قيء، وكتير منهم بيحصل لهم اسهال، واللي بيكون شديد في الأول وبعد كده يتحسن تدريجيا، بس بشكل عام طبيعة البراز ما بترجعش زي الأول،
من بعد الأسبوع الثاني الطفل بيشتكي من ألم شديد في المفاصل وخصوصا أسفل الضهر، وهنا بتبدأ المعاناة مع التشخيصات المختلفة

طيب هل فيه اعراض تانية أو مشاكل تانية ممكن تحصل بسبب تأخر التشخيص؟
تضخم الغدد الليمفاوية
تضخم الكبد والطحال
التهاب في عضلة القلب
انيميا وقد يزيد الموضوع إلى خمول في النخاع الشوكي، يعني أنيميا وتكسير صفائح ونقص في كرات الدم البيضاء

كل ما اتاخرنا في التشخيص، كل ما الأعراض بقت متشابهة مع أمراض تانية كتير

طيب ولو ما اتشخصش؟ مش ممكن البكتيريا دي تخف لوحدها؟ للأسف لا

لان البروسيللا بتستجيب لأنواع معينة من المضادات الحيوية، يبقى لازم نشك فيها، ويتعمل تحليل براز، مزرعة براز، مزرعة الدم، أجسام مناعية للبروسيللا

وطالما التشخيص موجود، يبقى العلاج ان شاءالله سهل

دكتورة #أستاذ مساعد طب #الأطفال و #استشاري أمراض #الحساسية و #المناعة و #الروماتيزم لدى الأطفال، كلية الطب، جامعة عين شمس

01/07/2025

لظروف استثنائية وقهرية مضطرة اعتذر لكل ضيوفي النهاردة
ظروف طارئة سامحوني

Address

الوعد بلازا، شارع السوق التجاري ناصية شارع محمد البرقوقي، الحي الثامن، مدينة نصر
Cairo
11765

Opening Hours

Tuesday	5pm - 10pm
Wednesday	5pm - 10pm
Saturday	5pm - 10pm
Sunday	5pm - 10pm

Telephone

01101006434

Website

http://ghadashousha.com/

Alerts

Be the first to know and let us send you an email when د.غادة شوشة - استشاري أمراض الحساسية والمناعة والروماتيزم في الأطفال posts news and promotions. Your email address will not be used for any other purpose, and you can unsubscribe at any time.

Contact The Practice

Send a message to د.غادة شوشة - استشاري أمراض الحساسية والمناعة والروماتيزم في الأطفال:

Shortcuts

د.غادة شوشة

استشاري ومدرس طب الأطفال وحديثي الولادة بكلية الطب جامعة عين شمس. استشاري أمراض الحساسية والمناعة والروماتيزم في الأطفال. عضو الجمعية المصرية لحساسية ومناعة الأطفال ESPAI عضو المنظمة العالمية للحساسية WAO

عضو الأكاديمية الأمريكية للحساسية والربو الشعبي وأمراض المناعة AAAAI

عضو الأكاديمية الأوروبية لأمراض الحساسية والمناعة الاكلينيكية EAACI -------- الخدمات المقدمة : - الكشف على حالات الأطفال والحساسية وأمراض المناعة والأمراض الروماتيزمية في الأطفال. - عمل اختبارات حساسية الأغذية والأدوية والحساسية ضد الحيوانات في الأطفال والكبار. -------- العيادات: * عيادة مستشفى د.عبد القادر فهمي 23 شارع حسن أفلاطون مدينة نصر - القاهرة المواعيد : الاحد من 7-9 م و الخميس من 2-5 م للحجز : 222918700 - 01221111172 أو الضغط على Book now في صفحة الفيسبوك

* عيادة مدينة نصر: 6 عمارات السعودية، شارع النزهة، أمام دار الدفاع الجوي، الدور الرابع السبت: 7-10م والأحد : 2-4م و الثلاثاء : 2-4م للحجز : 01101006434 أو الضغط على Book now في صفحة الفيسبوك * مستشفى كليوباترا: الكوربة ، مصر الجديدة. للحجز: 19668 الثلاثاء : 5-7 مساءً

د.غادة شوشة - استشاري أمراض الحساسية والمناعة والروماتيزم في الأطفال

30/07/2025

29/07/2025

28/07/2025

26/07/2025

24/07/2025

22/07/2025

19/07/2025

18/07/2025

16/07/2025

16/07/2025

15/07/2025

01/07/2025

Address

Opening Hours

Telephone

Website

Alerts

Contact The Practice

Shortcuts

Share

Category

د.غادة شوشة