Rabab

13/03/2025

قال رسول الله لرجل اسمه بِشر اتي يبايعه علي الاسلام ولكنه رفض انه يدفع الزكاة ولا انه يجاهد في سبيل الله
فقال له رسول الله عليه افضل الصلاه والسلام:
يا بِشر.. لا زكاة ولا جهاد؟؟
فبما تدخل الجنه!!

تخيلوا الناس اللي مش في دماغها هي عليها زكاه او لأ؟؟
او بيطلعوا صدقه في سبيل الله عز وجل او مش مهتمين بالموضوع؟؟
طيب يا تري حد فينا بيجاهد؟؟
والجهاد مش معناه قتال ولكن معناه مجاهده النفس في سبيل الله عز وجل،
هل احنا بنحاول نصلي بتركيز ونجاهد نفسنا عشان نصلي احسن صلاه ونكون من المحسنين؟؟
طيب هل حد فينا بيحاول يقرا القرآن ويتدبر ربتا بيقولنا ايه واحنا دماغنا مقفوله بنقرا قرايه جرايد او حتي مش بنقىا قرآن خالص؟؟
هل بنجاهد نفسنا في شغلنا؟
ف مذاكرتنا؟
في اخلاقنا؟؟

طيب هندخل الجنه بإيه؟؟

يلا بينا كل واحد يختار لنفسه باب يحاول يركز فيه ويكون من المجاهدين فيه عشان يقدر يدخل منه الجنه
باب صدقه
باب زكاه
باب صلاه
باب صوم
باب دعاء
باب احسان
ابواب الجنه كتير .. يلا نلحق نطرق ابواب رحمة ربنا
وندخل الجنه مع الرسول عليه افضل الصلاه واتم التسليم 🥰🥰

06/03/2025

في دعاء كنت بقوله من شويه مع ا. عمرو خالد بيقول
اللهم أغننا بالافتقار إليك، ولا تفقرنا بالاستغناء عنك

وكلنا اكيد عارفين الدعاء ده وبنردده لما نسمعه
بس لقيتني ركزت كده مع الدعاء انه بيقول لا تفقرنا بالاستغناء عنك
بعد كده قعدت افتكر ف فتره قريبه في حياتي كنت بقول اني مش لاقيه حاجه ادعي بيها انا خلاص مش عاوزة حاجه
اللي بدعي بيه مش بيحصل واصلا خلاص مش عاوزة حاجه
انا تمام وراضيه وخلاص علي كده كفايه عليا في الدنيا!!
(استغفر الله العلي العظيم واتوب اليه)
ويمكن الفتره دي نفسيتي فيها من اسوأ الفترات لاني مش عارفه اخد خطوة لقدام في اي حاجه لاني مش عاوزة حاجه ولا في شغل ولا في حياه ماشيه وخلاص
ربنا منّ عليا بفضله اني طبعا ارجع ادعي تاني بس مع شويه يأس جوايا الصراحه
وبعدها رزقني بتعب ومرض بقيت بتسول الدعاء حرفيا من اللي اعرفه وما اعرفوش عشان اقدر ارجع بصحتي وعافيتي

معني كلمه اننا فقرا بالاستغناء عن ربنا عز وجل ده مصيبه كبيره

انا و زيي كتير انا واثقه جينا في وقت وقلنا خلاص مش عاوزين حاجه ويكأن اننا اتقمصنا وبنتفضّل (استغفر الله) بالاستغناء عن اللي بندعو بيه عشان اتأجل شويه او اتمنع لكرم ربنا وفضله
فربنا من فضله برضه انه يرزقنا بحاجه تردنا ليه وللدعاء ليه لأن ده عز الغني والفضل والكرم اننا نطلب من الله الكريم
تخيلوا لو فعلا بطلنا ندعي وسكتنا وبقينا مش عاوزين وساخطين ويأسين من الحياه
هنكمل ازاي بجد؟
طيب ربنا هيفرجها علينا؟؟
سواء رزقنا او لا واحنا مش حاسين ان ده كرم من ربنا عمرنا ما هنعيش في رضا ابدا
بجد اول مره افهم جمله لا تفقرنا بالاستغناء عنك
لأن حقيقي الواحد من جواه بيبقي فاضي وفقير وحاسس بخواء لأنه حاسس انه لوحده بشكل تام
ولكن لما ربنا يغنينا بالافتقار اليه يعني الاحتياج ليه في كل نفس بنتنفسه ساعتها بس بنحس اننا مسنودين وكل طلباتنا واحتياجتنا في ايد الغني الكريم .. اللي لو عطهالنا يبقي رحمه منه ولو منعها يبقي رحمه مضاعفه احنا مش شايفينها
فاللهم لك الحمد حمدا كثيرا طيبا مباركا فيه واللهم اغننا بالافتقار اليك ولا تفقرنا بالاستغناء عنك
اللهم امين

04/03/2025

سكوا ابواب الاحزان يمسامير الرضا 🥰
اللهم ارزقنا الرضا بما قسمت لنا والهدوء والراحه والسكينه

03/03/2025

سيدنا ابو بكر كان متعود يطلع صدقه باستمرار طبعا وفي ابواب متفرقه منهم ابواب ثابته
وكان باب من الابواب دي واحد من قرايبه، ابن خالة سيدنا ابو بكر
بعد كده في وقت حادثه الإفك ناس كتير اتكلموا عن السيده عائشه "بنته"
كانوا ناس غريبه وناس قريبه، والغريب في الامر ان واحد من الناس القريبه اللي اتكلموا وقال كلام سئ و قعد ينشر في اشاعات سيئه كان الراجل قريبه ده اللي سيدنا ابو بكر بيساعده بالصدقه الدايمه دي!!

وطبعا سيدنا ابو بكر كأي انسان طبيعي غيور علي شرف بنته قرر انه يوقف الصدقه واقسم انه مش هيديله صدقات تاني ولا يساعده ويديها لحد تاني افضل..

فوقتها ربنا عز وجل نزل في كتابه الكريم في سورة النور وقال:

وَلَا يَأْتَلِ أُولُو الْفَضْلِ مِنكُمْ وَالسَّعَةِ أَن يُؤْتُوا أُولِي الْقُرْبَىٰ وَالْمَسَاكِينَ وَالْمُهَاجِرِينَ فِي سَبِيلِ اللَّهِ ۖ وَلْيَعْفُوا وَلْيَصْفَحُوا ۗ أَلَا تُحِبُّونَ أَن يَغْفِرَ اللَّهُ لَكُمْ ۗ وَاللَّهُ غَفُورٌ رَّحِيمٌ (22)

ربنا عز وجل بيقول ان بلاش اولو الفضل يحلفوا ولا يقسموا علي عدم مساعده القرايب ( زي ابن خالة سيدنا ابو بكره)
و لا المساكين (هو برضه لانه كان من المحتاجين)
ولا المهاجرين (وهو برضه كان مهاجر من مكه الي المدينه)
عشان ربنا يغفر ليكوا ويعفو عنكوا زي ما سامحتوا في حقكوا ..

وطبعا وقتها سيدنا ابو بكر قال انا هكون من اولو الفضل ورجع يدي الصدقه تاني لابن خالته وسامحه..

في هنا نقطتين
اول نقطه ان ربنا بيدعو للمسامحه والود بين الاهل حتي لو حصل غلطه كبيرة لانها اقوي رباط وصلة ارحام..
تاني نقطه ان الراجل اللي غلط ده كان من الناس اللي شاركت في غزوة بدر في بداية الاسلام يعني هو من الناس المتعمقه في الديانه، القريبه من الرسول عليه افضل الصلاة والسلام من البدايه
وكمان وهو بيهاجر من مكه للمدينه ساب كل امواله واملاكه ف مكه عشان يقدر يهاجر مع رسول الله عليه افضل الصلاه والسلام
ومع ذلك حصلت منه ذله وغلط ..
غلط في زوجه الرسول عليه الصلاه والسلام وبنت سيدنا ابو بكر!!

ف كل انسان مهما كان مدي قربه من ربنا وجهاده في سبيله فهو وارد يغلط
ويغلط غلطات كبيرة
وربنا بيغفرها بالاستغفار والتوبه

فلازم نحاول نكون هينين مع نفسنا
عن طريق اننا نسامح ونعفو عن نفسنا مهما غلطنا من غلطات كبيرة مش عارفين نستوعب ازاي عملناها
و اننا نعفو عن اللي اذونا وننساهم
وربنا بيرد كل الحقوق لاصحابهم في الاخر

13/01/2025

عشان تبدأ تسيطر علي مشاعرك، لازم تقبل انهم هيعدوا بسرعه.
لازم تتعلم تخليهم يعدوا من غير ما تتمسك وتتفاعل معاهم اوي
يعني مثلا لو زعلان
اسمح لنفسك انك تحزن عادي من غير ما تؤنب نفسك وتقول "انا مش لازم اكون زعلان" او "انا هفضل كده لامتي"

لازم تفهم انك مهما كانت شخصيتك قويه، وعقليا قادر تتحكم في انفعالاتك
هتفضل برضه اوقات يمر بيك حالات من الزعل والحزن والاكتئاب وخيبة الامل والاحساس بالخيانه والخذلان
وكثير من المشاعر السلبيه
هتشك في نفسك
وهتشك في قدرتك علي انك تكون الشخص اللي انت بتسعي تكونه
بس ده طبيعي
لأن المشاعر دي بتيجي لينا كلنا
وزي ما بتيجي فهي برضه بتروح

طيب ايه لزمه اني احس مشاعر سيئة؟؟
زيها زي الاحساس بالالم كده
لولاه كان زماننا ميتين
محدش بيحب يحس بالالم ولكن لولاه احنا بنعرف ان جوانا مشكله ولازم تتحل ومحتاجين دكتور وعلاج

الاحاسيس السيئه كده برضه
هي بتبقي اشارة لوضعك الحالي،
ممكن تكون محتاج تتخلي عن ناس معينه في حياتك،
او تتخلص من قصه مسببة ليك معاناة في حياتك..

وبرضه لازم تاخد بالك من حاجه
ان لو المشاعر نفسها اتكررت كذا مره علي فترات
فده معناه ان في حاجه سيئه في حياتك محتاجه تتغير
في نقطه مسببة ليك المشاعر السيئه دي انها تتكرر فلازم تحاول تغيرها او تزيلها خالص من حياتك..

بوست مستوحي من كتاب
ج

13/01/2025

يا أيها الإنسان ما هذا القلق؟!
أوليس ربك قد تكفل بما خَلق؟!
أوليس بعد العُسر يُسراً مثلما..
بعد الليالي دائماً يأتي القلق!

12/01/2025

Loneliness is not cured by human company
Loneliness is cured by contact with reality, by understanding that we don't need people.

اول ما تدرك انك مش محتاج الناس، هو ده الوقت اللي هتبتدي تستمتع فيه بصحبة الناس..
لأنك وقتها هتشوفهم علي حقيقتهم وعلي مقدار وجودهم الحقيقي في حياتك، مش هتشوفهم بالمقدار اللي انت محتاجه منهم!!

05/01/2025

Half angel, half devil

01/01/2025

30/12/2024