06/12/2025
مشهد الاستاذ احمد خليل فى مسلسل وهما بيعملوله عملية وفجأة الدكتور قالهم المريض محتاج دم ضرورى(من قبل ما يفتحو جرح العملية اصلا)...فقالوله مفيش دم كفاية فالمستشفى يا دكتور....فراحت الممرضة بكل فدائية جابت سرنجة 5 سم وسحبت من دراعها دم وبعدين الدكتور حقن الـ5 سم دم طازة دول اللى هما مقدار تفة تقريبا فى دراع الاستاذ خليل والحمد لله تم انقاذ حياته!
طبعا دا تهجيص درامى لأبعد الحدود بس انا مش هنتقده عشان انا عملت تهجيصة مماثلة ايام ما كنت امتياز بس مش عشان انقذ حياة الاستاذ احمد خليل...لأ...عشان انقذ حياتى أنا
وانا في فترة الامتياز وواقف فى الطوارىء لقيت هاجم عليا واحد منفعل بيقولى اخويا بينزف وعايزين ننقله دم دلوقتى...قولتله فين اخوك...قالى قاعد هناك تعالى بسرعة الحقه...روحت معاه...لقيت واحد قاعد لافف صوباعه بمنديل
شيلت المنديل وشوفت الجرح لقيته صغير بتاع 2 سم...فقولتله دا محتاج غرزة ولا اتنين وخلاص متقلقوش بسيطة الحمد لله.
لقيت راجل أربعينى ظهر من العدم فى المشهد بصوت أعوذ بالله منه بجد...اللى هو لو الفنان مصطفى كامل سمعه هيتمنى انه يعيش فى مقبرة مصنوعة من صوت الراجل دا...المهم لقيت الصوت الأجش دا قالى:"غرزة ولا اتنين اييييييييه انتو كفرة...انت مش هتنقله دم!!!!!...بنقولك نزف انت مش شايف المنديل متغرق دم ازاى...هتخيط قبل ما تعوضله الدم!!..انتو مفيش عندكو ضمير!!! "
فهمته قولتله هو بالنسبالك كتير عشان انت مشوفتش نزيف قبل كدا...مش دا النزيف اللى بنعمله نقل دم ونعرض المريض لخطورة نقل الدم والاثار الجانبية بتاعتها....وكدا كدا هنعلقله محلول من باب الاحتياط مع ان الجرح صغير اصلا ومش مستاهل....قالى عليا الطلاق بالتلاتة لو ما اتعوضله الدم اللى نزفه لأعملكو جناية ف ديك أم المستشفى دى انتو مش هتضحكو علينا.
حاولت افهمه بكل الطرق العلمية المبسطة مكنش قابل غير ان يتعلقله دم الاول وبعدين نتفاهم ..فمكانش قدامى حل غير انى استخدم الهجايص بتاعت مدينة الانتاج الاعلامى عشان اتعامل معاه صح طبيا وفى نفس الوقت مطلعش من الموقف دا بمطوة فى وشى...فـقولتله حاضر هنعوضله الدم وقمت مجهز ادوات الجراحة...وروحت جبت ازازة محلول من التمريض وسحبت منها 5 سم بسرنجة وحطيتها فى جيبى ورجعت.
يدوب علقت المحلول...لقيت أبوه كشر و قالى محلول بس!!!امال فين الدم!!!...ساعتها ابتسمت ابتسامة ثقة وقمت مطلع السرنجة من جيب البالطو....طبعا الراجل وشه اتشنج وعروقه أنتفخت وقالى بلهجة اللى هيضربنى دلوقتى:" ايه دا !!!"...قولتله دا دم....قالى دم ازااااااااااااى دا ابيض!...قولتله: خلايا دم بيضا 🙂
قام هدى خالص ووشه بقى رايق وجميل وصوته ابتدى يبقى رومانسى وقالى بمنتهى الاحترام:"طب بالنسبة للحمرا يا دكتور مش هتعوضهاله ؟"....قولتله الاهم عندنا البيضا...الحمرا دى ممكن يروح ياكل اى حاجة غنية بكرات الدم الحمرا...فراولة,,,طماطم,,,تفاح...أى حاجة.
وروحنا كلنا مبسوطين بعد يوم جميل اكتملت فيه الاضلاع الثلاثة لمثلث السعادة...انا عملت اللى عايزه..وهما عملو اللى عايزينه..والفنان حسن الرداد وقتها مكنش بيمثل.
