25/10/2025
الدكتور : البيبي يا مدام كويس اوي في السونار الحمد لله
الحامل: طيب ممكن يا دكتور تقول لي النوع ولد ولا بنت مش المفروض يظهر انا في آخر الرابع
الدكتور : هو لسه مش واضح عشان البيبي صغير بس هحاول اشوفهولك
الحامل : مش عشان حاجه والله يا دكتور بس عشان اجيب اللبس
جوز الحامل : لو بنت يا دكتور قول ... عادي مش هنزعل
ام جوز الحامل : نزعل؟؟ .. نزعل من ايه كل اللي يجيبوا ربنا كويس
ام الحامل : اه الحمد لله .. ولد او بنت نعمه فيه غيرنا اصلا مش طايلين
اخت الحامل : هيا يعني خلصت خلفه.. دي لسه اول مره
واحده معاهم معرفش مين : هو لسه فيه ناس بتفرق معاها الولد من البنت .. الناس مبقتش جاهله زي زمان يا دكتور
الدكتور : النوع ظهر اهوه الحمد لله ... بنوته أن شاء الله
الحامل : بنت .. هو في آخر الرابع يبقي دقيق وواضح ولا نستني شويه ونتأكد ؟؟
جوز الحامل : ايه ده بنت ازاي ؟؟ ده جالي في الحلم جوز خالتي الله يرحمه شايل ولد واداهولي وقال لي خد ياسين يا حسنين
ام جوز الحامل : عادي يا حبيبي ( موجهه الكلام لابنها ) ما هو السونار ممكن يغلط لان دي كانت رؤيا
ام الحامل : هو انت يا دكتور مش قلت من شويه مش باين ... في لحظه كده بان وظهر وكمان بنت .. عجايب ( مع حركه تتميز بها المرأه المصريه تتمثل في عوج زاويه الفم ناحيه الجانب الايسر للوجه مع رفع الحاجب الايمن في ذات اللحظه مع إصدار صوت معين من الفم يصدر دون فتح الفم او الاسنان او حتي تحريك اللسان ... وربما لأعجوبه إصدار
هذا الصوت يرتبط دائما بكلمه عجايب بعده )
اخت الحامل: متقلقيش يا حبيبتي أن شاء الله ولد والاشاعات دي يا ما بتغلط هما الدكاتره بيفهموا حاجه
واحده معاهم معرفش مين : يا عيني عليكي يا حبيبتي .. متضايقيش نفسك انتي لسه صغيره وبكره ربنا هيعوضك
الدكتور : خلصتو …هي بنت واطلعوا بره
