أسماء أحمد - Asmaa Ahmed

20/01/2026

أوقات كتير الألم بيكون أعلى من قدرتنا على التعبير…
أعلى من قدرتنا على الشرح…
وأعلى بكتير من إن حد يلاحظ إننا بنغرق.

صوت داخلي طول الوقت بيقولك إن وجودك مش باين.
فبندور على أي طريقة تحسسنا
حتى لو كان ده بايذاء نفسنا
علشان مش عارفين طريقة تانية

لو انت كمان بتمر بده اسأل عن الجلسات وتعالى نتعلم مع بعض ازاي نعبر عن وجودنا من غير م نأذي نفسنا
#تشافي

03/01/2026

انا معنديش صحاب
انا لوحدي كويس مش محتاج حد
هيسبوني ويمشوا
هيأذوني
لا ياعم مش لاعب خليني بعيد احسن

جزء من أصوات التعلق التجنبي
اللي طالعة من خوف بيفكرنى بخوف قديم لأول مرة اتسابت لوحدى وتم تجاهل مشاكلى ومشاعرى فاتعلمت احلها لوحدى
تعلق مرضي مش راحة بال
لأنه طالع من خوف منا لو حبيت وقربت واتعلقت هتوجع

بس التجنب مش هيحل الخوف ده ولا يخليه يختفي
الحل في التعلق الآمن بعلاقات صحية داعمة
بعد التعافي من صدمات الطفولة والتعلق المرضي
هتعرف تعيش وتتعامل وتستفاد بوجود الناس من غير م تتأذي
أسال مجرب

23/12/2025

التماهي موجود فينا من وإحنا أطفال.
‏إحنا بنتعلم العالم عن طريق التقليد.
‏بس اللي عنده بوردرلاين؟
‏بيفضل يعمل ده طول عمره علشان ده أسهل وسيلة دفاعية عنده.

09/12/2025

نوبات الغضب اللي بتجيلنا كبوردرلاين طالعة من مكانين
احساس قوي جوايا اني محدش فاهمني
فلو حاولت اشرح براحة واتكلم عن نفسي واللي مضايقني محدش هيحس او يستوعب اللي بقوله
فبزعق غصب عني يمكن اتسمع

والجزء التاني إن جوايا طوفان من المشاعر الكتير والقوية اللي بتعلى وانا مش عارفة اسمعها ولا افسرها ولا اتعامل معاها
فبيوصلوني للانفجار ده

لو انت بتمر بده
اسأل على تفاصيل الجلسات ويلا بينا نبدأ نتعلم ازاي نسيطر على نوبات الغضب ونتواصل بشكل احسن مع الناس ومع نفسنا

01/12/2025

الخوف من الهجر من أقوى سمات البوردرلاين
بنتعامل معاه بالتعلق والاختبارات والشك أو حتى بالتجنب والهروب من العلاقات علشان منتوجعش
وفي الحالتين بنتوجع
لو انت بتمر بده
اسأل على تفاصيل الجلسات ويلا بينا نبدأ طريق الطمأنينة الحقيقي

26/11/2025

في ناس كتير بتفتكر إن اضطراب الشخصية الحدّية مجرد تقلب مزاج
بس الحقيقة ان الموضوع عمره ما كان مزاج.
الموضوع أمان.
أوقات كلمة صغيرة… نبرة حد اتغيّرت…
رسالة اتأخرت…
حتى وشّ حد حاساه مش زي كل مرة.
تفصيلة بسيطة جدًا…
علشان الإحساس بالأمان عندي مرتبط بالناس
ف اي حاجة بتهزه.

ابعت رساله لو حابب نمشي الرحلة دي مع بعض ونوصل لمشاعر مستقرة اكتر وحياة اهدى

20/11/2025

الخوف من الهجر من أقوى سمات البوردرلاين
ناس بتتعامل معاه بالتعلق وناس تانية بالتجنب والهروب من العلاقات علشان منتوجعش
وفي الحالتين بنتوجع
علشان الحل في التعافي مش في الحيل الدفاعية

11/08/2025

:

من سنتين تقريبًا بدأت رحلة كده للتعرف على الذات كانت أول صدمة فيها اني بسعى طول الوقت أني اكون مثالية وانا مش مدركة ده ولا واخدة بالي ولا عارفة ان في حاجة اسمها كده أصلا

محاولاتي طول الوقت ان البيت يفضل مترتب ونضيف ومفيش اي حاجة تتحرك من مكانها اللي كانت ممكن تاخد مني ٤ ساعات كاملين كل يوم من غير م احس بالوقت ده مكنش حب للنظام ده كان سعي للمثالية علشان أكون (شاطرة - ليا لازمة - مقبولة)

محاولاتي للسيطرة طول الوقت على الناس اللي حواليا انهم يتصرفوا بشكل أحسن ده مكنش مساعدة ليهم لأن محدش طلب مني ده
ده كان جزء من خلق عالم مثالي اقدر اعيش فيه من غير توتر

كل الحاجات اللي اجلتها ومبدأتش فيها في وقتها مستنية اني اكون جاهزة وده عمره م هيحصل
"اللحظة المناسبة هي دلوقتي"

كل الحاجات اللي سبتها في نصها
اصل طالما مش هتطلع احسن حاجة فليه احاول

الحالة دي مهلكة وبتدخلنا في دوامة بتاخد مننا كتير ومش بتدينا اي حاجة

الكتاب ده ساعدني جدا في الادراك والحل والتغير
ارشحه بشدة
❤️

07/07/2025