clinical psychologist Nada abdelhady

12/03/2025

أختلاف الرأى لا يفسد للود قضية دا شئ أساسي ومفيش حد مختلف عليه، ولكن فيه مواضيع مينفعش فيها حياد مينفعش فيها انى مقولش رأى واضح وصريح يا تكون مع أو ضد وبشكل واضح وناقش فيها بقي أسباب رفضك أو قبولك بس قول رأيك ودعمه بدليل ..
ادرس الموضوع من كل الجوانب الخاصة بيه ( نفسيا، اجتماعيا، بيلوچيا،قانونيا، فسيولوچيا ) والاغلب هتلاقي الجانب ( الديني ) متوافق مع كل المعايير السابقه ..
فكر بمنطقيه وعقل وعاطفه
والعاطفه مقصود بيها التقبل والفهم والمراعاه لجميع الجوانب ..

23/02/2025

انا متقبلاك وفهماك ومش شرط اكون موافقه على تصرفك أو فعلك ..
في فرق بين اني متقبله تصرفك الغلط أو اللى مش صح وحاسه وفاهمة بالظروف الى دافعتك للتصرف دا وبعذرك ومتقبلاك ك إنسان بيغلط ومسمحاك
وبين انى موافقه على الغلط في حد ذاته ..
كلنا مفروض نراعي ونفرق بين التصرف وبين الشخص
ف فكرة انك اتصرفت غلط او عملت حاجة وحشه دا مش معناه اطلاقا انك وحش بس التصرف فى الوقت دا بالتفكير دا والظروف دي خلتك تفكر وتتصرف كدة ..
ف انا براعي ومسامحه ومقدرة دا وانت منفصل عن تصرفك
لان تصرفاتك صح فى حاجات وغلط فى حاجات حسب حاجات كتير كلنا ك بشر مفروض نراعي بعض فيها ..

11/08/2024

مش محتاج تثبت أو تقنع أو تبرر لحد حاجة، مش محتاج تبذل مجهود وطاقة على الأرض، انت أولى بأى مجهود تبذله المهم تكون متسامح وراضي وحابب ومتقبل نفسك، المهم نفسك، المهم راحتك وسلامك النفسي وطمأنتك لنفسك.
المهم انت وراحتك من الأخر يعنى ..

09/08/2024

بتهتم بأكل وشرب وتعليم وتمارين ودروس ولادك دا مش حب دى رعاية، كل دا كوم وانك تاخدهم فى حضنك وتحسسهم قد ايه بتحبهم وتبينلهم مشاعرك كوم تانى ..
ولادك محتاجين يشوفوا حبك ليهم واضح بالتعبير عنه والاحساس بيه، مهما كان كل اهتمامك ب رعايتهم وحمايتهم من المستقبل قوي، احتياجهم أنهم يحسوا بالمشاعر الواضحة والتعبير عن حبك وخوفك واحتوائك ليهم اقوي ..

19/07/2024

من وجهة نظرى اكتر حاجة بتميز اى علاقة مريحة هى الوضوح ،،
يكون فى وضوح وصراحة فى العلاقة
ميكونش فى تصنع وتمثيل ملهوش أى داعى
يكون فى احترام لأفكار ومشاعر وحدود وقيم ومبدائ اللى قدامى أيا كانت العلاقة دى ايه علاقة بين صحاب علاقة بين اتنين بيحبوا بعض أو أيا كانت نوع العلاقة ..
الوضوح والتفهم والنضج الكافى لفهم المشاعر واحترامي لطريقة تفكير اللى قدامى كافى ينجح اى علاقة ..

02/06/2024

فى اى قضية عاملة إثارة فى المجتمع بين وجهتين نظر متعارضين بشوف كتير واخدين رأى الأغلبية من غير ما يشوفوا أو حتى يسمعوا وجهتين النظر بشكل كامل ومفصل بيكون بس مجارة إجتماعية بشكل أعمى .
ودا مش بيدل من وجهة نظرى غير على الضعف والهشاشة النفسية والمعرفية .
فى اي اختلاف فى اى قضية احكم عقلي وأشوف بعقل كدة الطرف دا بيقول ايه، وايه الادله اللى بتتقال على كلامة وتبحث وتدور على المعلومات وهكذا مع الطرف التانى
عشان تكون رأى مستقل بنفسك ويكون ليك وجهة نظر مستقلة وإلا هيكون ايه لازمة وجود العقل ! ويكون ايه فائدة التعليم ! التفكير النقدي والانتقائي هو اللى بيميزنا عن باقي الكائنات الحية ،،، بلاش نبقي ماشين مع التيار كدة
كلمة تودينا وكلمة تجبنا ، خلينا نشغل مخنا ونعقل ونفكر ونفكر ونفكر بلاش حفظ، بلاش مجارة إجتماعية ، بلاش خوف، بلاش ضعف ..

01/06/2024

Look how nature is beautiful ❤️

Sit back and relax while enjoying this scenic film captures the marvelous and amazing world of cute baby animals. In this relaxation film you will find a be...

27/05/2024

هل انتشار الاعتداءات الجنسية للأطفال من أقرب الناس ليهم زى الأب والأخ والخال والعم مش بيدينا إنذار كدة أن خلاص حان الوقت وبجد أن يكون فى توعية جنسية للأطفال أو ثقافة جنسية وتربية جنسية ليهم .
هل لسه مصطلح التربية أو الثقافة الجنسية عند البعض عامل قلق وخوف ؟!
إدراكك لمعنى المصطلح السلبي وتخيلاتك السلبية عن المراد تعليمة بيخليك تمنع فوائد وإيجابيات كتير زى أن الطفل

١. يتعلم ويعرف حرمة جسدة والأماكن اللى محدش ينفع يلمسها .
٢. يعرف الحدود والمسافة الآمنه فى تعاملاته مع الناس .
٣. يعرف يميز الشخص المتحرش حتى وهو أقرب الناس له .
٤. تعليم الطفل المعلومات الجنسية المناسبة لسنه والمرحلة العمرية بدل ما يعرفها من مصادر غير آمنة زى الانترنت او الاصدقاء اللى فى نفس السن .

واكتر من كدة بكتير إيجابيات انى اوعى ابنى/ بنتى عن الثقافه الجنسية المناسبة لعمرهم ..

الأضطرابات والمشاكل النفسية اللى بتحصل للشخص نتيجة عدم التوعية والتثقيف فى الصغر بتبقي مش سهله ابدا ..

زى خبرة التحرش فى الصغر ولمدة طويلة من شخص قريب
تفتكروا دا هيطلع شخصية عامله ازاى لما يكبر ؟

طب لو كان فى توعية للطفل وتثقيف من البداية عن حرمة الجسد وتميز الشخص المتحرش و و و إلي آخره كان ممكن تجنب كم أذي قد ايه ؟

التوعية والتثقيف الجنسي للأطفال مش عيب ولا حرام
إدراكك للمفهوم السلبي هو اللى بيخليك تشوفه عيب أو مينفعش مع أن العيب واللى مينفعش هو التجنب والخوف الشديد من انى مثقفش ولا اوعي ابني أو بنتي والعواقب السلبية البشعة المترتبة عن عدم توعية اطفالك انت ذات نفسك هتعاني منها فيما بعد ..