https://www.facebook.com/336157583816093/

Dr/Ibrahim Ellithiy, Cairo (2025)

25/02/2025

كل عام وانتم بكل خير وستر وسعاده ديما يارب العالمين ورمضان مبارك عليكم جميعا
كوباية شاى وتعالى اقولك نظامك تقريبا هيكون ازاى خلال الشهر الكريم اعاده الله عليكم بالخير واليمن والبركات

🔸 ابدأ فطاري ازاى

اربع خطوات بالشرح و بالتفصيل وماتزهأش

1. اول حاجه .. خل التفاح لو انت من الناس اللي تقدر تشرب خل تفاح (كوباية مايه معلقتين خل تفاح نص لمونة تمام وتحط شوية من ملح البحر او ملح الهيمالايا)
ليه لانك فى الصيام فاقد المعادن والفيتامينات
وخصوصا الصوديوم .. ف الحركه دي هتعوض جسمك في لحظتها من احتياجه للاملاح وخصوصا الصوديوم
(خل التفاح ممنوع تماما مع حالات التهابات المعده وقرحه المعده ) .. ومن الأفضل استشاره طبيبك الباطني لو لديك مشكله في المعده قبل استخدامه

2.تاني حاجه ..شوربة العظم ودي ملهاش حل ياجماعه تدعم الجسم واللياقة وبناء العضلات لانها تحتوي على الكولاجين
وده يديلك الجيلاتين.. والجيلاتين دا هو اللى بيغلف الامعاء
تعرف أن جسمك أثناء الصيام بيكسر الغشاء المخاطى؟ ليه؟؟ عشان يصلحه و يجدده
عشان تقدر تمتص الفيتامينات من الوجبة اللي بعدها

الجيلاتين ده بيقوم بنفس الوظيفه بيغلف الأمعاء ويساعد الجسم جداااا في هذه الوظيفه

شوربة العظم كمان بتحتوي على الجلوتامين
الجلوتامين بيعمل اى؟
الجلوتامين ده حمض اميني بيدعم الجهاز المناعي ويدعم جهازك الهضمي .. ازاى ؟؟؟
يوقف عمليه اسمها موت الخلايا الظهارية في الأمعاء
الخلايا دي بتغلف الامعاء فلو ماتت الخلايا دى مش هيبقى فى امتصاص حتى لو اخدت كل المكملات وانضف الأنواع في الدنيا مش هتستفيد
ليه؟ لأنه معندكش الخلايا الظهارية دى
واللي بيدعمها الجلوتامين اللي موجود فى شوربة العظم

افضل طريقه (١٠ ساعات ل ١٢ ساعه طهي علي نار هاديه وبدون اي بهارات) .. وبعدين تاخده وتفرغه في كوبايات صغيره وتخزن فالفريزر ويوميا تسخن كوبايه وتشرب وهكذا

3. تالت حاجه ... طبق السلطة
طبق السلطة يكون صغير مش كبير لأنك لسه هتاكل
(خس جرجير خيار طماطم وتحط عليهم زيت زيتون)
طيب ليه؟
لأنهم مليانين بوتاسيوم و ماغنيسيوم
دول كلهم يقللوا مقاومة الأنسولين
هتلاقي حتي لو عندك سكر .. الدنيا تمام ومفيش اي صداع ولا دروخه ولا تعب وضغطك متظبط

4.رابع حاجه .. مصدر البروتين
يكون البروتين سمك واللحوم البيضا (فراخ )
هتكون افضل من اللحمه لانها تقيله شوية تقدر تاخدها بعد نص ساعه عادى تاكل لحمة
طيب انا نفسي في شويه رز .. افضلك بلاش ولو خدت الدنيا بالترتيب ده عمرك م هتحس بالجوع والله
ولكن لو ضروري تاكل الرز يتغسل كويس اوي ويتسلق بس وتاكل مثلا ١٠ معالق رز .. وابدأ قلل بعد كده علي مدار الأيام
بحيث يبقي مفيش
طبعا سنبوسة لاااا .. عصاير لاااا

عاوز عصير .. نفسي اشرب عصير ( دي عادتي في رمضان)
ممكن عصير ليمون عادى بس بدون سكر
عصير كركديه عادى بس بدون سكر
عصير بنجر عادى بس بدون سكر
عصير التوت عادى بس بدون سكر
عصير برتقال عادي بس بدون سكر
عصير فراوله عادي بس بدون سكر
ويكون العصير خلف الوجبه مباشره
غيرهم لااااااااااااااااااااااااا

🔷 طيب ايه اسوأ ما تفطر به او تكسر صيامك عليه ؟؟
البقوليات زي الفول و العدس و الفاصوليا والشوفان
والحليب والجبنة والزبادي ( الالبان كلها دى اسوأ حاجه ممكن تفطر بيها ) .. احذروا يا عشاق التمر باللبن 😅

🔸طبعا خليك حريص وقت كسر الصيام .. ده وقت مهم جدا لان زي ما قولتلك وقت الصيام الجسم قاعد بيكسر في الأمعاء عشان يضبطها ويصلحها والغشاء المخاطى يتجدد

▪️فالبقوليات واللاكتوز والشوفان والالبان دول عندهم (prostaglandins response )
وهى دى اللى بتسببلك التهابات شديده !
عشان كدا بما بتاكل بتحس بخمول وتعب
دى مش تخمه دى التهابات فى القولون

🔹ومتنساش انت صومت عشان كمان تظبط هضمك
اسوء حاجه انك تبدأ بكل دول .. مفيش هزار في الحته دي

🔸لان بعد الالتهابات .. ايه اللى بيحصل ؟
بيحصل ردة فعل مناعية من جسمك
جهازك المناعي بدل ما يصلح جسمك ..بيبوظ كل حاجه
ويمشي يلطش في جسمك

▪️ف بدل التصليح تخريب

و الأمراض المناعية دى تسألوا عن ألامها .. الناس اللي معاها الكرونز و الأمعاء الملتهبة ..اللي ممكن يبكوا بسبب الألام اللي بيشوفوها ... نصيحتي للي عندهم مشاكل مناعيه عموما
كرونز .. خمول غده درقيه.. روماتيزم.. فايبرومالجيا.. وغيره
يلتزم بالكلام اللي بقوله .. ويتابع تغذيه مع مختص بجد
لان حقيقه الدايت بيفرق معاهم ١٨٠ درجه في صحتهم
ومش أي دايت والسلام ( في ناس ينفع معاها اتكينز أو قرطاي و كارنيفور..(( دي اسماء انظمه دايت )). )

----------

🔶 تاني حاجه وجبه السحور ودي مهمه اوي عشان تقدر تصوم وانت مرتاح لازم السحور يتضمن دهون صحيه
دهون صحيه زي الزبده الفلاحي أو السمن البلدي
والافضل طبعا زيت جوز الهند mct oil

ليه الدهون دي مهمه ؟
لأن الجسم هيأخد الدهون دى يغذي بيها الدماغ والخلايا والميتوكوندريا بتاع الخلايا عشان يديلك
نشاط باقي اليوم كله و تكون مرتاح و معندكش أي مشكلة
و تضيف معها مصدر بروتين ماتيسر وتبقي من الافطار
سمك أو فراخ و طبق سلطة
و احيانا للناس اللى مش بتحب السلطة كتير
يبدلوها ب افوكادو

🚩 عاوز اقول حاجه في فرق بين الغذاء والشبع

الشبع هو اني اكل اي حاجه وكل حاجه المهم
احط في بطنى و أسد الجوع اللي عندي .. وامشي ورا عادات وتقاليد اعتقد شوفت نتيجتها في صحتك ايه
عاوز اسألك هل الشبع..ادالك تغذيه صحيحه وجسمك استفاد

الغذاء بقي هو الشيء البسيط اللي يغذيك ويفيد جسمك و تكون مبسوط اليوم كله في الصيام
وصحتك تمام التمام وهضمك تمام وجسمك يمتص المعادن بتاعته من اكلك المنظم والمدروووس ..

🔶طيب امتى اعمل رياضه في رمضان
لو انت عايز تنزل وزنك اعمل رياضه قبل الفطار ب ٥ ساعات

ليه؟؟؟ لانه انت اثناء الصيام اصلا الجسم
فيه توتر استرس وعصبيه على جسمك تمام؟. بسبب الجوع
ف انت كده ب تديله استرس اكتر والكورتيزول
هيطلع اكتر ف هيكسر الدهون

🔸الكورتيزول يكون ضار لما يجتمع مع نشويات وسكريات
وسهر ولخبطه نوم ..
غير كدا الكورتيزول كويس جدا مضاد للالتهابات

ولو انت عندك ضغط و سكر و كوليسترول عالي عايز تنظمه
إتمشي قبل الفطار بساعة وقبل السحور بساعه .. وادعيلي

26/11/2024

السلام عليكم ورحمه الله وبركاته عيلة غير حياتك هنتكلم اليوم عن مشكله ٩٠٪ مع الناس بيشتكى منها
وهىمشكله الإجهاد الكظري(Adrenal fatigue)

🔴تعالوا نتكلم الاول عن الأعراض علشان نعرفها سوى!

👈بتكون عاوز تاكل حاجة مسكرة دايما او حاجة حلوة
👈جسمك مكسر طول الوقت عندك دهون حوالين البطن مش عايزة تروح مهما عملت ايه
👈عندك أي مشكلة ولو صغيرة في الغده الدرقيه
👈مش بتستحمل أي ضغط وبتتوتر والصوت العالي بيضايقك ..ودماغك خفيفة
👈اي حاجه بتقومك من النوم
👈سهل اوي تصدع مش بتعرف تركز خالص ويتتوه بسرعه أو مش عارف تجمع أفكارك وعشان تفوق اعتمادك على الكافيين والقهوه طبها
👈يومك تقيل اوي عليك ومش عارف هيخلص امته

🔴🔴العرض بقي اللي يأكدلي أن الشخص عنده إجهاد كظري !

🚨يا دكتور أصعب لحظه عندي في اليوم ..وانا قايم من السرير بقوم متكسر جسمي كله واجعني بقوم أكني مش نايم إلا نص ساعة .. مش بفوق الا بليل ونشاطي كله بليل.. النهار حتي لو صاحي مش عارف أنجز حاجه

🔷شوف بقي عندك كام عرض منهم

🚨عندك عرضين ل ٣ فيما فوق صح ولا لا ؟؟

🔶خلي بالك تجاهل إجهاد الغده الكظريه خطير جدا لان آخره امراض مناعية وسرطانات واكتئاب وانتحار وفقد القدرة الانتاجية للجسم ..ف الموضوع مهم ف شير بقي 👌

🔷طيب ايه هي الاسباب يا دكتور ؟؟
وقت الشغل والضغط هو النهار .. ف ربنا خالق الكورتيزول
عشان تاخد باور وتقوم من نومك و تتحرك وتشتغل ..
لان هو بنزين الجسم
اصعب غيار في العربيه .. هو الاولاني وهو أكبر ترس في العربيه .. لانه بيقومها من حاله السكون

▪️بالظبط في الإنسان
*عشان تقوم حالة السكون للحركة.. ف الكبد والمخ والعضلات والدم هادي.. عشان يتحول للنشاط وتشتغل وتقوم من السرير... لازم كورتيزول يفرز من الغده الكظرية
*عشان اعرف استحمل اي ضغط عصبي ..لازم شوية كورتيزول في جسمي
*لو في اي التهابات في الجسم ...لازم شوية
كورتيزول في جسمي
*عشان اعرف أفكر... لازم شوية كورتيزول في جسمي
*لو في خطر مثلا اسد قدامك أو ضغط عليك شديد
لازم الكورتيزول والادريناليني يطلعوا شوية .. وبعد ربع ساعه الادرينالين والكورتيزول ينزل
⚠️انت اكيد مش يوميا بتجري من اسد... لكن للاسف يوميا بتجري عشان تلبي طلبات بيتك وتتحمل الظروف الاقتصادية
مش عارف بكره فيه اي .. هنجيب فلوس منين .. ضغط علي نفسك مش مبطل .. اعتقد كمان فيها عدم ايمان بأن اي حاجه هتحصلك ب ايد ربنا.. وهتحصل عشانك مش ضدك ربنا حنين وكبير ورحيم ❤️
🔶انت في الضغط ده سنين و سنين..انا عارف وربنا يهونها
ده خلي الغده الكظرية خلاص ارهقت وتعبت ومعدتش قادره تشتغل خلاص ... بسبب الضغط اللي انت فيه يوميا لسنين

🔷المشكله دي مع الستات والرجاله عموما وكتير في الاتنين
لكن أكثر شويه مع الستات .. لان اي حاجه بتحصل بتخليهم في ضغط ..ده لو مشبك غسيل وقع بيتعصبوا
وكمان لأنهم غالبا عندهم مشاكل زياده وزن ..ومطنشين مهما قولت الحقوا نفسكم ..ف الانسولين عالي عندهم والكبد الدهني ومشاكل الغده الدرقيه وسياده الاستروجين.. وهيصه.محظوظين اوي انتوا😅

🔶مبتسألوش نفسكم ليه!؟
لما بتسافرو مصيف مثلا او اي مكان تغير جو .. الاكتئاب بيروح والصداع يروح والجسم يبقي فايق رايق
لان الغده الكظرية بدأت تفوق وتشد حيلها لما خرجت من الاستريس والضغط ...ونفس الكلام ينطبق علي الرجاله اللي بتحب تقعد ساعتين تلاته يوميا ع الكافيه أو القهوه 😅

🔷طيب عاوزين العلاج بقي ؟
احنا لازم نشغل الغده الكظرية بكل كفاءة..
عشان تديك بنزين تشتغل بيه

1️⃣ اول حاجه : ( فيتامين سي ) (VIT C)
ده تحطه قدام عينك .. من مصادر الطبيعه زي
الفواكه الحمضية، والتوت، والبطاطس، والطماطم، والفلفل، والكرنب، والبروكلي، والسبانخ
وتاخد كبسولات فيتامين سي(٥٠٠ مج) .. لمده شهرين
قرصين الصبح وقرصين بليل

2️⃣تاني حاجه : (فيتامين ب) (VIT B)
عشان الثيامين عشان يطلع الكورتيزول .. ما علينا
ناخذها من الخميره الغذائية (من اي عطاره وفي ف امتنان)
ومصادره كمان اللحوم والأسماك والمكسرات.. ف غالي
فتاخد كبسولات فيتامين ب كومبلكس من اي صيدليه (٥٠ملجرام ) مره او مرتين في اليوم لمده شهرين

3️⃣ثالث حاجة : البوتاسيوم
هتاكل طبق سلطة كبير مرتين تلاتة في اليوم دول الأساسيات

4️⃣رابع حاجه: السكر
تبدأ تقلل سكر وحلويات تماما .. ملعقه السكر الواحده هتخلص مخزون الثيامين اللي اصلا ناقص عندك .. وكمان هتوقف امتصاص فيتامين سي

5️⃣خامس حاجه : ادويه الحموضه
امنع اي ادوية حموضة لان ادوية الحموضه بتوقف امتصاص الماغنسيوم وتوقف امتصاص فيتامين سي وفيتامين د وفيتامين بي ..

6️⃣سادس حاجه : النوم
لازم تنام بدري في اوضه ضلمه.. من ١٠ بليل ل ٦ الصبح ومعدش فيه قهوه ولا كافيين ولا مشروبات طاقه خااالص

ده الوقت اللي جسمك بيجدد نفسه هيجدد الغده الكظرية والغده الدرقية و المخ و العضلات و تنظيف الكبد للسموم
مبيحصلش الا بليل ..خلي جسمك يدخل الورشه ويتنضف ويتجدد بليل
بتخافي من الضلمه ..نور هادي خالص وحطي فوطه علي عينك أو البتاع بتاع الطيارات( مش عارف اسمها😅)

7️⃣سابع حاجه : الرياضه
مش هتلعب اي رياضه .. زي الجيم .. مش عاوزك تنهج لان ده ستريس والكورتيزول عندك رايح في مصيبه
عاوزك بس تتمشي يوميا متواصل من نص ساعه ل٤٥ دقيقه ..وأذكر الله وفرفش وغير مودك .. حلو كده

8️⃣ثامن حاجه : مشاكل السمنه
لو عندك مشكله سمنه .. لازم تعمل دايت مع حد فاهم مش اي دايت والسلام .. افهم بقي كل واحد غير التاني
وخلي بالك غالبا عندك مشكله بسبب السمنه وكمان لازم طبيب فاهم عشان ينبهك في التعليمات اللي قولناها فوق

دمتم اصحاء❤️

28/09/2024

السلام عليكم عيلة غير حياتك
*اوعى تفتكروا ان الموضوع موضوع نزول او زيادة فى الوزن .هو الحكاية او الهدف معاكم فى التغذية .
ابداا طبعاا زى ماكل مره بشرح ليكم عن ازاى تقيم نفسك مش وزنك وان فى حجات مهمه لازم تعملها فى مشوارك

*الاول نعالج المشكله (سكر-خمول في الغده -الكوليسترول -الضغط-.....)مع اتباع حميه غذائيه مناسبه
*الهدف من المعلومات اللي بنزلها ليكم انكم تتعلم وتفهم انك ازاى تتغير وانى اساعدك في تغير سلوك الاكل لنمط حياه صحيه افضل وتغير في المقاسات وشكل الجسم وعلاج الامراض الناتجه عن عدم تنظيم الاكل
*ده الهدف مساعدتك توصل لهدفك خسارة الدهون وتغير في صحتك للافضل
*صحتك اغلي حاجه عندك
*الأكل الصحي مش مجرد فتره وخلاص
لا دا أسلوب حياه
دمتم اصحاء

28/09/2024

البوست ده علشان سؤال بيتكرر كتير .
هو انا همشى على ايه لانى عملت انظمه كتيييير قبل كده
هقولك على النظام المناسب لك تقريبا

1- لو سنك اقل من 18 سنة , الأمور الصحية تمام و زى الفل مفيش اى مشاكل مرضية غير شوية وزن زايد و لسه اول او تانى مرة تعمل دايت فى حياتك , ف أبشرك اقل م 3 شهور بإذن الله الموضوع هيكون خلص لانه هيكون سهل جدا معاك , و هنا مفيش اى اكل ممنوع غير تقنين لبعض كميات الأكل لا اكثر ولا اقل و امورك بسيطة .
يعنى هنا كل 3 او 4 او 5 مرات فى اليوم و خلى النشويات فى وجبتين منهم بكميات معقولة مع تنظيم شوية فى النوم و رياضة بسيطة ومش شرط تعمل صيـام .
-------------------------------
2- لو انا سنى اقل من 18 سنة : بس الأمور الصحية دخلت فى تكيسات مبايض + مقاومة إنسولين ! وبدأت اكرر الدايت كتيـر
هنـا اللى هيحصل اننا هنضطر نقلل فى كم النشويات اللى بتدخل عكس الحالة الأولى , لا يجوز منعها لان النشويات فى السن ده بتستخدم فى عملية النمو و البناء , وبالتالى منعها غلط لكن هتقل بس انت هنا بقى هتضطر تلعب رياضة قوية فيها مقاومة عالية + تنظيم النوم
الأمور هتتحسن وهتبقى ممتازة لكن هتاخد وقت اكبر شوية و تعمل صيام ما بين 12 لـ 14 ساعه.
--------------------------------
3- لو انا اقل من 35سنة و عملت دايت كتيـر كل شوية اكرره لكن لا اعانى من اى مشكلة مرضية , مجرد وزن زائد لكن لا مقاومة إنسولين و لا تكيسات مبايض ولا دهون ع الكبد ولا اي شئ ؟
هنـا انت هتحتاج تدوس على نفس شوية من ناحيتين
الأولى : انك هتكمل فى الدايت فترة طويلة متتالية علشان تكسر عملية اليويو دايت اللى انت بتعملها و تكررها كل شوية , و الجسم يكسر الثبات اللى بيدخل فيه نتيجة تكرارك للدايت
الثانية : هتخلى النشويات وجبة واحده كل يوم فطار او غداء مع شوية رياضة خفيفة وتنظيم النوم بعد فترة هتلاقى الأمور معاك ممتازه جدا بإذن الله .
------------------------------
4- لو انا 35 فيما فوق , عملت دايت كتير لكن كل شوية اكرره لكن بدأت اعانى من مشاكل مرضية و بدأت ادخل فى مقاومة إنسولين و دهون كبد و هكذا لكن الأمور لسه فى البدايه
الحل للأسف الشديد انك هتتعب شويتين تلاتة اربعه , لسبب ان الجسم مش هيحرق غير لما يتعالج الأول .
بمعنى فى الحالة اللى فوق دى انت مكنتش مريض ف انت هتخس حتى لو اخدت وقت طويل لكن معدلات الحرق عندك مازالت مرتفعه
لكن فى حالة وجود دهون ع الكبد مرتفعه و مقاومة إنسولين عالية , هنا الجسم بيقولك لو مأخدتش بالك هتدخل فى سكر و مضاعفات كتير منها الكوليسترول و النقرس
هنا للاسف الشغل بتاع نص رغيف مع 4 معالق رز و الكلام ده , مش هيجيب اى نتيجة الا مؤقته فى البداية
الحل هنـا يكمن انك ترجع جسمك سليم زى الحالة رقم 3 الأول علشان بعد كده يخس معاك , يرجع سليم فى اد ايه ؟ من 3 لـ 6 شهور بالكتير بيرجع سليم الفترة دى مش فترة تخسيس يعنى انت ممكن متخسش فيها لانك بتتعالج فيها الأول بتشيل طبقة الدهون اللى فوق الكبد و بتعالج مقاومة الإنسولين بدل ما تقلب بـ سكـر , بعد كده تبقى طبيعى زى الحالة التالته فـ تخس بسهولة .
طاب ده بيتم إزاى ؟! للأسف منع 90% من مصادر السكر و النشويات اللى داخلة للجسم علشان الجسم حاليا مش متقبلها و اى مصدر سكريات او نشويات هيدخل جسمك مش هيعرف يحرقه ولا يتعامل معاه حتى لو قليل و هيخزنها على هيئة دهون جديدة + انك هتعمل صيام لفترات طويلة تصل لـ 16 ساعه
طاب انت بتعمل كده علشان تخس ؟ لا , علشان تتعالج و تبقى طبيعى بتعدها تبقى تيجى مرحلة الخسسان .
غير كده انت بتضيـع وقت كتير فى الفاضى و مش هتوصل لاى نتيجة غير انك هتمرض بس .
طاب ليه امنع 90% من النشويات مش 100% طالما هى مضرة كده ؟ دا اللى نتكلم فيه البوست الجاي لانها مش مضره زى ما انت فاكر .
ودمتم اصحاء❤️

06/02/2024

كل شوية بتحس انك عاوز تاكل ؟!
خلي بالك دي اشارة خ-طي-رة ولازم الانتباه 🔴🔴
افهم/ي ان احساسك كل شوية انك عاوز تاكل حاجة مسكرة دا :-

✅ بيعكس ان #هرمونات جسمك مش شغالة بشكل كويس !
وان ف شوية خلل ف الهرمونات خصوصا الهرمونات المسئولة عن مستوي السكر
ف الدم وهو #الانسولين بشكل اساسي !
واحساس انك عاوز حاجة مسكرة دا من اكتر اعراض مشكلة او مشكلة
" ما قبل السكري - او السكر من النوع التاني "

✅بيعكس ان هرمونات جسمك المسئولة عن احساس الجوع والشبع مش شغالة بشكل كويس !
وممكن يكون ف مقاومة من نوع تاني اسمها #الليبتين !

✅اوقات كتير بتكون دي حالة اسمها #الجوع العاطفي او الكاذب !
🟢🔵انت لو جعان فعلا او محتاج عنصر غذائي فعلا فانت مش هتحس انك عاوز تاكل
#بسبوسة ولا #شوكلاته ولا #بسكوت ولا #دونتس !
لا ,,, انت هتحس انك جعان وخلاص ، وممكن تاكل اى حاجة ! ونفسك هتسمح باي حاجة

🔴🔴لكن انك تفكر ف حاجة معينة بعينها اعرف ان دا جوع كاذب
وان دا جوع ونهم جاي من دماغك مش جاي من معدتك !
تعمل اى ؟ وتحلي المشكلة دي ازاى ؟!

✅✅وجبات كافية ومتوزعة صح ع مدار اليوم وخصوصا ف الاوقات ال بتحس فيها بجوع !
✅✅اكلك وشربك يكون فيه كل العناصر الغذائية الطبيعية ، ومتمشيش لفترة طويلة
ع نظام اكل بيمنع نوع معين من العناصر الغذائية بشكل كامل .
✅✅3 حصص غذائية يوميا خضروات/فاكهة ايان كان نوع الدايت بتاعك !
وسواء كنت عامل دايت محدد ولا لا !

✅✅اشرب #مياه ! معظم احاسيس الجوع ف اليوم ممكن تكون احساس #عطش !
وبمجرد ما تشرب مياه احساس الجوع هيختفي !
✅✅لو جالك احساس انك عاوز حاجة مسكرة ، شوف انت اخر مرة اكلت كان امتي ؟!

🔴لو لسه واكل ف خلال ساعتين فاتوا اعرف ان دا جوع كاذب وجسمك اصلا مش محتاج اكل
ومش محتاج حاجة ! دي دماغك ال بتوسوس ليك وعاوزاك تبوظ ال بتعمله !
وعاوزة الكرش يزيد 5 سم ! وعاوزاك تضايق وانت مش عارف تقفل البنطلون !

🔴لو اكلت من اكتر من 3 ساعات فاتوا فممكن فعلا يكون جسمك محتاج اكل
او هرمونات جسمك محتاجة حاجة تشدها وتفوقها وتنشطها 👌
ساعتها ممكن تاخد اسناك صحي عبارة عن -

- بيضة مسلوقة مع خضار اخضر .
- شوية جبنة قريش مع سلطة خضرا .
- كوباية زبادي مع خضار .
- كوباية زبادي مع تفاحة ولا كام حباية فراولة .

🟢🟢بكدا هتسد جوعك وتخلي هرموناتك تشتغل بشكل افضل !
وف نفس الوقت هتحافظ ع ال بتعمله وع الدايت بتاعك !
ولو حتي مش عامل دايت معين فانت كدا هتحافظ ع صحتك وهتخلي جسمك احسن
صحيا وبدنيا وكشكل وحجم !

✅اخيرا : السيطرة ع الموضوع دا بتحتاج مجهود وتعود ومرة ع مرة هتظبط
فركز بس وافهم ان الموضوع دا ف الاساس نابع من #عقلك مش من #بطنك !
وافهم ان الموضوع دا محتاج سعي منك عشان تحسن من جودة عمل جسمك وهرموناته !
وف خلال اسابيع بسيطة هتلاقي نفسك خلاص مبقاش يحصلك الاحساس دا وبقي
! ويوم لما تاكل حاجة مسكرة فهتاكلها بمزاجك
" وجبة فري مثلا " او مزاجك راح لحاجة معينة او بتدوق حاجة !
لكن خلاص انت مبقتش تحت رحمة #السكريات ! وهتبطل تحس بالذنب ! وانك متضايق من نفسك!
السكريات والحلويات هي اساس هدم الصحة العامة ,, هي اساس زيادة الوزن والسمنة !
السكريات والحلويات ضررها اكبر ع الرجالة ! وهي اساس هدم صحة الرجل وكفاءته كراجل !
السكريات هي من اكبر الحواجز بينك وبين زيادة #كتلة عضلاتك !
خد النية وطبق النصايح واتفرج ع الفرق ال هيحصل ف حياتك ككل

29/01/2024

🚩 تعالوا اقولكم ازاي تاخدوا الفيتامينات كلها ببلاااش
وتوفروا فلوسكم

🔹الناس اللي عندها مشاكل في المناعه والانجاب والنمو والغده .....ده نقص فيتامين أ (VIT A)
▫️بكل بساطه تاكل طبق كبده أسبوعيا (تمن *1/8*كيلو)
هيكفيك طول الاسبوع (لانه بيقعد في الدم فتره طويله )
🔸ولازم تتابعي مع طبيب تغذيه "فاهم' لأن المشاكل دي لازم يبقي معاها زياده في الوزن

🔹الناس اللي عندها مشاكل في الاعصاب والحرق و العضلات والمزاج والشعر والبشره ..ده نقص
فيتامين ب (VIT B)
▫️بكل بساطه نفس طبق الكبده اللي فوق + معلقه خميره غذائيه يوم بعد يوم
🔸ولازم تتابعي مع طبيب تغذيه "فاهم' لأن المشاكل دي لازم يبقي معاها زياده في الوزن

🔹الناس اللي عندها مشاكل في والبشره والمناعه والأوعية والشعر ..ده نقص فيتامين س (VIT C )
▫️بكل بساطه حبه واحده فلفل يوميا

🔹الناس اللي عندها مشاكل في الحرق والمناعه والهرمونات والمزاج ...ده نقص فيتامين د (VIT D)
▫️بكل بساطه هنجيب من الصيدليه v drop
مره واحده في الاسبوع ونتعرض للشمس عشر دقايق بس
🔸ولازم تتابعي مع طبيب تغذيه "فاهم' لأن المشاكل دي لازم يبقي معاها زياده في الوزن

🔹الناس اللي عندها مشاكل في القلب والعظام والسيوله
ده نقص فيتامين ك ( VIT K )
▫️بكل بساطه هناخد شريحه شيدر أو بيضه يوميا
وكمان تاخد كرمب لو مره اسبوعيا لو سلطه أو حتي محشي

🔹الناس اللي عندها مشاكل في التجاعيد والشيخوخة والمناعه والبشره والالتهابات
ده نقص فيتامين اي (VIT E)
▫️بكل بساطه هناخد معلقه زيت جنين القمح يوم بعد يوم

وبس كده بطل تبهدل معدتك ووفر لحاجات اهم. الحياه صعبه💖 .. ربنا يهونها علينا جميعا

11/10/2023

🍒النقرس اسبابه علاجه🍒

ماهي اسباب زياده اليورك اسد في الجسم

✅ يوجد في جسم الانسان البيورين

تتحول في الكبد الى يوريك اسد
من اين ياتي البيورين
هل المصدر هو اللحوم فقط

الاجابه لا وانما الجسم ايضا ينتج البيورين
الجسم يصنع البيورين من تكسر الخلايا والحمض النووي

ومن هنا نعرف بان مصدر البيورين ليس فقط من اللحوم وانما ينتجها الجسم ايضا كميات اكبر من المصادر الخارجيه
ومن هنا اليورك اسد موجود ينتج في الجسم وكذلك من المصادر الخارجيه اللحوم

✅ عندما يتم اخراج اليورك اسد عبر البول في بعض الاحيان تقوم الكليه باعادته الى الدم لان الجسم يحتاج اليورك اسد اساسا
بعض المرضى عندما يصاب بزياده في حمض اليوريك يتوقف عن تناول اللحوم و يتناول ادويه يوروسولفين ومع ذلك لا يوجد اي نتائج
النقرس ليس بسبب تناول اللحوم ولن تستطيع ايقاف اليورك اسد لانه ينتج اساسا داخل الجسم والجسم يحتاجه كمضاد سموم ينظف به الخلايا السرطانيه
✅ البعض ايضا تجد نتيجه فحص حمض اليوريك عاليه ولكن لا يشكو من النقرس
✅ بعض الناس يتناولون اللحم باستمرار وليسو مصابين بالنقرس

✅ البعض لديه النقرس وهو لا يتناول اللحوم

لماذا و ما هو النقرس

النقرس هو التهاب المفاصل بسبب تراكم كريستال اليوريك اسيد في المفاصل

ما هي اسبابه ؟🤔

1️⃣ سبب النقرس وجود التهابات في الجسم

2️⃣ من اسباب النقرس زياده تناول السكريات وبالتالي زياده الانسولين لانها من مسببات الالتهابات

ما هو علاج النقرس؟

1️⃣ من السكريات تماما حتى الفواكه عاليه السكر
فقط تناول التوت والفراوله والكرز

2️⃣ تخلص من السمنه اذا كنت سمين

اذا كان الشخص سمين المراد علاجه من النقرس تتاخر النتائج لدى هذا المريض لذلك لابد من التخلص من السمنه

3️⃣ التقليل من اي اغذيه تحتوي على البيورين كاللحوم

4️⃣ تناول القهوه لانها مدره للبول وتجعل الجسم يتخلص من اليورك اسد

5️⃣ الاكثار من شرب الماء مع الليمون لاحتوائه على ستريت

6️⃣ تناول اغذيه عاليه المغنيسيوم والبوتاسيوم كالاسبيرولينا

المغنيسيوم مفيد في التخلص من اليوريك اسيد الذي يتم اخراجه عبر الكلي

يمكنك ايضا تناول مغنيسيوم سترات 400 مليجرام قبل النوم كل يوم

العلاج. الغير دوائى
Tart cherry
Celery seeds

خلاصة فاكهة كرز التارت مع بذور الكرفس
60 كبسولة

توصل الأطباء الى التأكيد على أن تناول الكرز الاحمر يساعد على إيقاف مرض النقرس وهو مرضٌ يصيب المفاصل، الكاحل، الاقدام والركبة.

كما أكد الباحثون بعد الدراسات أن الكرز يخفف من الاوجاع بنسبة 35% وذلك لاحتوائه على مضادات للاكسدة Anthocyanins كفيلة بالحدّ من الالتهابات.

إضافةً الى هذه الفوائد يساعد الكرز على تنشيط عمل الكليتين بفضل الاملاح المعدنية الموجودة فيه كما البوتاسيوم أما العامل الذي يُشعر النساء بالرضى.

أما الكرفس
يساعد في إزالة حمض اليوريك،
تساعد بذور الكرفس على التخفيف من التهاب المفاصل، والنقرس، فهي تحتوي على مواد كثيرة مضادة للالتهابات، والتي تساهم في تخفيف الألم بشكلٍ فعال.
تحتوي بذور الكرفس على خصائص مطهرة، بالإضافة إلى خصائص مدرة للبول أيضاً، وبالتالي فإنها تعمل بفعالية في تخفيف آلام التهاب المسالك البولة، والوقاية من الإصابة بها.
دمتم اصحاء ♥️
د/ابراهيم الليثى

21/07/2023

السلام عليكم ورحمة الله وبركاته....
موضوعنا انهارده عن مشكله مهمه جدااااااا لا يكاد يخلو منها اي بيت
الموضوع طويل شويه بس مهم جدا
#التبول #الليلي #الاإرادي
انا قولت لا إرادي قاصد اني اعرفك ان المشكله دي ابنك أو بنتك ملهاش ذنب فيها هي حاجه غصب عنهم وهي تمثل من ٦٠الي ٧٠٪ من الأطفال العالم يعني مش طفلك بس
#اسبابه
1_مشاكل نفسيه وعصبيه واسريه في البيت أو في البيئه من حوله
2-مشاكل عضويه زي (السكر التهاب مجري البول) أو اهمها وهو عدم اكتمال الجهاز العصبي المغذي المثانه علشان يخليها تتحكم في البول أثناء النوم
بس المشكله العضويه غالبا بيكون ساعتها الطفل معرفش يتحكم في البول ولا مره من ساعة ما اتولد إنما النفسيه والعصبيه بيكون بيتحكم ع فترات وفترات لا
#العلاج
1_تحسس الطفل بالحنان وتظبط ليه مشاكله النفسيه والعصبيه وتحسسه ان المشكله دي عادي وان كل الأطفال بتعاني منها وان زميله اللي معه في المدرسه أو اللي بيلعب معه عنده نفس المشكله بس مخبي عليه وانك هتساعده للتخلص من المشكله دي
2_عدم تعنيف الطفل لو حصل انه عمل حمام وتحفيزه بهديه أو خروجه لو معملش
3_عدم شرب السوايل والمنبهات والمواد الغازيه بعد المغرب الا للضروره والبيت كل يشجعه ع كده مش هو يتحرم وبقيت اخواته والبيت ياكل ويشرب عادي
4_نخليه يعمل حمام قبل النوم وتصحيه بالليل اكثر من مره كل ساعتين مثلا بس نفوقه بالمياه فعلا ونخليه مدرك علشان التبول بيكون بعد النوم العميق
الكلام ده لو عملته لمدة شهر شهرين هتعود الطفل انه يقلق ويقوم لوحده وهيكون الجهاز العصبي اكتمل وبيبعت إشارات للمثانه انها تتحكم في البول
5_مفيش مانع اننا نلبس الطفل حفاضه بالليل علشان ميبلش نفسه ويتعب بالكحه والبرد وكمان ميزعلش اوي لما يلاقي جسمه كله مبلول
التعليمات دي عليها نسبة ٧٠ الي ٨٠٪من العلاج وناخد minirin melt 60 mug قرص تحت اللسان قبل النوم مساء بعد الرجوع لطبيبك المختص
د/ابراهيم الليثى.

Dr/Ibrahim Ellithiy

25/02/2025

26/11/2024

28/09/2024

28/09/2024

06/02/2024

29/01/2024

11/10/2023

21/07/2023

Address

Website

Alerts

Contact The Practice

Shortcuts

Share

Category