22/08/2025
بحاول أراجع حياة بعض الناس إللي حولينا وبنعرف أخبارهم.. ولما بجمع كده أحداث الحياة الصعبة إللي بيمروا بيها بلاقي إن مفيش حاجة بتكسر الإنسان أد الحزن..
كل ما براجع حياة حد زي أنغام مثلاً بلاقي واقعة كبيرة عقبت تعرض لضغط أو ألم وحزن غالباً ما عرفتش تتعامل معاه أو بالأحرى كان أكبر من قدرتها على تمريره..
ده حالنا كلنا.. في حاجات بتقف لنا في الزور ومش بنعرف نبلعها..
وعشان كده جاية أقولك كلمتين...
أرجوووووك حاول فيهم.. اجتهد.. المسألة تستحق ومش بسيطة..
- الناس عارفة هي بتعمل إيه.. مهما كان الإنسان حبيبك بيعمل حاجة تضايقك أزعل مرة ونبه مرتين وبعد التالتة حاول ما تشوفهوش هم شخصياً.. بالبلدي كده طنش.. قول جواك إن ده إختياره وعدي إنت.
- اتعلم تمشي نفسيااااا.. يعني تبقى قاعد في مكان يضايق بس روحك مفصولة عنه.. قاعد مع حد مش مديك حقك بس انت مش خالط روحك معاه.. اتحرر قدر الإمكان ما تدوش فرصة للناس المفروضة عليكم ياكلوا روحكم.. أعمل إللي ضميرك يفرضوا عليك ناحيتهم بس لا تتفاعل معاهم بروحك.
- الناس بتدور على مصلحتها بطرق مختلفة وده حقهم طبعااااا.. عشان كده لا تسرف في التوقع منهم مهما كانت علاقتك بهم.. إلا قلة قليلة.
- عمق العلاقة بينك وبين ربنا عشان تفهم إن حكمة الحياة الأساسية إنها جهاد عشان بس تعدي بسلام وخليها قدام عينك الهدف.. تعدي بسلام..
- كل واحد في النهاية بيختار يتعامل معاك إزاي وبالتالي بيحدد درجة مشاعرك ناحيته فما تقلقش لو حاسس إنك بتقدر وتعطي وتهتم أكتر.. بعد شوية روحك هاتوصلك لأنهم يكونوا مش فارقين معاك.. دي قاعدة إلزامية.. هاتوصل معاهم بعد شوية مواقف لما يستحقوه.. ما تزعلش على إللي راح معاهم فكر في إللي جاي.
- استمتع مع أحبتك.. في مجموعة كده قريبة (بجد) ما تخليش الدنيا تاخدك منهم وياكل روحك ووقتك المفروضين عليك.
داليا الشيمي
