20/06/2024
لدواعي السفر
امير عيد قاعد مع أمه في قاعده بيحتويها الهجو..م والتبرير لصالحه في مباره في رمي التهم
بقولها انتي سبتيني وانا صغير
ومشيتي وبيحاول يقولها ان كل حاجه وحشه حصلتله في حياته كانت بسببها هي ..هي بس
قلتله تمام أنا الام الوحشه..أنا هتحمل انك تحملني نتيجه أفعالك وتقولي ان مشاكلك كلها كانت بسبب ام زيي كدا
بس الناس ملهمش ذنب خالص انك تحملهم نتيجه عمايلك
وهنا بقي بيبتدي الابن يشوف الحقيقه اللي مش علي مزاجه
حقيقه أن الدنيا مشيت والحياه كملت وأمه ذات نفسها كانت الست اللي عارفه طريقها واختارت تكون ست ليها كارير وكيان مستقل عن الاب رغم أن الأبن نفسه سابها وعاش مع الأب
بس الابن الناجح المشهور كان بيعمل كل دا عشان يقولها شفتي ؟ ابويا طلعني راجل زي الفل
ولا الحوجه ليكي يعني ..
وقد كان
بقي شاطر وناجح ومشهور ومكسر الدنيا والطبيعي أن أمه اتبسطت فعلا حتي وان كان الابن بيكيد فيها
بس الحلو بقي في الموضوع أن انت وانت بالغ وعاقل وواعي كدا يا حبيبي عندك شويه حاجات كدا محتاج تقف عندها
اولا
ان كل مشاكل الماضي في طفولتك سواء بشكل مقصود أو لاء عدت وانت دلوقتي المسؤول الوحيد عن التعافي ومفيش حد يقدر يساعدك غير نفسك
ثانيا
ابوك وامك عمرهم ماهيجوا يعتذروا عن اللي عملوه فيك لانهم اصلااا مش مومنين أنهم عندهم مشكله المهم انهم ربوك علي قد معرفتهم بالتربيه اساسا وغير كدا انت لو فضلت مستني فانت بتعيش دور الضحيه بكل معني الكلمه
بص متلومش الا نفسك بعد كدا تمام ؟
ثالثا
مفيش حد هيتقبلك بمعاناتك ومشاكلك النفسيه ..وان وجد هيزهق منك بعد شويه ويسيبك لأنك هتكون عبء عليه وطبعا مش طبيعي أن حد سوي يعيش مع حد مضطرب ومش عاوز يتعافي ..الهروب ساعتها فرض عليهم
رابعا
فكره انك تعمل كل حاجه في الدنيا عشان تثبت لاي حد انك جامد جدا وبقيت مفيش زيك اتنين فكره فاشله تماماااا وفكره فيهااا نوع من الطفوله والوعي غير المكتمل فأرجوك راجع نفسك تاني كدا لأن محدش اصلا مهتم لأمرك ومحاولاتك دي كلها وفرها انك تتغير هتبقي نفعت نفسك ونفعت مستقبلك
خامسا
العلاقات الجديده مش مكان للتعافي فلو انت متخيل أن في واحده او واحد هيحللك معاناتك فانت غلبان جدا
العلاقات بنتقبل فيها نقصنا البشري مش عيوبنا الانسانيه وهذا فرق لو تعلمون عظيم
اخيرا
جرب مره تسمع لنفسك مره واحده بس وانت هتتاكد أن كل اللي انت فيه دا بسبب أن عقلك بيلاعبك وانت سايبه من غير اي مقاومه منك والحل انك تطلع من دور الكيد ودور الضحيه وتشتغل علي وعيك والتحرر من صدمات طفولتك لأن انت المتضرر الوحيد
اتمني تكون استوعبت الرساله
Amir Eid
