Dr/Amal Mohamady

25/09/2025

في طفل جوا كل واحد فينا… طفل لسه واقف عند اللحظة اللي اتجرح فيها.
طفل اتحرم من كلمة حنان كان محتاج يسمعها…
طفل اتأذى من صرخة أو إيد قسيت عليه…
طفل فضل يعيط محدش حضنه، فقرر يسكت من غير ما يحكي تاني.

الأصعب مش إن الصدمات حصلت… الأصعب إنها لسه عايشة جوانا.
بتظهر في صورة خوف من الهجر، أو توتر من غير سبب، أو اختيارنا لعلاقات كلها وجع، وكأننا بنعيد نفس السيناريو اللي بدأ زمان...
صدمات الطفولة مش مجرد ذكريات… دي بتتشفر في المخ والجهاز العصبي، وتفضل تتحكم في ردود أفعالنا وإحساسنا بنفسنا.

إنت مش "مزاجك وحش" وخلاص… إنت عندك طفل داخلي مجروح، لسه بينادي عليك....
إنت مش "بتبالغ" في مشاعرك… إنت بتتوجع من نفس الجرح القديم اللي محدش لسه طبطب عليه...
ولا اتشافي....
وأجمل رحلة ممكن تبدأها… إنك تمد إيدك للطفل اللي جواك....
تقوله: "أنا سامعك… أنا شايفك… أنا هنا علشان أديك اللي اتحرمت منه".
لما تعمل كده، هتعرف يعني إيه حرية… حرية من قيود الماضي اللي مسك فيك.
وهتعرف يعني إيه سلام… سلام إنك تتصالح مع نفسك اللي كانت بتتألم وانت سايبها لوحدها....

✨ أكبر قوة مش إنك تنسى الماضي… أكبر قوة إنك تحتضن الطفل اللي جواك وتدي له الأمان اللي كان بيحتاجه من زمان...
د / أمل محمدي
لحجز الجلسات والاستشارات تواصل خاص علي ..01002004859
# رحلة وعي
# رحلة التشافي
# تشافي صدمات الطفولة

25/09/2025

💞 العلاقات مش مجرد وجود شخص في حياتك، العلاقات الحقيقية هي الأمان اللي بتحس بيه...
من الكلمة اللي بترفعك وقت ضعفك وتقويك... الحضن اللي يطمنك إنك مش لوحدك...

لكن ساعات… العلاقات تتحول لوجع وضغط نفسي ..
تلاقي نفسك مش فاهم ليه بتتأذى من أقرب الناس ليك، ليه الحب بقى مرهق بدل ما يكون سند...وراحة ...

الحقيقة إن سر العلاقات الناجحة مش بس في الحب، لكن في الفهم – التواصل – الوعي – والحدود الصحية.
ومن غير وعي بالعلاقات… بنعيد نفس الأخطاء مع نفس الأشخاص أو حتى مع أشخاص مختلفين....

🎯 في جلساتنا هنفهم سوا:

🔹إيه سبب الألم اللي بتعيشه في علاقتك.

🔹إزاي تحدد احتياجاتك وتعبّر عنها بوعي...

🔹إزاي تبني علاقة صحية فيها حب وراحة وأمان.

🔹إزاي تصلّح جراح الماضي اللي بتأثر على حاضرك....

✨ العلاقة الصح ممكن تغير حياتك كلها ✨.
ابدأ رحلة التغيير دلوقتي… وخلي علاقاتك تكون سبب سلامك مش سبب وجعك...
د / أمل محمدي
لحجز الجلسات والاستشارات تواصل خاص علي 01002004859


.


#التعافي
#رحلة التشافي

23/09/2025

فيه ناس بتفتكر إن التسامح معناه إنك تنسى، بس الحقيقة غير كده خالص…
إنت ممكن تسامح اللي قدامك وتقبَل اعتذاره، بس تلاقي نفسك أول ما موقف يشبه اللي وجعك زمان يحصل، الألم القديم يطلع تاني وتلاقي لسانك بيرجع يحكي نفس الحكاية كأنها لسه بتحصل.

السبب مش إنك "ما بتعرفش تسامح"، لأ… السبب إن الموقف السيئ بيسيب جرح عاطفي في دماغك بيتخزن جوه الذاكرة الانفعالية. أي حاجة شبهه بعد كده بتفتح نفس الجرح من غير ما تاخد بالك.

العقل بيعمل كده علشان يحميك: كأنه بيقولك "خلي بالك، ما تنخدعش تاني".
بس في نفس الوقت، ده بيخليك عايش في دوامة من إعادة الوجع، حتى بعد الاعتذار والصلح.

الحل مش في إنك تجبر نفسك تنسى، لكن إنك تعترف إنك اتوجعت، وتدي لنفسك فرصة تفرّغ مشاعرك صح…
اكتب اللي حسيت بيه، احكي لحد واعي يسمعك، أو واجه نفسك بالحقيقة: "أنا اتأذيت وده حقي، بس أنا مش هسيب الألم يتحكم فيا طول عمري".

التسامح الحقيقي مش إنك تمحي الموقف من ذاكرتك، لكن إنك تتعلم تبصله كـ درس مش كـ جرح مفتوح.
ساعتها بس هتحس إن قلبك خفيف وعقلك مرتاح....
د / أمل محمدي

#التشافي

#الوعي

23/09/2025

ازاي نتحكم في شهواتنا ....
موضوع الشهوات ده طبيعي وموجود عند كل إنسان، ربنا خلق فينا رغبات عشان نعيش ونستمر، بس الفرق إن في ناس هي اللي بتمسك زمام نفسها، وفي ناس بتسيب نفسها تمشي وراها.
التحكم في الشهوات محتاج ٣ حاجات مهمين:

1️⃣ الوعي: أول حاجة تبقي واعية إن الرغبة دي مش دايما احتياج حقيقي، ساعات بتكون هروب من فراغ أو من ألم أو وجع داخلي... يعني مثلا الأكل الكتير مش دايما جوع، ساعات بيبقى تعويض عن قلق أو زعل...أو احتياج ..

2️⃣ التدريب:
النفس محتاجة تدريب زي العضلة كده ... يعني تعملي "تأجيل للرغبة" حتى لو ٥ دقايق. مع الوقت، عقلك يتعلم إنك إنتي اللي بتتحكمي مش هي...

3️⃣ البدائل: ماينفعش تمنعي حاجة من غير ما تدي بديل. لو عندك ش**ة أكل، حاولي تفرغي الطاقة دي في رياضة أو كتابة أو ذكر. لو عندك ش**ة عاطفية أو تعلق بشخص، عوضيها بعلاقة صحية مع ربنا ومع نفسك...

✨ وخلي بالك، الضعف مش عيب. كلنا بنضعف. العيب إننا نسيب الضعف يجرنا ويكسرنا. القوة إنك تقفي وتواجهي، وتتعلمي تسيطري شوية بشوية لحد ما تبقي إنتي اللي ماسكة الدفة....
د / أمل محمدي
# رحلة وعي

23/09/2025

✨عارفة إن المشاعر المكبوتة والضغوط النفسية مش بتختفي ولا بتروح لوحدها؟
الجسم بيخزن كل وجع وكل صدمة وكل حزن ما اتعاش وما اتعبرش عنه، وبعد فترة تلاقي الوجع النفسي ده بيتحوّل لوجع جسدي.

🔹 ناس كتير يجيلها صداع مزمن، أو قولون عصبي، أو آلام في الظهر والرقبة، أو حتى مشاكل في القلب والتنفس… والسبب في الأصل مش عضوي بس، ده نتيجة مشاعر متخزنة جواهم من سنين.
🔹 الكتمان المستمر للغضب، أو الحزن اللي ما اتعاش...أو الضغط اللي اتعودنا نكتمه ونقول "معلش هعدي"… كل ده بيتجمع ويتخزن في الجسد لحد ما يبدأ يصرخ بطريقته.

الحقيقة العلمية بتأكد إن الصحة النفسية مرتبطة بشكل مباشر بالصحة الجسدية، وإن التشافي النفسي مش رفاهية… ده ضرورة عشان تعيشي جسم سليم وروح مرتاحة.

وهنا بييجي دور جلسات التشافي 🌱
الجلسات دي بتدي مساحة للألم اللي جواكي إنه يطلع، والمشاعر المكبوتة إنها تتحرر، وبتخليكي تفهمي نفسك أكتر وتتصالحي مع ماضيكي.. وده مش بس بيخفف عن روحك… لكن كمان بينعكس على جسدك وبيبدأ يتشافي تدريجياً.

💡 لما تبدأ رحلة التشافي، هتكتشفي إنك مش بس بتتخلصي من وجع نفسي… لكن كمان هتدي لجسمك فرصة يشفى ويستعيد عافيته...
د / أمل محمدي
#التشافي

22/09/2025

✨ أول خطوة في التشافي من جروح الماضي ✨

أصعب حاجة في رحلة الشفاء مش إنك تنسى… لكن إنك توعي وتعترفي.
الجرح اللي بنهمله أو ندوس عليه يفضل موجود، يبان في ردود أفعالك، في خوفك من العلاقات، أو في إحساسك إنك مش كفاية.

الوعي هو إنك توقفي مع نفسك وتسألي:

إيه اللي وجعني فعلًا ولسه مأثر في؟

إيه الذكريات اللي بتخليني أرتبك أو أتألم لحد دلوقتي؟

إزاي الجرح ده انعكس على حياتي وصورتي عن نفسي؟

والاعتراف هو إنك تسمحي لنفسك تقولي: "آه... أنا اتجرحت… وأنا أستحق أتعافى."
الاعتراف مش ضعف.. ده قوة وشجاعة.. لأنه بداية الطريق للتشافي ...

لما نسمي الجرح ونشوفه بوضوح… وقتها بس نقدر نفتح باب التشافي الحقيقي...
د / أمل محمدي
لحجز الجلسات والاستشارات تواصل علي
01002004859

#التشافي
#وعي

love
journey

20/09/2025

التنمر في المدارس: جرح صامت يهدد أجيالنا

التنمر لم يعد مجرد “شقاوة عيال” أو تصرف عابر بين الطلبة، بل أصبح ظاهرة نفسية واجتماعية خطيرة تهدد صحة الأطفال النفسية وتؤثر على مستقبلهم. المدرسة التي من المفترض أن تكون بيئة آمنة للتعلم والنمو، قد تتحول أحيانًا إلى ساحة خوف وألم إذا لم يتم مواجهة التنمر بوعي وحزم.

ما هو التنمر؟
التنمر هو سلوك عدواني متكرر، يقوم فيه الطالب أو مجموعة من الطلاب باستخدام القوة أو السيطرة لإيذاء زميل آخر، سواء بشكل جسدي (ضرب، دفع)، لفظي (سخرية، شتائم)، أو حتى نفسي واجتماعي (إقصاء، نشر شائعات، عزلة).
وفي السنوات الأخيرة، ظهر نوع جديد وهو التنمر الإلكتروني، من خلال الرسائل أو الصور أو الفيديوهات المسيئة عبر الإنترنت.

لماذا يحدث التنمر؟
أسباب التنمر متعددة، ومن أبرزها:
غياب الوعي الأسري والتربوي: طفل لم يتعلم الاحترام والتعاطف قد يلجأ للتسلط...أو أهله بيتعاملوا معاه بعنف وتسلط ...فيسقط هذا العنف علي أحد زملائه في المدرسة ...

ضعف الرقابة المدرسية: بيئة غير منضبطة تفتح المجال لتكرار السلوك العدواني...

الحاجة للشعور بالقوة: كثير من المتنمرين يعانون من شعور داخلي بالنقص أو التعرض للعنف في البيت، فيعوضونه بالسيطرة على الآخرين...

تطبيع العنف في المجتمع والإعلام: مشاهد العنف والسخرية تزرع في ذهن الأطفال أن هذا “سلوك طبيعي”.

آثار التنمر على الطفل الضحية....
التنمر ليس مجرد لحظة عابرة من الإهانة، بل يترك ندوبًا نفسية عميقة، منها:

فقدان الثقة بالنفس والشعور بالدونية.

العزلة الاجتماعية والخوف من الذهاب إلى المدرسة.

أعراض جسدية مرتبطة بالتوتر مثل الصداع وآلام المعدة.

تراجع التحصيل الدراسي.

في الحالات القصوى، قد يقود إلى الاكتئاب أو التفكير في الانتحار...

دور المدرسة والأسرة في مواجهة التنمر..

التوعية المستمرة: غرس قيم الاحترام والتعاطف في المناهج والأنشطة.

وجود سياسات واضحة ضد التنمر: مع عقوبات تربوية رادعة لكل من يمارس هذا السلوك..

تشجيع الحوار: فتح مساحة آمنة للطلاب للتعبير عن مخاوفهم دون خوف من الانتقام.

دعم الضحية نفسيًا: عبر جلسات إرشاد فردية أو جماعية تساعده على استعادة ثقته بنفسه.

توجيه المتنمر: بدلًا من الاكتفاء بالعقاب، يجب فهم دوافعه ومعالجتها...

رسالة أخيرة
التنمر في المدارس ليس مشكلة فردية تخص الطالب الضحية وحده، بل هو جرس إنذار لمجتمع كامل. فإذا سمحنا للعنف أن ينمو في قلب مدارسنا، سنجد أنفسنا أمام أجيال مشوهة نفسيًا، إما ضحايا محطمين أو متنمرين فاقدين للتعاطف.
ولذلك، فإن مواجهة التنمر تبدأ من الأسرة، وتمتد إلى المدرسة، لتصنع بيئة تعليمية آمنة تحترم إنسانية كل طفل وتتيح له أن ينمو بكرامة وثقة....
د / أمل محمدي
# رحلة وعي

20/09/2025

20/09/2025

🔔 عايز تبدأ رحلة جديدة مع نفسك؟
حاسس إنك محتاج تطور من نفسك، تلاقي ثقتك، وتفهم ذاتك بعمق؟
النهارده الفرصة جتلك 👇

💫 معايا هتتعلم:

إزاي تعالج صدمات الطفولة وتتحرر من قيود الماضي.

إزاي تبني ثقة قوية بنفسك وتبقى النسخة اللي بتحلم بيها.

إزاي تحل الصراعات الداخلية وتلاقي سلامك النفسي.

إزاي توصل لشغفك وأهدافك وتحقق الاستحقاق الحقيقي.

إزاي تكون عندك تربية نفسية سليمة لأولادك بعيدة عن الاضطرابات.

حلول عملية لـ مشاكل زوجية وتحديات المراهقين.

إزاي تطور تواصلك مع أهلك وأسرتك وتعيش بعلاقات صحية.
✨ مع كل جلسة هتشوف نفسك من زاوية جديدة...
✨ هتتعلم إزاي تعيش بروح مطمئنة ونظرة أعمق للحياة...
✨ هتقدر تتحرر من الماضي وتبدأ بداية جديدة مليانة قوة ووعي...

📌 الجلسات النفسية مش رفاهية... دي مفتاحك علشان تلاقي نفسك وتبني حياة أهدى وأسعد وأغنى بالمعنى.

📞 للحجز والتواصل: 01002004859
👩‍⚕️ د/ أمل محمدي

٠ أستشاري الصحة النفسية
٠ أستشاري أسري ومعالج زواجي
٠ لايف كوتش معتمد من ICF

18/09/2025

✨ معنى الرجولة الحقيقي:
الرجولة مش صوت عالي ولا عضلات ولا فلوس ولا تحكمات عالفاضي ...
الرجولة جوهرها في القيم و المواقف و القدرة على تحمل المسؤولية.
الراجل الحقيقي هو اللي بيقدر يوازن بين قوته و رحمته... بين حزمه و حنانه.
هو اللي يبقى سند وأمان للي حواليه...مش خوف ولا قسوة.

✨ صفات الراجل اللي ينطبق عليه معنى الرجولة:

1. المسؤولية: يعرف يواجه مشاكله، ويتحمل نتائج قراراته.

2. الصدق: كلمته عقد، ووعده عهد.

3. الرحمة واللين: الرجولة مش قسوة، بالعكس، الرجولة رحمة في قلب قوي...

4. العدل: ما يظلمش حد، خصوصا الأقرب ليه.

5. الكرامة: يحافظ على نفسه وأهله، وما يمدش إيده على حد ولا يهين حد.

6. القيادة الحكيمة: يقود البيت والأهل بالحب والتفاهم..مش بالتحكم والسيطرة والعنف ...

✨ تعامل الراجل الحقيقي مع أهله وزوجته وأولاده:

مع أهله:
بار بوالديه، رحيم بأخوته، ما ينساش فضلهم عليه.
يحترمهم حتى لو اختلف معاهم.

مع زوجته:
يحافظ عليها زي ما يحافظ على نفسه.. يحسن إليها ..ويحسن عشرتها ...
يسمعها ويحتويها..ويكفيها عاطفيا ..معنويا قبل ماديا .. ويشاركها قرارات البيت...
يكرمها زي ما أوصى الرسول ﷺ: "خيركم خيركم لأهله، وأنا خيركم لأهلي".

مع أولاده:
يكون قدوة ليهم، مش بالكلام بس لكن بالفعل.

يربيهم على القيم، ويشبع احتياجاتهم النفسية قبل المادية.

يحتضنهم، يسمعهم، ويكون صديقهم قبل ما يكون مجرد "أب صارم".

✨ الخلاصة:
الرجولة الحقيقية مش بس في القوة الجسدية أو النجاح المادي، إنما في القدرة على أن تكون إنسان متوازن، رحيم، مسؤول، وعادل.
الراجل اللي بيخلي اللي حواليه يحسوا معاه بالأمان، هو ده الراجل اللي يستحق لقب "راجل بجد".
د / أمل محمدي
# رحلة وعي

16/09/2025

أكبر راحة ممكن يعيشها الإنسان هي يوم ما يقرر يتصالح مع نفسه…
يتقبل ضعفه زي ما بيتقبل قوته، ويتعامل مع غلطاته كخطوات في طريق نضوجه، مش كعيوب تحكم عليه بالفشل.

علم النفس بيأكد إن "تقبّل الذات" هو حجر الأساس في الصحة النفسية.
ليه....
لأن اللي بيرفض نفسه، بيعيش دايما في حرب داخلية، مهما حقق من نجاح أو خد تصفيق من الناس، جواه صوت بيقوله: "لسه مش كفاية".

لكن اللي بيتقبل نفسه، بيعرف يحبها ويطورها من غير جلد .. ولا قسوة...
تقبلك لنفسك مش ضعف… بالعكس هو شجاعة، لأنه معناه إنك بصيت لنفسك بصدق، وشُفت كل حاجة فيها، وقلت: "أنا أستحق الحب زي ما أنا، وهطور نفسي بخطوات هادية وحقيقية".

✨ لما تبدأ تتقبل نفسك:

هتعرف تعيش بسلام أكتر.

هتكون علاقاتك أنضج.

وهتلاقي إن نجاحك بقى نابِع من حبك لنفسك، مش من محاولتك تهرب من نقص جواك.

جرب تقول لنفسك كل يوم:
"أنا أستاهل أعيش بهدوء… أستاهل أدي لنفسي فرصة جديدة… وأستاهل أحبني زي ما أنا".

اتأكد أن اللحظة اللي هتقبل فيها نفسك، هتحس إنك اتولدت من جديد...
د / أمل محمدي
# رحلة وعي

16/09/2025

الإنسان دايما طول ماهو عايش عنده القدرة يطور نفسه حتى وسط المتاعب والضغوط، وده جزء من قوة النفس البشرية. المهم إننا نمشي بخطوات عملية وواعية. هقولك شوية خطوات :
1. إعترف بالواقع...
أول خطوة إنك تبقى صريح مع نفسك وتواجه الحقيقة: إنت فين دلوقتي؟ إيه اللي مضايقك؟ وإيه اللي محتاج يتغير؟

2. غير طريقة تفكيرك
بدل ما تقول "أنا مضغوط ومش قادر"، جرب تقول "أنا مضغوط بس قادر أتعلم إزاي أتعامل". التفكير بيغيّر الشعور والتصرف.

3. إبدأ بخطوات صغيرة
مش لازم تعمل نقلة جبارة مرة واحدة. إبدأ بحاجة بسيطة: قراءة كتاب، ممارسة رياضة 10 دقايق، أو حتى تنظيم وقتك.

4. تعلم إدارة الضغوط
الضغط مش هيختفي، لكن ممكن تتعلم تتحكم فيه: تنفس صح، اكتب مشاعرك، اعمل ريلاكس أو استرخاء أو شارك حد تثق فيه...

5. طور نفسك بالتدريج
حط لنفسك أهداف صغيرة واقعية، ولما تحقق حاجة بسيطة كافئ نفسك. الإنجازات الصغيرة بتعمل تراكم يغير حياتك.

6. اهتم بنفسك
النوم، الأكل الصحي، شوية رياضة، ولحظات هدوء. دول مش رفاهية، دول أساس أي تطوير.

7. خليك محاط بناس إيجابيين ..
ابعد عن الناس اللي بيمصوا طاقتك، وقرب من اللي بيدعموك وبيشجعوك.

8. افتكر دايما إن النمو مش خط مستقيم
هتقع وتقوم، وهتضعف وتقوى، وده طبيعي جدا. المهم إنك تكمل وتتعلم من كل تجربة....
د / أمل محمدي
# رحلة وعي