02/12/2025
العلاقات زي المرجيحة دي ..محتاجة ضبط المساحات عشان تتلعب كويس.
لو قربت او بعدت بشدة هتتعب الاخر وهتبوظ اللعب.
التعلق الزائد بيخنق الاخر وبيحسسه بالعبء والرغبة في الابتعاد
والابتعاد الزائد بيوتر الاخر وبيخوفه من الهجر وبيخليه يحس بالتجاهل وبيخلي عنده رغبة شديدة في التعلق...او الغضب
الاتنين مع بعض بيطلعوا اسوء ما في بعض وبيحققوا اقوى مخاوفهم وبيعيشوا لعبة متوترة ودرامية غير مستقرة او اللعبة بتنتهي.
حلول الاستسهال والانانية وعدم الرغبة في تحمل المسئولية وبذل الجهد بتشوف المشكلة عند الٱخر...
- طب متحل هي عن سمايا وتديني مساحاتي اللي عايزها....وهنبقى زي الفل
او طب ما يهتم هو زيادة ويديني كل- القرب اللي عايزاه...ومش هتحصل مشكلة
حلول لا تراعي الاخر ومخاوفه* واحتياجاته ..والنتيجة سنين من الدراما والخناقات..لا انت تعمل لأ انتي تعملي...الخ الخ...النتيجة فشل العلاقة.وانتهائها او استمرارها تعيسة ومهلكة.
الحل انكم تفهموا مخاوف واحتياجات وظروف بعض وتظبطوا مسافاتكم...انتم الاتنين...مش طرف واحد...ده يقرب وينفتح..وده يهدى شوية. .زي لعبة المرجيحة بالظبط..لازم ضبط مسافات عشان تعرفوا تلعبوا...واي تغيير في مكان طرف وموضعه هيلزم تغيير مكان الاخر وموضعه والا اللعبة مش هتشتغل...او زي رقصة التانجو..حركات متناغمة مع حركات..مرنة وناعمة ومنسجة وايقاعية...
الاتنين مهم يولفوا حركاتهم مع بعض..مش طرف متحجر زي المانيكان والاخر هو اللي مطالب يكيف نفسه ويقيفها ويظبطها على مقاسات التاني ..لان لو طرف واحد عمل كدة...هيتحمل هو كل التعب والارهاق والاحتياج والخوف والتاني مريح دماغه ومجهوده...ويوم ما يقرر الطرف اللي شغال لوحدة يبطل يلعب اللعبة دي...العلاقة بتقع وبتنهار ( وغالبا هو اللي بيتلام...انت اللي سلت ايدك فالعلاقة وقعت وانا وقعت..ليه مفضلتش شايلني وشايل العلاقة؟)
الحل الاتنين مع بعض وفي نفس التوقيت...او توقيت متقارب قدر الامكان. والا العلاقة هتقابل اختيار من تلاتة...تتحول لماتش ملاكمة...او تنتهي..او تستمر هادية وهدوءها بشبب ان واحد اتلغى وشال الليلة والتاني ريح دماغه
