Dr.Eman Mahfouz clinic

14/06/2025

ان شاء الله النهارده اول يوم عمل في العياده بعد العيد😍😍😍
مواعيد العياده:
سبت واثنين من ٥ الي ٧
للحجز او الاستفسار يرجي الاتصال علي01020771525

08/06/2025

الميزان ممنوع تماما في العيد ❌️❌️❌️
اي حد هايوزن نفسه اليومين دول هايزعل جدا وهيلاقي الوزن زايد شويه كويسيين 😳😳😳. بس الخبر المفرح ان الوزن ده غير حقيقي بالمره ده وزن الفته والرقاق مش وزن حضرتك نوهااائي😂.. مفيش حد بيزيد دهون من يومين لخبطه .. كل اللي بيحصل ان الجسم بيخزن ماء بكميات كبيره لما بنأكل نشويات مع دهون( رقاق _ فته _ محشي _ بشاميل) بالاضافه لوزن الاكل نفسه .
عشان كده محدش يوزن نفسه ابدا الايام دي ويعكنن علي نفسه علي الفاضي .. ده عيد ياجماعه والعيد فرحه 🥰🥰🥰

الميزان ان شاء الله يبقي بعد العيد بأسبوع او ١٠ ايام بشرط الرجوع للدايت والالتزام التام من تاني 😉
وكل سنه وانتم طيبيين ❤️❤️❤️

06/06/2025

مين اللي كان مسيطر النهارده ؟ الفته ولا الرقاق .... يا خوفي لا يكونوا الاثنييين🙈🙈🙈؟؟؟

05/06/2025

عيد سعيد من غير ما الوزن يزيد
العيد فرحه و بهجه وعيله ولمه
وطبعا اكله حلوه😋😋😋
وسواء كنت عامل دايت او لا

خلي هدفك انك تخرج من العيد من غير زياده في الوزن و برضه مش لازم تعكنن علي نفسك في العيد ( مش لازم تخس في الكام يوم دول يعني🤫😉)

طيب نعمل ايه عشان نستمتع بالعيد من غير اي زياده في الوزن:

١. خلي اللخبطه في وجبه واحده فقط اللي هي وجبه الغذاء طبعا
٢. خلي وجبه الفطار صحيه مفيش داعي للخبطه فيها خليك ذكي

٣. ممكن تستغني عن وجبه العشاء لو افتريت اوي في الغداء

٤. كل اي حاجه نفسك فيها سواء فته او رقاق او محشي بس راعي الكميه ( الكميه تكون في حدود ربع او ثلث طبق متوسط ).

٥. المشكله في عيد الاضحي مش في اللحمه الضاني مشكلتنا كلها مع الفته والرقاق خلي بالك

٦. اللحمه الضاني مفيده جدا جدا صحيا بس أفضل طرق طبخها هو السلق او الشوي في الفرن مفيش داعي ابدا للتحمير

٦. ابدأ الوجبه بكام معلقه سلطه خضراء او طبق خضار صغير هاتفرق كثيييير جدا معاك
٧ اتحرك كثير خصوصا بعد وجبه الغداء.

٨. ما تدخلش جسمك سعرات فارغه علي الفاضي زي المياه الغازيه والعصاير والحلويات ...وفر السعرات دي لحاجه تستاهل.

٩. مش لازم توصل لحد التخمه و تقوم من علي الاكل مش قادر تتنفس .... كل باعتدال بدل ما جهازك الهضمي يزعلك .

كل سنه و حضراتكم جميعا طيبيين وبخير
عيد سعيد 🥰🥰🥰
مع تحياتي
د.ايمان محفوظ

01/06/2025

ارجوووك لا تستهين بالكبد الدهني⚠️
للاسف ناس كثير بتتعامل مع الكبد الدهني علي انه حاجه بسيطه ومفيش منها قلق . بس الحقيقه غير كده خالص 😥

دراسات كثير ربطت بين الكبد الدهني و زياده خطر الاصابه بامراض القلب 🥺

إهمال الكبد الدهني بيؤدي الي تطوره من مجرد دهون علي الكبد الي التهاب شديد ثم تليف في الكبد و ممكن نوصل الي فشل كبدي او سرطان الكبد😳

الكبد الدهني بيزود جدا من فرصه الاصابه بالسكر من النوع الثاني وكل مضاعفاته😢😢

يعني الكبد الدهني قنبله موقوته داخل اجسامنا .

(طبعا انا كلامي هنا عن الكبد الدهني الغير كحولي لان فيه نوع تاني من الكبد الدهني بسبب شرب الكحوليات )

ورغم كل ده العلاج من أبسط مايكون و بدون حبايه دواء واحده

*اهم خطوه في العلاج واللي هاتعمل فرق كبير جدا و تحسن من حاله الكبد جدا جدا هي فقدان الوزن 👍👍👍

مجرد نزول 10 % من الوزن بيعمل فرق رهيييب في حاله الكبد بس خلي بالك النزول ده لازم يكون بمعدل صحي اللي هو نصف كيلو الي كيلو في الاسبوع لان النزول السريع للاسف بيزود الدهون في الكبد مش بيعالجها .

🔻اطعمه يفضل تستغني عنها تماما او علي الاقل تقللها قدر المستطاع :
▪️الدقيق الابيض
▪️السكر الابيض
▪️الدهون المهدرجه والمقليات
▪️العصاير حتي الطبيعيه
▪️اللحوم المصنعه والمواد الحافظه

🔺️اطعمه ومشروبات صديقه للكبد وصحته :
▪️القهوه باعتدال
▪️الشاي الأخضر
▪️البيض (ممتاز جدا )
▪️الخضروات الورقيه
▪️زيت الزيتون
▪️الثوم
▪️الكركم
▪️البنجر

* ممارسه الرياضه ولو مشي ٣٠ دقيقه يوميا هاتساعدك جدا

* النوم العميق ليلا لمده ٧ ساعات اهم مما تتخيل

* شرب الماء بكميات معقوله يوميا .

وبس كده

وربما يديم علينا نعمه الصحه والعافيه جميعا 🤲🤲🤲

مع تحياتي 🌹
د ايمان محفوظ

30/05/2025

البطيخ ينفع في الدايت ولا لأ ؟؟؟

البطيخ ده حبيب الملايين و انا شخصيا اعرف ناس بتستني الصيف عشان خاطر البطيخ .🍉🍉🍉🥰😋😋😋

طيب هل البطيخ مناسب للدايت؟ فيه ناس بتقول طبعا ده كله مياه اصلا مفيهوش حاجه وفيه ناس بتقول البطيخ بيتخن وممنوع في الدايت🤔🤔🤔 ..

اولا مفيش اي فاكهه في الدنيا ممنوعه في الدايت ولا في حالات مقاومه الانسولين ولا لمريض السكر
الموضوع بيتحدد علي اساس ايه ؟؟؟

فيه حاجه اسمها المؤشر الجلايسيمي ( glycemic index)من [ 0_ 100] لأي اكل بما فيهم الفواكه يعني سرعه الاكل ده في رفع سكر الدم وطبعا كل ما الرقم ده زاد يبقي الاكل ده بيرفع السكر بسرعه ودي حاجه مش مستحبه خالص ومضره صحيا جدا
وبالنسبه للبطيخ مؤشره الجلايسمي عالي 72 يعني بيرفع سكرالدم بسرعه للاسف 😢

استني بس ما تزعلش🤌😀

بس فيه حاجه تانيه اهم اسمها الحمل الجلايسمي (glycemic load )دي بقي اهم من المؤشر الجلايسمي لانها بتعتمد علي الكميه يعني بتقيس الأثر الفعلي للأكل علي سكر الدم حسب كميته مش نوعه بس ... يعني ممكن الاطعمه اللي مؤشرها الجلايسمي عالي لو اكلنا منها كميه صغيره ده يقلل الحمل الجلايسمي لها وما ترفعش سكر الدم بسرعه .

بالنسبه للبطيخ تحديدا الحصه الواحده منه اللي هي = شريحه بطيخ متوسطه او حوالي كوب ونصف من مكعبات البطيخ حملها الجلايسمي حوالي 8 وده يعتبر منخفض الحمد لله 🙏

يعني خلاصه الكلام :
البطيخ مناسب جداااا للدايت وحالات مقاومه الانسولين ومرضي السكر بشرط اسااااسي هو الالتزاااام بالكميه وياسلام لو يكون بعد وجبه كامله فيها بروتين وخضار او نأكله هو شخصيا مع كام واحده مكسرات وبالهنا والشفا 😋🥰

مع تحياتي 🌹
د.ايمان محفوط

29/05/2025

اهم 5 تحاليل وفحوصات لازم مريض السمنه يعملها عشان يقيم حالته الصحيه :

١. سكر تراكميA1C و سكر صايم fasting glucose.

٢. دهون دمLipid profile.

٣.وظائف الغده الدرقيهFree T4 & TSH.

٤ وظائف الكبد تحديدا نبدأ بALT & AST .

٥. قياس ضغط الدم .( مهم جدا)

في بعض الحالات بنحتاج نعمل تحاليل وفحوصات اخري اكيد ولكن اللي ذكرتهم هما اهم واول حاجه بنبدأ نقيم بيها الحاله عشان ما نعملش تحاليل كثير مالهاش لازمه .

مع تحياتي🌹
د.ايمان محفوظ

28/05/2025

28/05/2025

عايزه اخس ومش عارف اعمل ايه؟
ايه احسن دايت يجيب نتيجه؟ محتاجه اخد دواء يعلي الحرق؟ طيب ايه رايك في الزبادي بالليمون ؟ ولا الكمون بالليمون احسن؟
طيب بالنسبه للجلسات والاجهزه والحقن اللي بتدوب الدهون كويسه؟ ولا اروح اعمل تكميم ؟ اصل انا سني فوق الأربعين وحرقي اكيد ضعيف ؟ اصلي عملت دايت كثير قبل كده وما خستش؟؟؟ اعمل ايه؟؟؟؟؟؟😭😭😭😭😭😭😭

بعد سنيييين طويله من عملي كطبيبه تغذيه علاجيه عالجت مئات من حالات السمنه الحمد لله اقدر اقول لأي حد عايز يفقد وزن و يوصل لشكل يرضيه وصحه كويسه النصائح الاتيه:

١. أنجح الحالات اللي قدرت تفقد ٣٠ و٤٠ و٥٠ كيلو اعتمدت معاهم فقط علي النظام الغذائي من غير حبه دواء ولا اجهزه ولا جلسات ولا حقن .

٢ مفيش دايت يناسب الجميع ولا دايت احسن من دايت .. انما فيه دايت متفصل عليك انت هو ده اللي يناسبك وتقدر تلتزم به وتخس عليه

٢. مفيش اي مشروب او اكله بتدوب الدهوووون الله يكرمكم

٣. مهما كان سنك فوق الأربعين ولا الخمسين ولا اي عمر تقدر تخس وتفقد وزن يمكن بمعدل أبطأ شويه بس اكيد هاتخس

٤. عدوك الاساسي في الدايت هو الاستعجال .. الصبر و الاستمرار هما كلمه السر . لازم تكون فاهم ان الموضوع مش سحر و لازم توقعاتك تكون منطقيه يعني نزول نص كيلو الي كيلو في الاسبوع هو ده المعدل الصحي والطبيعي لنزول الوزن مش أكثر من كده .

٥. حب الدايت يحبك ... بلاش تتعامل مع الدايت علي انه عذاب و حرمان .. فيه افكار كثير لاكلات صحيه وطعمها جميل و مع الوقت هتتعود عليها وتحبها اكثر من الاكل الغير صحي مليون مره .

٦. افتكر انك مش مخلوق عشان تأكل والاكل من متع الحياه بس مش المتعه الوحيده ولا هو الحل لمشاكلك ابدا بالعكس ده بيزودها .. بدل ما تبقي متضايق بس هاتبقي متضايق وتخين

٧. لو عندك هدف حقيقي عايز تحققه هايخلق جواك اراده جباره تخليك تكمل المشوار لاخره .

٨. اخيرا انا لا افضل ادويه الدايت بكل انواعها وأشكالها و اكيد ضد عمليات السمنه تمااااماااا .

مع تحياتي 🥰
د.ايمان محفوظ

26/05/2025

ياللا بينا دايت العشر الاوائل من ذي الحجه 🥰🌹🥰🌹🥰

ممكن الايام العظيمه دي تكون بدايه حلوه لرحلتك مع نزول الوزن
بس انت ابدأ💪💪💪

▪️فطار: تمره + كوب ماء ثم صلاه المغرب

ثم
طبق سلطه + طبق خضار ني في ني + ربع فرخه مشويه بدون جلد او سمكه بلطي متوسطه مشويه او ٤ اصابع كفته مشويه قليله الدسم +٥ معالق رز مسلوق او٦ معالق مكرونه مسلوقه او نصف رغيف بلدي.

▪️خلال ساعه من وجبه الفطار : ثمره فاكهه متوسطه

▪️سناك بين الفطار والسحور: ٢ مكعب دارك تشوكليت فوق ٧٠% + ١٠ حبات سوداني اسواني او لوز ني + عصير ليمون بالنعناع او كركديه بدون سكر او اي مشروب ساخن بثلث كوب لبن

▪️سحور : ٢بيضه مسلوقه + ٤ معالق جبنه قريش او ٣ معالق فول مدمس + معلقه صغيره زيت زيتون + ٢ خيار + كوب زبادي كبير + ثمره فاكهه

▪️اختيارات( ٤ مشمش _ ٢ خوخ صغير _ موزه صغيره_ نصف ثمره كنتالوب _ شريحه صغيره بطيخ)

▪️الرياضه قبل أذان المغرب بساعه لها مفعول السحر في حرق الدهون

▪️لو الجو حر او حاسس باجهاد خليها بعد الفطار بساعتين

▪️شرب المياه مهم جدا حوالي ٨ اكواب موزعه علي الفتره من الفطار للسحور

كل سنه وحضراتكم بخير ربنا يتقبل صيامكم و يجعل لكم دعاءا مستجابا في يوم عرفه أن شاء الله 🌹🌹🌹

مع تحياتي
د.ايمان محفوظ

26/05/2025

العشر الاوائل من ذي الحجه من اعظم ايام السنه وصيامها من احب الاعمال لله ❤️❤️❤️
عشان نكسب ثواب صيام الايام المباركه دي من غير ما نضر صحتنا خصوصا ان الجو حر جدااا.. دي بعض النصايح المهمه لصيام امن باذن الله:
١. اشرب مياه بكميه كافيه بين المغرب والفجر علي فترات مش مره واحده و خفف كافيين لانه بيزود العطش

٢. اخر السحور قدر المستطاع

٣ . خلي السحور مليان بروتين ( بيض . جبنه قريش . زبادي )و خضروات مرطبه للجسم زي الخيار و الكابوتشي و قليل من الدهون الصحيه زي زيت الزيتون

٤. قلل الملح والتوابل و المخللات بالذات في السحور

٥ تجنب السكريات والحلويات والعصاير في السحور هاترفع سكر الدم بسرعه وبعدها يهبط جدا فتحس بجوع وارهاق بدري جدا

٦.ركز علي الاطعمه الغنيه بالبوتاسيوم والمغنسيوم( زي الموز _ المشمش _الكنتالوب _تمر_ بطاطس_ بنجر _بروكلي) عشان تساعدك علي توزان الاملاح في جسمك و تقليل الارهاق والشد العضلي

٧.ما تبداش الفطار بعصير او نشويات بكميات كبيره
ابدا بالتدريج تمره وكوب مياه .. انتظر ١٠ دقايق ثم سلطه او خضار .. بروتين و خلي النشويات اخر حاجه

٨ . لو حابب تمارس رياضه
انسب وقت قبل الفطار بساعه ممتاز لحرق الدهون ( بس بلاش لو الجو حر اووي او حسيت بدوخه او ارهاق او مش شارب ماء بكميه كافيه) ممكن تخليها بعد الفطار بساعتين

٩.لو مريض( ضغط - سكر- كلي -قلب) ارجوووك راجع طبيبك ينظم لك مواعيد الادويه و يقيم حالتك الصحيه اذا كان الصيام يناسبها او لأ.

١٠. اخيرا.. الايام دي كنز افتكر ان ثوابها كبير جدا و ده هايهون عليك مشقه الصيام و ادعي ربنا كثييييير جدا

مع تحياتي 🌹🌹🌹
د.ايمان محفوظ

23/05/2025

صباح الفل ...
صباح الورد...
صباح التفاؤل والرضا ....
صباح الخير كله بإذن الله
جمعه مباركه ❤️❤️🌹🌹