09/06/2023
بمناسبه فتره الصيف
يلا بينا نبتدي نبلبط بس مش في البحر 😀
قواعد خلع الحفاضة
١_اصبري كثيرا
٢_طولي بالك
٣_مالكيش دعوة بحد
٤_انتي تقدري
٥_بالهداوة مش بالقساوة
٦_العنف بيجيب نتيجة عكسية و الجريمة لا تفيد
٧_ابدأي في الصيف _زي الأيام دي
٨_شيلي السجاجيد و اقفلي المكاتب و الدواليب ارفعي عفش شقتك ١٠ سم عن سطح الأرض
٩_اصبري.. كتير
١٠_ما تبدأيش قبل سنتين اكتر مع الولاد ممكن البنات من سنه و نصف
١١_ارجعي لقاعدة رقم ٣ _مالكيش دعوة بحد
١٢_فرغي نفسك أسبوعين و اوهبي وقتك للمهمة العظيمة دي
١٣_اخلعي الحفاض طوال اليوم يلبسه وقت النوم
١٤_كل ربع ساعة قعديه في الحمام من خمس لعشر دقائق و كل ماينجح ابعدي الوقت اكتر خليها نص ساعه و بعدين ساعه و هكذا
١٥_كلميه كتير في الموضوع ده حتى لو كلامه قليل أو مش بيتكلم ..هيفهم.. يعني القطط هتتعود و هو لأ ؟
١٦_شجعيه كل ما يقعد في الحمام حتى لو ما حققش أهدافك النبيلة..صقفي له و غني له و حسسيه إنه عبر المانش
١٧_هو لسة بيتعلم ،، طبيعي يبقى فيه خساير و هدوم بتتوسخ و ارض بتتملي بي بي و كاكا
١٨_افتكري ؛ العنف هيأخرك و الجريمة لا تفيد
١٩_استخدمي طريقة المحاكاة أو التمثيل ؛ خلي لعبته المفضلة تقعد في الحمام و شجعيها هيتأثر
٢٠_هيفضل كام مرة يغلط في التقدير و يعمل عملته بعد ما يقوم من الحمام يدقايق
٢١_لما يحقق التارجت و يعمل المراد قي الحمام احتفلي معاه و حسسيه بالإنجاز
٢٢_طولي بالك
٢٣_كتري عدد المشجعين: باباه و إخواته و المجتمع و الناس
٢٤_لو بيخاف من الحمام حببيه فيه، هاتيله سلم أو قاعدة صغيرة و ستيكرات ملونة تكسر رهبته
٢٥_مالكيش دعوة بحد
٢٦_أقل من سنتين صعب و مالوش لزمة
٢٧_أكتر من ٣.٥ سنوات هيتعبك و يعاندك
٢٨_لو نجحتي في خلع الحفاض بالنهار حليتي ٩٠٪ من المشكلة
٢٩_مفيش عيل بيتعود على الحمام عند ٧ شهور ده كلام بيقولوه عشان يعقدوكي..لا سنه و لا لياقته يسمحو بده
٣٠_لو بيعمل و هو نايم ده مش بإيده حتى اسمه تبول لا إرادي.. إياكي تعاقبيه
٣١_العنف هيأخر و الجريمة لا تفيد
٣٢_لحد خمس سنين مقبول يبل سريره بالليل بعد كده اكشفي
٣٣_قللي سوايل بالليل و ما تنيميهوش زعلان
٣٤_عوديه يدخل الحمام مباشرة قبل ما ينام
٣٥_اصبري_كتير
٣٦_مع الوقت علميه الخصوصية في خلع ملابسه و دخول الحمام و علميه النضافة يعد الحمام
٣٧_اتعبي شويه هترتاحي كتير
٣٨_همسة في أذن الأب؛ لو سمحت اوعى تزعلها في المرحلة دي و تقبل كل شيء منها و إلا قوم انت بالمهمة دي يا بطل
٣٩_اصبري و طولي بالك و احتسبي الأجر و الثواب عند الله
٤٠_احتفلي مع طفلك بكل إنجاز يعمله حتى لو كان مجرد إنه بقى يعمل زي الناس في الحمام
ثقته في نفسه و إحساسه بأهمية أي حاجة بيعملها بتتنقل له منك انتي
