Dr.Mahmoud ElHalwagy دكتور محمود الحلوجي اخصائي النساء والتوليد

  • Home
  • Egypt
  • Cairo
  • Dr.Mahmoud ElHalwagy دكتور محمود الحلوجي اخصائي النساء والتوليد

Dr.Mahmoud ElHalwagy دكتور محمود الحلوجي اخصائي النساء والتوليد أستشاري نسا وتوليد
٩١ شارع العباسيه برج الاطباء امام بنزينه مصر للبترول

18/09/2024

الاسبوسيد مع الحمل

صباح الفل علي الكل
ست الكل الي مشرفانا دايما مش كل الحوامل بتاخد اسبوسيد بتاع السيوله هو مش ملبس حنه شيماء
كبرات النسا بره (من بعد جرجا وانت مقبل كده )قسموا الحوامل نوعين
نوع لازم ياخد اسبوسيد وهم
- لو عندك الضغط اصلا وبتاخديله علاج (مش جوزك الي رفعهولك)
- لو مريضه كلي
- لو مريضه امراض مناعيه ودول انواع كتير
- مريضه سكر (مش انتي الي سكر)
- جالها جلطه قبل كده في حمل سابق (مش الي جابت لحماتها جلطه قبل كده)
النوع التاني
البوست الجاي بقي....
محمود دكتور النسا

11/12/2023

(PMS) متلازمة ما قبل الدوره

- الموضوع ده للأسف مش واخد حقه برغم اهميته علشان كده هنحاول نتكلم عنه ببساطه ( علشان نفهم الرجاله قبل الستات لان هما اللى بيكونوا فى وش المدفع و بيستقبلوا العكننة كلها من ست الكل )
- هى حاله من متلازمة الام نفسيه و جسديه و سلوكيه بتيجى لبعض النساء فى النصف التانى من الدوره و تنتهى بانتهاء الدوره .
هى بتنقسم لدرجات :
¥ اعراض بسيطه: مبتأثرش على الحياه الاجتماعيه و السلوكيه ( يتم طلب الطلاق مره واحده و بتعدى على خير 😉😉)
¥ اعراض متوسطة : تؤثر على الحياه الطبيعيه و لكنها تستطيع السيطرة عليها و العمل بشكل طبيعى مع بعض الاضطراب السلوكي ( دى بيتم طلب الطلاق مرتين او ثلاثه و بتعدى على خير علشان خاطر الاولاد و الاستقرار )
¥ اعراض شديده : لا تستطيع العمل بشكل طبيعى و تؤثر على حياتها الطبيعيه و السلوكيه ( دى بقا بيتم طلب الطلاق من ٨ الى ١٥ مره يوميا و غالبا بتعدى على الزوج شخصيا و تفرمه 💪💪)
- للاسف مفيش اسباب واضحه للموضوع ده بس فى نظريات منها اسباب جينيه و وراثيه و لكنها مرتبطه بتاثير هرمونات الانوثه على مستقبلات الاعصاب او تلاكيك و السلام يعنى ياريت ناخد بالنا من نفسنا علشان جريمه القتل فى الحاله دى هتكون تحت تأثير التعب النفسى (يعنى مش هياخدوا فينا يومين فى السجن يا رجاله 👀👀👀)
اعراضها :
نفسيا : تقلبات مزاجيه - الاكتئاب- ( مش مرتاحه و لا مبسوطه ) ( انا قرفانه ) ( الخناق و العصبيه من غير مبرر) ( طلقنى )
جسديا : امتلاء الصدر ( صدرى مزند ) - صداع - الام بالبطن - حبوب بالوجه - حاجات تانيه كتير ....
ازاى نشخصها :
- طبعا عن طريق دكتور و كشف
- و لازم تسجيل الاعراض كتابيا و عرضها على الدكتور لمده دورتين ورا بعض ( علما بأن الدوره الاولى كشف ، الدوره الثانية استشارة ، و كله برزقه اهم حاجه نفسيتكم انتوا ولادى )
- و طبعا فى اختبارات طبية عن طريق دكتور النساء بتاعك بلاش تسمعوا كلام و عادات طنط مديحة جارتكم علشان احنا بنعانى فى الاخر علشان نقنعكم بالطب بتاعنا 🤨🤨
- اخيرا بقا الستات الاكثر عرضه للموضوع ده هى الستات صاحبه الوزن الزائد و اللى مابيلعبوش رياضة
- اللى عايز اوصله من البوست ده للناس ان فى بعض الستات ( ٣٪؜ من اللى بيجيلهم المشكله) دى بتنتحر من الاعراض الشديده و خصوصا من الحاله النفسية اللى محدش بيقدرها ..
و باقى ٩٧٪؜ هما دول بقا الي رجالتهم بيقابلوا وجه كريم و تدخل على النت تقولنا ادعوله اول ليله فى القبر و تكون زعلانه انه كان بيعضها و هى بتخنقه 😳😳😳
- ياريت ناخد الموضوع بجد و نحاول نساعدهم حقيقى الموضوع بيكون متعب و صعب نفسيا.

محمود الحلوجي ( دكتور النسا)

#مفيش كشف علي النت
#يلا نشير ونعمل لايك يمكن يكتب العلاج
#شكله مش دكتور اصلا
#متلازمه (PMS)

10/09/2022

الحاله النفسيه للحامل ٢

* كنت كتبت قبل كده بوست عن موضوع نفسيه الحامل وازاي بتاثر علي الجنين وسلوكه بعد الولاده (وطبعا زي اي بوست ولا اي اهتمام ولا لايك ولا شير)
ياسيدي والله بتاثر علي الجنين هضحك عليك يعني و بعدين كفايه نكد وحرقه دم ( ليك وليها وللدكتور)
* بصوا بقي انا هقولوكوا علي شويه حاجات بتضايق الحامل مثلا
* (الحمل مش باين عليكي) كده بقي انتي بتجامليها يعني مثلا وانتي مالك هي حامل في ابنك ليه تقلقيها وتحسسيها ان الجنين صغير وناقص او فيه مشكله
* وطبعا بلاش اصلك مليتي مع الحمل ( هي بتاكل من عندكم مثلا) سيبيها في الي هي فيه
* بلاش استظراف وسؤالها انتي استعجلتي ليه او ما انتي كنتي بتاخدي وسيله ( ياستي هي داخله مسابقه وعايزه تخلص الاول) ليه الاحراج
* وبلاش طبعا سؤال انتي هتجيبي ولد ولا بنت( هتقلولك الشايب مثلا وشكلك هيبقي وحش والهزار هيبقي دون المستوي بصراحه)
* ليه تخمني ليها نوع المولود ليه تشغليها وتلخبطيها وتبعتلي انت متاكد يا دكتور انه ولد ( اصل ساميه قالتلي منخيرك كبيره يبقي هتجيبي بنت) هي يعني اسمها (ساميه سونار)
* والسؤال التقليدي هتسميه ايه ( هسميه فتله علي اسم المنجد الي عملي العفش) لا والغريبه ان في ناس كمان بتجادل وتقولها لا مش حلو
ومتديعاش نصايح طبيه هي متابعه مع دكتور متشغليش بالك بيها
وبلاش تسودوا الدنيا في وشها من عينه ( مش هتنامي تاني _ الولاده صعبه _ ابره الضهر هتتعبك سنتين بعدها) بلاش توتر
طبعا كل ده صعب حد يعمله وهتساليني امال يعني استخف دمي معاها ازاي واهزر معاها
يا اخوانا عادي بشروها بالخير وخلوها تتفاءل وان شاء الله الخير جاي

محمود ( دكتور النسا)

14/08/2022

تاثير الحاله النفسيه علي الحامل والجنين

كلنا عارفين ان بيكون عليكي اعباء كثيره اثناء الحمل ولازم تقومي بيها طبعا علي اكمل وجه (محدش بيرحم لما الاكل بيتاخر)
وطبعا مطالبه تحافظي علي حالتك النفسيه والمزاجيه في استقرار وراحه وهدوء خلال فتره الحمل لان كل ده بينعكس علي حاله جنينك
وهنا يجي السؤال ؛ ايه المخاطر النفسيه علي الجنين في حاله العصبيه والنرفزه؟ اقولك ياستي
* القلق والضغط النفسي والعصبيه المستمره تخلي الجسم يفرز هرمون التوتر يوصل لجنينك يأثر علي نموه ووزنه يقل عن الطبيعي ويكون عرضه لاضطرابات فرط الحركه وصعوبه الكلام وتشتت الانتباه وعدم التركيز
* كمان يضعف شهيتك فمتاكليش كويس ويضعف مناعه جنينك
* طيب لو اتعرضتي لضغوط نفسيه متباعده، دي بقي تعمله مشاكل بعد الولاده زي انه يبقي عصبي وينام بصعوبه ويعيط كتير ( كفايه عليكي واحد بس عصبي في البيت).
# طيب اعمل ايه يادكتور ما انت شايف الدنيا والغلا والبنزين؟. هقولك علي شويه حاجات ممكن تساعدك.
* كلي اكل صحي يساعدك علي تهديه اعصابك زي الاكل الغني بالكالسيوم ( اللبن ومشتقاته والملوخيه السبانخ)
* متقعديش لواحدك كتير لو مضايقه او مخنوقه
* مارسي رياضه خفيفه تساعدك علي الاسترخاء
* نامي كويس وفترات كافيه ونوم هادي
* اتكلمي مع طفلك وانتي حاطه ايدك علي بطنك هتزودي الترابط بينكم وهتهديه
* متخافيش بزياده علي جنيك طالما متابعه كويس وبتاكلي كويس
* حاولي تاجلي خناقاتك لبعد الولاده ( ممكن تكتبي الي هتتخاقي معاهم في ورقه علشان متنسيش)
* ابعدي عن كلام النت واستشارات النت وكلام الستات علي النت
* لو في حاجه تعالي زوريني في العياده اطمنك

05/08/2022

شرب الماء

* واضح ان موضوع الفيديوهات معجبكوش مش عارف بقي علشان شكلي معجبكوش ولا المحتوي الي مش عاجبكم ( علي العموم اهو تغيير)
* النهارده هكلمكم ان شاء الله عن شرب الميه واهميتها في الحمل وغير الحوامل وانا شايف ان الموضوع مهم جدا ومش واخد حقه ( كفايه مشروبات غازيه رجلينا لزقت في بعض والترهلات والتخن مبيرحموش)
# خلينا نتكلم عن بعض اهميه شرب الميه مهم جدا في تحفيز الكلي علي اخراج الاملاح الزياده اهم علاج للالتهابات المسالك البوليه الي دايما موجوده خصوصا عند الحوامل( بدل ما تروحي للدكتور يكتبلك مضاد حيوي ولا فوار)
بيثبت الحمل في مراحله الاولي وبيقلل من احتماليه الاصابه بالام ولاده مبكره بيحسن الاعراض الي بتيجي اول الحمل زي الحموضه والقئ والعثيان
بيحمي الجلد من الجفاف ( بدل ما يقعد يتريق عليكي ويقولك قشفتي في الحمل) بيحسن نمو الشعر وبيقلل من التساقط ( والي بيروح صعب يرجع) بيزود اللبن في الثدي اثناء الرضاعه (ونوفر لمصر) بيقلل الاصابه بالامساك واضطرابات الجهاز الهضمي
* علشان كده لازم نشرب علي الاقل لترين في اليوم وخصوصا اثناء الحمل والرضاعه
متنسوش الشير والكومنت وابقوا طمنوني عليكم
محمود (دكتور النسا)

30/07/2022

السناكس مع الحمل

* علشان نخلص من الجدل ده وبالذات اول ثلاث شهور لاننا مبنحبش ندي حاجه غير الفوليك اسيد وطبعا الاكل الصحي (قتل بحثاوكلاما )
هنتكلم عن السناكس المفيد
# اي حاجه فيها حليب ( زبادي_ زبادو )
# مكسرات ارخصهم السوداني من غير ملح او ملح خفيف وطبعا اللوز والبندق واستغفر الله العظيم الكاجو مفيد جدا ( انا اسمع عنه بصراحه)
# المهلبيه والبليله وياسلام لو عليهم عسل ابيض بقي
# العصاير الطازجه خصوصا البرتقال والجزر والجوافه ( ولو عليهم عسل ابيض هتبقي احلي )
# سلطه الفواكه : كل الفاكهه بلا استثناء مفيده جدا وملكيش دعوه بكلام الناس ( مش هينفع اقول بالعسل هتبقي اوفر ودعايه جدا)
# الخضروات الورقيه شويه خس وجرجير وبروكلي (مش عارف ده ايه بصراحه)
# الفشار بس قللي الملح مفيد جدا
# البطاطا المشويه : هايله ( لا مش شرط وانتي بتتمشي علي النيل)
# سلطه الخضروات : باليمون وزيت الزيتون
# الشاي والنسكافيه ليكي كبايه واحده في اليوم
*اشوف بقي واحده تقولي شيبسي وبيبسي ولا فسيخ ومخلل وشطه واصل نفسي فيهم ( عادي ما انا نفسي ابقي طيار ومستحمل )
* المهم بقي الي هتيجي تتابع بعد كده تجيب عينات من السناكس دي خصوصا استغفر الله المكسرات الغاليه علشان اطمن علي جودتهم ووريها بتتاكل ازاي
تعديل: اي زوج هيدخل يشتم ( البوست ده مش بتاعي ) هات شيبسي اوفر العائلي ابو ٥ جنيه
محمود ( دكتور النسا)

الافرازات المهبليه والنضافه الشخصيه # الافرازات المهبليه دي حاجه طبيعيه جدا دورها المهم انها بتنضف الجهاز التناسلي بصوره...
14/07/2022

الافرازات المهبليه والنضافه الشخصيه

# الافرازات المهبليه دي حاجه طبيعيه جدا دورها المهم انها بتنضف الجهاز التناسلي بصوره دوريه من الخلايا الميته والميكروبات
# الطبيعي هي الافرازات البيضه الشفافه وممكن تبقي سميكه ولزجه مع قرب الدوره
# وبتزيد مع التبويض واثناء الحمل وبتقل في سن اليأس
المرضي بقي دي الافرازات الي ليها لون اخضر او اصفر او رائحه مش حلوه او هرش او متكتله وسميكه وبيضاء زي الجبنه او في وجع شديد اثناء العلاقه
₱ علاجها (لازم كشف والله لازم)
بس لحد ما ربنا يفرجها وتكشفي (متستخسريش في نفسك)
• اهتمي بالنضافه الشخصيه وبلاش استخدام اي مواد كيماويه للتنضيف ( زي الصابون) كفايه ميه دافيه بس
• برضه بلاش المواد المعطره بتعمل حساسيه
• البسي ملابس داخليه قطن وواسعه
• غسل المنطقه دي بيبقي من ادام للوراء
• بلاش الليفه ( مش قعر الحله يعني )
• ولازم طبعا تنشيف كويس بعد الحمام
• بلاش استخدام التشطيفات المهبليه ولا الدش المهبلي
• بلاش نستخدم ادوات شخصيه من بعض ( بيحصل بس فكري شويه ومتفوليش لا )
• وطبعا لو عندك التهابات يفضل غسيل الملابس الداخليه بتاعتك لوحدها
• غالبا العلاج بيبقي للزوجين
₱ طبعا هتبعتوا اسئله ملهاش اجابات وتنسوا اللايك والشير والمنشن والحاجات المفيده دي

محمود (دكتور النسا)

عدم انتظام الدوره الشهريه # ست الستات مش معني ان الدوره منتظمه يعني تجيلك في نفس اليوم كل شهر (هو مش عم محمد صاحب الشقه ...
04/07/2022

عدم انتظام الدوره الشهريه

# ست الستات مش معني ان الدوره منتظمه يعني تجيلك في نفس اليوم كل شهر (هو مش عم محمد صاحب الشقه جاي ياخد الايجار)
لا ممكن تقدم كام يوم تاخر كام يوم عادي بقي استحمليها واستنيها ( زي ما بتستني المرتب كده)
# نبتدي نفكر امتي لو اتاخرت اكتر من اسبوع
# طيب ليه اصلا بتتلخبط يا دكتور انا ماشبه علي ( برنامج دورتي صاحبتي ) وقالي المفروض تيجي من يومين
# بصي ياستي في اسباب طبيعيه واسباب مرضيه
# الطبيعيه اهمها
¥ تقلبات المزاج والتوتر والنكد ( المثلث المصري ) متقوليليش اصلها بتختلف من راجل وست وابراج ومناطق ( دي جينات وموروثات مع الفول وميه النيل)
للاسف بقي بتاثر جدا علي الهرمونات وتلخبط الدوره
الاكل الغير صحي ( دي نقطه في كل بوست ربنا ما يقطع لكم عاده )
¥ زياده الوزن او نقصانه بشكل حاد ومفاجيء
¥ ممارسه الرياضه العنيفه او المجهود البدني الزائد
¥ الرضاعه
¥ استخدام وسايل منع الحمل
# كل الحاجات دي بتلخبط الدوره عادي ومتقلقش بس لو اتاخرت عن اسبوع لازم تحليل حمل الاول ( حتي لو جوزك مسافر ، او بنت ، مركبه وسيله ، عمك مش مصري ، والده بره مصر ) ده مش رايي الكتاب ( كتاب الطب صفحه تاخر الدوره) الي بيقول كده
# طيب الاختبار سلبي مش هناخد اي علاج وهنستناها الا لو اتاخرت اكتر من شهر
# ست الحبايب مفيش حاجه اسمها انا تعبانه علشان الدوره منزلتش ( اصلها متخزنه في بطني وعملالي تقل) الي متخزن في بطنك ده المحشي بتاع امبارح او يمكن بطنك بتوجعك علشان جالك القولون العصبي علشان مخدتيش حقك من جارتك الي نشرت عليكي وكاتمه في نفسك
# الحاجات المرضيه
ارتفاع هرمون اللبن
ارتفاع هرمون الذكوره
مشاكل الغده الدرقيه
تكيس المبايض
وحاجات تانيه كتير محتاجه كشف ومتابعه مع دكتور
# سيبك من اسئله النت لو عندك مشكله وروحي اكشفي واطمني علي صحتك او اضربي جارتك يمكن تهدي والدوره تنزل
# متنسوش الشير واللايك
محمود ( دكتور النسا)

Address

٩١ شارع العباسيه برج الاطباء امام بنزينه مصر للبترول
Cairo

Telephone

+201221012191

Website

Alerts

Be the first to know and let us send you an email when Dr.Mahmoud ElHalwagy دكتور محمود الحلوجي اخصائي النساء والتوليد posts news and promotions. Your email address will not be used for any other purpose, and you can unsubscribe at any time.

Shortcuts

Share

Category