د/ صفاء جمعة Dr Safaa Gomaa

05/11/2025

باقي عدد محدود من الاماكن

Fully booked 💚

16/10/2025

إنشغالك بأولادك
إنغماسك في تفاصيلهم
سعيك أنك توفر احتياجاتهم
وجودك الدائم معاهم
مشاركتهم في اوقات النجاح
مشاركتهم في اوقات عدم التوفيق
مساعدتهم في التعبير عن مشاعرهم
نقل خبراتك الحياتيه لهم
تقديم الحب غير المشروط
تقديم الدعم غير المشروط

كل اللي فات ده.
دور حضرتك كمربي ومؤثر سواء كنت اب او كنتي أم في حياة أولادك
و دي حقوق أولادكم عليكم
لو عملتوها هتضمنوا طفوله سعيده لاولادكم ومراهقه آمنه وعلاقه سويه مع ابنائكم طول العمر 😍

23/09/2025

كل عام دراسي وأنتم وأولادكم بخير وسعادة.

المدرسة بالنسبة لأولادنا ساعات بتكون مرتبطة بحاجات مش محببة زي الصحيان بدري، والمذاكرة، وحفظ المواد، والجلوس في الفصل لفترة طويلة.
لكن ممكن نغير النظرة دي تمامًا ونحولها لمصدر طاقة إيجابية من خلال سرد قصص بسيطة عن أهمية التعليم في حياتهم، أو بإشعال روح التحدي عندهم، وتحفيزهم على التفوق والإنجاز.

حاولوا بقدر الإمكان تداروا مشاعر الملل أو الضيق من رجوع المدارس قدامهم، لأن الشعور ده بينتقل ليهم بسرعة وبيأثر على حماسهم، وده هيخلي السنة الدراسية صعبة على الجميع.
بالعكس، ردّدوا قدامهم عبارات مليانة طاقة وتفاؤل، ووضحوا إنكم متحمسين للسنة الجديدة وإنها هتكون سنة مميزة ومليانة نجاحات.
ودي بعض الأفكار والنصايح اللي هتساعدكم

1-احتفلوا بالبدايه اعملوا يوم قبل المدرسة للاحتفال ببدء العام الدراسي، جهزوا أدوات المدرسة بشكل ممتع، زي ما تكونوا بتحضروا لحدث مميز.

2- استخدموا نظام المكافآت حددوا أهداف صغيرة ليهم وقدموا مكافآت بسيطة لما يحققوها، زي خروجه حلوة أو لعبه بيحبوا يلعبوها .

3 - عمل روتين صباحي ممتع يخلي الصحيان بدري ممتع وحضروا فطار لذيذ مع اجواء مبهجه مع هدوء وعدم عصبيه .

4 - إحكوا عن ناس حققت إنجازات كبيرة بفضل التعليم والالتزام، علشان يعرفوا قد إيه ده مهم لحياتهم ومستقبلهم.

5 - نظموا وقت المذاكرة مع فترات راحة، بحيث يكون الوقت مناسب ومريح ومش ضاغط عليهم عن طريق عمل جدول مريح يشاركوا في اعداده .

6 - شاركوهم يومهم اسألوهم عن يومهم الدراسي بطريقة حماسية، واستمعوا لإنجازاتهم، حتى لو كانت صغيرة. ده هيخليهم متحمسين يشاركوا معاكم طول السنة.

كل سنة دراسية جديدة هي فرصة للتطوير والتعلم، سواء للأولاد أو للأباء ، ومهم إننا نكون جزء إيجابي من التجربة دي.
ومتنسوش تحتسبوا الأجر

وافتكروا دايما " ما أسرع الأيام "
حالا هيكبروا واللي هيبقا عندهم من ذكريات عن الدراسه عمرهم ما هينسوه

فأحسنوا صنع الذكريات💚

د/صفاء جمعه

04/09/2025

"صَلُّوا عَلى مَن، واسَي طِفلاً مَاتَ عُصفُورُه"

واستلهموا من خلقه ومن صفاته الرحمة والعطف
فما احوجنا أن نَرحم ونُرحم
كل عام وهو حبيبنا ومرشدنا وشفيعنا وقدوتنا
صلوا عليه وسلموا تسليما َ

#المولدالنبوي

23/07/2025

أمهات وآباء طلبة الثانويه العامه📣📣
ليكم عندي رسالة 📩

بما إني مريت ثلاث مرات بنفس اللي الحالة اللي انتوا فيها دي وعشت نفس مشاعر
الترقب والانتظار والآمال

الحقيقة لازم نفهم أمرين
الأمر الأول
أولادنا غير مسئولين عن أحلامنا وآمالنا ولا موكل لهم يحققوها

الأمر الثاني
أكيد ابنك او بنتك لو كان يقدر وعنده قدرات تعليمية كان هيجتهد ويكون احسن وافضل

وبذكركم تاني

آيا كانت النتيجة …أرضوا وافرحوا .... واظبطوا ردة فعلكم لأن اللحظات دي مبتتنسيش
بشوف ناس بعد سنين كتير بتتعالج ومش قادرة تتجاوز رده فعل والدها ووالدتها لما عرفوا نتيجة الثانويه
مفيش حد بيختار الفشل غير لو عنده مشكلات بتعيقه عن تحقيق النجاح والتميز

توفيق ولادنا وتميزهم في الحياة مش بيحدده درجات
لكن علاقتنا بأولادنا مرتبطه بافعالنا تجاههم

بالتوفيق يا رب والنجاح لكل الشباب ♥️






#الثانويه
#الثانويةالعامة2025

26/06/2025

22/06/2025

يا رب كن معهم واكرمهم ومدهم بمدد من عندك 🤲

البداية لازم نعرف إحنا بنذاكر ليه ؟ بنذاكر عشان حاجات كتيرة أوى اهمها
1-نشكر ربنا على نعمه وأهمها الصحة والوقت
2- عشان"من سلك طريقاً يلتمس فيه علماً سهل الله له به طريقاً
إلى الجنة "
3- عشان تحقق أحلامك فى مكانة إجتماعية وعلمية كانت من أهدافك .
4- عشان تفرح أسرتك وترد لهم جزء من فضلهم عليك

طيب لو حد مقصر ومبتداش لغاية دلوقتى مذاكرة اوابتدى بس مش بداية جد يعمل ايه ؟

أبشرك إن لسه فيه أمل فاضل على الامتحان كام يوم لو استغليتهم صح هتتفوق
ومتنساش "على قدر النوايا تكون العطايا "
يالا ننطلق

أول استعداد هنعمل لنفسنا مناخ خاص للمذاكرة بمعنى تجهز ركن ليك فيه كل اللى هتحتاجه للمادة اللى قررت تذاكرها وجنبك ميه او اى مشروب هتقفل موبايلك واللاب وكل اللى ممكن يعطلك ولو المكان اللى جهزته له باب يا ريت يتقفل وتستأذن من اللى فى البيت انك مش عاوز ازعاج
هتستعين بالله وتبتدى
لازم ندرك اننا فى ازمة وابسط قواعد فن إدارة الازمة بيقول اننا لازم نحدد المشكلة بوضوح واحصرها فى نقاط وابتدى ادرس كل نقطة وأحدد أولوياتى يعنى مثلا لو عندى 10 مواد منهم 5 مبدأتش فيهم خالص يبقا لهم الأولوية
وبعدين هنقسم الوقت دلوقتى فاضل عندنا كام يوم هنقسمهم ما بين مذاكرة ومراجعة
فيه خطأ شائع انى امسك مادة اخلصها كلها ده غلط لان استيعابك لأول وحدتين فى المادة هياخد كل تركيزك والباقى مش هيثبت نتيجة للمل اللى هتحس بيه ... هنذاكر بالتوازى يعنى وحدة من مادة وبعدين وحدة تانية من مادة تانية وهكذا
هنعمل جدول للمذاكرة هنقسم لكل مادة ثلاث ساعات وبعدهم بريك نص ساعة وكل ساعة الا ربع بريك 10 دقايق ... بس بشرط بلاش البريك يكون على الموبايل ولا الفيس ولا التليفزيون خلى البريك رياضة أو كافئ نفسك بحاجة من السوبر ماركت المقصود لازم حركة تجدد نشاطك
- لو ذاكرت مادة عملية وبعدها مادة نظرية هتتفاجئ بنتيجة تحصيلك والانجاز اللى هتحققه
-من اكتر الطرق اللى بترفع معدل التحصيل انك تتخيل اللى بتقراه او تمثل انك بتشرحه لحد تانى
-عشان المعلومة تثبت كررها اكتر من مرة باكتر من اسلوب
-حاول تتقمص دور واضع الامتحانات وكل فقرة تقراها حط عليها سؤال او اتنين واوعدك هتلاقى من اسئلتك فى الامتحان (بس ابقوا افتكرونى بالدعاء)
-لو أنجزت فى يوم التارجت اللى كنت محدده فى الجدول كافئ نفسك بحاجه بتحبها
-اهتم بالنوم 8 ساعات
-ابتدى يومك مع الفجر وهتنبهر بقدرتك على التحصيل فى الوقت ده
متنساش أن وقتك امانه هتتحاسب عليها ومتنساش ان نجاحك مش هيفرحك لوحدك هيفرح كل اللى حواليك وبيحبوك
استعن بالله وابتدى .... خالص تمنياتى بالنجاح و التوفيق

05/06/2025

عرفه ودعوات عرفه

والله زي النهارده كنت بكلم صديقه ليا اعيد عليها واوصيها بالدعاء
بقولها ان شاء الله نكون مع بعض في الحج السنه الجايه قالتلي نروح عمره حتى مع بعض في نص الكلام جت سيره صديقه لينا قالتلي ونقابل منى هناك وضحكنا
والله والله بعد اربع شهور من حيث لا نحتسب ولا نرتب. روحنا انا وهي عمره وبالصدفه صديقتنا اللي كنا بنتكلم عنها كانت هناك وقابلناها
يا ريتنا دعينا بالحج وقتها

ركزوا في الدعاء في هذا الوقت المبارك
اللهم رضاك والجنه

05/06/2025

"ﻣﻦ ﻟﻢ ﻳﺴﺘﻄﻊ ﺍﻟﻮﻗﻮﻑ ﺑﻌﺮﻓﺔ .. ﻓﻠﻴﻘﻒ ﻋﻨﺪ ﺣﺪﻭﺩ ﺍﻟﻠّﻪ ﺍﻟﺬﻱ ﻋﺮﻓﻪ"
يوم عرفه خير أيام الأرض
يكفيه تشريفا نزول هذه الآيه فيه

( الْيَوْمَ أَكْمَلْتُ لَكُمْ دِينَكُمْ وَأَتْمَمْتُ عَلَيْكُمْ نِعْمَتِي وَرَضِيتُ لَكُمُ الْإِسْلَامَ دِينًا.. )

أبواب السماء فيه مفتوحه فأطلبوا حاجاتكم
والدعاء بظهر الغيب مستجاب فأدعو لمن تعرف ولمن لاتعرف ولكم المثل إن شاء الله
ولا تنسوا عندما نطلب من أكرم الأكرمين نطلب على قدر كرمه لا على قدر حاجتنا
رزقكم الله استجابه الدعاء وجعلكم من المقبولين السعداء ❤️