21/12/2025
من حالات النهارده…
شاب مهندس.
بعد تاريخ مرضي طويل، وباعترافه هو شخصيًا، المشكلة الأساسية عنده هي Emotional Eating.
واللافت أكتر إن الشاب ده مقتنع تمامًا إن:
«أنا شخص صعب… ومعقّد… وده طبعي»
من وجهة نظري الإكلينيكية:
الحالة دي تنطبق عليها
Hover Eater induced by Inverted Circadian Rhythm
يعني: أكل سريع ومتقطع، ناتج عن قلب الساعة البيولوجية.
فيه جملة منتشرة جدًا:
«هو جسمي هيعرف إزاي إني باكل بليل مش الصبح؟»
الإجابة العلمية: أيوه، جسمك بيعرف.
الجسم مش بيتعامل مع الوقت كرقم في الساعة،
لكنه بيتعامل مع:
نور
ضلمة
توقيت نوم
توقيت أكل
نور الشمس لما يدخل العين،
بيحفّز مركز في المخ اسمه Suprachiasmatic Nucleus
وده المسؤول عن ضبط الساعة البيولوجية.
المركز ده بيخلّي الجسم يفرز Cortisol
والطبيعي إن الكورتيزول:
يكون أعلى في الصبح
يخلّيك صاحي ومستعد ليومك
يساعدك تشتغل وتتحرك
المشكلة إن لما:
النوم يبقى متأخر
السهر يطول
الأكل يبقى بليل
والضوء شغال طول الليل
الكورتيزول يفضل عالي في غير وقته.
وده يترجم لإيه؟
توتر دائم
عصبية
إحساس بالضغط من غير سبب واضح
إحساس إنك شخص “صعب” أو “معقّد”
ولما سألته سؤال بسيط: بتقوم من النوم تعبان؟ إجابته كانت:
«آه… كأني ما نمتش»
وده عرض شائع جدًا مع ارتفاع الكورتيزول واضطراب النوم،
مش ضعف شخصية
ولا كسل
ولا طبع وحش.
في نفس الوقت، بالليل،
المفروض الجسم يفرز Melatonin
وهو هرمون النوم والإصلاح الداخلي.
لكن:
الأكل المتأخر
التعرض للضوء
قلب النوم
بيقلل إفراز الميلاتونين،
فيطلع نوم خفيف،
وصحيان من غير راحة.
النتيجة عند ناس كتير؟ أكل سريع بلا نَهَم حقيقي
لا في جوع واضح
ولا استمتاع
ولا حتى إحساس بالطعم.
وده مش أكل متعة
ولا حتى أكل ضغط مباشر،
ده محاولة غير واعية لتهدئة جسم مرهق.
عشان كده بنقول: الأكل هنا مش المشكلة
ده مجرد عَرَض.
المشكلة الأساسية: Chronodisruption
اضطراب الساعة البيولوجية
وارتفاع الكورتيزول لفترات طويلة.
وده موضوع كبير،
وبيأثر على:
الوزن
الهرمونات
القلب
المزاج
جودة النوم
وحتى نظرتك لنفسك.
فبلاش دايمًا نقول:
«أنا شخصيتي كده»
في حالات كتير: دي مش شخصية… دي فسيولوجي.
ولما:
النوم يتظبط
التوقيت يكون صح
الضلمة ترجع لليل
والنور يرجع للصبح
الجسم يهدى…
والأكل يهدى…
والشخص نفسه يبدأ يحس إنه أبسط مما كان فاكر.
فا لما تلاقي نفسك مضغوط بزياده
او بتقوم من النوم تعبان
راجع جدول نومك
و اعمل تحاليل كورتيزول و كوليسترول
و ماتتخضش..... بس هاتبقى عارف تبدأ منين....
Dr Sahar elagamy
01212806022
