23/10/2025
📱 الخيانة الإلكترونية.. ليه بتوجّع زي الخيانة الحقيقية؟
في ناس كتير بييجوا العيادة وهم مكسورين من جواهم وبيسألوا نفس السؤال:
"هو ليه انا حاسّة بالألم ده كله؟ دي كانت مجرد رسايل، ماحصلش حاجة في الحقيقة!"
وجوابي دايمًا بيكون:
💔 لأن الوجع وجع واحد.
الخيانة العاطفية أو الإلكترونية مش أخف من الخيانة الجسدية، بالعكس… ساعات بتوجّع أكتر. وده ليه؟
علشان حاجات كتير جدا
⬅️علشان بتمسّ أمانك:
موبايلك ده جزء من خصوصيتك، من عالمك اللي محدش المفروض يدخله. لما الخيانة تحصل من خلاله بتحسي إن مافيش مكان آمن تاني. كأن أقرب حاجة ليكي اتكسرت فجأة.
⬅️علشان الخيال بيشتغل:
العقل لما مايعرفش التفاصيل، بيبدأ يخلقها!
تفضلي تسألي نفسك: "كان بيقولها إيه؟"، "هما كانوا قريبين قد إيه؟"، "ضحك على كلامها زي ما بيضحك معايا؟"
الأسئلة دي بتتعب أكتر من الحقيقة نفسها.
⬅️علشان بتكسر ثقتك في نفسك:
الخيانة دي بتوصّل رسالة جارحة: "في حد تاني استحق اهتمامي أكتر منك".
وده بيوجع على مستوى تقديرك لذاتك… بتحسي إنك مش كفاية، وده إحساس صعب جدًا.
⬅️علشان فيها تلاعب:
في ناس بعد الخيانة بيحاولوا يقنعوا الطرف التاني إنه بيتهيأ له أو بيبالغ…
وده اسمه تلاعب نفسي (Gaslighting)، وده بيكسر أكتر وبيخليكي تشكي في إحساسك وعقلك.
💬 للي اتخانت أقولك من قلبي:
وجعك حقيقي ومشروع وحقيقى.
ماتسمحيش لحد يقلل من إحساسك أو يقولك "ماحصلش حاجة".
الخيانة الإلكترونية خيانة بكل معنى الكلمة.
خيانة للعهد، وللأمان، وللصدق اللي المفروض يبني أي علاقة.
🩶 طريق الشفاء يبدأ من:
إنك تعترفي بالألم، ما تهمليهش.
إنك تحطي حدود واضحة، الاحترام غير قابل للتفاوض.
وإنك تلجئي لمتخصص نفسي يساعدك ترجّعي توازنك وتختاري اللي يريحك.
القوة مش في إنك تستحملي اللي محدش يستحمله،
القوة إنك تختاري اللي يديكي سلامك النفسي من تاني.
—
د/ [علا عادل]
استشارى صحه نفسية واستشارات أسرية 🧠💫
#العلاقات
