13/05/2025
سمعت قبل كدا عن إيدز القطط🤔
قطتك ممكن تكون مصابة بمرض ممكن يدمر جهاز المناعة بتاعها من غير ما تحس.
إحنا بنتكلم عن فيروس نقص المناعة السنوري (FIV)، المرض اللي لازم كل مربي قطط يكون عنده وعي كامل بيه لأن الوعي المبكر هو الحل.
♦فيروس نقص المناعة السنوري (FIV) دا عامل زي الإيدز عند البني آدمين كدا، بس طبعًا بيصيب القطط ومش بيتنقل للبني آدمين خالص.
وهو فيروس بيضعف جهاز المناعة بتاع القطة، يعني بيخليها عرضة لأي مرض تاني، حتى لو كان بسيط.
والمرض دا لما بييجي للقطة ممكن ميبانش عليها أي أعراض خالص لسنين، وممكن تظهر عليها أعراض زي: خسسان في الوزن، سخونية، التهاب في اللثة والفم، إسهال، تورم في الغدد الليمفاوية، مشاكل في الجهاز العصبي وغيرها..
ولأن الأعراض دي مش مميزة وممكن تيجي من كذا مرض فاحنا بنلجأ للتحاليل عشان نتأكد بنعمل تحليل دم بسيط، بنعرف إذا كان فيه أجسام مضادة للفيروس ولا لأ.
📌القطة بتتصاب بالمرض بكذا طريقة زي:
🔸العض
دي الطريقة الأساسية لما قطة مصابة تعض قطة تانية الفيروس بينتقل عن طريق اللعاب.
🔸نقل الدم
لو قطة خدت دم من قطة مصابة.
🔸من الأم لصغارها
لو الأم مصابة ممكن تنقل الفيروس لصغارها وهي حامل أو بترضعهم.
📌إيه العلاج؟
للأسف، مفيش علاج نهائي للفيروس دا، بس بنقدر نساعد القطة إنها تعيش حياة كويسة عن طريق:
🔸علاج أي التهابات تانية بتظهر عليها.
🔸أكل صحي ومتوازن.
🔸متابعة صحة القطة باستمرار.
🔸مكان نضيف وآمن تعيش فيه.
🔸إعطاء بعض الأدوية المضادة للفيروسات في بعض الحالات.
📌طيب ولو قطتي سليمة الحمدلله يبقا أحميها من الفيروس دا ازاي؟
🔸فيه تطعيم بيحمي القطط من الفيروس دا.
🔸نخلي القطط جوه البيت، ونمنعها من الاختلاط بقطط تانية مش معروفة.
🔸نعقم القطط، عشان نقلل من العض والقتال.
🔸لو جبنا قطة جديدة، نعملها تحليل FIV قبل ما ندخلها البيت.
📌القطط المصابة بالفيروس ده ممكن تعيش حياة طويلة وكويسة لو اهتمينا بيها.
📌لازم نزور الدكتور البيطري باستمرار عشان نتابع صحة القطة.
