02/01/2026
أول ما أشتغلت في المستشفى جاتلى واحده عندها حوالى 27 سنه وقالتلى يا دكتور معلش لو ممكن تيجي زياره منزليه ضروري ماما حالتها صعبه أوي
قولتلها تحت امرك بس أنا هخلص متأخر ممكن تجيبوها بإسعاف المستشفي أفضل أو تنتظري لما أخلص ،خلصت شغل وطلعت لقيتها مستنيه قدام المستشفي
المهم ركبنا العرببه وفي الطريق قعدت تشرحلى الحاله وقالتلي أمى جتلها جلطه فى المخ وعملتلها شلل فى النصف الأيمن ودكتور المخ والأعصاب قال لازم تعمل علاج طبيعى مكثف وبسرعه فانا عايزه حضرتك تكشف عليها و تطمنى على ماما اصلها بركتنا و عمود البيت ولو وقعت البيت كله هيقع
وطول الطريق تشكرلى فى مامتها، المهم وصلنا البيت وشفت الحاله ولاقيتها الحمدالله كويسه مجرد hemiparises شويه ضعف فى الجزء الأيمن ومع العلاج الطبيعي هتبقى كويسه وهترجع شبه طبيعيه بنسبه كبيره زي الدكتور اللي قبلي ما قالهم طمنتها وقولتلها بإذن الله يا ماما هتبقى زى الفل كفاية حب بنتك ليكى
الست ردت بعرفان وقعدت تشكرلى فى بنتها وتقولى هو انا ليا غيرها يا دكتور دى هى اللى مرعيانى وبتاكلنى وبتغيرلى ودخلنى الحمام دا انا من غيرها كان زمانى مرميه فى الشارع دى ملاك يا دكتور هى صحيح مرات ابنى بس زى بنتى تمام والله
وهنا انا اتصدمت و سالتها هى مش بنتك ؟
قالتلى لا دى مرات ابنى بس زى بنتى و أكتر
ساعتها انا كنت لسه ماتجوزتش قعدت ادعى فى سرى لو ربنا يكرمنى بزوجه تحب امى وامى تحبها كده هبقى فى قمة السعاده
المهم الاخت راحت تجيب حاجه أشربها واجب الضيافه
لقيت الست رفعت رأسها وبتقولي بصوت واطي يا دكتور بنت الكلب اللى شلتنى..
انا الصراحه فى الاول مستوعبتش فقولتلها بتقولى ايه يا ماما !!
- قالتلى مرات ابنى دى عيله بنت كلب هى اللى شلتنى
= فانا قولتلها الملاك هى اللى شلتك ؟
- قالتلي ملاك مين دى بنت شياطين..
على دخلت البنت علينا وهى جايبالى العصير لاقيت حماتها بتقولها ربنا يحرسك يا بنتى ويخليكى شايف يادكتور شايله البيت كله اقسملك بالله ملاك بنتى حبيبتى😇
من يوميها الصراحه وأنا عندى أزمة ثقه بينى وبين الستات كلهم 🤦😂
دكتور / سليم ابراهيم
