د. أحمد الصفتي استشاري النساء والتوليد

31/03/2022

الحمل خارج الرحم من الحالات الخطيرة اللي تحتاج تشخيص مبكر و علاج قبل ما يحصل نزيف داخل البطن و إزالة أنبوبة الرحم بعملية منظار او فتح، عشان كده اي حمل في بدايته و يكون غير طبيعي يعني مصاحب لنزول دم او ألم في البطن او عدم ظهور كيس الحمل يبقى لازم عمل تحليل حمل رقمي مرتين و بين كل تحليل و الآخر يومين، لو هرمون الحمل ما حصل فيه تضاعف يبقى كده الحمل ده غير طبيعي، و بنتأكد بالسونار، و لو تم تشخيص الحمل خارج الرحم ممكن يكون علاجه حقن بتعمل له ضمور، إنما لو حصل نزيف داخلي يبقى لازم عملية، و الحمل خارج الرحم قد يكون في الأنبوبة او البطن او جرح القيصرية او المبيض، الصور دي لحالة تأخرت في التشخيص لدرجة ظهور جنين داخل الأنبوبة و بداية نزيف داخل البطن و بالتالي كان الحل استئصال الأنبوبة و الحمل داخلها

22/11/2021

- يا مدام أول يوم في آخر دورة كان امتي
= يوم حنة شيماء
-..... كانت امتي يعني الحنة دي
= قبل الفرح بيومين
-....

25/08/2021

لما مريضة حامل و عندها سكر تروح لدكتور النسا و دكتور النسا يبعتها على دكتور الباطنة و دكتور الباطنة يكتب لها انسولين زي اي واحدة مش حامل، طبعا هي كده بتاخد جرعات انسولين غلط و المفروض ان دكتور النسا هو اللي يحسب لها الجرعة بمعادلة معينة بناء على وزنها و عمر الحمل، و للأسف بتتكلف كشوفات هنا و هناك و في الآخر النتيجة وحشة، و ييجي دكتور النسا يقولها هعملك قيصرية في أول التاسع عشان عندك السكر و ممكن العيل يموت، و طبعا ده غلط لأن السكر لو مظبوط يبقى كده هي طبيعية كأنها ما عندها سكر و فيه حاجة اسمها تخطيط لقلب الجنين كل ٣ ايام بيطمن و حركة الجنين و الدوبلر، و نصيحة لكل حامل عندها سكر، تابعي مع دكتور نسا يظبط لك السكر و يشيل مسئولية معاكي و اشربي ميه كتير و اتحركي و ظبطي اكلك و تابعي السكر مع العلاج في البيت، صايم يكون أقل من ١٠٠ و بعد الفطار او الغدا او العشا بساعتين يكون أقل من ١٤٥

19/07/2021

22/05/2021

واحدة حامل في الشهر الثامن و عندها آلام ولادة و راحت لدكتور و عمل لها قيصرية و الجنين دخل الحضانة و جاله الصفرا و بعد كده كل شويه يتعب لأن مناعته ضعيفة و الأم مش عارفة تراعيه لأن الالتصاقات اللي حصلت في بطنها عاملة لها ألم مزمن طول عمرها، ده غير المصاريف الكبيرة اللي اتدفعت ، يبقى من الأول المفروض ان الدكتور يعمل فحص مهبلي، لو عنق الرحم اقل من ٤ سم المريضة تاخد أدوية توقف الطلق و تاخد ابر الرئة و تعالج الالتهابات اللي سببت الطلق و تولد في التاسع، و لو عنق الرحم ٤ سم او اكثر يبقى برضه تاخد ابر الرئة و تتحجز في مستشفى عام او خاص و تولد طبيعي على مهلها، لأن الولادة الطبيعية بتحسن من رئة الطفل و تنفسه و كمان الولادة بتكون سهلة لأن الجنين صغير ، نصيحة مهمة ، بلاش تروح لدكتور جاهل و لا دكتور تاجر

07/04/2021

معلومات هامة يجب أن تعرفيها :
مش كل واحدة عندها تأخر إنجاب يبقى علاجها تنشيط للتبويض باقراص او حقن، لأن سبب تأخر الحمل قد يكون في الزوج او انسداد او إلتهاب في الجهاز التناسلي للزوجة أو عدم تواجد الزوج وقت التبويض أو العادات الخاطئة في الجماع مثل استخدام الكريمات و السوائل اللزجة و اخذ بعض الأدوية و المسكنات.
معاد الولادة بيكون افضل شيء قبل نهاية الشهر التاسع باسبوع، و لو عملتي قيصرية قبل كده بدون داعي قوي، هيدخل المولود الحضانة في أغلب الأحيان و هيكون ضعيف و هتجيله صفرا مرضية و هتكون مناعته ضعيفه و يمرض كل شويه.
الولادة الطبيعية السهلة افضل ألف مرة من القيصرية و فوائدها على الأم و المولود على المدى القريب و البعيد، حتى لو الميه قليله او عملتي قيصرية واحدة قبل سنة و نصف على الأقل او عندك ضغط او سكر .
التكيسات في المبيضين و نقص فيتامين د من أسباب الإجهاض لو ما اتعالجت قبل الحمل
ابرة الظهر لتسكين ألم الولادة الطبيعية بتطول فترة الولادة و بتخلي تخطيط قلب الجنين غير مطمئن و بتخليكي مش عارفة تمشي باتزان وقت الولادة و هيفضل مكانها يوجعك في ظهرك لمدة قد تصل إلى سنة بعد الولادة، يبقى بديلها حقنة عضل اسمها بيثيدين او حتى الباراسيتامول الوريدي

لو حد عنده سؤال محيره او عايز يتأكد من معلومة يسأل
و عايز أقول ان للأسف الطب بقى تجارة و اعلانات و الدكتور مفيش عنده وقت يسمع المريض و لا يصبر عليه في ولادة او علاج لأن عنده زحمة، يبقى نكشف عن الدكتور اللي عنده رحمة لانه هيفيدك اكتر من الغالي المشهور، و ربنا يصلح أحوالنا جميعا

09/09/2020

عمليات اليوم استئصال للرحم لمريضة تعاني من تغدد رحمي و هو عبارة عن انغماس بطانة الرحم داخل عضلات الرحم و تكون أعراضه ألم و نزيف مع الدورة و عدم انتظامها، و الحالة الأخرى إزالة لورم ليفي لمريضة آنسة تعاني من نزيف مع الدورة و صعوبة في التبرز و التبول، و الحالة الثالثة لمريضة تعاني من تأخر في الإنجاب و اضطراب في نزول الدورة و تكرار التهابات الجهاز التناسلي و تم تشخيص وجود تجويف في الرحم من سوء عمل القيصرية السابقة و تم إزالة الجرح السابق و عمل خياطة جيدة لجرح سليم ، و يلاحظ في الفترة السابقة ان الولادات أصبحت قيصرية بنسبة كبيرة جدا مع العلم ان الولادة الطبيعية هي الأفضل و أيضا تتم محاولة الولادة الطبيعية لمن سبق لها ولادة قيصرية واحدة بشرط أن يكون الجنين حجمه مناسب و حوض الأم مناسب و نزوله بالرأس و مضى سنة و نصف على عمل القيصرية السابقة و لا يوجد ألم بجرح القيصرية

31/08/2019

الولادة الطبيعية قد تحدث بعد ولادة قيصرية سابقة بنجاح في أغلب الحالات و ذلك بشروط في الام و الطفل و حالة الرحم وقت الولادة، حيث أن نسبة حدوث انفجار في الرحم يكون حالتين في كل ١٠٠٠ حالة