مركز you can يو كان Training and consulting

18/01/2026

17/01/2026

🌪 صعوبة التحكم في الانفعالات و ليه بتحصل وإزاي تعرفها؟

🎭 مش أنت العصبي مشاعرك هي اللي ماسكة الدركسيون.
بتغضب فجأة؟ بتنفعل من أقل حاجة؟
الغضب يطلع مرة واحدة والصوت يعلى أو الصمت يبقى جارح
وبعدها سؤال واحد يفضل يلف في دماغك هو أنا ليه عملت كده؟
الحقيقة إن ده مش ضعف شخصية ولا مجرد عصبية زيادة
ده اسمه صعوبة التحكم في الانفعالات.
⬇️ كمّل القراءة واعرف
إيه اللي بيحصل جواك فعلًا،
وليه مشاعرك أحيانًا بتسبق عقلك.

1️⃣ تعريف صعوبة التحكم في الانفعالات :
👈 هي الحالة اللي بيبقى فيها الشخص غير قادر على التحكم في مشاعره وردود أفعاله سواء كانت غضب أو حزن أو خوف أو أو قلق و بتتصرف بطريقة مفاجئة أو مفرطة بدون ما تفكر في النتائج و تحس إن مشاعرك مسيطرة عليك بدل ما تكون أنت المسيطر عليها.

2️⃣ أسباب صعوبة التحكم في الانفعالات

الضغط النفسي المستمر والتوتر اليومي:
بسبب الشغل أو الدراسة العلاقات كل ده ممكن يخلي أعصابك مشدودة على طول.

تجارب الطفولة والصدمات العاطفية:
لو كنت طفلاً تعرضت لنقد شديد أو إهمال، ده ممكن يعلّم دماغك تتحرك بسرعة عند أي تهديد أو ضغط.

ضعف مهارات ضبط النفس:
بعض الناس ما تعلموش طرق تنظيم مشاعرهم أو التعبير عنها بشكل صحي، وده بيخلي أي شعور مفاجئ يخرج على شكل تصرف مفرط.
مشاكل صحية أو عصبية أحيانًا:
زي اضطرابات القلق، الاكتئاب، أو ADHD اللي بتخلي التحكم في الانفعالات أصعب.

3️⃣ علامات صعوبة التحكم في الانفعالات :
👈ممكن تلاحظ العلامات دي على نفسك أو على أي حد حواليك:
انفجارات غضب مفاجئة حتى على مواقف صغيرة.
صعوبة تهدئة النفس بعد التوتر أو الغضب، وكأن المشاعر مش بتستجيب لمحاولاتك للسيطرة.
البكاء أو الصراخ أو الصمت المبالغ فيه كرد فعل على أي موقف مزعج.
تأثر العلاقات: ممكن المشاعر المفرطة تسبب مشاكل مع الأسرة أو الأصدقاء أو الزملاء.
شعور بالذنب بعد التصرف: بعد ما تطلع الانفعال، ممكن تحس بالندم أو الخجل.

💬 شاركنا في الكومنتات:
هل بتحس إن انفعالاتك أحيانًا بتغلبك ولا بتعرف تتحكم فيها؟
لو محتاج مساعدة حقيقية عشان تتحكم فيها أنا هنا أساعدك.

د/مروة شعيب
دمياط القديمة كورنيش النيل بجوار مديريه الامن
التواصل
01095402887

17/01/2026

📍 ازاي الكذب المرضي بيدمر حياة المراهق؟

المراهق اللي بيكذب باستمرار مش مجرد بيغلط ولكنه بيعيش نمط حياة مؤذي ليه قبل أي حد.كل كذبة سلوك وكل سلوك ليه ثمن زي ثقة بتضيع علاقات بتقع وضغط نفسي بيكبر لحد ما يتحول لأسلوب حياة صعب الخروج منه.

🔍 سلوكيات المراهق اللي بيعاني من الكذب المرضي:
■بيكذب حتى في أبسط التفاصيل ومن غير سبب واضح.
■يخلق كذبة جديدة عشان يغطي كذبة قديمة.
■يبالغ أو يخترع قصص عشان يبان أقوى أو أحسن.
■يهرب من المواجهة والمسؤولية.
■يتوتر ويتلخبط لما يحس إن كذبه ممكن يتكشف.
■ينكر الحقيقة حتى مع وجود دليل.
■يغيّر شخصيته حسب اللي قدامه.
■يستخدم الكذب كوسيلة لجذب الانتباه أو الإحساس بالقيمة.

⚠️ سوا هنعرف الكذب المرضي ده بيأثر عليه إزاي فعلًا؟
1. تدمير الثقة في كل علاقاته:
المراهق اللي بيكذب باستمرار بيفقد ثقة أهله، أصدقائه، ومدرسيه. المشكلة الأكبر؟
حتى لما يقول الحقيقة بعد كده و محدش بيصدقه.

2. فجوة كبيرة بينه وبين أسرته
الأهل يبدأوا يشكوا ف كل تصرفاته وأفعاله يراقبو وويسألوا كتير والمراهق يحس إنه متهاجم ومش مفهوم فيقفل على نفسه أكتر.

3. عزلة ووحدة نفسية:
مع الوقت المراهق يبعد عن الناس لأنه مش مرتاح يكون على طبيعته و دايمًا حاسس إنه لابس قناع ومتعب.

4. ضغط نفسي وقلق دائم:
الخوف من انكشاف الكذب بيخلق توتر مستمر و تفكير زائد، عصبية، اضطراب نوم، وتقلبات مزاجية.

🔄 5. حلقة مفرغة صعب الخروج منها :
كل كذبة بتحتاج كذبة تانية تحميها لحد ما الكذب يبقى عادة يومية مش اختيار.

6. تراجع الثقة بالنفس :
يوصل لمرحلة يحس فيها إن الحقيقة مش كفاية وإنه محتاج يزوّد أو يزوّر عشان يتقبل ويتحب.

7. تأثير سلبي على الدراسة والسلوك :
قلة تركيز و تهرب من المسؤوليات ومشاكل متكررة في المدرسة أو مع القوانين.


☑️ الكذب المرضي مش المشكلة ولكن المشكلة الحقيقية هي الأسباب اللي وراه والمشاعر اللي المراهق مش عارف يعبر عنها.
🧠 التدخل بدري بالحوار والفهم ممكن ينقذ حياة وعلاقات كتير.
💬 شاركنا رأيك:
هل الكذب عند المراهقين سلوك بسيط؟
ولا علامة خطر لازم ناخد بالنا منها؟

د/مروة شعيب
دمياط القديمة كورنيش النيل بجوار مديريه الامن
التواصل
01095402887

12/01/2026

📍تفتكر طفولتك راحت؟ فجأة هتلاقيها بتتحكم في
مشاعرك وجسمك.

في حياتك اليومية ممكن تحس بتوتر أو خوف من غير سبب
ممكن الغضب يسيطر عليك فجأة أو جسمك يحس بتعب مستمر ولكن دا مش صدفة دا أثر صدمات الطفولة اللي لسه عايشة جواك، بتتحكم في مشاعرك وحتى جسمك.

1️⃣ التأثير النفسي 🧠
صدمات الطفولة بتخلي عقل الإنسان دايمًا في حالة “خطر مستمر” حتى لو مفيش خطر حقيقي.
وده بيأثر على طريقة تفكيره ومشاعره طوال حياته:
1. القلق المستمر:
الشخص حاسس إن فيه حاجة غلط طول الوقت دايمًا متوتر أو قلقان بدون سبب واضح، وصعب عليه الاسترخاء.

2. الشعور بعدم الأمان:
حتى في علاقات الحب والصداقة، بيحس إن أي علاقة ممكن تنهار فجأة وده بيخليه متردد في الاقتراب من الناس.

3. جلد الذات:
الطفل اللي اتلام على كل حاجة بيكبر وهو شايف نفسه سبب أي مشكلة حتى لو مالوش ذنب.

4. نوبات الغضب أو الحزن المفاجئة:
المشاعر المكبوتة من سنين بتطلع فجأة و ممكن غضب شديد أو حزن ثقيل من غير سبب واضح.

5. مشاكل في الثقة بالنفس:
الصدمات بتخلي الإنسان يشك في قدراته ويقلل من نفسه باستمرار و الخوف من الفشل أو حتى من النجاح.

2️⃣ التأثير الجسدي :
الجسم بيحتفظ بتوتر الطفولة وكأن التجربة لسه بتحصل، وده بيظهر في مشاكل جسدية:

1. صداع وتوتر عضلي:
الجسم مش قادر يفصل من حالة الدفاع فالكتفين والرقبة والظهر دايمًا متوترين.

2. إرهاق وتعب مزمن:
حتى لو مفيش مجهود كبير لأن الشخص حاسس بتعب مستمر.

3. اضطرابات النوم:
أرق، نوم متقطع، أو كوابيس متكررة بسبب قلق داخلي مستمر
4. مشاكل هضمية مرتبطة بالضغط النفسي:
زي ألم المعدة أو الانتفاخ لأن الجسم دايمًا في حالة توتر.

5. ضعف المناعة أحيانًا:
التوتر المزمن بيخلي الجسم أكتر عرضة للأمراض والعدوى.

📌 صدمات الطفولة مش بس ذكريات حزينة ولكن هي بتسيب بصمة نفسية وجسدية على الإنسان طول حياته.
الوعي بيها وملاحظتها هو أول خطوة للتعامل معاها بشكل صحيح والبدء في العلاج النفسي أو تغيير العادات.

➡️ للتواصل معانا:
د/مروة شعيب
دمياط القديمة كورنيش النيل بجوار مديريه الامن
التواصل
01095402887

10/01/2026

🧨 إزاي نتعامل مع الشخص التجنبّي من غير ما نضغطه ولا نجرحه؟

👈 في ناس شكلها هادي لكن جواها حرب محدش شايفها.
عايزين يقربوا بس الخوف يشدّهم لورا.
عايزين يعبروا بس كلمة واحدة ممكن تكسرهم.
وده اللي بيخلي التعامل معاهم محتاج حساسية وفهم… مش ضغط ولا استعجال.
وفي البوست ده هقولك:
إزاي تتعامل مع الشخص التجنّبي من غير ما تجرحه أو تزوده خوف وكمان إمتى تعرف إن الوقت جه يلجأ لثيرابي يساعده يخرج من دايرة التجنّب.
يلا نبدأ من أول خطوة:

🤝 ١- قدم له مساحة آمنة

ما تضغطوش يتكلم ولو اتكلم ما تقطعوش.
هو محتاج يحس إن وجوده مش بيتحاكم.

💛 ٢- طمّنه باستمرار

كلمة أنا مقدر أو وجودك مهم لما تتقال له بتعمل فرق ضخم عنده حتى لو ما بيبانش.

🧠 ٣- اتجنب النقد اللاذع والكلام الي ممكن يوجعه :
هو أصلًا حساس جدًا للنقد وأبسط تعليق ممكن يوجعه أكتر مما تخيّل

🌱 ٤- تشجعه على خطوات صغيرة:

مش مطلوب يختلط بالمجتمع مرة واحدة.
حاول تخليه يجرب بخطوات صغيرة زي
مكالمة قصيرة أو زيارة خفيفة أو مشاركة بسيطة خطوة وراء خطوة.

📌 ٥- افهم إن انسحابه مش تجاهل :

هو أوقات بيختفي مش لأنه مش مهتم ولكن لأن خوفه أخد السيطرة عليه.

💬 ٦- اسأله: تحب أساعدك إزاي؟

أكتر جملة بتفتح أبواب جواه لأن هو محتاج يحس إن رأيه مسموع.

👈إمتى الشخص التجنبّي يحتاج متخصص؟

في فرق بين أنا خجول شوية وأنا حياتي واقفة بسبب خوفي

يلزم متخصص لو كان:

🔹 الخوف من النقد والرفض معطّله عن الشغل أو الدراسة
مش قادر يدخل مقابلة ومش قادر يحضر اجتماع و مش قادر يشارك.

🔹 بيتجنب العلاقات لدرجة إنه حاسس بوحدة شديدة
رغم إنه نفسه يكون عنده ناس في حياته.

🔹 تقدير الذات منخفض جدًا وبيأذيه نفسيًا
دايمًا شايف نفسه أقل من كل اللي حواليه.

🔹 عنده قلق وتوتر مستمر ومش عارف يعيش طبيعي
أبسط موقف اجتماعي بيبقى معركة بالنسباله.

🔹 التجنّب بقى أسلوب حياته
كل قرار يتاخد على أساس “أبعد وخلاص.

🔹 فقد السيطرة وبدأ يحس إنه مش قادر يتغيّر لوحده
ودي مرحلة محتاجة دعم مهني.

🎯 التعامل مع الشخص التجنّبي محتاج صبر والعلاج محتاج أمان قبل أي كلام ومع الوقت ومع متخصص فاهم.
ممكن يبني صورة جديدة عن نفسه ويرجع يشوف إنه يستحق القرب، الحب، والقبول.

💬 لو حاسس إنك شايف نفسك في أي علامة من اللي فوق ما تستناش لحد ما الخوف يوقف حياتك.
اكتبلي سؤال أو موقف حصل معاك وأنا هساعدك تفهمه خطوة بخطوة.
👇 ابدأ من هنا رسالة واحدة ممكن تغيّر طريقك.
د/مروه شعيب
استشاري صحه نفسيه وعلاج زواجي
مدرب معتمد من جامعه عين شمس
01095415567
01095402887

29/12/2025

😔 أعراض الرهاب الاجتماعي

لما جسمك وقلبك يتعبوا قبل أي موقف
مش دايمًا الرهاب الاجتماعي بيبان في الكلام

😔 أحيانًا الموقف نفسه ما يكونش صعب ولكن الصعب هو اللي بيحصل جواك.
دقة قلب سريعه وصوت داخلي بيقول: امشي و متتكلمش كلهم باصين عليك.
دي مش عصبية ولكن دي أعراض الرهاب الاجتماعي.

🔹 أعراض نفسية ممكن تحس بيها:

■خوف شديد من التفاعل مع الناس أو التواجد في تجمعات.
■قلق مبالغ فيه من نظرة الآخرين أو حكمهم عليك.
■تفكير زائد قبل أي موقف اجتماعي: هقول إيه؟ هتصرف إزاي؟
■إحساس بالإحراج بسهولة حتى في أبسط المواقف.
■ضعف الثقة بالنفس والشعور إنك أقل من غيرك.
■ميل واضح لتجنب المواقف الاجتماعية.

🔹 أعراض جسدية بتحصل بدون إنذار:
■تسارع ضربات القلب أو خفقان قوي.
■تعرق ملحوظ حتى بدون مجهود.
■رعشة في الإيدين أو الصوت.
■جفاف الفم وصعوبة في الكلام.
■إحساس بالغثيان أو اضطراب في المعدة.
■صداع أو توتر شديد في الجسم.
■
💭 الأعراض دي مش ضعف ولكن دي رسالة من جسمك ونفسك إنك محتاج تفهم اللي جواك وتتعامل معاه صح.

💡 الرهاب الاجتماعي قابل للعلاج ومع الدعم المناسب تقدر ترجع ثقتك بنفسك خطوة خطوة.

💬 شاركنا هل حسّيت قبل كده ببعض الأعراض دي؟
ولو بتحب تقرأ أكتر عن الصحة النفسية تابعنا.
للتواصل وحجز الجلسات☎️☎️
01095402887
دمياط القديمه كورنيش النيل بعد مديريه الامن بعمارتين

29/12/2025

ايه تأثير الرهاب الاجتماعي على الحياة اليومية؟

😔 في موقف بسيط أو سؤال عادي
نظرة من الناس حواليك و فجأة قلبك بيدق أسرع، صوتك بيتلخبط وكل تفكيرك بيبقى: هم شايفني إزاي دلوقتي؟
ده مش ضعف ولا قلة ثقة.
ده ممكن يكون رهاب اجتماعي بيأثر على تفاصيل يومك من غير ما تحس.
خليك معايا وخلّينا نفهم إزاي الرهاب الاجتماعي ممكن يسرق راحتك بهدوء. 💭

🔹 تأثير الرهاب الاجتماعي على الحياة اليومية:

■بيخليك تتجنب مواقف بسيطة زي الكلام مع ناس جديدة أو حضور تجمعات.
■بيأثر على شغلك أو دراستك بسبب الخوف من العرض، المناقشة أو حتى السؤال.
■بيقلل فرصك الاجتماعية وبيخليك تحس بالوحدة رغم إنك محتاج ناس حواليك.
■بيأثر على ثقتك بنفسك ويخليك تشك في كل تصرف أو كلمة.
■بيخلي القلق دايمًا حاضر قبل أي مناسبة، وأحيانًا بعد الموقف كمان.
■ممكن يسبب إرهاق نفسي مستمر وإحساس إنك “مش عارف تعيش براحتك.

🔹 سوا هنتعرف علي لمواقف الي ممكن بتحفّز الرهاب الاجتماعي:
■التحدث أمام مجموعة أو إلقاء عرض.
■التعرف على أشخاص جدد.
■المناسبات العائلية أو التجمعات الكبيرة.
■التحدث مع شخص صاحب سلطة (مدير، مدرس، مسؤول).
■الأكل أو الشرب أمام الآخرين.
■التعبير عن رأيك أو الاعتراض قدام الناس.

💡 الرهاب الاجتماعي مش اختيارك بس التعامل معاه وفهمه هو أول خطوة للتغيير.

💬إيه أكتر موقف اجتماعي بيخليك تحس بالضغط؟
مشاركتك ممكن تخفف عن غيرك.

23/12/2025

إزاي منفعش في فخ تكرار الغلط #

18/12/2025