24/01/2026
العميل الشيك المحترم نعمة كبيرة من ربنا والله العظيم
العميل اللي داخل عارف هو عاوز اي وجاد ومحافظ على وقته وكلامه قليل ومختصر.
العميل اللي بييجي في العدل علطول ما بيلفش ويدور.
العميل المحترم اللي لسانه نضيف وطالع من بيئة سوية ومتزنة.
العميل دا بيجيلنا واتس او مسنجر يلاقينا كاتبين نظام التعامل بيقرأه بتركيز وفهم ولو اقتنع بالنظام ده بيدخل الكتالوج يلاقينا مظبطين متجر منظم ومتقسم فئات وكل منتج محطوط صوره ومكتوب سعره تحته بيحدد طلباته ويبعتها ويسأل عن وسيلة الدفع ويدفع ويبعت بياناته وينتظر وصول الطرد له بكل سلاسة وشياكة وهندمة في التعامل من أوله لآخره.
ولو لا قدر الله قابلته مشكلة بتلاقيه يتواصل بكل شياكة بردو لحل المشكلة بدون هرجلة ولا صياح وعويل.
العميل من النوعية الشيك دي والله العظيم يتشال في العين وفوق الراس، وفرحتنا بيه في كل مرة بيدخل لنا بتكون فرحة كبيرة جدا لأننا عارفين انه نعمة من رب العباد.
المنشور دا باكتبه بس علشان أقدم تحية إجلال وتقدير ومعزة واحترام لكل عميل تعامل معنا بشياكة ورقي وتحضر.
ونسأل الله ألا يحرمنا من أولاد الأصول والأكابر والمحترمين ❤️
