09/08/2023
السلام عليكم ورحمة الله وبركاته
طبعا زي ما انتو شايفين الدنيا حر اوي و بقينا نطقطق زي الفشار.
في الصهد ده تجيليك طنط ام أحمد الصيدلية باحمد ابنها و تشتكيلك ان هي و ابنها عندهم طفح جلدي و شعور بحكة و كمان ظهرت إلتهابات وحبوب علي الجلد.
ساعتها عقلك يفكر يا ترى دي حساسية ولا عدوي ولا اية؟
ما تحترش تعالي بس هقولك ده إية ، سمعت قبل كدة عن حمو النيل؟
طبعا هتقولي بس ي دكتور حمو النيل ده بيجي للأطفال بس ، ساعتها هقولك ع فكره مش شرط ، ده ممكن يحصل لأي شخص وأي فئة عمرية لكن بيكثر حدوثه مع الأطفال ومرضي السمنة تعالوا نتكلم ونفهم إيه اللي بيحصل ونعرف علاجه. ♥️
- طبعا عارفين إن الجلد بيحتوي علي غدد عرقية وظيفتها إخراج العرق وطرده خارج الجسم.
- مع إرتفاع درجة الحرارة بتبدأ الغدد العرقية تفرز العرق بكثرة نتيجة لإرتفاع الحرارة عشان يكون في موازنة والجسم يفضل درجة حرارته ثابته عند الدرجة الطبيعية. هنا بقي تحصل المشكلة لإن مع إرتفاع الحرارة والرطوبة في الجو بيحصل تشبع للماء في الجو فالعرق مبيتبخرش فبيتخزن داخل الغدد العرقية ويحصل فيها انتفاخ وتظهر علي هيئة حبوب حمراء علي الجلد من الخارج مع الشعور بالحكه والهرش ..لحد كدا تمام الزيادة في الموضوع بقا إن إيدك بتروح لمكان الحكه وتفضل تهرش فيه جامد فبيحصل إلتهابات شديدة وتظهر رؤوس بيضاء أيضا.
ندخل بقي ع العلاج
اول حاجة لازم نأمن نفسنا الاول
١) طبعا لازم نلبس ملابس قطنية
٢) ناخد شاور بماية باردة مش سخنة
٣) نشرب سوايل كتير عشان نحافظ ع نفسنا من الجفاف
٤) لازم تكون درجة حرارة حرارة الاوضة الي حد ما معتدلة و فيها تهوية كويسة
طب لا قدر الله وقعنا ف المحظور هنتصرف ازاي؟
١) ممنوع إيدك تقرب نحية جلدك و لا تهرش فيه عشان ميحصلش إلتهابات
٢) ناخد شاور بصابونة جلسرين عشان نرطب الجلد كويس
٣) نستخدم لوشن أو مرطب عشان مندييش اي فرصة لجلدك انه يحصله جفاف زي
( zinc oxide , calamine , glycerin)
المواد الفعالة دي هتلاقيها في lotions كتير زي
( three zad , calamile, bringo, clawash)
٤) لو الحكة شديدة اوي و مش متحملها ممكن ندي oral antihistamines
٥)لو لا قدر الله ظهر رؤوس بيضاء والتهابات شديدة يبقي نضيف مع اللوشن كريم مضاد للالتهاب ومضاد حيوي موضعي ونستخدم كل من اللوشن أو الكريم 3مرات يوميا .
وبس كدا الموضوع بمنتهي البساطة. لو شوفت ع المريض أعراض مختلفة عن اللي ذكرنها يبقي لازم تعمله refer ع طول لدكتور جلدية ؛ لإن ممكن يكون عنده إكزيما أو حساسية ودي بتظهر كبقع دائرية حمراء واسعه علي مساحه كبيرة من الجلد.
