Dr. Esam Elsharkawy. طب الاطفال

16/03/2025

بنقول من زمان ونعيد ونزيد محدش يبوس طفل صغير علي الوجه..
علي حسب صحيفة الديلي ميل البريطانية طفل صغير يفقد عينه اليسري بعد ما أحد أقاربه قام بتقبيله علي العين وكان عنده قرحة هربس Cold sore علي فمه.

العدوي بفيروس الهربس البسيط Herpes simplex من الحاجات الشائعة جداً علي الفم وبتحصل كتير بالتزامن مع أدوار البرد العادية. انتقال العدوي للعين ممكن يعمل التهاب في قرنية العين Keratitis وتقرحات Corneal ulcers تصل لمرحلة الثقب الكامل Corneal perforation والعمي الكامل Blindness.

كمان العدوي بفيروس الهربس البسيط علي الأصابع بتعمل حاجة إسمها Herpetic witlow بتظهر علي هيئة حبوب بيضاء وحويصلات صغيرة علي الأصابع ولو تم لمس العين بالأصبع ممكن تؤدي لنفس المضاعفات مع انتقال العدوي للعين.

كمان فيروس الهربس من أكتر أسباب التهاب المخ Encephalitis في الأطفال.

دكتور وليد علي

08/05/2024

وعي + علم + مرجعية دينية + قدرة على توصيل المعلومة بسلاسة وهدوء = صانع محتوى ناجح يستحق نتابعه ونستفيد منه،
كتير عندهم عقدة من أي شخص بيقدم محتوى عن التربية بشكل عام ظنًا منهم إنه أكيد بيقول نصايح خيالية مش من الواقع وبيضغط على الأمهات،
فتابعت صناع محتوى كويسين كتير بيعملوا فيديوز عن التربية، لكن كنت دايمًا بحس إن فيه شيء ناقصهم،
أ/ سولافا لحد الآن هي صانعة المحتوى التربوي المتكاملة بالنسبة لي والأفضل واللي بتحقق المعادلة كاملة، حقيقي بحب الفيديوز بتاعتها جدًا جدًا جدًا وبتعلم منها، برشحهالكم وبقوة.

Soulafa Selim - سولافا سليم

07/05/2024

أوعي تستهوني بقياس محيط الراس لطفلك

لازم في كل زياره لطبيبك تقيسي محيط الرأس لطفلك
بالذات أول سنه من عمره

لان ٩٠ ٪؜ من تطور المخ ونموه بيتم في أول سنه من العمر

النمو ده لازم يكون حجم الجمجمه بيزيد معاه الزياده الطبيعيه

بنقيس محيط الرأس بالمازوه في كل زياره

لو محيط الرأس اكبر من الطبيعي او اصغر من الطبيعي

لازم نعمل فحص عصبي كويس للطفل ونطمن علي الأفعال الانعكاسيه وتطور اكتساب المهارات عنده والتطور الحركي

كل ده بيساعدنا في التشخيص

الطفل الطبيعي بيتولد ومحيط الرأس عنده ٣٥ سم

عند سنه بيبقي ٤٥ سم

مهم جدا نتابعه 👌🏼👌🏼

29/04/2024

صلاحية الأدوية اللي في باب تلاجتك🤦‍♂️

مش معنى أن صلاحية الدواء اللي اشتريته من الصيدلية ٣ ولا ٥ سنين يبقى ينفع نستعمله وهو في باب التلاجة.

العلبة لما تتفتح بيتخلط بالهواء واللي بيعمل تفاعلات ممكن تفسد المادة الفعالة للدواء.

١-المضادات الحيوية الشراب مثلا.. بتقعد بره التلاجة اسبوع وجوه التلاجة اسبوعين... غير كده يترمي.

٢-أدوية الشراب زي مثلا أدوية الكحة... شهر من تاريخ فتحها.

٣-القطرات اسبوعين لشهر فقط.

٤-حقن زي (يونتكتام - سالبين-يوناسين) متنفعش تتقسم وتتحط جوه التلاجة... خد الجرعة وارمي باقي الحقنة لأنها كده تعتبر مية.

٥-فيدروب نقط شهر.

٦-اتروفنت امبول الاستنشاق يومين من الفتح.

٧-بلميكورت امبول الاستنشاق ١٢ ساعة من الفتح وبيتكسر بالضوء بيفضل جوه كيس سولفان.

٨-أدوية الجديد والفيتامينات من ٣ اسابيع ل ٤ اسابيع من فتحها.

د. عصام الشرقاوى
طبيب الاطفال وحديثي الولادة

26/04/2024

💥💥💥تحذير 💥💥💥
بلاش الأمهات تستخدم الكريمات اللي بتحتوي علي كورتيزون عشان التهابات الحفاضات لفترة طويلة من غير الرجوع للطبيب.
للأسف الطفل بيخش في متلازمة كوشينغ ويبدأ جسمه يزيد جدا ويحصله مشاكل كتير.
ربنا يشفي أطفالنا ويحفظهم ❤️

د.عصام حافظ محمد
طبيب الاطفال وحديثي الولادة

25/04/2024

#حالة من العيادة
طفل ٧ سنين يعاني من ألم بالبطن وترجيع وزيادة معدل التنفس،اتشخص بالخطأ انه التهاب بالمعدة ،غير مستجيب للعلاج
بالكشف علي الحالة تبين وجود التهاب رئوي عنيف ومية علي الرئة الشمال ونقص بمستوي نسبة الأكسجين.
تم حجزه بالمستشفي لانه بحاجة إلي اكسجين وبزل لسحب المية من الرئة.

د.عصام حافظ الشرقاوي
طبيب الاطفال وحديثي الولادة

25/04/2024

بعد اللي شفناه من ادوار النزلات المعوية والالتهاب الرئوي خلال الفترة اللي فاتت ..ضروري لازم نبدأ التطعيمات الاضافية
ربنا يحفظ أولادنا ❤️

23/04/2024

☁التشنجات الحرارية ☁

يعني ايه تشنجات حراريه 🙄🙄

من اسمها كدا هى عباره عن تشنجات بتحدث للطفل ف الجسم كله من حركات لا اراديه وغياب عن الوعى وكل دا بسبب ارتفاع درجه الحراره ومش شرط توصل الحراره لغايه 40 او 41 علشان يتشنج الطفل لا طبعا في الغالب بتحدث مع درجه الحراره فوق 38 يعنى مش مرتبط بشده الحراره لكن مرتبط بوجود

الحراره ومرتبط اكتر بالصعود المفاجئ لدرجة الحرارة ويبدأ السيناريو كالتالي ؛
الطفل صحي من النوم كويس وفجأة سخن وبعدها اتشنج وده غالبا بيحصل من سن ست شهور لست سنين وفي الأغلب قبل سن ١٨شهر.

طيب هي انواع يا دكتور التشنجات الحرارية

طبعا نوعين .

*النوع الاول وهو :

التشنج الحراري البسيط (Simple Febrile Seizure):

الأكثر شيوعا و تكون التشنجات فيه عبارة عن حركات سريعة منتظمة لليدين أو الرجلين يعنى ف الجسم كله ولا تتكرر التشنجات البسيطة خلال 24 ساعة من بداية حدوثها ولا تستمر أكثر من 15 دقيقة .

*النوع الثانى وهو :

التشنج الحراري المعقد (Complex Febrile Seizure):

الأقل شيوعاً وتستمر التشنجات إلي أكثر من 15 دقيقة وتحدث في جزء معين من الجسم اى محدوداً لليد أو الرجل أو الرأس وتتكرر خلال 24 ساعة من بداية التعرض للتشنجات وفتره ما بعد التشنجات من الهمدان بتستمر فتره اطول واستعاده مستوي الوعي والحركه ممكن ياخد وقت برضه لذلك التشنجات المعقده الغير بسيطه يستدعي فحص دقيق وقد يحتاج الطفل الي عمل بعض الفحوصات لاستبعاد الاسباب الخطيره مثل التهاب المخ.

🌀ازاي نتعامل مع التشنجات الحرارية؟

*عند حدوث التشنجات احيانا بيكون معاها ترجيع و بعض الإفرازات من الفم، ولتجنب حدوث الاختناق نخلى الطفل مستلقى علي أحد جوانبه ونرجع الراس شويه للخلف علشان يتنفس الطفل بسهوله لأن اهم شيء سلامه مجري التنفس .

*وضع الطفل علي سطح امن ولا ينبغي محاوله إيقاف التشنجات بالقوه لتجنب الصدمات والكسور.

*إعطاء خافض للحراره مع كمادات بارده تحت الابطين وعلي الرقبة من الناحيتين .

*إعطاء أدوية التشنجات من مشتقات البينزوديازيبين زي النيوريل وده في المستشفي فقط.

🌀هل يمكن التنبؤ باحتماليه حدوث كهرباء بالمخ فيما بعد؟

نعم يمكن التنبؤ إذا وجدت هذه العلامات:

١-التشنجات الحرارية المعقده اللي حصل فيها تشنج جزئي
او تكررت في نفس اليوم مع طول فتره التشنج مع وجود فحص عصبي أو تطوري غير سليم.

٢-لو الطفل اللي حصل معاه تشنج حراري يوجد في التاريخ العائلي اضطراب كهرباء بالمخ.

٣-حدوث التشنج الحراري في اقل من ساعه من ارتفاع درجه الحراره.

🌀ما هي الحالات التي تستدعي عمل رسم مخ ؟

١-لو التشنجات الحرارية طولت واستدعت دخول الطفل العناية المركزة.

٢-لو حصل للطفل تشنجات حرارية أعقبها تشنجات غير مسببة بارتفاع درجه الحراره.

٣-لو حصل تراجع أو تأخر في مهارات الطفل الحركيه
والعصبية.

٤-اي علامه تدل على فحص عصبي ونفسي غير سليم.

🌀ما هي الحالات التي تستدعي عمل اشعه رنين بالمخ ؟

١-التشنجات الحرارية المعقده والطويلة لاحتمال تأثر بعض أجزاء المخ .

٢-الفحص العصبي والتطوري الغير سليم مع وجود وحمات
مرضيه أو مظاهر متلازمة عصبية

🌀متي يجب الذهاب لطبيب أعصاب الاطفال ؟

١-حدوث التشنجات لعمر أقل من سنه.

٢-وجود فحص عصبي غير سليم.

٣-حدوث تراجع وتأخر في القدرات العقلية والحركية للطفل
بعد التشنجات الحرارية.

22/04/2024

التشنجات الحرارية بتمثل رعب لكتير من الامهات ، لازم نبسط ونشرح الموضوع عشان نطمن الامهات ونعرفهم يتصرفوا صح ازاي وامتي نقلق ونعمل تحاليل واشاعات علي المخ 😎

Send a message to learn more

18/04/2024

😂😂😂

09/04/2024

💥💥💥💥تهنئكم عيادة💥💥💥💥

د. عصام حافظ الشرقاوي

💥💥💥بعيد الفطر المبارك 💥💥💥

كل عام وحضراتكم بخير

بداية مواعيد العمل
الأحد..من ٣م الي ١٠م

واتس الطبيب للطوارئ
01270603699

08/04/2024

✅هنتكلم عن مشكلة كبيرة بتقابل امهات كتير و هي ..الامساك عند الاطفال

الامساك من المشاكل الي بتسبب قلق شديد للطفل و الأم 😰

-و في حالات كتير ممكن الطفل يجيلنا بمشاكل خطيرة زي نزيف من فتحه الشرج أو بواسير و كل ده لاننا اتعاملنا غلط مع المشكله ،،

✅تعريف الامساك :
هو ان الطفل بيعمل البراز بصعوبه حتي لو بيعمل كل يومين و لكن خايف و بيجد معاناه يبقي كده امساك .

- و طبعا طبيعه البراز بيبقي ناشف جدا و حجمه ممكن يبقي كبير لدرجه انه يسد التواليت في طفل صغير ،
لان القولون بتاع الطفل بيتمدد و حجمه بيكبر مع طول فتره الامساك

✅ويعد الامساك المزمن من الحالات المنتشرة ،
واهم سبب من اسباب الام البطن المتكرر عند الاطفال

- في حالات سهله التشخيص .. الطفل بيعمل كل فترة طويله والام بتلاحظ وبتيجي تشتكي شكوي صريحه الطفل عنده امساك.

-وفي حالات بتدخل الحمام كل شويه لكن الام مش بتبقي عارفه طبيعة البراز وبيعمل ولا لا, وممكن تكون جايه تشتكي اني بيدخل الحمام كتير علي انه اسهال.
وده حالات بتتوه وحالاتها بتسوء لانها بتتشخص غلط وبتاخد ادوية توقف الاسهال وبالتالي الامساك بيزيد .

- علاج حالات الامساك المزمن بيحتاج فترة طويله والتزام بالعلاج وتوعية لاهمية الالتزام بالادويه والاغذيه الانسب لحالة الطفل

✅ ومنها 👇:

- الماء والسوائل والعصائر والشربة و اللبن من لتر -لترين يومياً.

- الرده ورغيف القمح الكامل والمكرونات والمعجنات
البقوليات. ( فول عدس فاصوليا).

-و من اهم العوامل الألياف 🍏🥬🥝
الالياف الموجوده في الخضار و الفاكهه الطازجه بتفرق كتير جدا في حركه المعده .


د.عصام حافظ الشرقاوي
طبيب الاطفال وحديثي الولادة