https://www.facebook.com/105227248977811/

أخصائية التغذية د/ليلي عبيد nutritionist dr.laila ebaid, El-Mahalla el-Kubra (2025)

30/08/2023

مساء الخير
الناس اللي وزنها فوق 100kg وجربت دايت كتير ومفيش فايدة 😭
ممكن تجرب النظام ده وهيفرق كتير في صحتها علي ضمانتي 😉😉
اول حاجة ودي الاهم نقطع سكر ابيض خالص معلشي نستحمل شوية اكيد صحتنا اهم
ونقطع بيبسي وشيبسي وحلويات وعصاير لانها كلها سكر برده
بلاش فرايد تشيكن او مقليات خالص
لومفيش مشاكل في الركبة او المفاصل التمشية يوميا لمدة ربع ساعة في اليوم🏃‍♀️🏃‍♀️🏃‍♀️🏃‍♀️
والمية كوبايتين مية مع كل صلاة علشان متنسوش المية
نعتمد في اكلنا علي الدهون الصحية زي الزبدة البلدي والسمنة البلدي وزيت الزيتون والزيت الحار والافوكادو والمكسرات 😍😍😍
وكلوا عيش ومكرونة ورز عادي بس هنقلل كميتها لست معالق رز او مكرونة ونص رغيف بلدي
ومتنسوش اهم حاجة البروتين سواء الحيواني او النباتي
زي اللحمة 🥩والفراخ 🍗والسمك والكبدة والجمبري 🍤والبيض 🍳والفول والعدس والحمص واللوبيا والفاصوليا لازم ناخد احتباجنا منها كويس لانها دي اللي بتحافظ علي مستوي العضلات فالحرق يزيد 😍😍
ولو مفيش اي مشاكل او ممنوعات مع الصيام المتقطع هتبقي النتيجة احلي واحلي البنات والسيدات عىوما صيام ١٤ ساعة والرجال ١٦ ساعة عادي انا شارحة في بوست قبل كده كل ما يخص الصيام المتقطع 😍😍😍
انا بكرر تاني في خلال شهر هتلاقوا فرق كبير في الوزن والصحة عموما 🏃‍♀️🏃‍♀️😍😍
دمتم دايما بخير

26/08/2023

ناس كتير بتسأل ايه اللي مسئول عن الحرق في جسمنا 😍😍😍
طبعا فيه كذا هرمون مسئولين عنه وزيادتهم او نقصانهم ممكن تسبب خلل في الحرق 🫣🫣
١-الغدة الدرقية
بتفرز هرمونات بتساعد علي تنظيم النوم والحرق وضربات القلب واي خلل فيهم او قصور بيسبب زيادة الوزن 😉
٢-هرمون الانسولين
اكل الحلويات والسكريات والنشويات بكميات كبيرة بتزود هرمون الانسولين وده المسئول عن تخزين الدهون في الجسم فبيسبب زيادة الوزن 😉
٣-هرمون الكورتيزول
بيتفرز من الغدة الكظرية ومسئول عن تنظيم الطاقة وبيتفرز اثناء التوتر والقلق بكمية اكبر ولو فضلت مستوياته عالية كتير بيبسبب زيادة الوزن علشان كده فيه ناس لما بتزعل تزيد وناس العكس 🙃
٤-هرمون الميلاتونين
بيحافظ علي الساعة البيولوجية ومستوياته بتزيد بالليل وبتقل الصبح
لما بيكون في اعلي مستوياته وقت الليل وقت النوم والراحة بتقل درجة حرارة الجسم فبتساعد في افراز هرمون النمو المسئول عن اصلاح التلف في الجسم وكمان بيساعد في حرق الدهون
علشان كده الناس اللي بتسهر كتير بيحصل معاه في الموضوع ده وبيسبب زيادة الوزن🫣🫣
٥-هرمون الاستروجين
انخفاض الاستروجين بيسبب زيادة في الوزن😊
٦-هرمون التسوستيرون
نقصه او زيادته عند النساء بتسبب زيادة في الوزن علشان جسم النساء بيتأثر باي زيادة او نقصان فيه😅
٧-هرمون اللبتين والجارلين
هرمونات الجوع والشبع واي خلل فيهم بيسبب زيادة في الوزن 😔
دمتم دايما بخير 😍😍😍

20/08/2023

تكيس المبايض 😩
اغلب السيدات دلوقتي للاسف بقت بتشتكي من الموضوع ده 😭
طيب في الاول يعني ايه تكيس المبيض 🧐
بيبقي موجود سماكة في قشرة المبيض ومش بيستجيب للهرمونات المحفزة للمبيض فبتنمو بويضات كتير في كل شهر بدل من واحدة ومش بيوصلوا للحجم المناسب ومش بيحصل حمل
طيب ايه سبب المشكلة دي 🫣🫣
١-ممكن يكون مشكلة في pituitary gland بتفرز هرمون LH وده بيقلل هرمون الاستروجين وفاستجابة المبيض هتبقي غير منتظمة وكمان مسئول عن خروج البويضة في الحويصلات وليه دور في نضج البويضك كمان فلما يزيد كل شوية هتطلع بويضة لحد ما يتملي الكيس 😩😩
ونقص هرمون FSH وده مسئول عن نمو البويضة 🥺
٢-مشكلة في المبيض نفسه ومش بيستجيب للهرمونات
٣-مشكلة في الغدة الكظرية اللي بتفرز الهرمونات الذكرية ودا بيعمل تكيس برده
٤-بعض الادوية زي علاجات الصرع
٥-فعالية مستقبلات الانسولين لانها بتعتمد علي تغذية الجلوكوز للمبيض ودي النقطة اللي تهمنا وخاصة بالتغذية 😂😂
لما بيزيد الوزن هيأثر علي مستقبلات الانسولين وخصوصا المبيض وهيقل (sexhormone binding globulin)SHBG وده بيتفرز من الكبد ومسئول عن حمل الهرمونات في الدم وتواجدها 🥺
وزيادة الانسولين وقلة البروتين اللي بيشيل هرمونات الجنس بتعمل زيادة التستوسيترون وقلة البروجيسترون وحساسية المستقبلات عن السيدات اعلي بكتير من الرجل حتي لو زيادة التستوستيرن مش عالية للاسف 😭😭😭
الاعراض بقي 🫣🫣🫣
١-زيادة هرمون ال leptin هيعمل خلل في تنظيم الدهون فهيعمل زيادة في الوزن
٢-نمو الشعر في اماكن غير مرغوب فيها زي الدقن وتحت الصدر والفخذين
٣-حب الشباب وزيادة دهنية البشرة
٤-تأخر في البريود والتبويض وتاخر الانجاب وممكن يعلي الضغط كمان
٥-ممكن تنزل لبن من غير حمل او رضاعة
٦-ممكن يحصل حمل بس هيبقي ضعيف وهيسقط بعد شهرين علشان البروجسترون قليل للاسف 😔😔
التحاليل نتيجتها بتبقي ايه 🧐🧐
١-زيادة هرمون LH عن FSH
٢-زيادة هرمون البرولاكتين (هرمون اللبن )
٣-زيادة هرمونات الذكورة التستوستيرون
٤-انخفاض حاد للبروجيستيرون
٥-ممكن ارتفاع هرمون الانسولين في 50% من الحالات
وللتاكيد الدكتور بيعمل اشعة فوق صوتية لو لقي 10-12 بويضة قطر الواحدة فيهم 10 ml او اقل يبقي تكيس للاسف 🫣🫣🫣
طيب نيجي بقي للعلاج والجزء الخاص بالتغذية
طبعا لازم نكون متابعين مع الدكتور والعلاج اللي يكتبه بنمشي عليه
طبعا تقليل الوزن هيكون نظام رياضة مع الدايت لانها بتحسن من مقاومة الانسولين كتير وبتحسن من صحة القلب وكل الجسم عموما 😍😍😍
ممكن نبدأ بربع ساعة تمشية يوميا ونزود لحد نص ساعة والكلام ده كله بينفع م البيت عادي اليوتيوب فيه كمية رياضات رهيبة نقدر نعملها في البيت 😍😍😍
وكمان بنستعمل حبوب تحسن من مقاومة الانسولين زي مادة metformin وده موجود في الجلوكوفاج وبدايله وده كورس لمدة ٦ شهور
نيجي بقي للاكل 😍😍😍
فيه انظمة كتير بتنزلكويس في الحالات دي اولهم الكيتو دايت بس انا مبحبوش 😂😂😂
وفيه نظام low carb ده كويس جدا ومفيش منه اعراض سيئة زي الكيتو لان اكيد عارفين ان الكيتو مش بنسحبه مرة واحدة
١-نعتمد علي النشويات المعقدة زي الرز والعيش بردة او الشوفان او الدرة او البرغل او الكينوا دي كلها بتدي احساس بالشبع فترة اطول وكمان غنية بالالياف اللي بتحسن الهضم وبتخرج معاها جزء من الدهون فبتحافظ علي صحة القلب والقولون كمان 😍😍😍
٢-ناخد احتياجنا من البروتين في كل وجبة بناخدها لان ده اللي هيحافظ علي معدل الحرق بتاعنا زي مثلا ربع فرخة او قطعة لحمة بحجم الكف او سمكتين مشويين وسط او قطعتين كبدة
او البروتين النباتي زي الفول والعدس والفاصوليا واللوبيا والحمص
اومعلقتين كبار زبدة فول سوداني وكمان اللوز 😍😍
وكمان الجبنة فيها بروتين نفس كمية اللحوم زي الجبنة القريش والفيتا الطبيعي والموتزريلا نبعد عن الجبن النباتي الدهن ودي هتكلم عليها في بوست تاني ان شاء الله 😍😍😍
٣- ناخد بقي الدهون الصحية زي زيت الزيتون والمكسرات والسمك الغني باوميجا ٣زي السلمون والسردين وكمان السمنة البلدي والزبدة البلدي
٤-نبعد عن المقليات كلها وكمان المعجنات والمخبوزات والبيبسي والشيبسي عارفة ان فيه ناس كتير بتضعف ادامها بس اكيد صحتنا اهم من كل حاجة 😍😍😍😍😍
دمتم دايما بخير ❤️❤️

19/08/2023

ازيكوا عاملين ايه
الناس اللي بتعاني من امساك مزمن وعمل فحوصات كتير ومفيش فايدة
جربوا ماغنسيوم سيترات هيفرق جدا في الموضوع ده لانه بيساعد الامعاء في امتصاص السوايل وبالتالي هيسهل خروج البراز 😩😩
وكمان بيدعم وظيفة العضلات والعظام😍😍
ولو حد بيعاني من التهاب اعصاب بيساعد مع فيتامين ب ١٢ في حل الموضوع ده 😍
بس لازم نستشير الطبيب لو حد بيعاني من التهاب قولون تقرحي او عنده مشاكل في الكلي 😩
وفيه منه اشكال كتيرة وانواع مختلفة في السوق فيه علي هيئة اقراص وفيه اكياس فوارة
والجرعة بتاعته ٢ قرص يوميا او كيس علي نص كوب ماء مرة او مرتين يوميا 😍
دمتم دايما بخير😍😍

23/03/2023

صلاة التراويح 🥰🥰🥰🥰
تعرفوا ان صلاة التراويح بتحرق بمعدل 300-400 سعر حراري يوميا وكمان بتزيد لو رايحين مسجد ابعد مشي 🥰🥰🥰
وده كله ثواب لله وبيساعد كمان في نزول الوزن وتنشيط الدورة الدموية وصحة القلب ❤️❤️❤️
دمتم دايما بخير 🥰🥰

22/03/2023

مرضي السكر والصيام ❤️
طبعا كل دكتور ادري بحالته وهو اللي بيقرر اذا كان يصوم او لا
بس فيه حاجات لازم ناخد بالنا منها
لو السكر اقل من 70 مينفعش تصوم ولو اكتر من 300 برده مينفعش تصوم 🫣🫣🫣
واهم حاجة نتجنب العصاير المسكرة وقت الفطار ونهتم باننا نكسر صيامنا علي ٣ تمرات وكوباية لبن بدل من العصاير التانية ونهتم بالنشويات المعقدة زي الرز والعيش البلدي يعني مثلا ٦ معالق رزاو نص رغيف بلدي او رغيفين سن
والبروتين قطعة لحمة اد الكف او ربع فرخة او ٤ صوابع كفتة او ٢ قطعة كبدة مع طبق السلطة وطبق الخضار المطبوخ
وممكن تاخد قطعة بطيخ مع الفطار او اي نوع فاكهة
واهم حاجة المية ٣ لتر يوميا
السحور
٦ معالق فول او قطعة جبنة قريش او بيضتين وعليهم معلقتين زيت زيتون مع طبق سلطة او خضار وعلبة زبادي
دمتم دايما بخير

22/03/2023

كل سنة وانتوا طيبين يارب دايما تكونوا بخير
رمضان كريم 😍😍
الناس اللي حابة تخس رمضان احسن فرصة بجد لنزول الوزن بس لو استغلينا الموضوع صح 🥰🥰🥰

اول حاجةالسحور 🥰🥰
نهتم فيه بالبروتين والنشويات المعقدة والدهون المفيدة
مثلا ٦ معالق فول او قطعة جبنة قريش او ٣ معالق كبيرة جبنة فيتا وعليهم معلقتين صغيرين زيت زيتون او زيت حار وطبق سلطة او خس او جرجير ونص رغيف عيش بلدي او ٢ رغيف سن
مع علبة الزبادي 🥰🥰
الفطار🥰🥰
نكسر صيامنا علي كوباية لبن مع تلات تمرات ويفضل نصلي المغرب بعدين نرجع نكمل فطارنا
٦ معالق رز او نص رغيف بلدي او ٦ معالق مكرونة
مع قطعة لحمة حجم الكف او ربع فرخة او ٢ قطعة كبدة او بيضتين او ٢ سمك مشوي
مع طبق السلطة الخضراء
او طبق خضار مطبوخ
ولو نفسكوا في البشاميل هيبقي قطعة اد الكف مع طبق السلطة
السناك 🥰🥰
هيبقي ٢ ثمرة فاكهة اي حاجة تحبوها وده بين الفطار والسحور او عصير من غير اضافة سكر

أخصائية التغذية د/ليلي عبيد nutritionist dr.laila ebaid

30/08/2023

26/08/2023

20/08/2023

19/08/2023

23/03/2023

22/03/2023

22/03/2023

Address

Telephone

Website

Alerts

Contact The Practice

Shortcuts

Share

Category