https://www.facebook.com/290510024151659/

Dr.Basma Ayed IBCLC د.بسمة إبراهيم عايد استشاري دولي الرضاعة الطبيعية, El-Mahalla el-Kubra (2025)

19/08/2025

قالها نشفي اللبن ووقفي رضاعة وأصرفي من الصحة 🙄
يا زميلي الفاضل
الصحة وقفت صرف الصناعي وبقى بشروط وفاة الأم أو مرضها بأمراض خطيرة أو توأم والصرف لواحد بس
لما تبقى أم معايا بتعمل إعادة ارضاع وتحارب علشان تزود حليب الث*ي وتيجي حضرتك بكلمة تهدم كل التعب دا وطبعا الأم هتسمع كلامك ما انت دكتور أطفال وأكيد عارف
يا جماعة مفيش لبن بيتصرف في الصحة علشان الأم معندهاش لبن دا كان زمان القرار نزل واتطبق من أكتر من سنة
فحضرتك بدل ما تنصح الأم النصيحة دي انصحها تكمل في اللي بدأناه
ولتقل خيرا أو لتصمت
هلاقيها منين ولا منين أنا من دكاترة الأطفال ولا الجراحة ولا النسا ولا الصيادلة 😁

11/08/2025

#أميرتي ٥
أنواع الإفرازات المهبلية اللي ممكن تظهر مع الأميرة في طفولتها لحد البلوغ: حضرتك دورك كأم تلاحظي لو فيه أي تغيير او ريحة أو افرازات عند البنت مش بس تغيري وتشطفي فركزي في كل نوع لأن العلاج بيفرق

1️⃣أفرازات الأميرة حديثة الولادة👶 ‼️

إفرازات شفافة ولزجه أو مائلة للأبيض زي افرازات الكبار
أو افرازات فيها دم او دم صريح تشوفيه في الحفاضة😱 🩸
دا بسبب هرموناتك بتوصل ليها وهي جنين لسه في بطنك وبعد ما تتولد الهرمونات دي بتقل ويبدأ ينزل الدم والافرازات دي
ودا بنسميه دورة كاذبة لحديثة الولادة😮
👈دا مفيش منه قلق وممكن يستمر من أسبوع لأسبوعين ويختفي بدون أي تدخل او علاج.

2️⃣افرازات بسبب عدوة فطرية‼️
أفرازات تشبه اللبن المجبن أو افرازات بيضا سميكة اما بدون الريحة او ليها ريحة شبه الخميرة او كمكمة
بتكون كتير وتظهر واضحة في غيارتها أو بسيطة يدوب بين الشفرات.

بيكون معاها حكة او البنت هتقولك أن حاجة بتقرصها او لو لسه بيبي هتلاقيها بتبكي وبتحرك جسمها عشان تحاول تهرش
( كمان ممكن البنت تعمل حركة بجسمها وتقولي بتعمل حركة العادة السريه انها تنام على بطنها وتتحرك حركة غريبة قبل ما تقولي انها عادة دوري في البنت وشوفي هل فيه التهاب وسبب للهرش )
بيكون معاها احمرار بسيط معظم الوقت
👈الأعراض { أكلان وهرش وأفرازات بيضا واحمرار بسيط}
👈ودي علاجها بسيط بس الأهم الأهتمام بالتنشيف والتهوية وتلبس قطن واسع ولو بتلبس حفاضة يبقى مقاس كبير.

🚫نوع الافرازات الجاي كان السبب في كتابتي السلسلة لأنه الأخطر
3️⃣افرازات بني أو خضرا معاها ريحة كريهه جدا‼️
أفرازات الجسم الغريب👇
بتظهر اكتر مع البنت لما تبدأ تلعب وتتعرف على جسمها نقدر نقول من سن سنة إلى ٤ سنوات.
الفترة اللي الأولاد بيبلعوا بأي جسم صغير ممكن كمان يحطوا الجسم الصغير دا في أي فتحة في جسمهم زي الأنف او الأذن او الفم أو مع البنات فتحة المهبل😱
(ممكن تحصل مع البنت ذات القدرات الخاصة أصحاب الهمم اللي عندهم مشكلة ذهنيةفي أي فترة عمرية في حياتها )

يعني البنت دخلت جسم غريب زي لعبة صغيرة أو بذرة

ممكن تحصل في عمر أصغر من كدا في عمر الشهور من بقايا الستول لو مش بتنضفي كويس زي ما شرحنا قبل كدا

أوقات بيحصل نزول دم لو الجسم دا كان لعبة واوقات مع أرتفاع في حرارة الجسم
👈الأعراض {أفرازات خضرا أو بني أو دم وريحة كريهه مع أو بدون الم وحرارة }.
👈العلاج إزالة السبب والعلاج حسب شدة الحالة.

4️⃣أفرازات بسبب عدوة بكتيرية ‼️
غالبا بتكون بعد دور عدوى تنفسية او عدوى في الجهاز الهضمي😮
《يعني مثلا إصابة البنوتة بنزلة معوية وإسهال او اصابتها بنزلة شعبية والتهاب في الرئة》
العدوى دي ممكن تنتقل لمنطقة المهبل وتسبب عدوى بكتيرية
👈الأعراض{ أفرازات لونها بيكون اصفر زي الصديد او مائل للأخضر }
👈وعلاجها بيكون مضاد حيوي حسب الحالة وتشخيصها بيتحدد نوع المضاد

5️⃣افرازات شفافة سائلة بدون لون ولا ريحة ‼️
معاها أكلان أو مش معاها
معاها احمرار أو مش معاها
دي بتكون أما بسبب ديدان شرجية او التهابات جلدية من الحفاضة أو حساسية من كريم أو صابون وهنتكلم عن دا في بوست تاني. #بسمات #أميرتي #أمومة

د. بسمة عايد أخصائي النسا والتوليد واستشاري دولي الرضاعة الطبيعية

10/08/2025

#أميرتي ٤
الهرش او الأكلان أو الحكة عند البنوتة😢

⬅️مش بتكلم على الجلد خالص لأن أسبابه وعلاجها مختلف ومحتاج طبيب جلدية
بتكلم عن منطقة الفرج يعني الشفرات وحول المهبل

🚼أعراض الأكلان عند الطفلة اللي لسة مش بتتكلم او مش بتقدر تعبر:
عياط مستمر وتلاقيها بتفرك وترفص برجلها بمحاولة لضم الرجلين على بعض.
او بتدعك جسمها في السرير عشان تحاول تهرش
🚼لو كبيرة شوية هتشاور وتعيط
🚼ولو بتتكلم هتقول ان فيه حاجة بتوجعها
🚼أو تحط أيدها وتهرش فعلا.
ناخد بالنا البنت لبعد سن خمس سنين واحيانا أكبر ممكن متقدرش تعبر عن إحساس الأكلان بتحسه زي ألم أو عدم راحة . وأنتي فاكراها أما بتدلع أو بتلعب

⛔️الأسباب ⁉️
⬅️أما التهابات جلدية
⬅️تحسس من الصابون أحيانا النضافة زيادة عن اللزوم في المنطقة دي بصابون ولوشن ومعطرات تسبب تحسس واحمرار وتهيج جلدي
استحمام البانيو والفقاعات من أشهر الأسباب

⬅️قلة النظافة كمان ممكن تسبب حكة بسبب عدم التشطيف الصح من بقايا البراز ( اقري بوست طريقة التشطيف الصحيحة)
⬅️ ديدان دبوسية ودي بتمشي من الشرج في الخلف للأمام وتعمل هرش ورا وأمام

⬅️ألتهابات فطرية معاها إفرازات بيضا بين الشفرات ( فيه بوست خاص بالأفرازات عند الأطفال )

⬅️التهاب مجرى البول

⬅️في المصيف السبب أما تحسس من كلور حمام السباحة أو دخول رمل للمنطقة وعدم تنضيفها البنت لازم تتشطف فورا بعد السباحة في بحر أو حمام سباحة

⬅️وأخيرا انها تكون مش حكة ولكن لمس للمنطقة للتعرف على جسمها أو أحيانا مشكلة نفسية وتعرضها للتحرش
لكن طبعا لازم نستبعد الأسباب العضوية اللي فوق الأول

👌هتعملي إيه لما تلاقي البنت عندها الأعراض اللي ذكرناها؛

🔸️ أولا تشطفيها بالمية كويس لاستبعاد ان يكون فيه اي بقايا لمناديل او براز مسبب الحكة .
🔸️تنشفي المكان كويس بمناديل
🔸️تشوفي لو فيه أي إفرازات في ملابسها الداخلية.
لو فيه ريحة كريهه
🔸️ وتعمل تحليل بول وبراز وكشف طبعا.

🦸‍♀️خليكي أم واعية قبل ما تقولي البنت بتعمل حركات غريبة أو بتدلع أو بتعمل عادة سرية دوري على السبب الأول

د. بسمة عايد أخصائي النسا والتوليد واستشاري دولي الرضاعة الطبيعية.
# #أميرتي #أمومة #بسمات

08/08/2025

#أميرتي ٣

أميرتك بدأت تدخل التويلت لوحدها 🚽💪
يبقى تعلميها تتشطف وتهتم بنفسها ازاي ،
الروتين دا هتستمر عليه لحد ما تبلغ وهيفرق معاها في حياتها طول عمرها ان شاء الله 😍
ودا الوقت اللي تزرعي فيها انها تثق فيكي وتحكيلك عشان لما تكبر وتحس بأي اعراض غريبة تيجي وتسألك 🥰

🚿هتفهميها تتشطف بماية من الأمام للخلف.
🧻وتنشف بالمنديل الامام الاول ثم الخلف( مش تمسح من ورا للأمام لانه اسهل ).

🩲تغير قبل ما تنام كل يوم وفي الصيف تغير مرتين
غيارتها تبقى قطن واسعة رقم او اتنين

🩳لو جسمها زايد شوية نلبسها شورت قطن ( هاف قطن ) علشان نمنع احتكاك الفخذين والاسمرار .

👈بدايه منع الأسمرار من الطفولة عشان متجيش وهي عروسة تدوري على جلسات تفتيح.

🚫ممنوع اي غسول مهبلي او صابون لحد سن البلوغ

ولو قعدت في بانيو 🛁فيه صابون تتشطف بالماية كويس أوي.

تفهميها أن أي حاجة تضايقها في المنطقة دي تحكيلك عشان تعالجي أي التهاب بدري.

🦸‍♀️مهمتك كأم :
👀تدوري في غيارتها قبل ما تغسلي تشوفي فيه اي لون او ريحة غريبه.
🩲غيارتها يا ريت تتغسل لوحدها بماية سخنة وتتشطف اكتر من مرة من بقايا المسحوق ، وبلاش منعم الاقمشة .
واي غيارات جديدة تتغسل قبل لبسها.

👀لاحظي لو البنت بتهرش في المكان كتير او بتشتكي من
مشكلة وقت التبول.
اي شكوى مهما كانت صغيرة تكشفي وتعالجي صح .
بلاش شغل حطي زيت طبيخ لما تتسلخي دا 😶😡

☺️الأم الخجولة بتضر بنتها احذري تكوني أم خجولة 💕
منشن لصاحبتك اللي عندها بنوتة من عمر سنتين لحد عشر سنين او البلوغ

د. بسمة عايد أخصائي النسا والتوليد واستشاري دولي الرضاعة الطبيعية

#أمومة #
#بسمات #أميرتي

06/08/2025

#أميرتي ٢
دلوقت معادنا مع الأميرة من حديث الولادة لحد ما تتعلم تدخل الحمام لوحدها❤️

بنهتم في فترة الحفاض ليه🤔
دا لان الحفاض بيعرض المنطقة الأمامية أكتر للبراز وان أميرتنا الصغيرة في أول شهور بيكون البراز سايل وسهل يدخل إلى منطقة الفرج ( الشفرات والمهبل)😱

👈الغسيل هيكون بماية بمساعدة قطنة وماء دافي لو الاتساخ بين الشفرات صعب يزال بالماء بس

هتقولي والريحة😷 لازم صابون😡 دا بقى موضوعنا
❌️⛔️الصابون ممنوع في منطقة الفرج في طول حياة البنت لحد ما تبلغ.

ممكن تغسلي بيه الجلد حول المكان لكن المنطقة دي بالذات تجنبي الصابون فيها او اشطفيها كويس جدا.
ويكون صابون طبي مخصص للاطفال 🧼
👈دا لأن المنطقة دي معرضة لحدوث جفاف وأحمرار وتهيج من الصابون 👈(Saop vulvitis)

⛔️❌️كمان ممنوع تقعد فترة طويلة في بانيو او حمام مائي فيه صابون او اي نوع شامبو او غسول.
🛁لو بانيو يبقى ماية دافية وبس من غير اي إضافات ولا غسول مهبلي ولا ديتول ولا شامبو ولا شاور حتى بدال هتقعد وتلعب يبقى ماية وبس.

وتكملي بنفس التعليمات 👇
🔸️الغسيل من الامام للخلف.
🔸️التنشيف فوطة خاص بالمكان دا بس وتتغير كل يوم
وتتعرض للشمس التنشيف بالطبطبة.
🔸️غسيل ايدك قبل التشطيف مهم جدا.
🔸️ممنوع ترك الحفاض فترة طويلة متسخ.
🔸️ممنوع بودرة الاطفال ولا بنات ولا أولاد.
🔸️ممنوع الديتول حتى للكبار.( الديتول مطهر اسطح وأرضيات ممنوع يستخدم على الجسم )
🔸️ممنوع الغسول المهبلي.

المرة الجاية هنتكلم عن الافرازات اللي ممكن تشوفيها مع الأميرة وايه أخطر افرازات تجري تكشفي لو شوفتيها
تابعي باقي السلسلة ومنشن لصاحبتك اللي معاها بنوتة 🥰

لينك البنوتة حديثة الولادة وطريقة التشطيف
https://www.facebook.com/share/176qXGngvJ/
د. بسمة عايد
أخصائي النسا والتوليد واستشاري دولي الرضاعة الطبيعية

#أميرتي
#أمومة
#بسمات

04/08/2025

وصلتي شهرك الكام 😍😍🤩🤩🤩

03/08/2025

#أميرتي
هنبدأ بالأميرة حديثة الولادة 💕💕

طريقة التشطيف👈 لازم كل مرة غيار للحفاض وخصوصا البراز تغسلي كويس بالماية وتتأكدي من إزالة اي بواقي للبراز في المكان وتغسلي بين ثنيات وشفرات المنطقة الأمامية.

👈والتنشيف فوطة قطن او مناديل طبطبة مش دعك من الأمام للخلف. ويفضل المناديل.

👈يفضل اول اسبوعين الغسيل بماء فقط خصوصا المنطقة الأمامية. )هنعرف بعد كدا ان الصابون ممكن يعمل التهابات تحسسية للسن دا).

👈والترطيب بكريم حفاض مناسب هتدهني المكان كامل بطبقة خفيفة من الكريم. لعمل عازل بين الجلد والفضلات.
......انتي يا اللي بتخافي تغسلي للبنت من الأمام شايفاكي وعارفاكي😅 اغسلي للبنت كويس ما تخافيش مش هيحصلها حاجة المكان متأمن متخافيش😉😁
(غشاء البكارة في الاطفال على عمق يعني صعب ايدك توصله )

👈هتغسلي بماء فقط ممكن تستعيني بالقطن المبلل لضمان تنضيف وازالة اي براز.
نهتم ننضف بين الشفرات وأي ثنيات من أي بقايا براز أو كريم أستخدام القطن المبلل في المرحلة دي هيساعدك كتير وهيكون أحن على جلدها الرقيق.

👈الغسيل والتنشيف من الامام للخلف دايما.
👈 تخصيص فوطة لتغير الحفاض مع تغييرها يوميا وغسلها أول بأول وتعريضها للشمس عند تجفيفها،
أو مناديل وهي الأفضل
والحرص على ألا تكون المنطقة مبللة أبداً.

⛔️❌️ممنووووووع استخدام المناديل المبللة المعطرة حتى لو مكتوب مناسب للاطفال ولو استخدمتيها طوارئ خارج البيت تشطفيها أول ما ترجعي بالماء.

⛔️لازم ايدك تكون نضيفة تماما قبل ما تلمسيها. مينفعش تكوني بتنضفي وايدك فيها تراب او بتطبخي وتقولي ما كدا كدا هغسلها مينفعش لان ايدك أول مكان بتلمسه هو الامام ودا ممكن يدخل ميكروبات.

⛔️ ممنوع تتركي الحفاض فترة طويلة حتى لا تحدث الإلتهابات بسبب تراكم البراز وتحركه إلى داخل المهبل ناقلا الميكروبات.

💕💕البنات تحتاج نضافة أكثر تكرارا وأكثر حذر من الأولاد لسهولة اصابتها بالتهاب مجرى البول . الولد ممكن يجيله التهاب حفاض لكن البنت هيجيلها التهاب حفاض والتهاب في مجرى البول.

تابعي باقي السلسلة ومنشن لصاحبتك اللي هتشرفها أميرة في البيت عن قريب❤️❤️

د. بسمة عايد
أخصائي النسا والتوليد واستشاري دولي الرضاعة الطبيعية.
#أمومة #بسمات
#أميرتي

02/08/2025

الأمومة مش أكل وشرب
مشهد كريمة وهي مستعدة لمرحلة جديدة في حياتها
أنا عارفة أن كتير منكم ضد المشهد دا وخصوصا مجتمع الرجال😁 شايفين أن المنصة اللي عرضت المسلسل دا أسلوبها وأن دا مشهد ميصحش يتعرض وما يقولوا وخلاص أن البنت كبرت بدون مسميات وجرأة وبلا بلا بلا
مع أني ضد المنصة وأنها أغلب الوقت دس السم في العسل لكن أنا مش معاكم المرة دي انتو بس اللي متعودتوش تسمعوها صريحة أمهاتكم كانوا مكسوفين من نفسهم زوجاتكم واخواتكم البنات كان عندهم حرج من كونها أنثى ازاي يتذكر في التلفزيون على مسامع أطفالنا لفظ زي بريود كدا بكل بجاحة 🤐
ونسيتم أنه ذكر في القرآن اللي بتحفظوه لأولادكم ( محيض ) وافتكر أن نفس الناس دي لما ابنه يسأله تفسير الآية ...( وَيَسْأَلُونَكَ عَنِ الْمَحِيضِ ۖ قُلْ هُوَ أَذًى فَاعْتَزِلُوا النِّسَاءَ فِي الْمَحِيضِ ۖ وَلَا تَقْرَبُوهُنَّ حَتَّىٰ يَطْهُرْنَ ۖ فَإِذَا تَطَهَّرْنَ فَأْتُوهُنَّ مِنْ حَيْثُ أَمَرَكُمُ اللَّهُ ۚ إِنَّ اللَّهَ يُحِبُّ التَّوَّابِينَ وَيُحِبُّ الْمُتَطَهِّرِينَ ).. هيهرب من السؤال ويتصبب عرقا واحتمال كمان يزعق لابنه علشان سأله سؤال محرج هو في الحقيقة مش محرج الاحراج الحقيقي عقولكم اللي تصورت ان جزأ من المرأة وكونها أنثى عيب نذكره أو ننوه عنه
الحياء مهم طبعا مقولتش البنت تمشي في الشارع تذكر الأمر للمارة لكن على الأقل لو باباها سألها مش بتصلي ليه النهاردة ترد عليه بدون كسوف
وهنا لم أذكر شئ عن ما يسمى التربية الجنسية🙂 علشان محدش يفهم الكلام غلط هنا بتكلم عن ان البنت تفهم جسمها وتكون مستعدة وفخورة بخلق الله

طولت عليكم بس حبيت أوضح وجهة النظر والمقابل ليها
نرجع لكريمة أو هنسميها في سلسلتنا أميرة 👸
عرفنا أن الأمومة مش أنك تطبخي وتنظفي وتغسلي وتنزلي مدارس الأمومة تكوني مدرسة أم كما اطلقوا عليها الأم مدرسة
تبدأ حكاية أميرة وكل بنوتة وهي لسه بيبي ازاي تهتم بنضافتها وانوثتها
لو عايزة بنوتك تكون أنثى فخورة بما خلقه الله تابعي معايا الكاتلوج كتالوج تربية بنوتة
بس المرة دي هنسميه أميرتي مش كتالوج بسمة 😅😅
لأن كل بنوتة هي أميرة بيت أبوها
#أميرتي
#بسمات

#أمومة

31/07/2025

مش أنا دكتورة نسا أنا بقا بقولكم الث*ي ملوش أي علاقة بالنسا لما الث*ي يكون فيه مشكلة أغلبكم بيجري تكشف مع دكتور النسا اللي للأسف بيدي علاج بدل ما يحول الحالة لمختص ⬅️(لزمايلي دكاترة النسا عيني في عينك كدا درست ايه في النسا متعلق بالث*ي إلا قشور علشان تحول الحالة)
نيجي ليا أنا أنا كنت زيهم بدوس واتكلم عن الرضاعة دا لحد لما درست البورد الدولي في الرضاعة وعرفت أني كنت بعك حرفيا كنت زي كل دكاترة النسا بقول للأم ترطب قبل الولادة😁 وكنت بعالج تشققات النبل وكنت وكنت ...... 🤱لو انتي بترضعي مشكلتك مع استشاري رضاعة
لو انتي مش بترضعي أو آنسة مشكلتك مع جراح ويا ريت يكون جراحة أورام ث*ي
محدش يزعل من الحقيقة
#بسمات

21/07/2025

طلبت من الأمهات على جروب التليجرام يحكوا تجربتهم لإعطاء الأمل لغيرهم جاتلي الرسالة الجميلة دي
ربنا يجعلني سبب في راحة وسعادة ام وطفلها الحمد لله 🥰🥰🥰🥰🥰🥰🥰🥰🥰🥰
أنا مشكلتى بنتى عندها حساسية ألبان وكمان مش بتزيد في
الوزن بالعكس بتقل بشكل ملحوظ ودا كمان مع الترجيع المستمر
من أول يوم كنت مقررة أنى أرضع طبيعي بسبب فؤايدة وكمان لأن الحاجه الربانية أفضل كتير
بس مع الأسف الشديد من أول يوم وكل اللى حوليا بتكلم عن أنى لازم أرضع صناعي طبعاً من اللى بيشفوا منه من زيادة في الوزن والنفخ والله المستعان وصل الأمر لدرجة صعبه جدا وبدأت المقارنات العائلية الغير منتهية إلى الآن صراحه
لأن كمان بنتى كانت بتنزل في الوزن وطلع كمان عندها حساسية ألبان ودخنا بيها حرفياً
وكنت حاسة أنى بحارب لوحدى ووصل الأمر أنى حسيت أنى بتعب نفسي على الفاضي وطبعاً مع التشققات وتعبي وغير كمان النفسية أصبحت في الدمار
دكتور الأطفال اللى قالى بنتك مش بتستفاد ودخل صناعي بشكل أساسي
حرفياً كنت منهارة ومش احسن حاجه وطبعاً مع كل الضغط دا اللبن قل جداً بشكل مش طبيعي
وكنت رايحة للدكتورة بسمة ربنا يباركلها بقدم رجل وبأخر التانية خصوصاً أنى داخليا كنت مقررة خلاص هوقف على الأقل انا هرتاح من كمية الوجع والألم اللى كنت فيه رحت كمحاولة أخيرة منى
ومن أول ما شفتنى قالتلى أنى أستحملت كتير وأتكلمت معايا كتير
وكانت سبب أساسي أنى إكمل واصبر وأن اللبن بتاعى أفضل من مليون لبن صناعي
وخصوصاً ساعدتنى
وكانت معايا على الواتس وحالتى كمان صعبه لان بنتى بتلتهب ث*ي وكان الأمر لا يحتمل بشتى الطرق
لحد الحمد لله ربنا عانى وحاولت معاها وكملت وصبرتنى كتير
جزاها الله عنا خيراً

21/07/2025

النصايح الطبيه على النت بقت شئ غريب
ماشي الفتي مقبول من غير الأطباء اهو بيحاول يعلي الريتش لكن لما يكون من طبيب فالمفروض أنك ثقة للمريض
يعني أيه دكتورة تكتب جرعة دوا لزيادة الإدرار في كابشن الفديو
دوا بديه بحذر وتاريخ مرضي للأم وأحيانا رسم قلب
دوا لو اتاخد بجرعة غلط ينشف لبن الأم تماما
للأمهات الجميلات بلاش ناخد نصيحة للرضاعة إلا من استشاري دولي رضاعة ونحط مليون خط تحت كلمة دولي او
IBCLC
وأنا أسفة لزمايلي أني بقول كدا لكن دا من اللي شوفته من مشاكل للأمهات او يأس بسبب نصيحة غلط حضرتك دارس النصيحة اديها للأم مش دارسها أعمل تحويل
وافتكر الامهات معايا عارفين اني مش بتدخل الا في الرضاعة والنسا فقط ولو خارج تخصصي بحول الأم للمختص حتى لو عارفة العلاج

Dr.Basma Ayed IBCLC د.بسمة إبراهيم عايد استشاري دولي الرضاعة الطبيعية

19/08/2025

11/08/2025

10/08/2025

08/08/2025

06/08/2025

04/08/2025

03/08/2025

02/08/2025

31/07/2025

21/07/2025

21/07/2025

Address

Telephone

Website

Alerts

Shortcuts

Share

Category