19/09/2025
دوالى الأحبال الصوتية
vocal folds vascular ectasia & vaicosities
************************
كلنا نعرف أو سمعنا عن دوالى المرىء ..... أو دوالى الرجلين
لكن كتير مننا أول مرة يسمع عن دوالى الأحبال الصوتية
المشكلة دى بتصيب الناس اللى بتسىء إستخدام صوتها
يعنى الناس اللى بتزعق و تصرخ و صوتها عالى أغلب الوقت
أو "ممتهنى الأداء الصوتى " أو البروفيشنال
يعنى أصحاب المهن القائمة على إستخدام الصوت
زى المغنى - المذيع - مقرىء القرأن- البائع المتجول
الناس دول بيحصل لهم أن الشعيرات الدموية الصغيرة جدا - الدقيقة جدا
اللى على سطح الحبل الصوتى
بتتمدد و تتورم و تتحول إلى شبكة من القنوات الدموية
المشكلة دى فى حد ذاتها كافية
إنها تسبب بحة و تغيير فى الصوت
و الشكوى الأساسية عند الشخص ... و خاصة الشخص البروفيشنال
حتكون أنه فيه طبقات معينة من صوته مش قادر يجيبها مستريح
أو مش قادر يوصل لها زى زمان
إذا لم يتم معالجة هذه المشكلة
الدوالى دى ممكن تنفجر
دوالى المرىء لما تنفجر تعمل نزيف و قىء دموى
( زى ما كان بيحصل لعبد الحليم حافظ الله يرحمه )
لكن دوالى الأحبال الصوتية لما تنفجر
الدم بيتجمع تحط سطح الحبل الصوتى
و بيعمل وحمة دموية ... ممكن الوحمة الدموية دى تكبر
و تتحول مع الوقت إلى "لحمية دموية"
ساعتها الصوت بيسوء تماما
و يبقبى فيه بحة شديدية و لا يستطيع معه الشخص أداء عمله نهائيا
علاج المشكلة دى على حسب
أحنا شوفنا المريض إمتى
لو لسة فى بداية المشكلة
ممكن الراحة التامة للصوت و العلاج الدوائى و تدريبات التخاطب تعالج المشكلة
لكن لو الموضوع متأخر و فيه لحمية دموية
لابد من التدخل الجراحى
و العملية بتبقى إستئصال اللحمية الدموية بالمنظار و الميكروسكوب الجراحى و ألات الحنجرة الدقيقة
تحت المخدر الكلى
العملية نفسها عملية دقيقة و محتاجة مهارة و خبرة
لكن اللى بيغفله حتى كتير من الدكاترة المهرة اللى بيعملوا النوع دة من العمليات
أن لو تم إستئصال اللحمية الدموية فقط بدون "كى " الدوالى
اللحمية ممكن ترجع تانى بسهولة
ببساطة كدة
اللحمية دى ... حوض مليان دم
و الدوالى ... هى الماسورة اللى بتوصل الدم للحوض دة
لو شيلنا الدم من الحوض و الماسورة لسة مفتوحة ... الحوض سيمتلأ مرة أخرى
الطريقة الأمثل للتعامل مع دوالى الحبل الصوتى
بتكون بالليزر
in defocused mode
لكن لأن الليزر للأسف غير متواجد فى 99 % من المستشفيات
و لو موجود ... إستخدامه غالى و أعطاله كتير
العبد لله أبتكر طريقة جديدة للتعامل مع دوالى الحبل الصوتى
هى طريقة محتاجة مهارة و دقة عالية جدا ...جدا
أنت محتاج تشرح الدوالى ... اللى أدق من الشعرة
من على سطح الحبل الصوتى ... اللى أقل من المللى
و تممر تحتها قطنة مبللة بمحلول ملح
لحماية نسيج الحبل الصوتى
ثم تقوم بكى الدوالى بلسعة صغيرة ... سريعة من جهاز التردد الحرارى
بإستخدام إبرة أحادية القطب ... رفيعة جدا
الطريقة دى أنا أستخدمتها عدة مرات
و شايف نتائجها ممتازة
و طبعا لأان أنا اللى أبتكرتها
فأنا قررت أبقى أنانى و أسميها بأسمى
طريقة دكتور TA7
(اللى هو إختصار أسمى بالإنجليزى Tarek Abdel Fatta7)
أتمنى تعجبكم
